Neʼe Liliu “Te Tokosiʼi” Ko “Te Lauʼi Afe”
“Ko te tokosiʼi ʼe liliu anai ko te lauʼi afe, pea ko ia ʼaē ʼe veliveli ʼe liliu anai ko te puleʼaga mālohi.”—Isaia 60:22.
1, 2. (a) He koʼe ia ʼaho nei ʼe ʼaofi te kele e te fakapōʼuli? (b) ʼAki te temi, neʼe gigila feafeaʼi te mālama ʼa Sehova ki tana hahaʼi?
“KO TE fakapōʼuli ʼe ina ʼaofi anai te kele, pea ko te fakapōʼuli mātolu te ʼu puleʼaga: kae kia koe ʼe gigila anai ia Sehova, pea kia koe ʼe ʼiloga anai tona kolōlia.” (Isaia 60:2) Ko te ʼu palalau ʼaia ʼe ʼalutahi mo te ʼaluʼaga ʼo te mālama talu mai te taʼu 1919. Neʼe fakafisi te Keletiate ki te fakaʼiloga ʼo te ʼi henī faka hau ʼa Sesu Kilisito, “te malama o te malama-nei.” (Soane 8:12; Mateo 24:3) ʼUhi ko te “hauhau fakamataku” ʼa Satana, te pule ʼo “te u aliki pule o te malama aeni o te fakapouli,” neʼe hoko ʼi te 20 sēkulō ʼaenī te ʼu meʼa fakalialia ʼaupito pea mo fakamataku ʼaupito. (Apokalipesi 12:12; Efeso 6:12) Ko te tokolahi ʼo te hahaʼi ʼe nātou nonofo ʼi te fakapōʼuli.
2 Kae ʼe gigila te mālama ia ʼaho nei. ʼE ‘gigila’ ia Sehova ki tana kau kaugana, te toe ʼo te kau fakanofo ʼaē ko te kau fakafofoga ʼi te kele ʼo tona “ ʼohoana” ʼi selo. (Isaia 60:1) Tāfito talu mai tonatou faka ʼāteaina mai Papiloni ʼi te taʼu 1919, neʼe nātou fakahā te kolōlia ʼo te ʼAtua pea neʼe nātou ‘huhulu tonatou malama ia mua o te hahai.’ (Mateo 5:16) Mai te taʼu 1919 ʼo aʼu ki te taʼu 1931, neʼe ʼāsili mū te mālama ʼo te Puleʼaga ʼi tanatou līaki te ʼu seini ʼo te ʼu manatu faka Papiloni. Neʼe tuputupu tonatou kaugamālie ʼo aʼu ki te toko lauʼi hogofulu afe, pea ʼe ko he fakahoko ʼaia ʼo te fakapapau ʼa Sehova: “ ʼE ʼau tānaki moʼoni anai te toe ʼo te kau Iselaele. ʼE ʼau fakatahiʼi anai nātou ke nātou logo tahi ohage ko he kiʼi faga manu ʼi te lotoʼā, ohage ko he faga ōvi ʼi tana gāueʼaga; ʼe nātou logoaʼa anai ko he hahaʼi.” (Mikea 2:12) ʼI te taʼu 1931, neʼe hā lelei te kolōlia ʼo Sehova ʼi tana hahaʼi he neʼe nātou toʼo ai te higoa ʼaē ko te kau Fakamoʼoni ʼa Sehova.—Isaia 43:10, 12.
