“Koutou Alaʼala”
“Koia, koutou alaʼala, koteuhi e mole koutou iloi, pe ko te aho fea e haele mai ai toutou Aliki.”—Mateo 24:42.
1. Koteā te manatu ʼa te ʼu kaugana ʼa Sehova ʼaē kua fualoa tanatou ʼi te moʼoni, ʼo ʼuhiga mo te ʼu taʼu ʼaē ʼe nātou tauhi ai kia Sehova? Koutou fakahā he faʼifaʼitaki.
TOKOLAHI ʼi te ʼu kaugana ʼa Sehova kua nātou ʼiloʼi te moʼoni talu mai tanatou kei tūpulaga. Ohage ko te tagata faifakatau ʼaē neʼe ina maʼu te mataʼi tofe maʼuhiga pea mo ina fakatau ʼana ʼu meʼa fuli moʼo totogi ʼo te mataʼi tofe ʼaia, ko te kau ako fakamalotoloto ʼaia ʼo te Tohi-Tapu neʼe nātou fakafisi kia nātou totonu pea mo foaki tonatou maʼuli kia Sehova. (Mateo 13:45, 46; Maleko 8:34) Koteā tanatou manatu ʼo ʼuhiga mo tanatou atalitali ʼaia talu mai fualoa ke nātou sio ki te fakahoko ʼo te ʼu fakatuʼutuʼu ʼa te ʼAtua ʼo ʼuhiga mo te kele? ʼE mole nātou fakahemala ki te faʼahi ʼaia! ʼE nātou manatu tahi mo te Tēhina ko A. H. Macmillan, ʼaē hili kiai taʼu e teitei 60 ʼo tana tauhi ki te ʼAtua neʼe ina ʼui fēnei: “ ʼE kua ʼau toe lotomālohi age ke ʼau haga taupau taku tui. ʼAki taku tui, kua ʼi ai te ʼuhiga ʼo toku maʼuli. ʼE kei tokoni mai kia ʼau ke mole ʼau tuʼania ia te ka haʼu.”
2. (a) Koteā te tokoni ʼaoga neʼe fai e Sesu ki tana kau tisipulo? (b) Koteā te ʼu fehuʼi ʼaē ka tou vakaʼi anai ʼi te alatike ʼaenī?
2 E feafeaʼi kia koutou? Tatau aipe peʼe koutou taʼu fia, kae koutou fakatokagaʼi te ʼu palalau ʼaenī ʼa Sesu: “Koia, koutou alaʼala, koteuhi e mole koutou iloi, pe ko te aho fea e haele mai ai toutou Aliki.” (Mateo 24:42) ʼE maʼu ʼi te ʼu palalau ʼaia te moʼoni lahi. ʼE mole tou ʼiloʼi te ʼaho ʼaē ka haʼu ai te ʼAliki ʼo fakahoko tana fakamāu ki te tuʼu agakovi ʼaenī, pea ʼe mole ʼaoga ke tou ʼiloʼi. Kae ʼe tonu ke tou fakaʼaogaʼi fakalelei totatou maʼuli ke ʼaua naʼa tou fakahemala ki te ʼu meʼa ʼaē neʼe tou fai. ʼO ʼuhiga mo te faʼahi ʼaia, koteā te ʼu faʼifaʼitaki ʼaē ʼe tou maʼu ʼi te Tohi-Tapu ʼe tokoni mai anai kia tatou ke tou nofo ʼalaʼala? Neʼe fakahā feafeaʼi e Sesu ʼe maʼua ke tou nofo ʼalaʼala? Pea koteā te ʼu fakamoʼoni ʼaē ʼe tou maʼu ia ʼaho nei ʼe nātou fakahā ai ʼe tou maʼuʼuli ʼi te ʼu ʼaho fakamuli ʼo te tuʼu heʼe tui ʼaenī?
