Tou Fiafia ʼi Te ʼAtua ʼo Totatou Hāofaki
“ ʼE ʼau fiafia lahi anai ia Sehova totonu; ʼe ʼau fiafia anai ʼi te ʼAtua ʼo toku hāofaki.”—Hapakuke 3:18.
1. Koteā ʼaē neʼe sio kiai ia Taniela ʼi muʼa ʼo te tō ʼo Papiloni ʼi te taʼu 539 ʼi muʼa ʼo totatou temi?
KO TAʼU e hogofulu tupu ʼi muʼa ʼo te fakaʼauha ʼo Papiloni ʼi te taʼu 539 ʼi muʼa ʼo totatou temi, neʼe sio te polofeta ko Taniela ki te ʼu meʼa maʼuhiga. Neʼe fakakikite ai te ʼu meʼa ʼaē ka hoko ʼi te malamanei katoa pea ʼe iku anai ki te fetauʼaki ʼo te ʼu fili ʼo Sehova pea mo Sesu Kilisito, te hau ʼaē neʼe ina fakanofo. Neʼe lave feafeaʼi te faʼahi ʼaia kia Taniela? Neʼe ina ʼui fēnei: “Neʼe ʼau gaʼegaʼe pea . . . mo mate noa ʼuhi ko te meʼa ʼaē neʼe ʼau sio kiai.”—Taniela 8:27.
2. Koteā te tau ʼaē neʼe sio kiai Taniela pea koteā takotou manatu ki tona kua vave hoko mai?
2 E feafeaʼi kia tatou? Kua fualoa te hoko ʼo te hisitolia ʼaia! Koteā tatatou manatu mokā tou mahino ki te kua vave hoko mai ʼo te tau ʼaē neʼe sio kiai ia Taniela—ia Halamaketone, te tau ʼa te ʼAtua? Koteā tatatou tali ʼi tatatou ʼiloʼi ʼaē ʼe fakaʼauha anai e te ʼAtua tona ʼu fili, ʼuhi ko te mafola ʼaupito ʼo te agakovi ohage ko tana tala ʼi te lea faka polofeta ʼo Hapakuke? ʼE mahino ia, ʼe lagi tatau mo Hapakuke te meʼa ʼaē ʼe tou logoʼi ʼi totatou loto, ohage ko tona fakamatala ʼi te tolu kapite ʼo tana tohi faka polofeta.
ʼE Kole e Hapakuke Ke Manavaʼofa Te ʼAtua
3. Ko ai ʼaē neʼe hūfaki e Hapakuke, pea ʼe malave feafeaʼi kia tatou tona ʼu folafola?
3 Ko te kapite tolu ʼo Hapakuke ʼe ko te faikole. ʼI te vaega 1, ʼe ko te ʼu tagilāulau, ko te ʼu hiva fakaloto mamahi. ʼE hage ʼe hūfaki e te polofeta ia ia totonu. Kae ʼi tona fakahagatonu, ʼe hūfaki e Hapakuke te puleʼaga katoa ʼa te ʼAtua. Ia ʼaho nei, ʼe maʼuhiga ʼaupito tana faikole ki te hahaʼi ʼa te ʼAtua, ʼaē ʼe nātou fakahoko te gāue fai faka mafola ʼo te Puleʼaga. Kapau ʼe tou manatuʼi te faʼahi ʼaia ʼi tatatou lau te kapite 3 ʼo Hapakuke, pea ʼe lagi fakamataku anai kia tatou kae ʼe toe fakafiafia foki. Ko te faikole ʼa Hapakuke, peʼe ko tana tagilāulau ʼe ina fakahā mai he ʼu tupuʼaga lelei ke tou fiafia ia Sehova, te ʼAtua ʼo totatou hāofaki.