3. Neʼe hā feafeaʼi ko te mālama ʼa Sehova ʼe mole gigila ʼāteaina pe anai ki te kau fakanofo?
3 Ko Sehova ʼe gigila pe anai koa ki te toe ʼo te “kiʼi fagaovi”? (Luka 12:32) Kailoa. Neʼe talanoa Te Tule Leʼo Fakapilitānia ʼo te ʼaho 1 ʼo Sepetepeli 1931 ki te tahi kūtuga. Neʼe fakamahino ai te ʼu vaega ʼo Esekiele 9:1-11, pea neʼe ʼui ai ko te tagata ʼaē ʼe taka mo te vaitohi ʼa te sikalaipe, ʼe ina fakatātā te toe ʼo te kau fakanofo. Ko ai ʼaē neʼe fakaʼiloga e te tagata ʼaia ʼi ʼonatou laʼe? ʼE ko te “tahi ʼu ōvi,” ʼe ko nātou ʼaē ʼe ʼamanaki ke nātou maʼuʼuli ʼo heʼegata ʼi te palatiso fakakelekele. (Soane 10:16, MN; Pesalemo 37:29) ʼI te taʼu 1935, neʼe tou toe mahino ai foki ko te kūtuga ʼaia ʼo te “tahi ʼu ōvi,” neʼe ko te “hahai kaugamalie . . . mai te atu puleaga” ʼaē neʼe sio kiai te ʼapositolo ko Soane. (Apokalipesi 7:9-14) Mai te taʼu 1935 ʼo aʼu ki te temi ʼaenī, neʼe fai fakalelei te tānaki ʼo te toe hahaʼi tokolahi ʼaia.
4. Ko ai te ʼu “hau” pea mo te ʼu “puleʼaga” ʼaē ʼe talanoa kiai ia Isaia 60:3?
4 ʼE talanoa ki te tānaki ʼaia te lea faka polofeta ʼaenī ʼa Isaia: “ ʼE ʼolo anai te ʼu puleʼaga ki tou mālama, pea mo te ʼu hau ki te gigila ʼo te mālama ʼaē ʼe haʼu mai ia te koe.” (Isaia 60:3) Ko ai te ʼu “hau” ʼaē ʼe talanoa ki ai? Ko te toe ʼo te toko 144 000 pea mo Sesu Kilisito, ʼaē ʼe nātou kaugā hau mo ia ʼi te Puleʼaga ʼi selo pea ʼe nātou takitaki te gāue fai faka mafola. (Loma 8:17; Apokalipesi 12:17; 14:1) Ia ʼaho nei, ʼe tokosiʼi age te toko lauʼi afe ʼo te kau fakanofo ʼaē ʼe kei maʼuʼuli ʼi te kele ʼi te tokolahi ʼaupito ʼo te hahaʼi ʼo te ʼu “puleʼaga,” ʼaē ʼe ʼamanaki ke nātou maʼuʼuli ʼi te kele, pea ʼe nātou ʼōmai kia Sehova ke ina akoʼi nātou pea ʼe nātou fakaafe te hahaʼi ke nātou fai feiā mo nātou.—Isaia 2:3.
Te Kau Kaugana Fakamalotoloto ʼa Sehova
5. (a) Koteā te ʼu faʼahi ʼaē ʼe hā ai neʼe mole vaivai te lotomālohi ʼo te hahaʼi ʼa Sehova? (b) Ko te ʼu fenua fea ʼaē neʼe hoko ai he ʼu tuputupu makehe ʼi te taʼu 1999? (Koutou vakaʼi te pasina 17 ki te 20.)
5 Neʼe gāue fakamalotoloto te kau Fakamoʼoni ʼa Sehova ʼi te lolotoga ʼo te 20 sēkulō ʼaenī! Pea neʼe mole vaivai tanatou lotomālohi logope la te ʼāsili kovi ʼo te ʼu faigataʼaʼia ʼaē ʼe tau mo nātou pea mo te hoko mai ʼo te taʼu 2000. Neʼe kei maʼuhiga kia nātou te fakatotonu ʼaenī ʼa Sesu: “Koutou fai ni ʼu tisipulo ʼi te hahaʼi ʼo te ʼu fenua fuli pe.” (Mateo 28:19, 20, MN) ʼI te taʼu gāue fakamuli ʼo te 20 sēkulō, neʼe tuputupu te kau fai faka mafola ʼo te logo lelei ʼo aʼu ki te toko 5 912 492. Neʼe nātou fakaʼaogaʼi ia hola e 1 144 566 849 moʼo fai palalau mo te hahaʼi ʼo ʼuhiga mo te ʼAtua pea mo tana ʼu fakatuʼutuʼu. Neʼe nātou fai ia ʼaʼahi e 420 047 796 pea mo fai te ʼu ako Tohi-Tapu e 4 433 884. ʼE hā ʼaki mai ai te lelei ʼaupito ʼo tanatou gāue!