Ko He Faʼifaʼitaki Moʼo Fakatokaga Kia Tatou
3. Koteā ʼaē ʼe tatau ai te hahaʼi ʼo te temi ʼaenī pea mo te hahaʼi ʼo te temi ʼo Noe?
3 ʼE lahi te ʼu ʼaluʼaga ʼe tatau ai te hahaʼi ʼo te temi ʼaenī mo te hahaʼi ʼo te temi ʼo Noe. ʼI te temi ʼaia, neʼe fonu te agamālohi ʼi te kele, pea ko te loto ʼo te tagata neʼe “kovi tuʼumaʼu.” (Senesi 6:5) ʼI te ʼaho fuli, neʼe nātou tokakaga pe nātou ki tanatou ʼu gāue. Kae ʼi muʼa ʼo tana fakahoko te Tulivio lahi, neʼe tuku e Sehova he faigamālie ki te hahaʼi ke nātou fakahemala. Neʼe ina fekauʼi Noe ke fai faka mafola, pea neʼe fakalogo ia Noe—ʼo tauhi ohage ko “he tagata faka mafola faitotonu” ia lagi taʼu e 40 peʼe 50 peʼe laka atu. (2 Petelo 2:5, MN) Kae neʼe mole tokagaʼi e te hahaʼi te ʼu fakatokaga ʼaē neʼe fai age e Noe. Neʼe mole nātou nofo ʼalaʼala. Pea ki muli age, neʼe ko Noe pea mo tana famili pe ʼaē neʼe hāo ʼi te fakahoko ʼo te fakamāu ʼa Sehova.—Mateo 24:37-39.
4. He koʼe ʼe feala ke tou ʼui neʼe fua lelei te minisitelio ʼo Noe, pea he koʼe ʼe feala ke tou toe manatu feiā pe ʼo ʼuhiga mo tatatou gāue fai faka mafola?
4 Neʼe ʼi ai koa he fua ʼo te minisitelio ʼo Noe? ʼE moʼoni neʼe tokosiʼi te hahaʼi ʼaē neʼe fakalogo, kae neʼe hoko te fakatuʼutuʼu ʼo te faka mafola ʼa Noe, tatau aipe pe neʼe mole nātou tali. Koteā tona tupuʼaga? He ko te faka mafola ʼaia neʼe ina faka fealagia ki te hahaʼi ke nātou filifili peʼe nātou fia tauhi kia Sehova peʼe kailoa. E feafeaʼi te telituale ʼaē ʼe koutou fai faka mafola ai? Tatau aipe peʼe tokosiʼi ia nātou ʼaē ʼe fia logo, kae ʼe lahi te ʼu fua lelei ʼaē ʼe koutou maʼu. Koteā tona tupuʼaga? Heʼe ʼaki takotou fai faka mafola, ʼe koutou fakahā ai te ʼu fakatokaga ʼa te ʼAtua, pea ʼe koutou fakahoko ai te fakatotonu ʼaē neʼe fai e Sesu ki tana ʼu tisipulo.—Mateo 24:14; 28:19, 20.
Neʼe Mole Nātou Tokagaʼi Te ʼu Polofeta ʼa Te ʼAtua
5. (a) Neʼe koteā te ʼu ʼaluʼaga ʼaē neʼe hoko ʼi Suta ʼi te temi ʼo Hapakuke, pea neʼe tali feafeaʼi e te hahaʼi tana logo faka polofeta? (b) Neʼe fakahā feafeaʼi e te hahaʼi ʼo Suta tanatou agakovi ki te kau polofeta ʼa Sehova?
5 Hili kiai ni ʼu sēkulō ʼi te ʼosi ʼo te Tulivio, neʼe fakaʼofaʼofa ʼaupito te ʼaluʼaga ʼo te puleʼaga ʼo Suta. Neʼe maʼu ai te tauhi tamapua, mo te heʼe faitotonu, te gaohi koviʼi ʼo te hahaʼi, pea mo te fai fakapō. Neʼe fekauʼi e Sehova ia Hapakuke ke ina fakatokaga ki te hahaʼi, kapau ʼe mole nātou fakahemala pea ʼe hoko anai kia nātou te malaʼia mai te kau Kalitia, peʼe ko te kau Papiloni. (Hapakuke 1:5-7) Kae neʼe mole fia fakalogo te hahaʼi. Lagi neʼe nātou manatu fēnei, ‘Kua hili kiai taʼu e teau tupu, neʼe fakahā mai e te polofeta ko Isaia te fakatokaga ʼaia, kae mole heʼeki hoko he meʼa!’ (Isaia 39:6, 7) Tokolahi ʼo te kau takitaki ʼo Suta neʼe nātou fakafisi ki te logo ʼaia pea neʼe nātou gaohi koviʼi te kau ʼave logo. ʼI te tahi lakaga, neʼe nātou faiga ke nātou matehi te polofeta ko Selemia, pea neʼe mole feala he neʼe hāofaki ia ia e te tagata ko Ahikami. ʼI tana ʼita ʼuhi ko te tahi logo faka polofeta, neʼe fakatotonu e te Hau ko Seoiakimi ke matehi te polofeta ko Ulia ʼaki te heletā.—Selemia 26:21-24.