4. He koʼe neʼe mataku ia Hapakuke, pea ʼe fakaʼaogaʼi moʼoni anai e te ʼAtua tona mālohi kiteā?
4 Ohage ko te meʼa ʼaē neʼe tou vakaʼi ʼi te ʼu ʼuluaki alatike e lua, neʼe kovi ʼaupito te ʼaluʼaga ʼo te fenua ʼo Suta ʼi te ʼu ʼaho ʼo Hapakuke. Kae neʼe mole loto e te ʼAtua ke hoko atu te ʼaluʼaga ʼaia. ʼE fakatokatoka anai e Sehova te faʼahi ʼaia ohage ko te meʼa ʼaē neʼe ina fai ʼi muʼa atu. Koia ʼe mole tou punamaʼuli ai ʼi te kalaga fēnei ʼa te polofeta: “Ê Sehova, kua ʼau logo ki te fakamatala ʼaē neʼe fai ʼo ʼuhiga mo koe. Kua ʼau mataku, Ê Sehova, ʼo ʼuhiga mo tau gāue”! Neʼe koteā te fakamatala ʼaia? Ko ‘te fakamatala ʼaē neʼe fai ʼo ʼuhiga mo Sehova,’ neʼe ko te hisitolia ʼo te ʼu gāue mālohi ʼa te ʼAtua, ohage ko te meʼa ʼaē neʼe hoko ʼi te Tai Kula, mo te toafa pea mo Seliko. Neʼe ʼiloʼi lelei e Hapakuke te ʼu gāue ʼaia, pea neʼe mataku ai he neʼe ina ʼiloʼi, ʼe toe fakaʼaogaʼi anai e Sehova tona māfimāfi ki tona ʼu fili. ʼI tatatou sio ki te agakovi ʼo te mālama ʼaenī ia ʼaho nei, ʼe tou toe ʼiloʼi foki ʼe fai anai e Sehova te ʼu faʼahiga gāue neʼe ina fai ʼi te temi muʼa. ʼE tou tuʼania koa ki te faʼahi ʼaia? Ei! Kae ʼe tou faikole ohage ko Hapakuke: “ ʼI te lotolotoiga ʼo te ʼu taʼu, Ê fakamaʼuli mai! ʼI te lotolotoiga ʼo te ʼu taʼu, ke ke fakaʼilo ia ia. ʼI te lolotoga ʼo te ʼu maveuveu, ʼofa pe ke ke manatuʼi ʼo loto manavaʼofa.” (Hapakuke 3:2) ʼI te temi ʼaē neʼe fakakatofa e te ʼAtua, “ ʼi te lotolotoiga ʼo te ʼu taʼu,” ʼofa pe ke ina fakaʼaogaʼi faka milakulo tona mālohi. Pea ʼi te temi ʼaia, ʼofa pe ke ina manatuʼi ʼo loto manavaʼofa kia nātou ʼaē ʼe ʼoʼofa kia te ia!
ʼE Haʼele Ki Muʼa Ia Sehova
5. Neʼe ‘haʼu feafeaʼi te ʼAtua mai Temane,’ pea koteā tona pikipikiga mo Halamaketone?
5 Koteā te meʼa ʼaē ka hoko mokā logo anai ia Sehova ki tatatou faikole ki te manavaʼofa? ʼE tou maʼu tona tali ia Hapakuke 3:3, 4. ʼUluaki, ʼe ʼui fēnei e te polofeta: “Neʼe haʼu te ʼAtua totonu mai Temane, ei ko te Maʼoniʼoni mai te Moʼuga ʼo Palani.” ʼI te temi ʼo te polofeta ko Moisese, ko Temane pea mo Palani neʼe tuʼu ʼi te ala ʼo Iselaele ʼaē neʼe fakalaka ʼi te toafa ʼo aʼu ki Kanaane. ʼI te fagona ʼo te puleʼaga lahi ʼo Iselaele, neʼe hage ʼe ko Sehova totonu ʼaē neʼe haʼele mo nātou, pea neʼe mole he meʼa neʼe feala ke ina tāʼofi nātou. Ko Moisese ʼi muʼa ʼo tona mate, neʼe ina ʼui fēnei: “Ko Sehova—neʼe haʼu mai Sinai, pea neʼe tuʼu ake kia nātou mai Seile. Neʼe gigila mai te potu fenua moʼugaʼia ʼo Palani, pea neʼe nofo mo ia te ʼu lauʼi miliate [ʼaselo] maʼoniʼoni.” (Teutalonome 33:2) Ka haʼu anai Sehova ki tona ʼu fili ʼi Halamaketone, ʼe ina toe fakahā feiā anai tona mālohi.