6. Koteā te fakatuʼutuʼu foʼou ʼaē neʼe fai ki te kau pionie, pea koteā tona ʼu fua?
6 ʼI Sanualio ʼo te taʼu ʼaenī kua ʼosi, neʼe fakahā e te Kolesi Pule he fetogi ʼi te ʼu hola ʼaē ʼe fakamaʼua ki te kau pionie. ʼAki te fakatuʼutuʼu foʼou ʼaia, neʼe feala ki te tokolahi ke nātou pionie katoa peʼe nātou pionie vaeluaʼi temi. Ohage la, ʼi te lolotoga ʼo te ʼu ʼuluaki māhina e fā ʼo te taʼu 1999, neʼe momoli ki te filiale ʼo Holani te ʼu pepa fakaʼui pionie katoa ʼe lahi tuʼa fā age tona fakaʼui ʼi te ʼu pepa fakaʼui ʼo te ʼu māhina ʼaia e fā ʼo te taʼu ki muʼa atu. ʼE fakamatala fēnei e te filiale ʼo Ghana: “Talu mai te fakahifo ʼo te ʼu hola ʼa te kau pionie, ʼe ʼāsili kaugamālie tamatou ʼu pionie katoa.” Lolotoga te taʼu gāue 1999, ʼi te malamanei katoa neʼe fakaaʼu te kaugamālie ʼo te kau pionie ki te toko 738 343—ko he fakahā taulekaleka ʼaia ʼo te “faʼafai i te u gaue lelei.”—Tito 2:14.
7. Neʼe tapuakinaʼi feafeaʼi e Sehova te gāue mālohi ʼa tana kau kaugana?
7 Neʼe tapuakina koa e Sehova te gāue fakamalotoloto ʼaia? Ei. ʼAki ia Isaia neʼe ina ʼui fēnei: “Hiki ake tou ʼu mata ki te ʼu tafaʼaki, pea ke sio! Neʼe fakatahiʼi fuli ia nātou; kua nātou ʼōmai kia te koe. ʼE kei haga ʼōmai mai mamaʼo tau ʼu tama, pea mo tau ʼu taʼahine ʼaē ka fua anai ʼi te faʼahi vakavaka.” (Isaia 60:4) Ko te ʼu “tama” pea mo te ʼu “taʼahine” fakanofo ʼaē kua tānaki ai, ʼe kei nātou gāue mālohi kia Sehova. Pea ʼi te temi nei, ʼe tānaki te tahi ʼu ōvi ʼa Sesu ia tafa ʼo te ʼu “tama” pea mo te ʼu “taʼahine” fakanofo ʼa Sehova ia fenua pea mo motu e 234.
“Te Gaue Lelei Fuape”
8. Koteā ‘te ʼu gāue lelei’ ʼaē ʼe fai e te kau Fakamoʼoni ʼa Sehova?
8 ʼE maʼua ki te kau Kilisitiano ke nātou faka mafola te logo lelei ʼo te Puleʼaga pea ke nātou tokoni ki te hahaʼi ke nātou liliu ko he ʼu tisipulo. Pea ʼe nātou “teuteu o uhiga mo te gaue lelei fuape.” (2 Timoteo 3:17) Koia ʼe nātou tokaga lelei ki tonatou ʼu famili, ʼe nātou tali kāiga ki te hahaʼi pea mo ʼaʼahi te kau mahahaki. (1 Timoteo 5:8; Hepeleo 13:16) ʼE kau ʼihi ʼi te ʼu gāue ohage ko te laga ʼo te ʼu Fale ʼo Te Puleʼaga—pea ʼe ko he tahi ʼaia fai fagonogono. ʼI Togo, ʼi te ʼosi laga ʼo te Fale ʼo Te Puleʼaga, ko te hahaʼi takitaki ʼo te ʼēkelesia charismatique neʼe nātou fia ʼiloʼi pe koʼe neʼe lava laga e te kau Fakamoʼoni ʼa Sehova tonatou ʼu fale fono, he ko tanatou ʼēkelesia neʼe tonu ke nātou totogi he ʼu hahaʼi moʼona laga. Neʼe ʼui e te filiale ʼo Togo, ko te laga ʼo te ʼu fale matalelei ʼo te Puleʼaga, ʼe ʼi ai tona ʼu fua lelei ki te ʼu hahaʼi ʼo te kolo, pea ʼe nātou fia lue peʼe nātou fia totogi te ʼu fale ʼaē ʼe ōvi ki te ʼu Fale ʼo Te Puleʼaga.