6. Neʼe fakaloto mālohiʼi feafeaʼi e Sehova ia Hapakuke?
6 Ko te logo ʼaē neʼe tala e Hapakuke neʼe fakamataku pea neʼe mole tali lelei e te hahaʼi, ohage pe ko Selemia, ʼaē neʼe fakatotonu age e te ʼAtua ke ina fakakikite te ʼu taʼu e 70 ʼaē ka līʼakina ai Suta. (Selemia 25:8-11) Koia ʼe tou mahino ai ki te loto tuʼania ʼa Hapakuke ʼi tana kalaga fēnei: “ ʼO aʼu anai ki ʼafea taku kalaga, Ê Sehova, ke ke hāofaki ʼau, kae mole ke logo koe kiai? ʼO aʼu anai ki ʼafea taku pāui kia te koe ke ke tokoni mai ʼuhi ko te agamālohi, kae mole ke hāofaki koe?” (Hapakuke 1:2) Neʼe tali fakalelei e Sehova kia Hapakuke, ʼaki te ʼu palalau fakaloto mālohi ʼaenī ki tana tui: “Heʼe ko te meʼa ʼaē neʼe hā ʼe kei tuku ia ki te temi ʼaē neʼe fakakatofa kiai. Pea ʼe fakatupu lotohoha ia ʼo aʼu ki te fakaʼosi, pea ʼe mole loi anai ia. Tatau aipe peʼe tuai, haga talitali kiai; heʼe hoko moʼoni anai ia. ʼE mole tauhala anai ia.” (Hapakuke 2:3) Koia, ʼe maʼu e Sehova he ‛temi kua fakakatofa’ moʼo fakagata te heʼe faitotonu pea mo te agakovi. Tatau aipe pe neʼe hage ʼe tuai, kae neʼe mole tonu ke lotovaivai ia Hapakuke, peʼe ina fakamāmālie tana gāue. Kae neʼe tonu ia ke “haga talitali,” pea mo fai fakatoʼotoʼo tana gāue. Neʼe mole tuai te ʼaho ʼa Sehova!
7. He koʼe neʼe tonu ke toe maumauʼi ia Selusalemi ʼi te ʼuluaki sēkulō ʼo totatou temi?
7 Hili kiai teitei taʼu e 20 ʼi te ʼosi palalau ʼa Sehova kia Hapakuke, pea neʼe maumauʼi ia Selusalemi, te kolo muʼa ʼo Suta. Neʼe toe laga ki muli age, pea neʼe fakatonutonuʼi te ʼu aga kovi ʼaē neʼe tupu ai te mamahi ʼa Hapakuke. Kae ʼi te ʼuluaki sēkulō ʼo totatou temi, neʼe toe maʼua ke fakaʼauha te kolo ʼaia ʼuhi ko te heʼe agatonu ʼo te hahaʼi ʼaē neʼe nonofo ai. ʼI tana manavaʼofa, neʼe fakatuʼutuʼu e Sehova ke hāofaki te hahaʼi faitotonu. ʼI te temi ʼaia, neʼe ina fakaʼaogaʼi te polofeta lahi ko Sesu Kilisito moʼo fakahā te logo. ʼI te taʼu 33 ʼo totatou temi, neʼe ʼui fēnei e Sesu ki ʼana kau tisipulo: “Ka koutou mamata ki te takatakai o Selusalemi e te u fua solia, pea koutou iloi leva kua hokosia mai tona maumauʼi. Kia natou e mauli i Sutea ke natou feholaki ki te u mouga.”—Luka 21:20, 21.
8. (a) Koteā ʼaē neʼe feala ke hoko ki ʼihi Kilisitiano ʼi te hoholo ʼo te temi ʼi te ʼosi mate ʼa Sesu? (b) Neʼe hoko feafeaʼi te ʼu palalau fakakikite ʼa Sesu ʼo ʼuhiga mo Selusalemi?
