Ko Te Faleako ʼo Te Sosiete Watchtower—ʼE Ina Fekauʼi Te Kau Misionea
KO TE Faleako Faka Tohi-Tapu ʼo Kalaate ʼo te Sosiete Watchtower, neʼe ina fakatuʼutuʼu te ʼu kalasi ʼi te ʼu potu kehekehe. ʼI te vaha ʼo te taʼu 1943 ʼo aʼu ki te taʼu 1960, neʼe fai te ʼu kalasi e 35 ʼi te ʼu fale ʼo South Lansing, ʼi New York, ʼi Amelika, neʼe faʼufaʼu te ʼu kalasi ʼaia e te kau ako neʼe ʼōmai mai te ʼu fenua e 95, pea neʼe nātou ako te ʼu meʼa makehe. Pea neʼe hiki te faleako ki te fale lahi ʼi Brooklyn, ʼi New York, pea neʼe tuʼu ʼi ai ia taʼu e 28. Talu mai te taʼu 1988 ʼo aʼu ki te kamataʼaga ʼo te taʼu 1995, ko te Faleako ʼo Kalaate neʼe fai ʼi Wallkill, ʼi New York.
ʼI te lolotoga ʼo te ʼu taʼu ʼaia, neʼe faka laulahi te ʼu fealagia ʼo te faleako ʼaia. ʼAki te takitaki ʼa te Faleako ʼo Kalaate, neʼe fakatuʼutuʼu te ako ʼo te ʼu kalasi e tolu neʼe fai ʼi Mekesike; ko te ʼu kalasi feiā e nima neʼe fai ʼi Siamani; ko te ʼu kalasi e tolu ʼi Initia. Talu mai te taʼu 1987 neʼe fakatuʼutuʼu te tahi ako, ko te Ako faʼufaʼu faka minisitelio, neʼe fai ʼi te ʼu fenua e 34, pea ko te ako makehe ʼaia ʼe fai ʼi te ʼu vāhaʼa ʼe valu, ʼo ina akoʼi te kau tūpulaga ʼaē ʼe nātou maʼu te ʼu fealagia ʼaē ke nātou kau ki te ako ʼaia. Kae ko te ako ʼaē neʼe foaki ki te 99 kalasi ʼo Kalaate ʼi te ʼu fale foʼou ʼo Patterson ʼi New York, ʼi te Faleako ʼo Te Sosiete Watchtower, neʼe fai lolotoga te ʼu vāhaʼa e 20. ʼI te tahi vāhaʼa neʼe nātou ako te Tohi-Tapu katoa, te hisitolia pea mo te kautahi ʼa te kau Fakamoʼoni ʼa Sehova ʼi te temi ʼaenī, pea mo te ʼu tokoni kehekehe ʼo ʼuhiga mo te gāue faka misionea ʼi te ʼu fenua kehe.
ʼI te ʼaho 2 ʼo Sepetepeli, neʼe foaki ki te 99 kalasi tonatou ʼu pepa faka misionea. Ko te polokalama ʼaia neʼe foaki ai tonatou ʼu pepa faka misionea, neʼe fai ia hola e tolu, ʼi te fale foʼou ʼo te Faleako ʼo te Sosiete Watchtower. Neʼe fonu ʼaupito te fale. Neʼe kau ki te fakatahi ʼaia, ia nātou ʼaē ʼe gāue ʼi te Petele ʼo Patterson, mo nātou ʼaē ʼe gāue ʼi Wallkill, pea mo nātou ʼaē ʼe gāue ʼi Brooklyn, ʼo nātou mulimuli ʼi te televisio. Neʼe ko he ʼaho fakafiafia ʼaia ki te kau misionea, mo tonatou ʼu famili pea mo tonatou ʼu kaumeʼa, ʼo feiā ai foki ki te lauʼi teau hahaʼi gāue ʼaē neʼe kau ki te laga ʼo te ʼu fale foʼou ʼo te faleako, ʼaē neʼe fakaafe kiai ʼi te ʼaho ʼaia.