9. Koteā te meʼa ʼaē neʼe fai e te kau Fakamoʼoni ʼa Sehova mokā hoko he ʼu tuʼutāmaki faka natula?
9 ʼI ʼihi temi, ʼe ʼaoga ke fai he tahi gāue lelei. ʼI te taʼu gāue ʼaenī kua ʼosi, ʼe lahi te ʼu fenua neʼe hoko ai te ʼu tuʼutāmaki faka natula, pea ʼi te agamāhani, ko nātou ʼaē neʼe ʼuluaki tokoni ki te hahaʼi, ʼe ko te kau Fakamoʼoni ʼa Sehova. Ohage la neʼe lahi te ʼu maumau neʼe hoko ʼi Honduras ʼaki te Afā ko Mitch. Neʼe faʼufaʼu fakavilivili e te filiale te ʼu komite moʼo fakatuʼutuʼu te tokoni ʼaē ka fai ki te hahaʼi ʼo Honduras. Ko te kau Fakamoʼoni ʼo Honduras pea mo te tahi ʼu fenua neʼe nātou momoli te ʼu mutuʼi meʼa, mo te meʼa kai, mo te ʼu faitoʼo pea mo te tahi ʼu meʼa. Neʼe fakaʼaogaʼi e te ʼu Komite Fakafenua ki te Laga Fale tonatou faiva moʼo toe laga te ʼu fale ʼo te ʼu tēhina. Mole tuai pea ko te ʼu tēhina ʼaē neʼe hoko ki ai te tuʼutāmaki, neʼe feala ke nātou toe fai tanatou ʼu gāue māhani. ʼI Équateur, neʼe tokoni te kau Fakamoʼoni ʼa Sehova ki tonatou ʼu tēhina he neʼe maumauʼi tonatou ʼu fale e te lōmaki. ʼI tana sio ki tanatou gāue lelei moʼo fakatokatoka te fihifihia ʼaia, neʼe ʼui fēnei e te tagata ʼe gāue ʼi te puleʼaga: “ ʼE ʼau lava fai anai he ʼu gāue lelei ʼaupito mo kanapaula neʼe ʼi ai haku ʼu hahaʼi gāue feiā! ʼE tonu ke ʼi ai he ʼu hahaʼi ohage ko koutou ʼi te ʼu fenua fuli.” Ko te gāue lelei ʼaia ʼe tupu ai te fakavikiviki kia Sehova ʼAtua, pea ʼe ko he fakamoʼoni ko tatatou “lotu e aoga i te meafuape.”—1 Timoteo 4:8.
ʼE Nātou “Lele Mai Ohage Ko He ʼAo”
10. ʼE hifohifo te kaugamālie ʼo te kau fakanofo, kae he koʼe ʼe ʼāsili age te faka mafola ʼo te huafa ʼo Sehova ia ʼaho nei?
10 ʼE fai e Sehova te fehuʼi ʼaenī: “Ko ai ia nātou ʼaia ʼe lele mai ohage ko he ʼao, pea mo hage ko he ʼu lupe ʼe nātou liliu ki tonatou nofoʼaga? He ko te ʼu motu ʼe nātou haga falala kia te ʼau, ʼo feiā mo te ʼu vaka ʼo Talesi ohage ko te kamataʼaga, ke feala hau ʼaumai mai mamaʼo tau ʼu tama . . . Ko te kau matāpule ʼe nātou laga anai tou ʼu kaupā, pea ʼe tauhi anai tonatou ʼu hau kia te koe.” (Isaia 60:8-10) Ko nātou ʼaē neʼe nātou ʼuluaki tali te mālama mai ia Sehova, neʼe ko tona ʼu foha, te kau Kilisitiano fakanofo. Pea neʼe toe ʼōmai mo te kau “matāpule,” te toe hahaʼi tokolahi ʼaē ʼe nātou tauhi agatonu ki tonatou ʼu tēhina fakanofo pea mo mulimuli ki tanatou takitaki ʼi te faka mafola ʼo te logo lelei. Koia logope la ʼe hifohifo te kaugamālie ʼo te kau fakanofo, ʼe ʼāsili faka mafola te huafa ʼo Sehova ʼi te kele katoa.