8 ʼI te fakalaka ʼo te ʼu taʼu, neʼe lagi fia ʼiloʼi e ʼihi Kilisitiano ʼo Selusalemi peʼe hoko ʼafea te lea faka polofeta ʼa Sesu. ʼE moʼoni, koutou fakakaukauʼi age muʼa te ʼu sakilifisio ʼaē neʼe fai e ʼihi ia nātou ʼaia. ʼUhi ko tanatou fia nonofo ʼalaʼala, neʼe lagi nātou fakafisi ki he ʼu gāue neʼe totogi lelei ai nātou. ʼI te hoholo ʼo te temi, neʼe ʼāsili koa tanatou loto tuʼania? Neʼe nātou manatu koa ʼe pulinoa tonatou temi, ʼo nātou manatu ko te ʼu palalau ʼaē neʼe fai e Sesu neʼe fai ia ki te taʼiake ka muli mai, kae mole fai ia ki tonatou temi? ʼI te taʼu 66 ʼo totatou temi, neʼe kamata hoko ai te lea faka polofeta ʼa Sesu, he neʼe ʼatakai Selusalemi e te ʼu foʼi solia Loma. Ko nātou ʼaē neʼe nonofo ʼalaʼala neʼe nātou sio ki te fakaʼiloga, ʼo nātou feholaki mai te kolo, pea neʼe nātou hāo ai ʼi te maumauʼi ʼo Selusalemi.
Te Lea Fakatātā ʼe Ina Fakahā Te Maʼuhiga ʼAē Ke Tou Nonofo ʼAlaʼala
9, 10. (a) ʼE feafeaʼi anai hakotou fakamatala fakanounou te lea fakatātā ʼa Sesu ʼo ʼuhiga mo te ʼu kaugana ʼaē ʼe nātou atalitali ki te toe liliu mai ʼo tonatou ʼaliki mai tana ʼohoana? (b) He koʼe neʼe feala ke faigataʼa ki te ʼu kaugana tanatou talitali ki tonatou ʼaliki? (c) He koʼe neʼe ʼaoga ke talitali te ʼu kaugana?
9 ʼI tana fakahā lelei te maʼuhiga ʼaē ke tou nonofo ʼalaʼala, neʼe fakatātā e Sesu tana kau tisipulo ki he ʼu kaugana ʼe nātou atalitali ki te toe liliu mai ʼo tonatou ʼaliki mai tana ʼohoana. ʼE nātou ʼiloʼi ʼe toe liliu mai anai ʼi te pōʼuli—kae ʼi te hola fia? ʼI te ʼuluaki koga ʼo te pōʼuli? ʼI te lua? ʼI te tolu? Neʼe mole nātou ʼiloʼi. Neʼe ʼui fēnei e Sesu: “Kapau e aluʼage [te ʼaliki] i te vaelua po, pe aluʼage i te uluaki moa, e ina mauʼage e [nātou ʼalaʼala], manuia ia kaugana aia!” (Luka 12:35-38) Koutou fakakaukauʼi age muʼa ki te nofo tokaga ʼa te ʼu kaugana ʼaia. ʼE mahino ia ko he kiʼi logoaʼa pe, peʼe ko he makalo ʼa he tahi, neʼe fakaʼāsili ai tanatou atalitali ʼaia: ‘ ʼE ko totatou ʼaliki ʼapē?’
10 E feafeaʼi mo kapau neʼe haʼu te ʼaliki ʼi te vaelua po, ʼaē neʼe kamata ʼi te hola hiva pōʼuli ʼo aʼu ki te māʼupō? Neʼe atalitali koa te kau kaugana fuli, ʼo kau kiai mo nātou ʼaē neʼe gāue kinakina talu mai te kei hegihegi, ke nātou felāveʼi mo te ʼaliki, pe neʼe tulemomoe ʼihi? E feafeaʼi mo kapau neʼe toe liliu mai te ʼaliki ʼi te tolu koga ʼo te pōʼuli—ʼaē neʼe kamata ʼi te māʼupō ʼo aʼu ki te hola tolu māfoatā? Neʼe lotovaivai ai koa ʼihi kaugana, peʼe ʼiʼita ʼi te hage ʼaē ʼe tuai mai tonatou ʼaliki?a Neʼe manuʼia pe ia nātou ʼaē neʼe maʼu atu ʼe nātou nofo ʼalaʼala ʼi te tau mai ʼa te ʼaliki. ʼE mahino papau ia ʼe faka ʼuhiga kia nātou te ʼu palalau ʼaē ʼe tuʼu ia Tāʼaga Lea 13:12: “ ʼE mahaki te loto, mokā ʼe mole hoko vave te meʼa ʼaē ʼe ʼamanaki kiai.”