ʼI te ʼu ʼuluaki palalau ʼa Carey Barber ʼo te Kolesi Pule, neʼe ina fakatokagaʼi ia te maʼuhiga ʼo te ʼaho ʼaia. Neʼe ina ʼui fēnei: “Ko te koga meʼa ʼaenī kua liliu ko te tafitoʼaga ʼo te ako fakaʼatua lahi ʼaē ʼe fai ʼi te kele nei.” Neʼe ina fakamahino kua tou fakaōvi ki te ikuʼaga ʼo te tau ʼa te hāko ʼo te fafine pea mo te hāko ʼo te gata. (Senesi 3:15) Neʼe ina fakahā ai, ʼe gata pe kia nātou ʼaē ʼe nātou maʼu te ʼatamai mālama ʼo ʼuhiga mo te Folafola ʼa te ʼAtua pea mo nātou maʼuliʼi, ʼe nātou maʼuʼuli anai ʼi te tau fakamataku ʼaia ʼi te lolotoga ʼo te mamahi lahi ʼaē ka hoko mai.
Neʼe ina ʼui fēnei, “ko tatatou polokalama ako foʼou, neʼe fakatuʼutuʼu moʼo faka fealagia ki te hahaʼi ʼa Sehova ʼi te potu fuli pe, ke nātou maʼu te aga fakapotopoto ʼaē ʼe talanoa kiai ia Tāʼaga Lea 1:1-4—ke nātou ʼiloʼi te poto pea mo te akonaki, ke feala hanatou maʼu te fakasiosio poto, ke nātou maʼu te ako ʼaē ʼe nātou maʼu ai te fakasiosio tonu, te faitotonu, te faifakamāu, te agatonu, pea ke nātou maʼu te ʼu fealagia ʼo te fakakaukau.” ʼE fakatupu hāofaki tatatou maʼu te ʼu faʼahiga koloā fakalaumālie ʼaia!
Te ʼu Tokoni Ki Te Kau Misionea
Neʼe hoa atu ki tana ʼu ʼuluaki palalau te ʼu akonaki fakanounou e nima neʼe fai tāfito ki te kau misionea. Ko Harold Jackson, ʼaē neʼe ko te tagata faiako ʼo Kalaate ʼi muʼa atu, pea kua kau ʼi temi nei ʼi te kūtuga ʼi te fale lahi ʼi Brooklyn, neʼe ina fakaloto mālohiʼi te kalasi, ʼaki te kupu tāfito ʼaenī “Ke Koutou Feʼauga ʼi Te ʼu Meʼa ʼAē Kua Koutou Maʼu.” Ko Lloyd Barry, ko te misionea ʼāfea pea kua kau nei ʼi te Kolesi Pule, neʼe talanoa ki te kupu tāfito ʼaenī “Tou Kaugana Kia Sehova ʼAki Te Agavaivai.” Neʼe ina fakamahino ko te kalitate ʼaia ʼe maʼuhiga ki te kau misionea ʼi te ʼu koga meʼa foʼou ʼaē ʼe nātou ʼolo kiai, ke nātou fakamāmāhani ki te ʼu ʼaluʼaga foʼou ʼi tanatou ʼu felogoi ʼaē mo tonatou ʼu kaugā fagona misionea, mo te ʼu kokelekasio ʼaē ʼe nātou gāue ai, pea mo te hahaʼi ʼo te telituale.
Ko Karl Adams, ʼaē ʼe gāue ʼi te Faleako ʼo Kalaate, neʼe ina fai te fehuʼi ʼaenī ke fakakaukauʼi e te kalasi “Koteā Te Meʼa ʼAē Ka Uga Koutou e Takotou Tui Ke Koutou Fai?” Neʼe ina fakaloto mālohiʼi ia nātou ke ʼaua naʼa nātou hage ko te kau Iselaelite ʼaē neʼe meo ʼo ʼuhiga mo te ʼu ʼaluʼaga ʼo tonatou maʼuli ʼi te toafa, pea neʼe nātou fia liliu ki Esipito, kae ke nātou hage ko Apalahamo, ʼaē neʼe ina tokagaʼi te Puleʼaga ʼo te ʼAtua ohage ko te puleʼaki pe ʼaia e tahi ʼo te ʼu fihifihia, kae neʼe mole ina fakatuʼutuʼu ke toe liliu ia ki Ule ʼi Kalitia. (Ekesote 16:2, 3; Hepeleo 11:10, 15, 16) Ko Ulysses Glass, te sikalaipe ʼo te faleako, neʼe ina fakaʼaogaʼi te hisitolia ʼo Asafe, ohage ko tona fakamatala ʼaē ia Pesalemo 73, moʼo fakaloto mālohiʼi ʼo te kau misionea, ʼaki te kupu tāfito ʼaenī, “Koutou Toe Vakaʼi Te ʼu Tapuakina ʼAē ʼe Foaki Atu Kia Koutou.” Pea ko Albert Schroeder, ʼaē ʼe kau ki te Komite ʼo te Ako ʼo te Kolesi Pule, neʼe talanoa ki te kupu tāfito ʼaenī “ ʼE Foaki e Sehova.” Moʼo fakamoʼoni ʼo te manatu ʼaia, neʼe talanoa ki te Faleako ʼo Kalaate pea mo tana gāue ʼaē ʼi te fakahoko ʼo te fai faka mafola pea mo te fai ʼo te ʼu tisipulo.