11. (a) Koteā te gāue ʼaē ʼe hoko atu pea koteā tona fua ʼi te taʼu 1999? (b) Ko te ʼu fenua fea ʼaē neʼe kaugamālie ʼaupito ai te kau papitema ʼi te taʼu 1999? (Koutou vakaʼi te pasina 17 ki te 20.)
11 ʼAki te gāue ʼaia, ko te toko lauʼi miliona hahaʼi ʼe nātou ʼōmai “ohage ko he ʼu lupe ʼe nātou liliu ki tonatou nofoʼaga,” ʼo nātou kumi hāofaki ʼi te kokelekasio faka Kilisitiano. Ko te toko lauʼi afe hahaʼi ʼe nātou ʼōmai ʼi te taʼu fuli, pea ʼe kei ava te ala ki te tokolahi. ʼE ʼui fēnei e Isaia: “Ko tau ʼu matapā ʼe tuku ava tuʼumaʼu anai; ʼe mole māpunuʼi anai ʼi te ʼaho pea mo te po, ke feala he ʼaumai kia te koe te ʼu koloā ʼo te ʼu puleʼaga.” (Isaia 60:11) ʼI te taʼu ʼaenī kua ʼosi, neʼe papitema te toko 323 439 moʼo fakahā kua nātou foaki tonatou maʼuli kia Sehova, pea mole heʼeki ina māpunuʼi te ʼu matapā. ʼE kei fehūfi ʼi te ʼu matapā ʼaia e “te ʼu meʼa ʼaē ʼe maʼugataʼa ʼo te ʼu puleʼaga fuli,” te toe hahaʼi tokolahi. (Asea 2:7) ʼE mole līʼakina te hahaʼi ʼaē ʼe nātou fia mavae mai te fakapōʼuli. (Soane 12:46) ʼOfa pe ke nātou leleiʼia tuʼumaʼu te mālama ʼaē ʼe haʼu mai te ʼAtua!
ʼE Nātou Lototoʼa ʼi Te ʼu Fakafeagai
12. Neʼe faigaʼi feafeaʼi e te hahaʼi ʼaē ʼe nātou leleiʼia te fakapōʼuli ke nātou matehi te mālama?
12 Ko nātou ʼaē ʼe nātou leleiʼia te fakapōʼuli, ʼe nātou fehiʼa ki te mālama ʼa Sehova. (Soane 3:19) Ko ʼihi neʼe nātou faiga ke nātou matehi te mālama ʼaia, pea ʼe mole tou punamaʼuli ki te faʼahi ʼaia. Ko Sesu ia “te malama mooni [ʼo] te folafola [ʼaē] e ina fakamalamaʼi te tagata fulipe,” neʼe vāʼi ia ia, pea neʼe fai ki ai te ʼu fakafeagai pea neʼe matehi ia ia e te hahaʼi ʼo tona fenua. (Soane 1:9) ʼI te lolotoga ʼo te 20 sēkulō ʼaenī, neʼe toe hoko feiā ki te kau Fakamoʼoni ʼa Sehova, neʼe vāʼi nātou, mo pilisoniʼi nātou, neʼe tapuʼi tanatou gāue, pea neʼe matehi ʼihi ia nātou he neʼe nātou agatonu ʼo fakahā te mālama ʼa Sehova. ʼI te ʼu taʼu fakamuli ʼaenī, neʼe fakaʼaogaʼi e te kau fakafeagai te ʼu tala logo moʼo faka mafola te ʼu loi ʼo ʼuhiga mo nātou ʼaē ʼe nātou fakahā te mālama ʼa te ʼAtua. Ko ʼihi ʼe nātou loto ke manatu te hahaʼi, ʼe kovi te kau Fakamoʼoni ʼa Sehova pea ʼe tonu ke faka tuʼakoi peʼe tapuʼi tanatou gāue. Neʼe lava koa te ʼu faiga ʼa te hahaʼi fakafeagai ʼaia?