11. ʼE tokoni feafeaʼi mai te faikole ke tou nonofo ʼalaʼala?
11 Lolotoga te temi ʼaē neʼe hage neʼe tuai mai, koteā ʼaē neʼe tokoni ki te ʼu tisipulo ʼa Sesu ke nātou nonofo ʼalaʼala? ʼI tanatou nonofo ʼi te ʼōloto ʼo Setesemane ʼi muʼa ʼo tona puke, neʼe ʼui fēnei e Sesu ki tana ʼu ʼapositolo e toko tolu: “Koutou alaala pea koutou faikole, koteuhi naʼa koutou to ki te fakahala.” (Mateo 26:41) Ko te ʼu taʼu ki muli age, ko Petelo, ʼaē neʼe kau ʼi te ʼu ʼapositolo ʼaia, neʼe ina fai te tokoni feiā ki te kau Kilisitiano. Neʼe ina tohi fēnei: “E fakaovi mai te fakaʼosi o te meafuape, koia, koutou atamai malama pea mo koutou ateaina mai te konahia, ke feala tautou faikole.” (1 Petelo 4:7) ʼE mahino lelei mai, ʼi totatou maʼuli faka Kilisitiano ʼe tonu ke tou faikole fakamalotoloto. Ei, ʼe tonu ke tou kole tuʼumaʼu kia Sehova ke tokoni mai kia tatou ke tou nonofo ʼalaʼala.—Loma 12:12; 1 Tesalonika 5:17.
12. Koteā te kehekehe ʼo hatatou fakakaukauʼi te ʼu meʼa ʼaē ʼe feala ke hoko pea mo tatatou nonofo fakaonoono?
12 Koutou fakatokagaʼi, neʼe toe ʼui fēnei e Petelo: “E fakaovi mai te fakaʼosi o te meafuape.” ʼE kua ōvi feafeaʼi mai? ʼE mole feala ke ʼiloʼi e te tagata te hola pea mo te ʼaho totonu. (Mateo 24:36) Pea ʼe mole ʼui mai e te Tohi-Tapu ke tou fakakaukauʼi pe ko te temi fea ʼaē ʼe feala ke hoko ai, kae ʼe ina fakaloto mālohiʼi tatou ke tou haga talitali ki te fakaʼosi. (Vakaʼi ia 2 Timoteo 4:3, 4; Tito 3:9.) Koteā ʼaē ka tokoni mai kia tatou ke tou haga atalitali ki te fakaʼosi? Ko tatatou tokaga fakalelei ki te ʼu fakaʼiloga ʼaē ʼe nātou fakamoʼoni ai kua tou ōvi ki te fakaʼosi. Koia, tou vakaʼi te ʼu fakamoʼoni e ono ʼe nātou fakahā lelei mai ʼe tou maʼuʼuli ʼi te ʼu ʼaho fakamuli ʼo te mālama heʼe tui ʼaenī.
Ko Te ʼu Fakamoʼoni Maʼuhiga e Ono
13. ʼAki te lea faka polofeta ʼa Paulo ʼaē ʼe tuʼu ia 2 Timoteo kapite 3, he koʼe ʼe koutou faka tui ʼe tou maʼuʼuli ʼi “te u aho fakamuli”?
