ʼE Kei Toe Koa He Temi Loaloaga Ki Te Kau Agakovi?
“He koʼe koa [Sehova] . . . ʼe ke nofo fakalogologo mokā folo e te agakovi he tahi ʼe faitotonu age ia ia?”—Hapakuke 1:13.
1. Ko ʼafea ʼaē ka fonu katoa ai te kele ʼi te ʼiloʼi ʼo te kolōlia ʼo Sehova?
ʼE FAKAʼAUHA anai koa e te ʼAtua te kau agakovi? Kapau koia, pea ʼe tonu ke tou atalitali ʼo aʼu ki ʼafea? ʼE fai te ʼu fehuʼi ʼaia e te hahaʼi ʼo te malamanei katoa. Kofea ʼaē ʼe tou lava maʼu ai te ʼu tali? ʼE feala ke tou maʼu te ʼu tali ʼaia ʼi te ʼu folafola faka polofeta ʼaē ʼe talanoa ʼo ʼuhiga mo te temi ʼaē kua fakakatofa e te ʼAtua. ʼE nātou fakapapauʼi mai, kua vave fakamāuʼi e Sehova te kau agakovi. ʼOsi ʼaia, pea “fonu anai te kele ʼi te ʼiloʼi ʼo te kolōlia ʼo Sehova ohage ko te ʼuʼufi ʼo te tai e te ʼu vai.” ʼE maʼu te fakapapau faka polofeta ʼaia ʼi te Folafola Taputapu ʼa te ʼAtua ia Hapakuke 2:14.
2. Koteā te ʼu faifakamāu e tolu ʼa te ʼAtua ʼaē ʼe tuʼu ʼi te tohi ʼo Hapakuke?
2 Ko te tohi ʼo Hapakuke neʼe tohi ʼi te taʼu 628 ʼi muʼa ʼo totatou temi, pea ʼe maʼu ai te ʼu faifakamāu e tolu ʼa Sehova ʼAtua. Kua hoko te ʼu faifakamāu e lua. Neʼe fai e Sehova tana ʼuluaki fakamāu ki te puleʼaga ʼāfea pea mo talagataʼa ʼo Suta. Neʼe feafeaʼi ki te lua faifakamāu? Neʼe fakamāuʼi e te ʼAtua te puleʼaga agamālohi ʼo Papiloni. Koia, ʼe tonu ai ke tou falala ʼe hoko anai te tolu fakamāu. ʼI tona fakahagatonu, ʼe kua vave hoko mai. ʼUhi ko te kau faitotonu ʼo te ʼu ʼaho fakamuli ʼaenī, ʼe fakaʼauha anai e te ʼAtua te hahaʼi agakovi fuli. Ko nātou ʼaē ʼe kei maʼuʼuli ʼe nātou mamate anai ʼi “te tau o te aho fakaʼilifia o te Atua Mafimafi,” ʼaē kua vave hoko mai.—Apokalipesi 16:14, 16.
3. Koteā ʼaē ka hoko anai ki te kau agakovi ʼi totatou temi?
3 Kua tou fakaōvi ki te tau ʼo te ʼaho lahi ʼo te ʼAtua. Pea ʼe feala ke tou tui papau ʼe hoko anai te fakamāu ʼa te ʼAtua ki te kau agakovi ʼi totatou temi, ohage pe ko te fakahoko ʼo tana ʼu fakamāu kia Suta pea mo Papiloni. Kae ʼi te temi nei, tou fakakaukauʼi muʼa ohage ʼe tou maʼuʼuli ʼi Suta ʼi te ʼu ʼaho ʼo Hapakuke. Koteā ʼaē ʼe hoko ʼi te fenua ʼaia?