6. ʼO hilifaki ki te kolōlia ʼo te ʼAtua, koteā ʼaē ʼe toe sio kiai te kau Kilisitiano ʼaē ʼe fakasiosio tonu?
6 ʼE toe ʼui fēnei e Hapakuke: “Ko te ʼalikisia [ʼo Sehova] neʼe ina ʼaofi te lagi; pea neʼe fonu te kele ʼi tona fakavikiviki. ʼO ʼuhiga mo tona gigila, neʼe tatau pe mo te mālama.” ʼI meʼa taulekaleka leva! ʼE moʼoni, ʼe mole lava sio te hahaʼi kia Sehova ʼAtua pea mo maʼuʼuli. (Ekesote 33:20) Kae ki te kau kaugana agatonu ʼa te ʼAtua, ʼe gigila te ʼu mata ʼo tonatou ʼu loto ʼi tanatou sio ki tona taulekaleka. (Efeso 1:18) Pea ko te kau Kilisitiano ʼaē ʼe fakasiosio tonu, ʼe mole nātou sio pe ki te kolōlia ʼo Sehova. Moʼo fakaʼosi ʼe ʼui fēnei e Hapakuke 3:4: “Neʼe ʼi ai tona ʼu uloʼi mālama e lua neʼe mū mai tona nima, pea neʼe ko te nonoʼaga ʼaia ʼo tona mālohi.” Ei, ʼe tou sio ko Sehova kua tokalelei moʼo fakahoko tana gāue, pea ʼe ina fakaʼaogaʼi anai tona nima mataʼu ʼaē ko tona mālohi pea mo tona māfimāfi.
7. Koteā te faka ʼuhiga ʼo te haʼele ʼa te ʼAtua kia nātou ʼaē ʼe agatuʼu kia te ia?
7 Ko te haʼele ki muʼa ʼa te ʼAtua ʼe faka ʼuhiga ki te malaʼia ʼaē ka hoko kia nātou fuli ʼaē ʼe agatuʼu kia te ia. ʼE ʼui fēnei ia Hapakuke 3:5: “ ʼI ʼona muʼa, neʼe haʼele ai te mahaki, pea neʼe haʼu te fiva vela mai tona ʼu vaʼe.” ʼI te fakaōvi ʼa te kau Iselaele ki te ʼu tuʼakoi ʼo te Kele ʼo te Fakapapau ʼi te taʼu 1473 ʼi muʼa ʼo totatou temi, ko te tokolahi ia nātou neʼe nātou agatuʼu pea mo fai he ʼu aga heʼeʼaoga pea mo tauhi tamapua. Pea neʼe mamate ai te toko 20 000 tupu ʼi te mahaki ʼaē neʼe fakahoko e te ʼAtua. (Faka au 25:1-9) ʼI te ka haʼu, ʼi te haʼele ʼa Sehova ki “te tau o te aho fakaʼilifia o te Atua Mafimafi,” ko nātou ʼaē ʼe agatuʼu kia te ia ʼe nātou mamahi feiā anai ʼuhi ko tanatou ʼu agahala. ʼE lagi mate anai ʼihi ʼi hanatou mahaki moʼoni.—Apokalipesi 16:14, 16.