Ki muli age neʼe fakalogo lelei ia nātou ʼaē ʼi te fono ki te akonaki ʼaē neʼe fai e Milton Henschel, te pelesita ʼo te Sosiete Watch Tower, ʼaē neʼe palalau ʼo ʼuhiga mo te kupu tāfito ʼaenī “Ko Te Hahaʼi ʼe Nātou Felogoi Lelei.” Neʼe ina lau pea mo fakamatalatala fakalelei ia Loma kapite 12. ʼI te ʼu meʼa ʼaia, neʼe ina ʼui fēnei: “ ʼE tonu ke tou manatuʼi ʼe tou felogoi lelei mo ʼotatou ʼu kaugā fagona ʼo te kokelekasio.” Neʼe ina toe ʼui fēnei: “ ʼE ko he meʼa lelei tuʼumaʼu tatatou tokagaʼi ʼihi ohage ko he koloā ʼa Sehova, pea ke ʼaua naʼa tou gutu fatufatu, peʼe tou faiga ke tou ʼiloʼi tanatou ʼu hala, kae ʼe tonu ke tou fetokoniʼaki tuʼumaʼu. Ke tou tokakaga ʼo taupau maʼu tatatou logo tahi ʼi te kokelekasio faka Kilisitiano.” Neʼe ina fakahā ko te taʼi fetokoniʼaki ʼaia ʼe feala ke hā ʼi te ʼu ʼapi ʼo te ʼu misionea mokā teuteuʼi te meʼa kai, ke nātou manatuʼi ʼe mole tatau te ʼu meʼa ʼaē ʼe nātou fia kakai kiai. Neʼe ina toe fakaloto mālohiʼi nātou ke nātou tokoni ki ʼonatou ʼu kaugā fagona mokā ʼe nātou fai faka mafola mo nātou, kaʼe ʼaua naʼa nātou fatufatuʼi ia nātou, mo kapau ʼe nātou māsisiva. Kapau ʼe tou fetokoniʼaki moʼoni, ʼo tou fakaloto mālohiʼi niʼihi, neʼe fakahā fēnei e te tēhina ko Henschel, “ ʼE ʼofa anai ia Sehova kia tatou ʼuhi ko te ʼu meʼa ʼaia.” ʼE ko he tokoni fakaloto mālohi ki te kau misionea ʼaē ka ʼolo ʼo gāue ʼi te ʼu fenua ʼaia, heʼe kehekehe te aga ʼo te ʼu fenua ʼaia mo te aga ʼo te ʼu fenua ʼaē neʼe nātou nonofo ai!
Tou Feʼiloʼiʼaki Muʼa Mo Te Kalasi ʼo Te Kau Misionea
Ko te toko 48 kau misionea ʼo te 99 kalasi, ʼe nātou taʼu 32 pea ʼe kua taʼu 11 tanatou kau ki te gāue pionie katoa.
Ko te ʼu fakafehuʼi ʼaē neʼe fai ʼi te polokalama ʼo te kau misionea neʼe faka fealagia ai ki te hahaʼi ʼaē neʼe kau ki te fakatahi ke nātou feʼiloʼiʼaki mo ʼihi ʼi te kau misionea ʼaia. Neʼe fakamatala e Nikki Liebl, mai Amelika pea mo Simon Bolton, mai Siamani te ʼu meʼa neʼe ʼahiʼahiʼi ai tanā tui pea neʼe nā sio ai neʼe foaki e Sehova te ʼu meʼa ʼaē ʼe ʼaoga kia nāua ʼi te faʼahi fakasino. Neʼe nā ʼiloʼi ai ʼe tokaga ia Sehova kia nātou ʼaē ʼe nātou fakamuʼamuʼa te minisitelio.