Te Fenua Maveuveu
4. Koteā te logo fakamataku ʼaē ʼe fakahā kia Hapakuke?
4 ʼE koutou sio kia Hapakuke, te polofeta ʼa Sehova, ʼe nofo ʼi te fuga ʼato ʼo tona ʼapi, ʼo faka mokomoko ʼi te agiagi ʼo te matagi ʼo te afiafi. ʼE nofo mo tana meʼa mahōlō. (Hapakuke 1:1; 3:19, kiʼi nota ʼi te fakaʼosi ʼo te kapite) Kae ʼe fakahā age kia Hapakuke te ʼu logo fakamataku. Ko Seoiakimi, te Hau ʼo Suta, neʼe ina matehi ia Ulia pea neʼe ina fakatotonu ke lī te sino ʼo te polofeta ki te faitoka ʼo te hahaʼi māhani. (Selemia 26:23) ʼE moʼoni, neʼe mole taupau e Ulia tana falala kia Sehova, he neʼe mataku pea hola ai ki Esipito. Kae ʼe ʼiloʼi e Hapakuke ko te agamālohi ʼa Seoiakimi, neʼe mole ina fai moʼo lagolago ki te matagafua ʼo Sehova. ʼE ʼiloga lelei te faʼahi ʼaia he neʼe meʼa noaʼi e te hau te lao ʼa te ʼAtua, pea neʼe fehiʼa ki te polofeta ko Selemia pea mo te hahaʼi ʼaē neʼe nātou tauhi kia Sehova.
5. Koteā te ʼaluʼaga fakalaumālie ʼo Suta, pea koteā te manatu ʼa Hapakuke ki te faʼahi ʼaia?
5 ʼE sio ia Hapakuke ki te ʼu ʼato ʼo te ʼu vāhaʼa fale, ʼe hake mai ai te kohu ʼo te iseso. ʼE mole tutu e te hahaʼi te iseso ʼaia maʼa Sehova. Kae ʼe nātou fai te ʼu toʼotoʼoga ʼo te lotu hala ʼaē ʼe lagolago kiai ia Seoiakimi. ʼI meʼa fakaufiufi! ʼE tagi ia Hapakuke pea mo kole mamahi fēnei: “ ʼE tonu koa ke ʼau kalaga ʼo aʼu ki ʼafea, Ê Sehova, ke ke hāofaki ʼau, ka mole ke logo kiai? ʼO aʼu koa ki ʼafea taku pāui anai kia te koe ke ke tokoni mai ʼuhi ko te aga fakamālohi, ka mole ke hāofaki koe? He koʼe ʼe ke fakamamata kia te ʼau te meʼa ʼaē ʼe kovi pea mo ke haga sioʼi te ʼu maveuveu? Pea he koʼe ʼe tuʼu ʼi ʼoku muʼa ia te kaihaʼa ʼo te ʼu koloā pea mo te agamālohi, pea he koʼe ʼe ʼi ai te ʼu kē, pea he koʼe ʼe mālo te kē? Koia kua mate noa te lao, pea ʼe mole he ʼaho ʼe hū ai te faitotonu ki tuʼa. Koteʼuhi ʼe ʼatakai te faitotonu e te agakovi, ko te tupuʼaga la ʼaia ʼo te pikopiko ʼo te faitotonu.”—Hapakuke 1:2-4.
6. Neʼe feafeaʼi te lao pea mo te faitotonu ʼi Suta?
6 Ei, ʼe lahi te kaihaʼa pea mo te agamālohi. ʼI te potu fuli ʼaē ʼe sio kiai ia Hapakuke, ʼe sio ki te ʼu maveuveu, mo te ʼu kē pea mo te ʼu tau. “Kua mate noa te lao,” ʼe mole kei ina lava fai he meʼa. Kaeā te faitotonu? ʼE mole he temi ʼe “hū ai ki tuʼa” pea mo mālo! ʼE mole he temi ʼe mālo ai. Kae ‘ ʼe ʼatakai te hahaʼi faitotonu e te hahaʼi agakovi,’ ʼo nātou fakanoaʼi te ʼu lao ʼaē neʼe fai moʼo puipui te hahaʼi ʼaē ʼe mole nātou fai he meʼa kovi. Ei, ‘ ʼe pikopiko te faitotonu.’ Kua kākāʼi pea ʼe ko he meʼa fakaʼofaʼofa!
7. Koteā ʼaē ʼe lotomālohi e Hapakuke ke ina fai?
7 ʼE ʼai te kiʼi tuʼu ʼa Hapakuke moʼo fakakaukauʼi te ʼaluʼaga ʼaia. ʼE ina tuku anai koa tana gāue? Kailoa! Neʼe ina manatuʼi te ʼu fakataga ʼaē neʼe hoko ki te kau kaugana agatonu ʼa te ʼAtua, pea ʼaki he lotomālohi neʼe ina toe hoko atu tana nofo agatonu moʼo fakahoko tana gāue faka polofeta maʼa Sehova. ʼE fakahā anai e Hapakuke te logo ʼa te ʼAtua—tatau aipe peʼe mate ai.