8. Ohage ko tona ʼui ia Hapakuke 3:6, koteā ʼaē ka hoko ki te ʼu fili ʼo te ʼAtua?
8 Koutou fakalogo ki te fakamatala ʼaē ʼe fai e te polofeta ʼo ʼuhiga mo te gāue ʼa Sehova ʼo te ʼatu kautau. Ia Hapakuke 3:6, ʼe tou lau fēnei: “Neʼe tuʼu [ia Sehova ʼAtua], ke ina luluʼi te kele. Neʼe sio, pea neʼe ina fakahopo te ʼu puleʼaga. Pea neʼe maumauʼi te ʼu moʼuga heʼegata; neʼe falele te ʼu kiʼi moʼuga ʼaē ʼe mole ʼiloʼi he gataʼaga ʼo tonatou tologa. ʼE ʼaʼana te ʼu haʼeleʼaga ʼo te temi muʼa.” ʼUluaki, ʼe ‘tuʼu’ ia Sehova, ohage ko te senelale ʼaē ʼe ina leʼoleʼo te malaʼe tau. ʼE tete tona ʼu fili heʼe nātou matataku. ʼE nātou sio pe ko ai ia ia ʼaē ʼe nātou tauʼi pea ʼe nātou punamaʼuli ʼo fehopoʼaki ʼi tanatou lotohoha. Neʼe fakakikite e Sesu te temi ʼaē “e tuki fatafata anai ia hako fuape o te kelekele.” (Mateo 24:30) ʼE mahino tauhala anai kia nātou, ʼe mole feala ki he tahi ke fakafeagai kia Sehova. ʼE fakaʼauha anai te ʼu kautahi fakatagata—ʼo feiā mo te ʼu puleʼaga ʼaē ʼe hage ʼe tologa ohage ko “te ʼu moʼuga heʼegata” pea mo “te ʼu kiʼi moʼuga ʼaē ʼe mole ʼiloʼi he gataʼaga ʼo tonatou tologa.” ʼE hage anai ko te ʼu “haʼeleʼaga [ʼo te ʼAtua] ʼo te temi muʼa,” ohage ko te ʼu gāue ʼaē neʼe ina fai ʼi te temi muʼa.
9, 10. Koteā ʼaē ʼe fakamanatuʼi mai e Hapakuke 3:7-11?
9 Kua “liliu ʼo vela te hāūhāū” ʼo Sehova ki tona ʼu fili. Kae koteā te ʼu mahafu ʼaē ka ina fakaʼaogaʼi ʼi tana tau lahi? Koutou fakalogo ki te fakamatala ʼa te polofeta: “Kua hā te telefua ʼo tou nahau. Ko te ʼu fuakava ʼo te ʼu telepi ʼe ko te meʼa ʼaē neʼe tala. Neʼe ke fahiʼi te kele ʼaki te ʼu vaitafe. Neʼe sio te ʼu moʼuga kia te koe; neʼe nātou mamahi ʼaupito ai. Neʼe hoko ai te ʼua lalahi. Neʼe gugulu ai te vanu ʼo te vai. Neʼe ina hiki ake tona ʼu nima ki ʼoluga. Neʼe tuʼu te laʼā pea mo te māhina, ʼi tonā nofoʼaga māʼoluga. Neʼe ʼalu tau ʼu kauʼi nahau ohage ko te mālama. Ko te ʼuhila ʼo tau tao neʼe ko he meʼa moʼo faka mālama.”—Hapakuke 3:7-11.
10 ʼI te ʼu ʼaho ʼo Sosue, neʼe fakatuʼu e Sehova te laʼā pea mo te māhina, pea neʼe ko he fakahā fakaofoofo ʼaia ʼo tona mālohi. (Sosue 10:12-14) ʼE fakamanatuʼi mai e te lea faka polofeta ʼa Hapakuke, ʼe toe fakaʼaogaʼi anai e Sehova te mālohi ʼaia ʼi Halamaketone. ʼI te taʼu 1513 ʼi muʼa ʼo totatou temi, neʼe fakahā ai e Sehova ʼe pule ki te ʼu vai ʼo te kele, he neʼe ina fakaʼaogaʼi te Tai Kula moʼo fakaʼauha te ʼu kautau ʼa Falaone. Hili kiai taʼu e 40, ko te vaitafe loloto ʼo Solotane neʼe mole ina tāʼofi te hū ʼa Iselaele ki te Kele ʼo te Fakapapau. (Sosue 3:15-17) ʼI te ʼu ʼaho ʼo te fafine polofeta ko Tepola, neʼe maumauʼi e te ʼua lahi te ʼu saliote ʼo Sisela, te fili ʼo Iselaele. (Kau Fakamāu 5:21) ʼI Halamaketone, ʼe toe fakaʼaogaʼi anai e Sehova te ʼu mālohi faka natula ʼaia, te lōmaki, te ʼua lahi pea mo te ʼu vai loloto. ʼO toe feiā pe ko Sehova ʼe ina puke te mana pea mo te ʼuhila ʼi tona nima ohage ko he tao peʼe ko he ʼu kauʼi nahau ʼi tonatou ʼaiʼaga.