13. Koteā te ʼu fua ʼo te fakamahino fakapotopoto ʼo tatatou gāue ʼi te ʼu tala logo?
13 Kailoa. Neʼe ʼolo te kau Fakamoʼoni ʼa Sehova ki te hahaʼi tala logo ke fakamahino te moʼoni, mokā neʼe ʼaoga te faʼahi ʼaia. ʼAki tanatou fai ʼaia, neʼe lahi ai te fakahā ʼo te huafa ʼo Sehova ʼi te ʼu nusipepa, mo te ʼu kaupepa, mo te lātio pea mo te televisio. Neʼe ʼi ai tona ʼu fua lelei ʼi te gāue fai faka mafola. Ohage la, ʼi Danemark ko te polokalama ʼo te televisio fakafenua neʼe talanoa ki te kupu tāfito ʼaenī “He koʼe koa ʼe mole kei tui te kau Danois?” Neʼe kau te kau Fakamoʼoni ʼa Sehova ʼi te hahaʼi ʼaē neʼe fakafehuʼi. ʼOsi ʼaia, pea neʼe ʼui fēnei e te fafine neʼe ina sioʼi te polokalama ʼaia: “Neʼe hā lelei mai pe ko ai ʼaē neʼe ina maʼu te laumālie ʼo te ʼAtua.” Pea neʼe kamata ai tana ako.
14. Koteā te faʼahi ʼaē ʼe tonu anai ke mahino kiai te hahaʼi fakafeagai ʼaki he lotomamahi?
14 ʼE ʼiloʼi e te kau Fakamoʼoni ʼa Sehova, ʼe fakafeagai anai te tokolahi kia nātou. (Soane 17:14) Kae ʼe fakaloto mālohiʼi nātou e te lea faka polofeta ʼa Isaia: “ ʼE tonu ke ʼolo atu kia te koe te ʼu foha ʼo nātou ʼaē ʼe nātou gaohi koviʼi koe, pea ke nātou punonou atu; pea ko nātou fuli ʼaē neʼe mole fakaʼapaʼapa kia te koe ʼe tonu ke nātou tulolo ki tou ʼu ʼalofi vaʼe, pea ʼe tonu anai ke nātou fakahigoaʼi koe ko te kolo ʼo Sehova, ko Sione ʼo te Maʼoniʼoni ʼo Iselaele.” (Isaia 60:14) ʼE lotomamahi anai te hahaʼi fakafeagai ʼi tanatou ʼiloʼi ʼaē ʼe nātou tauʼi te ʼAtua totonu. Ko ai ʼaē ʼe lava mālo ʼi te tau ʼaia?
15. Koteā te faka ʼuhiga ʼo te ʼui ʼaē ko te kau Fakamoʼoni ʼa Sehova ʼe nātou “huhu ki te huʼa pipi ʼo te ʼu puleʼaga,” pea neʼe hoko feafeaʼi te faʼahi ʼaia ʼi tanatou gāue faiakonaki pea mo tanatou fai faka mafola?
15 ʼE fai e Sehova te tahi fakapapau: “ ʼE ʼau fakaliliu anai koe ko he meʼa ʼe laupisi ʼo talu ai . . . ʼE ke huhu anai ki te huʼa pipi ʼo te ʼu puleʼaga, pea ʼe ke huhu anai te huhu ʼo te ʼu hau; pea ʼe ke ʼiloʼi papau anai ko ʼau Sehova tou Hāofakiʼaga.” (Isaia 60:15, 16) Ei, ko Sehova ʼe ina Hāofaki tana hahaʼi. Kapau ʼe nātou falala kia te ia, pea ʼe nātou maʼuʼuli anai “ ʼo talu ai.” Pea ʼe nātou “huhu anai ki te huʼa pipi ʼo te ʼu puleʼaga,” ʼo nātou fakaʼaogaʼi te ʼu meʼa ʼo te mālama moʼo fakahaʼele ki muʼa te tauhi moʼoni. Ohage la, ʼaki te ʼu olotinatea pea mo te poto gāue masini ʼi te ʼu fakafelogoi, ʼe feala ke nātou tā fakatahi Te Tule Leʼo ia lea e 121 pea mo te Réveillez-vous! ia lea e 62. Neʼe fai te polokalama olotinatea moʼo tokoni ki te fakaliliu ʼo te Traduction du monde nouveau ʼi te tahi ʼu lea, pea ko te ʼu fakaliliu ʼaia ʼe ko he ʼu meʼa fakafiafia lahi. ʼI te fakahā ʼo te Tauhi Foʼou ʼi te lea faka Croate ʼi te taʼu 1999, neʼe tagi fakafiafia te toko lauʼi afe tēhina. Neʼe ʼui fēnei e te tēhina kua matuʼa: “Kua fualoa taku talitali ki te Tohi-Tapu ʼaia. ʼI te temi nei, kua feala haku mate fīmālie!” ʼE maʼu te ʼu Tohi-Tapu katoa peʼe fakakoga e 100 miliona ʼo te Traduction du monde nouveau ia lea e 34.