ʼE Fakahoko e Sehova He “Gāue” Fakaofoofo
8, 9. Koteā te “gāue” fakaofoofo ʼaē ʼe fakahoko e Sehova?
8 Neʼe ʼi ai te meʼa neʼe hā kia Hapakuke, pea neʼe sio ai ki te hahaʼi ʼaē ʼe nātou tauhi ki te lotu hala, ʼe nātou fakalainoaʼi te ʼAtua. Koutou fakalogo ki te meʼa ʼaē ʼe ʼui age e Sehova kia nātou: “Koutou sisio, ʼi te lotolotoiga ʼo te ʼu puleʼaga, pea mo koutou fesioʼaki ʼaki he fakapunamaʼuli.” ʼE mahino ia, ʼe feʼekeʼaki ia Hapakuke pe koʼe ʼe palalau feiā ia Sehova ki te kau agakovi ʼaia. Pea ʼe logo ki te ʼui age fēnei ʼa Sehova kia nātou: “Koutou punamaʼuli; heʼe ʼi ai te gāue ʼe fai ʼi tokotou ʼu ʼaho, pea ʼe mole koutou tui anai kiai logola tona tala atu.” (Hapakuke 1:5) ʼI tona fakahagatonu, ʼe ko Sehova totonu ʼaē ʼe ina fai te gāue ʼaē ʼe mole nātou tui kiai. Koteā te gāue ʼaia?
9 ʼE fakalogo fakalelei ia Hapakuke ki te ʼu palalau ʼa te ʼAtua ʼaē ʼe tuʼu ia Hapakuke 1:6-11. ʼE ko te logo ʼaia ʼa Sehova pea ʼe mole feala ki he ʼatua loi pe ko he tamapua mate ke ina tāʼofi tona fakahoko: “Koʼeni ʼe ʼau lagaʼi ake te kau Kalitia, te puleʼaga kona pea mo hoko ʼita, ʼaē ʼe ʼalu ki te ʼu potu fenua lalahi ʼo te kele moʼo faʼao te ʼu nofoʼaga ʼaē ʼe mole ʼaʼana. ʼE fakamataku pea mo fakatupu manavahe. ʼE haʼu mai ia ia totonu tona faitotonu pea mo tona ʼalikisia. Pea ko tana ʼu hōsi ʼe lele vave age ʼi te ʼu leopa, pea ʼe fekai age ʼi te ʼu lupo ʼo te afiafi. Pea ko tana ʼu hōsi neʼe nātou tuki te kele ʼaki tonatou ʼu vaʼe, pea ʼe nātou ʼōmai mai mamaʼo. ʼE nātou lele ohage ko te akuila ʼaē ʼe lele fakavilivili ke ina kai he meʼa. ʼE haʼu katoa moʼo fai te agamālohi. Ko te fakatahi ʼo tonatou ʼu fofoga ʼe hage ko te matagi ʼo te esite, pea ʼe ina tānaki he hahaʼi pilisoni ohage ko te ʼone. Pea ʼe ina vāʼi te ʼu hau totonu pea ʼe ina manukiʼi te hahaʼi maʼu tuʼulaga. Pea ʼe ina vāʼi te ʼu kolo tau fuli, ʼe ina tānaki te efu pea ʼe ina faʼao [te ʼu kolo tau]. ʼI te temi ʼaia, ʼe haʼele anai ki muʼa ohage ko te matagi pea ʼe ʼalu anai pea ʼe lākahala anai. Ko tona mālohi ʼe haʼu mai tona ʼatua.”
10. Ko ai ʼaē ʼe lagaʼi ake e Sehova?
10 ʼE ko te fakatokaga faka polofeta mālohi ʼaia ʼa te ʼAtua Māʼoluga! ʼE lagaʼi ake e Sehova te kau Kalitia, te puleʼaga aga fefeka ʼo Papiloni. ʼI tana haʼele ki te ʼu ‘potu fenua lalahi ʼo te kele,’ ʼe ina faʼao anai te ʼatu nofoʼaga. ʼI meʼa fakamataku ʼaupito! Ko te kautau ʼa te kau Kalitia ʼe “fakamataku pea mo fakamanavahe.” ʼE ina fai e ia totonu tana ʼu lao fefeka. ‘Ko tana faitotonu ʼe haʼu mai ia ia totonu.’