Ko Isabelle Kazan, ʼe haʼu mai Falani, neʼe ina ako te lea faka Alape ke feala ai hana fai faka mafola ki te kau alape ʼaē ʼi tona fenua. ʼI tana kamata ako te lea ʼaia ʼi te taʼu 1987, ko te kiʼi kūtuga ʼaē ʼe kau ʼi te lea faka Alape ʼi Palesi, neʼe faʼufaʼu e te ʼu tēhina e toko fā ʼe palalau ʼi te lea faka Alape, mo ia pea mo te tahi tuagaʼane ʼe ina ako te lea ʼaia. (Neʼe mole faigafua te ako ʼo te lea ʼaia. Neʼe nā fakaʼaogaʼi te ʼu hola e valu ʼi te vāhaʼa fuli moʼo teuteuʼi tanā Tule Leʼo, ke feala he fai ʼo hanā ʼu tali.) Neʼe ʼi ai koa he ʼu fua ʼo te ʼu faiga ʼaia? ʼE mahino ia, heʼe kua ʼi ai te kau Fakamoʼoni ʼi te lea faka Alape ʼe nātou faʼufaʼu te ʼu silikosikilipisio e nima ʼi Falani. Ko Miko Puro ko te tahi misionea, neʼe ina fakamatala neʼe ʼaoga kia ia te lea faka Falani ʼaē neʼe ina ako ʼi te faleako, he neʼe feala ai tana fai faka mafola ki te kau Afelika ʼaē ʼi tona fenua ko Finilani, pea ʼe toe ʼaoga anai kia ia ʼi tana gāue faka misionea ʼi Penine. Ko Bonny Bowes neʼe ina fakamatala tana ako ʼaē ke poto lelei ʼi te lea faka Falani ke feala hana gāue fakalelei ʼi Québec, Kanata. Pea ko Bjarki Rasmussen, mai Tanemaka, neʼe ina fakamatala pe neʼe feafeaʼi tana fai faka mafola mo tona ʼohoana lolotoga ni ʼu taʼu ʼi te ʼu motu ʼo Féroé. ʼIo, Ko te ʼu misionea foʼou ʼaia ʼe ko he ʼu minisi katoa kua māhani ʼi te fai faka mafola.
Neʼe hinoʼi te kau misionea ki te ʼu fenua e 19—ki Afelika, ʼi te lotomalie pea mo te Potu Toga ʼo Amelika, ʼi te Potu Hahake ʼo te Eulopa, pea mo te Potu Asia. Ko te kau misionea ʼo te ʼu ʼuluaki kalasi neʼe kua fekauʼi nātou ki te ʼu fenua e 200 tupu. Tokolahi ʼi te kau misionea ʼaia, ʼe kei gāue ʼi te ʼu fenua ʼaē neʼe hinoʼi nātou kiai. Ko te kau misionea foʼou ʼaia, ʼe nātou ʼolo anai kia nātou ʼaia, ʼo faka mafola te Puleʼaga ʼo aʼu ki te ʼu potu taupotu ʼo te kele.—Gāue 1:8.
[Paki ʼo te pasina 25]
Te ʼu paki ʼi te kalasi ʼo te Faleako ʼo te Sosiete Watchtower
[Paki ʼo te pasina 26]
Ko te 99 Kalasi ʼo Te Kau Misionea ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.
[Paki ʼo te pasina 27]
Ko nātou ʼaē kei nonofo ʼi te fenua ʼaē neʼe fekauʼi kiai: (faʼahi hema) Charles Leathco mo tona ʼohoana, Fern, ʼi Pelesile, neʼe nā maʼu pepa ʼi te ʼuluaki mo te ono kalasi ʼo Kalaate; (ʼi lalo) Martha Hess, ʼi Saponia, neʼe maʼu pepa ʼi te 7 kalasi ʼo Kalaate