11. Koteā ʼaē ka hoko mokā fakaʼaogaʼi anai e Sehova tona māfimāfi?
11 ʼE mahino papau ia, ʼe ko he meʼa fakamanavahe anai te temi ʼaē ka fakaʼaogaʼi ai e Sehova tona māfimāfi. ʼE hā ʼi te ʼu palalau ʼa Hapakuke, ʼe liliu anai te pōʼuli ko te ʼaho, pea ʼe lahi age anai te mālamagia ʼo te ʼaho ʼi te mālamagia ʼo te laʼā. Tatau aipe peʼe moʼoni peʼe ko he meʼa fakatātā te fakamatala faka polofeta ʼaia ʼo te ʼaho ʼo Halamaketone, kae ʼe tou ʼiloʼi papau, ʼe pule anai Sehova, pea ʼe ina fakaʼauha fuli anai tona ʼu fili.
ʼE Hāofaki Moʼoni Anai Te Hahaʼi ʼa Te ʼAtua
12. Koteā ʼaē ka fai e te ʼAtua ki tona ʼu fili, pea ko ai ʼaē ka hāo?
12 ʼE hoko atu e te polofeta tana fakamatala te ʼu gāue ʼa Sehova moʼo fakaʼauha Tona ʼu fili. Ia Hapakuke 3:12, ʼe tou lau fēnei: “ ʼAki tau ʼu palalau fakaʼita neʼe ke haʼele ʼi te kele katoa. ʼI tau ʼita neʼe ke tā te ʼu puleʼaga.” Kae ʼe mole fakaʼauha anai e Sehova te hahaʼi fuli. ʼE hāo anai ʼihi hahaʼi. ʼE ʼui ia Hapakuke 3:13: “Neʼe ke hū ki tuʼa moʼo hāofaki tau hahaʼi pea mo ia ʼaē neʼe ke fakanofo.” Ei, ʼe hāofaki anai e Sehova tana kau kaugana fakanofo agatonu. ʼE katoa ai anai te maumauʼi ʼo Papiloni Lahi, te kautahi faka malamanei ʼo te lotu hala. Kae ia ʼaho nei, ʼe faiga e te ʼu puleʼaga ke nātou molehi te tauhi maʼa. Mole tuai pea ʼohofiʼi anai te ʼu kaugana ʼa Sehova e te ʼu mālohi ʼa Koke ʼo Makoke. (Esekiele 38:1–39:13; Apokalipesi 17:1-5, 16-18) ʼE lava anai koa te ʼohofi ʼaia ʼa Satana? Kailoa! ʼI tona ʼita, ʼe tā ai anai e Sehova tona ʼu fili, pea ʼe ina molomoloki anai nātou ohage ko te molomoloki ʼo te pulapula. Kae ʼe ina hāofaki anai ia nātou ʼaē ʼe tauhi kia te ia ʼaki te laumālie pea mo te moʼoni.—Soane 4:24.
13. ʼE hoko feafeaʼi anai ia Hapakuke 3:13?
13 ʼE fakakikite fēnei te molehi ʼo te kau agakovi: “[Sehova] neʼe ke maumauʼi te pule ʼo te ʼapi ʼo te agakovi. Neʼe faka telefua te ʼu tafitoʼaga, ʼo aʼu ki te kia.” (Hapakuke 3:13) Ko te “ ʼapi” ʼaia ʼe ko te mālama agakovi ʼaē neʼe fakatupu e Satana te Tevolo, pea ʼe molehi anai. ʼE molomoloki anai te “pule,” peʼe ko te kau takitaki ʼaē ʼe nātou fakafeagai ki te ʼAtua. ʼE maumauʼi anai te fakatuʼutuʼu katoa ʼaia, ʼo aʼu ki tona ʼu tafitoʼaga. Ei, ʼe pulihi anai ia, pea ʼe ko he meʼa fakaloto fīmālie ia!