Te ʼu Lekula Māʼoluga ʼo Te Aga ʼAē ʼe Tonu Ke Fai
16, 17. (a) Logope la ʼe faigataʼa, kae he koʼe ʼe maʼuhiga ʼaupito ke kita mulimuli ki te ʼu lekula māʼoluga ʼa Sehova? (b) Koteā te faʼifaʼitaki ʼaē ʼe hā ʼaki mai ʼe feala ki te kau tūpulaga ke nātou tekeʼi te ʼu meʼa ʼuli ʼo te malamanei?
16 Neʼe ʼui fēnei e Sesu: “Ko ae e ina fakahoko te kovi e fehia ki te malama.” (Soane 3:20) ʼI te tahi faʼahi, ko nātou ʼaē ʼe nonofo ʼi te mālama, ʼe nātou manako ki te ʼu lekula māʼoluga ʼa Sehova. ʼE ʼui fēnei e Sehova ʼaki ia Isaia: “ ʼO ʼuhiga mo tau hahaʼi, ʼe nātou agatonu fuli anai.” (Isaia 60:21a) ʼE ko he meʼa faigataʼa ʼaupito te mulimuli ki te ʼu lekula faitotonu ʼaia ʼi he mālama ʼe mafola ai te ʼu aga heʼeʼaoga, mo te loi, mo te loto mānumānu pea mo te fialahi. Ohage la, ʼi te ʼu fenua ʼaē ʼe haʼele lelei ai te maʼuli faka ekonomika, ʼe ko he meʼa faigafua hakita tō ki te hele ʼaē ko te fia maʼu koloā. Kae neʼe fai e Paulo te fakatokaga ʼaenī: “Kae kia natou e fia maumea, e natou higa ki te fakahala, mo te matahele, pea mo te u manumanu kehekehe fakavale mo fakatupu tuutamaki, e natou fakaʼuku te hahai ki te auha mo te malaia.” (1 Timoteo 6:9) ʼE ko he meʼa fakaʼofaʼofa mokā tokaga fau he tahi ki tana gāue kae ina meʼa noaʼi te ʼu meʼa ʼaē ʼe maʼuhiga tāfito, ohage ko te fakatahi mo te kau Kilisitiano, te gāue taputapu ki te ʼAtua, te ʼu pelesepeto ki te aga ʼaē ʼe tonu ke fai pea mo te ʼu maʼua faka famili.
17 ʼE faigataʼa tāfito ki te kau tūpulaga tanatou mulimuli ki te ʼu lekula faitotonu, koteʼuhi ko te tokolahi ʼo te kau tūpulaga ʼe nātou fakaʼaogaʼi te toloke peʼe nātou fai te ʼu aga heʼeʼaoga. ʼI Surinam, ʼi te faleako neʼe ʼalu te tama tūpulaga ki te taʼahine ʼe taʼu 14 ʼo kole age ke nā fai he ʼu felāveʼi fakasino. Kae neʼe fakafisi kiai te kiʼi taʼahine ʼo ina fakamahino age ʼe tapu te faʼahi ʼaia ki he tama pea mo he taʼahine mokā mole heʼeki nā ʼohoana. Neʼe vāʼi ia ia e te tahi ʼu finemui ʼi te faleako, pea neʼe nātou fakaneke ia ia ke ina fetogi tana manatu, ʼo nātou ʼui ko te kau taʼahine fuli neʼe nātou fia fai he ʼu felāveʼi fakasino mo te tama ʼaia. Kae neʼe mole fetogi te manatu ʼa te kiʼi taʼahine. Hili kiai ni ʼu vāhaʼa, neʼe fakahā age ki te tama ʼaia kua kau ʼi te SITA pea neʼe mahaki kovi ai. Neʼe fiafia te kiʼi taʼahine he neʼe mulimuli ki te fakatotonu ʼa Sehova ke ‘fakamamaʼo mai te folonikasio.’ (Gaue 15:28, 29) ʼE fiafia ʼaupito te kau Fakamoʼoni ʼa Sehova koteʼuhi ko tanatou kau tūpulaga ʼe nātou lotomālohi moʼo fai te meʼa ʼaē ʼe lelei. Ko tanatou tui pea mo te tui ʼo tanatou ʼu mātuʼa, ʼe ina ‘fakamatamataleleiʼi’ peʼe fakavikiviki te huafa ʼo Sehova ʼAtua.—Isaia 60:21b.