13 ʼUluaki, ʼe tou sio lelei ki te fakahoko ʼo te lea faka polofeta ʼa Paulo ʼo ʼuhiga mo “te u aho fakamuli.” Neʼe tohi fēnei e Paulo: “E mau anai he u temi faigataa i te u aho fakamuli. Koteuhi, e liliu anai te hahai o tahi ofa pe kia te ia, o manumanu paaga, o fiatuu, o lotolahi, o fasituu, o talagataa ki anatou matua, o agavale, o sakililesio, o heeʼofa, o loto fefeka, o laukovi, o maveuveu, o kanivao, o fehia ki te lelei, o kaka, o hokoʼoho, o kivi i te fialahi, o manako ki te u fiafia kae e mole he ofa ki te Atua; o taupau te faahiga aga a te lotu, kae kua natou fakafisi ki tona malohi, pea mo natou aia, e ke fakamamao mai ai. Kae ko te hahai agakovi mo kaka e fakaʼalu anai tonatou koviʼage, e natou fakahehe anai te kaiga pea mo natou.” (2 Timoteo 3:1-5, 13) ʼE mole koutou sio koa la ki te hoko ʼo te lea faka polofeta ʼaia ʼi totatou temi? ʼE gata pe kia nātou ʼaē ʼe mole nātou fia ʼiloʼi te ʼu meʼa ʼaia ʼaē ʼe nātou fakafisi kiai!b
14. ʼE hoko feafeaʼi ia ʼaho nei te ʼu palalau ʼaē ʼe tuʼu ia Apokalipesi 12:9 ʼo ʼuhiga mo te Tevolo, pea koteā ʼaē kua vave hoko kia ia?
14 Lua, ʼe tou sio ki te kua hoko ʼo Apokalipesi 12:9, ki te ʼu gāue kovi ʼa Satana pea mo tana ʼu temonio talu mai tonatou kapu ifo mai te lagi. ʼE tou lau fēnei ʼi te vaega ʼaia: “Nee li ifo te talakone lahi, te gata afea, iaʼia e higoa ko ‘Tiapolo mo Satana’ te fakahalahala o te malama-nei katoa, nee li ifo iaʼia ki te kelekele fakatahi mo ana aselo.” Neʼe hoko ai te toe malaʼia lahi ki te kele. ʼE moʼoni, neʼe hoko ai te ʼu tuʼuga malaʼia ʼi te malamanei, tāfito talu mai te taʼu 1914. Kae ʼe toe ʼui e te lea faka polofeta ʼo Apokalipesi, ʼi te temi ʼaē ʼe lī ifo ai te Tevolo ki te kele, ʼe ina ʼiloʼi “ko te temi siʼi kei toe kia te ia.” (Apokalipesi 12:12) Lolotoga te temi ʼaia, ʼe tauʼi e Satana te ʼu tisipulo fakanofo ʼa Kilisito. (Apokalipesi 12:17) Lagi neʼe tou sio ki te ʼu fua ʼo te tau ʼaia ʼi totatou temi.c Kae kua vave hoko mai te temi ʼaē ka lī ai Satana ki te vanu, pea ʼe mole “ina toe fakahalai [anai] te u puleaga.”—Apokalipesi 20:1-3.
15. ʼE toe fakamoʼoni feafeaʼi ia Apokalipesi 17:9-11 ʼe tou maʼuʼuli ʼi te temi fakaʼosi?
15 Tolu, ʼe tou maʼuʼuli nei ʼi te temi ʼo te “hau” fakamuli, te valu “hau,” ʼaē ʼe talanoa kiai te lea faka polofeta ʼo Apokalipesi 17:9-11. ʼI te ʼu vaega ʼaia ʼe talanoa ai te ʼapositolo ko Soane ki te ʼu hau e fitu, ʼe nātou fakatātā te ʼu mālohi faka malamanei e fitu—ko Esipito, mo Asilia, mo Papiloni, mo Metia-Pelesia, mo Heleni, mo Loma, pea mo te ʼu mālohi faka malamanei e lua ʼo Pilitania mo Amelika. ʼE toe sio ki te “valu hau” ʼaē ʼe “kau ki te toko fitu.” Ko te valu hau ʼaia—te hau fakamuli ʼaē neʼe sio ki ai Soane—ʼe ina fakatātā te ʼAtu Puleʼaga Fakatahi. ʼE ʼui e Soane ko te valu hau ʼaia ʼe “alu ia ki tona mateʼaga malaia,” pea ʼe mole toe talanoa ki he tahi ʼu hau ʼi te kele.d
16. ʼE fakahā feafeaʼi mai e te fakahoko ʼo te fakatātā ʼaē neʼe sio kiai Nepukanesa ʼi tana moemisi ʼe tou maʼuʼuli nei ʼi te ʼu ʼaho fakamuli?