14-16. Ohage ko tona fakahā ia Hapakuke 3:14, 15, koteā ʼaē ka hoko ki te hahaʼi ʼa Sehova pea mo tonatou ʼu fili?
14 ʼI Halamaketone, ʼe maveuveu anai te hahaʼi ʼaē ka nātou faiga ke nātou matehi ia “ia ʼaē neʼe fakanofo” e Sehova. Ia Hapakuke 3:14, 15, ʼe palalau fēnei te polofeta ki te ʼAtua: “ ʼAki tana ʼu kauʼi ʼakau totonu, neʼe ke puhi te ʼulu ʼo tana ʼu tagata tau ʼi te temi ʼaē neʼe nātou ʼōmai ai ohage he afā moʼo veteki ʼau. Ko tonatou fiafia lahi neʼe hage ko te fiafia lahi ʼo te hahaʼi ʼaē ʼe lotomālohi ke nātou kai ia ia ʼaē ʼe maʼuli taʼomia ʼi tona nonoʼaga. Neʼe ke fakalaka ʼi te tai ʼaki tau ʼu hōsi, ʼi te tuʼuga vai lalahi.”
15 ʼI te talanoa ʼa Hapakuke ki te ʼu ‘tagata tau ʼaē ʼe nātou ʼōmai moʼo veteki ʼau,’ ʼe palalau te polofeta ki te kau fakanofo ʼa Sehova. Ohage ko te hahaʼi kaihaʼa ʼaē ʼe nātou nofo teuteu, ʼe hopo anai te ʼu puleʼaga ki te kau atolasio ʼa Sehova, moʼo matehi nātou. Ko te ʼu fili ʼaia ʼo te ʼAtua pea mo tana hahaʼi, ʼe nātou “fiafia lahi” anai heʼe nātou falala ʼe nātou mālo anai. ʼE hage anai ʼe vaivai te kau Kilisitiano agatonu, ohage ko “ia ʼaē ʼe maʼuli taʼomia.” Kae ʼi te temi ʼaē ʼe kamata ai te ʼohofi ʼa te ʼu mālohi ʼaē ʼe fakafeagai ki te ʼAtua, ʼe fakamaveuveu anai nātou e Sehova ke nātou fetauʼaki. ʼE nātou fakaʼaogaʼi anai tanatou ʼu mahafu, peʼe ko tanatou ʼu “kauʼi ʼakau,” moʼo tauʼi tonatou ʼu kaugā solia totonu.
16 Kae ʼe toe hoko anai te tahi meʼa. ʼE fakaʼaogaʼi anai e Sehova tana ʼu ʼaselo moʼo fakakatoa te fakaʼauha ʼo tona ʼu fili. ʼAki te ʼu “hōsi” ʼo tana ʼu kautau faka ʼaselo ʼaē ʼe takitaki e Sesu Kilisito, ʼe fakalaka anai ʼi “te tai” pea mo “te tuʼuga vai lalahi,” ʼaē ʼe ina fakatātā te ʼatu fili fuli ʼo te malamanei. (Apokalipesi 19:11-21) Pea ʼe pulihi anai te kau agakovi ʼi te kele. ʼE ko te fakamoʼoni mālohi ʼaia ʼo te māfimāfi ʼo te ʼAtua pea mo tana faitotonu!
ʼE ʼAmanaki Hoko Te ʼAho ʼo Sehova
17. (a) He koʼe ʼe feala ke tou tui papau ʼe hoko anai te ʼu folafola ʼa Hapakuke? (b) ʼE lava feafeaʼi hatatou faʼifaʼitakiʼi ia Hapakuke ʼi tatatou talitali ki te ʼaho lahi ʼo Sehova?