Neʼe Fakatuputupu e Sehova Tana Hahaʼi
18. (a) Koteā te ʼu meʼa lahi ʼaē neʼe fai e Sehova maʼa tana hahaʼi? (b) Koteā te meʼa ʼaē ʼe hā ʼaki mai ʼe toe tuputupu anai te gāue, pea koteā te ʼu meʼa taulekaleka ʼaē ka hoko kia nātou ʼaē ʼe nonofo ʼi te mālama ʼa Sehova?
18 Ei, ʼe foaki e Sehova te mālama ki tana hahaʼi, ʼo ina tapuakinaʼi nātou pea mo fakaloto mālohiʼi nātou. Lolotoga te 20 sēkulō ʼaenī, neʼe nātou sio ki te fakahoko ʼo te ʼu folafola ʼaenī ʼa Isaia: “Ko te tokosiʼi ʼe liliu anai ko te lauʼi afe, pea ko ia ʼaē ʼe veliveli ʼe liliu anai ko te puleʼaga mālohi. Ko ʼau, Sehova, ʼe ʼau fakavaveʼi anai te faʼahi ʼaia ʼi tona temi totonu.” (Isaia 60:22) ʼI te taʼu 1919 neʼe nātou tokosiʼi, kae neʼe liliu “te tokosiʼi” ʼaia ko “te lauʼi afe.” Pea ʼe mole heʼeki fakaʼosi te tuputupu ʼaia! ʼI te taʼu ʼaenī kua ʼosi, ko te toko 14 088 751 neʼe nātou kau ki te Fakamanatu ʼo te mate ʼa Sesu. Ko te tokolahi ia nātou ʼe mole ko he kau Fakamoʼoni. ʼE tou fiafia he neʼe nātou kau ki te fakamanatu maʼuhiga ʼaia pea ʼe tou fakaafe nātou ke nātou haga ʼōmai ki te mālama. ʼE kei haga mū ia Sehova ki tana hahaʼi. ʼE kei ava te ʼu matapā ʼo tana kautahi. Koia tou lotomālohi fuli ke tou nonofo ʼi te mālama ʼa Sehova. ʼE lahi te ʼu tapuakina ʼaē ʼe feala ke tou maʼu ʼi te temi nei! Pea ʼe ko he meʼa fakafiafia anai ʼi te ka haʼu, mokā fakavikiviki anai te ʼu meʼa fuli ʼaē neʼe ina fakatupu kia Sehova pea ʼe nātou fiafia fuli anai ʼi te taulekaleka ʼo tona kolōlia!—Apokalipesi 5:13, 14.
E Feafeaʼi Hakotou Fakamahino?
• Ko ai ʼaē neʼe ina fakahā te kolōlia ʼa Sehova ʼi te ʼu ʼaho fakamuli ʼaenī?
• Koteā ʼaē ʼe hā ʼaki mai, neʼe mole vaivai te lotomālohi ʼa te hahaʼi ʼa Sehova?
• Koteā te ʼu gāue lelei ʼaē ʼe fai e te kau Fakamoʼoni ʼa Sehova?
• Logope la te ʼu fakafeagai fakamataku, koteā te meʼa ʼaē ʼe tou tui papau kiai?
[Tānaki ʼo te taʼu gāue, pasina 17-20]
2000 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA
(Vakaʼi te nusipepa)
[Paki ʼo te pasina 15]
ʼE kei ʼōmai te hahaʼi tokolahi ki te kautahi ʼa Sehova
[Paki ʼo te pasina 16]
ʼE tou fiafia heʼe tuku ava e Sehova te matapā kia nātou ʼaē ʼe manako ki tona mālama