11. Koutou fakamatala pe neʼe feafeaʼi te ʼohofiʼi ʼo Suta e te kau solia Papiloni?
11 Ko te ʼu hōsi ʼo Papiloni ʼe nātou lele vave age ʼi te ʼu leopa. Ko tona ʼu tagata heka hōsi ʼe nātou fekai age ʼi te ʼu lupo ʼaē ʼe nātou kumi meʼa kai ʼi te afiafi. ʼI tanatou fia foimo ʼolo, ‘ ʼe tā e tanatou ʼu hōsi te kele ʼaki tonatou ʼu vaʼe.’ Mai te fenua mamaʼo ʼo Papiloni, ʼe nātou ʼolo ki Suta. ʼE lele te kau Kalitia ohage ko te akuila ʼaē ʼe lele vave ki tana meʼa kai lelei, pea ʼe nātou fakatō vave kiai. Kae ʼe ko he ʼohofi pe koa ʼe fai e he ʼu solia tokosiʼi? Kailoa! “ ʼE nātou ʼōmai katoa moʼo fai te agamālohi,” ohage pe ko he foʼi kautau ʼe haʼu moʼo maumauʼi ia meʼa fuli. ʼE hā ʼi tonatou fofoga tanatou holi mālohi ki te faʼahi ʼaia, pea ʼe nātou ʼolo ki te potu uesite ki Suta pea mo Selusalemi, ʼo nātou lele vave ohage ko te matagi esite. ʼE tokolahi ʼaupito te hahaʼi pilisoni ʼa te kau solia Papiloni, ʼe hage ʼe nātou ‘tānaki he hahaʼi pilisoni ohage ko te ʼone.’
12. E feafeaʼi te aga ʼa te kau Papiloni, pea koteā te “lākahala” ʼaē neʼe fai e te fili fakamataku ʼaia?
12 ʼE vāʼi e te kautau Kalitia te ʼu hau pea mo te ʼu hahaʼi maʼu tuʼulaga, ʼaē ʼe mole nātou lava tāʼofi tana haʼele ki muʼa. ʼE ina ‘vāʼi te ʼu kolo tau fuli,’ koteʼuhi ʼe nātou tō fuli mokā ‘tānaki te tuʼuga efu e te kau Papiloni’ heʼe nātou laga he tuʼuga kele moʼo ʼohofiʼi te kolo. ʼI te temi ʼaē kua fakakatofa e Sehova, ko te fili fakamataku ʼaia ʼe “haʼele anai ki muʼa ohage ko te matagi.” ʼI tana ʼohofi ia Suta pea mo Selusalemi, ʼe “lākahala anai” heʼe ina gaohi koviʼi anai te hahaʼi ʼa te ʼAtua. ʼI tanatou mālo, ʼe laupisi fēnei anai te kamutoa Kalitia: ‘Ko te mālohi ʼaia ʼe haʼu mai tomatou ʼatua.’ Kae ʼe mole ina ʼiloʼi te moʼoni!
Te Tafitoʼaga Lelei Ki Totatou ʼAmanaki
13. He koʼe ʼe lahi te ʼamanaki ʼa Hapakuke pea mo tana loto falala?
13 ʼI tana kua mahino lelei ki te fakatuʼutuʼu ʼa Sehova, ʼe toe lahi ai mo te ʼamanaki ʼo te loto ʼo Hapakuke. ʼE falala katoa kia Sehova, pea ʼe hā ʼi tana ʼu palalau tana fakaʼapaʼapa ki ai. Ohage ko tona tohi ia Hapakuke 1:12, ʼe ʼui fēnei e te polofeta: “ ʼE mole ke maʼuli koa la talu mai fualoa, Ê Sehova? Ê toku ʼAtua, ʼe ke Maʼoniʼoni, pea ʼe mole ke mate.” Ei, ko Sehova ʼe ʼAtua “talu mai te ʼu temi heʼegata ki te ʼu temi heʼegata”—ʼo talu ai.—Pesalemo 90:1, 2.