17 Tou tui papau, kua vave hoko mai te ʼu folafola ʼa Hapakuke. ʼE mole tuai anai. Koteā takotou manatu ʼi takotou kua ʼiloʼi te ʼu meʼa ʼaia? Koutou manatuʼi, neʼe faitohi Hapakuke ʼaki te takitaki ʼo te laumālie ʼo te ʼAtua. ʼE fakahoko anai e Sehova tana gāue, pea ʼe hoko ai anai he maumau lahi ʼi te kele. Koia ʼe mole tou punamaʼuli ai ki te faitohi fēnei ʼa te polofeta: “Neʼe ʼau logo, pea neʼe kamata gatutu toku fatu; pea ʼi te logoaʼa, neʼe tete ai toku ʼu laugutu; neʼe hū ai te popo ki toku ʼu hui; pea neʼe ʼau lotohoha ʼi te ʼaluʼaga ʼaē neʼe tau mo ʼau, ke ʼau talitali fakatokatoka ki te ʼaho ʼo te mamahi, heʼe hake anai ki te hahaʼi moʼo ʼohofi ʼo nātou.” (Hapakuke 3:16) ʼE mahino kia tatou, neʼe loto maveuveu ʼaupito ia Hapakuke. Kae neʼe vaivai ai koa tana tui? Kailoa! Neʼe fia talitali ki te ʼaho lahi ʼo Sehova. (2 Petelo 3:11, 12) ʼE mole toe feiā koa la mo tatou? Ei! ʼE tou tui papau, ʼe hoko anai te lea faka polofeta ʼa Hapakuke. Kae ʼo aʼu ki te temi ʼaē ka hoko ai, ʼe tou talitali anai kiai ʼaki he loto faʼa kātaki.
18. Logope la neʼe ʼiloʼi e Hapakuke ʼe hoko anai kia ia te ʼu faigataʼaʼia, kae neʼe ina tali feafeaʼi?
18 Ka hoko he tau, ʼe ʼi ai tuʼumaʼu tona ʼu fua kovi ki te hahaʼi, ʼo feiā mo te hahaʼi ʼaē ʼe mālo ʼi te tau ʼaia. ʼE hoko ai te hoge. ʼE maumau ai te ʼu koloā ʼa te hahaʼi. ʼE mole kei maʼu e te hahaʼi te ʼu meʼa ʼaē ʼe ʼaoga tāfito ki tonatou maʼuli. Kapau ʼe hoko kia tatou te faʼahi ʼaia, koteā ʼaē ka tou fai? Neʼe tuku mai e Hapakuke te faʼifaʼitaki lelei, he neʼe ina ʼui fēnei: “Tatau aipe peʼe mole fisi te fuʼu fiku, peʼe mole fua te ʼu fuʼu vite; ʼe mole lagi hoko anai te gāue ʼa te fuʼu oliveto, peʼe mole he meʼa kai ʼi te ʼu gāueʼaga; ʼe lagi toʼo kehe te kiʼi faga ōvi mai te lotoʼā, pea ʼe mole he faga pipi ʼi te ʼu lotoʼā; kae ʼo ʼuhiga mo ʼau, ʼe ʼau fiafia lahi anai ia Sehova totonu; ʼe ʼau fiafia anai ʼi te ʼAtua ʼo toku hāofaki.” (Hapakuke 3:17, 18) Neʼe ʼiloʼi lelei e Hapakuke, ʼe hoko anai kia ia te ʼu faigataʼaʼia, lagi ko te hoge. Kae neʼe mole puli kia ia tona fiafia ia Sehova tona hāofakiʼaga.
19. Koteā te ʼu faigataʼaʼia ʼaē ʼe hoko ki te tokolahi ʼo te kau Kilisitiano, kae koteā ʼaē ʼe feala ke tou tui papau kiai mo kapau ʼe tou fakamuʼamuʼa ia Sehova ʼi totatou maʼuli?