16 Fā, ʼe tou maʼuʼuli nei ʼi te temi ʼaē ʼe faka ʼuhiga kiai te ʼu vaʼe ʼo te fakatātā ʼaē neʼe sio kiai Nepukanesa ʼi tana moemisi. Neʼe fakamahino e te polofeta ko Taniela te moemisi fakalilo ʼaia ʼo te fakatātā lahi ʼa te tagata. (Taniela 2:36-43) Ko te ʼu faʼahi ukamea e fā ʼo te fakatātā, ʼe faka ʼuhiga ki te ʼu mālohi faka malamanei kehekehe, ʼo kamata mai te ʼulu (te Puleʼaga ʼo Papiloni) pea ʼo aʼu ki te ʼu vaʼe pea mo te ʼu kauʼi vaʼe (te ʼu puleʼaga ʼo te temi ʼaenī). Neʼe kua fakatuʼu te ʼu mālohi faka malamanei fuli ʼaē ʼe faka ʼuhiga kiai te fakatātā ʼaia. ʼE tou maʼuʼuli nei ʼi te temi ʼaē ʼe faka ʼuhiga kiai te ʼu vaʼe ʼo te fakatātā. ʼE mole talanoa ki he tahi ʼu mālohi ʼe tonu ke hoko mai.e
17. He koʼe ko tatatou gāue ʼaē ko te faka mafola ʼo te puleʼaga ʼe ko he tahi fakamoʼoni ʼaia ʼe tou maʼuʼuli ʼi te temi fakaʼosi?
17 Nima, ʼe tou sio ki te fakahoko ʼo te gāue fai faka mafola ʼi te malamanei katoa, ʼaē neʼe ʼui e Sesu ʼe tonu ke fai ʼi muʼa ʼo te fakaʼosi ʼo te tuʼu ʼaenī. Neʼe ʼui fēnei e Sesu: “Ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai pagani fuape pea e hoko anai mo te fakaosi.” (Mateo 24:14) Ia ʼaho nei, ʼe hoko te lea faka polofeta ʼaia ʼi te malamanei katoa. ʼE moʼoni, ʼe kei ʼi ai te ʼu telituale ʼe mole heʼeki fai, kae ʼi te temi ʼaē ka fakatuʼutuʼu kiai Sehova, ʼe fakahoko anai he gāue lahi ʼi te ʼu telituale ʼaia. (1 Kolonito 16:9) Kae ʼe mole ʼui e te Tohi-Tapu ʼe atalitali anai Sehova ke logo te hahaʼi fuli ki te logo lelei. Kae ʼe tonu ke faka mafola te logo lelei ohage ko tona fakatotonu mai e Sehova. Pea ʼe hoko mai anai te fakaʼosi.—Vakaʼi ia Mateo 10:23.
18. Koteā ʼaē ka hoko moʼoni ki te kau fakanofo ʼi te kamata ʼo te mamahi lahi, pea ʼe tou ʼiloʼi feafeaʼi te faʼahi ʼaia?
18 Ono, kua fakaaʼu ʼo tokosiʼi te kaugamālie ʼo te kau tisipulo fakanofo ʼa Kilisito, kae ʼe mahino ia ʼe kei maʼuʼuli anai ʼihi ʼi te kamata ʼo te mamahi lahi. Tokolahi ʼi te kau fakanofo kua matutuʼa, pea ʼaki te temi, ʼe liliu ʼo tokosiʼi te kau fakanofo moʼoni. Kae ʼo ʼuhiga mo te mamahi lahi, neʼe ʼui fēnei e Sesu: “Kapau nee mole fakanounou te u aho aia, e mole he tagata e mauli, kae uhipe ko natou filifiliʼia, e fakanounou anai ia aho alâ.” (Mateo 24:21, 22) Koia ʼe mahino mai ko ʼihi “filifiliʼia” ʼa Kilisito ʼe kei nātou maʼuʼuli anai ʼi te kele ʼi te kamata ʼo te mamahi lahi.f
Koteā ʼAē Ka Hoko?
19, 20. He koʼe ʼe maʼuhiga tāfito ia ʼaho nei ke tou nonofo tokaga pea mo ʼalaʼala?