14. Koteā te ʼu meʼa ʼaē neʼe fai e te kau ʼaposita ʼo Suta?
14 ʼI tana fakakaukauʼi te meʼa ʼaē neʼe fakahā e te ʼAtua kia ia pea mo tana fiafia ʼi te fakasiosio tonu ʼaē neʼe ina maʼu ai, ʼe hoko atu fēnei e te polofeta: “Ê Sehova, neʼe ke fakatuʼu ia ia ke ina fai te fakamāu, Ê Maka, neʼe ke fakatuʼu ia ia ke ina fai te fakatonutonu.” Neʼe fakatūʼa e Sehova ʼAtua te kau ʼaposita ʼo Suta pea ʼe ina fakatonutonuʼi pea mo tauteaʼi anai nātou. Neʼe tonu ke nātou kumi ia ia ohage ko tonatou Maka, te tule mālohi moʼoni pe ʼaia e tahi, mo te nonoʼaga pea mo te Matapuna ʼo te hāofaki. (Pesalemo 62:7; 94:22; 95:1) Kae ko te kau takitaki ʼaposita ʼo Suta ʼe mole nātou fakaōvi ki te ʼAtua, pea ʼe nātou hoko atu tanatou fakatagaʼi te hahaʼi atolasio ʼa Sehova ʼaē ʼe mole nātou fai he meʼa kovi.
15. Koteā te faka ʼuhiga ʼo te ʼui ʼaē ‘ ʼe maʼoniʼoni fau te fofoga ʼo Sehova ke sio ki te kovi’?
15 ʼE fakaloto mamahi te ʼaluʼaga ʼaia ki te polofeta ʼa Sehova. Koia ʼe ina ʼui fēnei: “ ʼE maʼoniʼoni fau tou fofoga ke ke sio ki te meʼa ʼaē ʼe kovi; pea ʼe mole ke lava sioʼi te malaʼia.” (Hapakuke 1:13) Ei, ko Sehova ‘ ʼe maʼoniʼoni fau tona fofoga ke sio ki te meʼa ʼaē ʼe kovi,’ ko tona faka ʼuhiga ʼe mole ina tali te ʼu aga ʼaē ʼe kovi.
16. E feafeaʼi takotou fakanounou ia Hapakuke 1:13-17?
16 Pea ʼe fai e Hapakuke te ʼu fehuʼi maʼuhiga. ʼE ina fehuʼi fēnei: “He koʼe ʼe ke sioʼi te hahaʼi kākā, pea mo ke nofo fakalogologo mokā folo e te agakovi ia ia ʼaē ʼe faitotonu age ia ia? Pea he koʼe ʼe ke fakaliliu te tagata kelekele ke tatau mo te ʼu ika ʼo te tai, ke tatau mo te ʼu manu totolo ʼaē ʼe mole puleʼi e he tahi? Ko nātou fuli ʼaia neʼe ina puke ʼaki te mātaʼu, ʼe ina toho nātou ʼaki tona kupega, pea ʼe ina tānaki nātou ʼi tona kupega. Ko te tupuʼaga la ʼaia ʼo tana fakafiafia pea mo tana fiafia. Koia la ʼaē ʼe ina momoli ai he sakilifisio ki tona kupega pea mo fakakohu he ʼu sakilifisio ki tona kupega; he ʼaki ia nāua ko tona vahe ʼe tafe ko te lolo pea ʼe lelei tana meʼa kai. ʼE ko te faʼahi koa ʼaia ʼaē ʼe tupu ai tana tūtū tana kupega, pea mo maʼua ai ke ina matehi tuʼumaʼu te ʼu puleʼaga ʼo mole manavaʼofa?”—Hapakuke 1:13-17.
17. (a) He koʼe ʼe feala ke tou ʼui neʼe fakahoko e te kau Papiloni te fakatuʼutuʼu ʼa Sehova ʼi tanatou ʼohofiʼi ia Suta pea mo Selusalemi? (b) Koteā ʼaē ka fakahā anai e Sehova kia Hapakuke?