19 Ia ʼaho nei, ʼi muʼa ʼo te tauʼi e Sehova te kau agakovi, ko te tokolahi ʼe nātou tau mo te ʼu mamahi lahi. Neʼe fakakikite e Sesu ʼe hoko anai te ʼu tau, te ʼu hoge, te ʼu mafuike pea mo te ʼu mahaki ʼi ‘te fakaʼiloga ʼo tana ʼi henī’ ʼi tona tuʼulaga hau. (Mateo 24:3-14; Luka 21:10, 11) Ko te tokolahi ʼo totatou ʼu tēhina ʼe nātou maʼuʼuli ʼi te ʼu fenua ʼaē ʼe hoko ai te ʼu meʼa ʼaia ʼaē neʼe tala e Sesu, pea ʼe hoko kia nātou te ʼahiʼahi fakamataku. ʼE lagi hoko anai te faʼahi ʼaia ki te tahi ʼu Kilisitiano ki muli age. Ki te tokolahi ia tatou, ʼe lagi feala ke mole “fisi te fuʼu fiku” ʼi muʼa ʼo te fakaʼosi. Kae ʼe tou ʼiloʼi pe koʼe ʼe hoko te ʼu meʼa ʼaia, pea ʼe tupu ai tatatou lotomālohi. Tahi ʼaē meʼa, ko Sehova ʼe lagolago kia tatou. Neʼe fakapapau fēnei mai e Sesu: “Kae koutou haga kumi muʼa te puleʼaga pea mo tana faitotonu, pea ʼe toe foaki [atu] anai mo te ʼu meʼa fuli ʼaia kia koutou.” (Mateo 6:33, MN) ʼE mole faka ʼuhiga leva ʼe faigafua anai totatou maʼuli, kae ʼe fakapapauʼi mai, ʼe tokaga anai Sehova kia tatou mo kapau ʼe tou fakamuʼamuʼa ia ia ʼi totatou maʼuli.—Pesalemo 37:25.
20. Logope la te ʼu faigataʼaʼia ʼaē ʼe hoko faka temi kia tatou, koteā te meʼa ʼaē ʼe tonu ke tou lotomālohi ʼo fai?
20 Tatau aipe pe koteā te ʼu ʼahiʼahi ʼaē ʼe tau mo tatou, kae ʼe tonu ke tou haga tui ʼe hāofaki anai tatou e Sehova ʼaki tona mālohi. Ko te tokolahi ʼo totatou ʼu tēhina mo tuagaʼane ʼi Afelika, mo Eulopa Esite pea mo te tahi ʼu potu fenua ʼe hoko kia nātou te ʼu faigataʼaʼia, kae ʼe nātou haga ‘fiafia ia Sehova.’ ʼOfa pe ke tou fiafia tuʼumaʼu ia Sehova ohage ko nātou. Koutou manatuʼi, ko te Tuʼi ʼAliki ko Sehova ʼe ko te Matapuna ʼo totatou “mālohi maʼuli.” ʼE mole he temi ʼe ina galoʼi anai tatou. ʼE tou ʼiloʼi papau, ʼe hoko anai ia Halamaketone, pea hoa anai kiai te mālama foʼou ʼaē neʼe fakapapauʼi mai e te ʼAtua. (2 Petelo 3:13) Pea “ ʼe fonu anai te kele ʼi te ʼiloʼi ʼo te kolōlia ʼo Sehova ohage ko te ʼuʼufi ʼo te tai e te ʼu vai.” (Hapakuke 2:14) ʼO aʼu ki te temi taulekaleka ʼaia, tou mulimuli ki te faʼifaʼitaki lelei ʼo Hapakuke. Tou ‘fiafia lahi tuʼumaʼu ia Sehova pea tou fiafia ʼi te ʼAtua ʼo totatou hāofaki.’
Kei Koutou Manatuʼi Koa?
• ʼE malave feafeaʼi kia tatou te faikole ʼa Hapakuke?
• He koʼe ʼe haʼele ki muʼa ia Sehova?
• Koteā te meʼa ʼaē ʼe ʼui e te lea faka polofeta ʼo Hapakuke ʼo ʼuhiga mo te hāofaki?
• ʼE tonu ke tou feafeaʼi ʼi tatatou talitali ki te ʼaho lahi ʼo Sehova?
[Paki ʼo te pasina 23]
ʼE koutou ʼiloʼi koa te ʼu mālohi ʼaē ka fakaʼaogaʼi e te ʼAtua ki te kau agakovi ʼi Halamaketone?