19 Koteā ʼaē ka hoko anai kia tatou ʼi te ka haʼu? ʼE hoko mai anai he ʼu temi fakafiafia. Neʼe fakatokagaʼi e Paulo “e hoko mai te Aho o te Aliki, o hage he tagata kaihaʼa i te pouli.” ʼO ʼuhiga mo te ʼu tagata ʼaē ko he kau popoto ia mata ʼo te mālama, ʼe ina ʼui fēnei: “E ko te temi ae ʼe lau ai e te hahai: ‘Ko te tokalelei mo te fimalie’, pea fokifa mo te tau mai kia natou a te Hauaʼa.” Koia ʼe uga fēnei e Paulo tana kau lautohi: “Aua naa tou momoe o hage ko natou alâ, kae tou alaʼala mo atamai malama.” (1 Tesalonika 5:2, 3, 6) ʼE moʼoni, ko nātou ʼaē ʼe nātou falala ki te ʼu puleʼaga fakatagata moʼo fakatuʼu te tokalelei pea mo te fīmālie, ʼe mole nātou ʼiloʼi te meʼa ʼaē ka hoko moʼoni. Ko te ʼu hahaʼi ʼaia ʼe nātou māʼumoea!
20 Ko te fakaʼauha ʼo te mālama ʼaenī ʼe hoko fakapunamaʼuli anai. Koia, tou atalitali ki te ʼaho ʼa Sehova. Neʼe ʼui fēnei e te ʼAtua totonu kia Hapakuke: “ ʼE mole tuai anai!” Koia, ʼe maʼuhiga ʼaupito kia tatou ke tou haga nonofo ʼalaʼala.
[Nota ʼi te lalo pasina]
a Neʼe mole fakahā age e te ʼaliki ki tana ʼu kaugana pe ko te temi fea ʼaē ka haʼu ai. Koia neʼe mole maʼua ai ke ina fakamatala age te ʼu meʼa ʼaē neʼe ina fai, pea mo fakamahino age pe koʼe neʼe hage ʼe tuai mai.
b Kapau ʼe koutou fia maʼu he tahi ʼu manatu ʼo ʼuhiga mo te lea faka polofeta ʼaia, koutou vakaʼi te kapite 11 ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼaē neʼe tā e te Watchtower Bible and Tract Society of New York, Inc.
c Kapau ʼe koutou fia maʼu he tahi ʼu manatu, koutou vakaʼi Te Tule Leʼo ʼo te ʼaho 15 ʼo ʼAukusito 1994, pasina 26 ki te 31.
e Koutou vakaʼi te kapite 4 ʼo te tohi Prêtons attention à la prophétie de Daniel !, ʼaē neʼe tā e te Watchtower Bible and Tract Society of New York, Inc.
f ʼI te lea fakatātā ʼo te ʼu ōvi pea mo te ʼu tao, ko Kilisito, te Foha ʼo te tagata ʼe haʼu ʼi tona kolōlia ʼi te temi ʼo te mamahi lahi pea ʼe ina fai te fakamāu. ʼE ina fakamāuʼi te hahaʼi moʼo vakaʼi pe neʼe nātou lagolago ki tona ʼu tēhina fakanofo. E mole ʼaoga anai te fakamāu ʼaia mo kapau kua fualoa te mavae ʼa te ʼu tēhina ʼo Kilisito ʼi te kele.—Mateo 25:31-46.
Kei Koutou Manatuʼi Koa?
◻ Koteā te ʼu faʼifaʼitaki faka Tohi-Tapu ʼaē ʼe feala ke tokoni mai kia tatou ke tou ʼalaʼala?
◻ Neʼe fakahā feafeaʼi e Sesu te maʼuhiga ʼaē ke tou ʼalaʼala?
◻ Koteā te ʼu fakamoʼoni e ono ʼaē ʼe hā ai ʼe tou maʼuʼuli ʼi te ʼu ʼaho fakamuli?
[Paki ʼo te pasina 9]
Ko A. H. Macmillan neʼe tauhi agatonu kia Sehova ia teitei taʼu e 60
[Paki ʼo te pasina 10]
Neʼe fakatātā e Sesu tana kau tisipulo ki he ʼu kaugana ʼe nātou nonofo ʼalaʼala