17 ʼI tanatou ʼohofiʼi ia Suta pea mo tona kolo hau ko Selusalemi, ʼe fai pe anai e te kau Papiloni te ʼu meʼa ʼaē ʼe nātou loto kiai. ʼE mole mahino anai kia nātou ʼe ko Sehova ʼaē ʼe ina fakaʼaogaʼi nātou moʼo fakahoko tana fakamāu faitotonu ki te hahaʼi heʼe agatonu. ʼE tou mahino gafua pe koʼe neʼe lagi faigataʼa kia Hapakuke tana mahino ki te fakaʼaogaʼi e te ʼAtua te kau Papiloni agakovi moʼo fakahoko Tana faifakamāu. Ko te kau Kalitia aga fefeka ʼaia ʼe mole nātou tauhi kia Sehova. Kia nātou ko te hahaʼi ʼe hage pe ko he ʼu ‘ika pea mo he ʼu manu ʼe totolo’ pea ʼe tonu ke puke pea mo puleʼi. Kae ʼe mole punamaʼuli fualoa anai ia Hapakuke. Mole tuai pea fakahā anai e Sehova ki tana polofeta ko te kau Papiloni ʼe mole nātou hāo anai ʼi te tautea, ʼuhi ko tanatou kaihaʼa ʼaki he loto mānumānu pea mo te lahi ʼo tanatou ligi toto.—Hapakuke 2:8.
ʼE Fakalogo Ki Te Tahi ʼu Palalau ʼa Sehova
18. Koteā te meʼa ʼaē ʼe tou ako mai te aga ʼa Hapakuke, ohage ko tona fakahā mai ia Hapakuke 2:1?
18 Kae ʼi te temi nei, ʼe talitali ia Hapakuke ke fai age e Sehova tana tahi ʼu palalau. ʼAki he fakamalotoloto, ʼe ʼui fēnei e te polofeta: “ ʼI toku tule leʼo ʼe ʼau haga tuʼu ai anai, pea ʼe ʼau fia leʼoleʼo ʼi te kaupā; pea ʼe ʼau leʼoleʼo anai moʼo vakaʼi pe koteā anai te ʼu palalau ʼaē ka ina ʼui mai ke ʼau tala, pea koteā anai taku tali ki toku fakatonutonuʼi.” (Hapakuke 2:1) ʼE fia ʼiloʼi fakamalotoloto e Hapakuke te meʼa ʼaē ka ʼui age e Sehova ke ina fakahā ʼi tana gāue faka polofeta. ʼUhi ko tana tui ʼaē ko Sehova ʼe ko he ʼAtua ʼe mole ina tali te agakovi, ʼe ina feʼekeʼaki pe koʼe ʼe mafola te agakovi, kae ʼe lotolelei ke fakatonutonuʼi tana manatu. Kaeā tatou? Mokā tou feʼekeʼaki pe koʼe ʼe hoko te ʼu meʼa kovi, ko tatatou falala ki te faitotonu ʼa Sehova ʼAtua ʼe tonu ke tokoni mai ke tou taupau he manatu lelei pea ke tou talitali kia ia.—Pesalemo 42:5, 11.
19. ʼO mulimuli ki te folafola ʼa te ʼAtua kia Hapakuke, koteā te meʼa ʼaē neʼe hoko ki te kau Suta ʼaē neʼe hēʼia?
19 Ohage pe ko te meʼa ʼaē neʼe ina ʼui kia Hapakuke, neʼe fakahoko e te ʼAtua tana fakamāu ki te puleʼaga ʼo te kau Sutea ʼaē neʼe hēʼia, ʼo ina tuku te kau Papiloni ke nātou hūfi ia Suta. ʼI te taʼu 607 ʼi muʼa ʼo totatou temi, neʼe nātou fakaʼauha ia Selusalemi pea mo te fale lotu, pea neʼe nātou matehi te hahaʼi matutuʼa pea mo te kau tūpulaga, ʼo nātou ʼave fakapōpula te tokolahi. (2 Fakamatala 36:17-20) ʼI te hili ʼo te temi loaloaga ʼaē neʼe nātou ʼaunofo ai ʼi Papiloni, neʼe liliu te toe ʼo te kau Sutea agatonu ki tonatou fenua pea neʼe nātou toe laga ai te fale lotu. Kae hili kiai, neʼe toe heʼe agatonu te kau Sutea kia Sehova—tāfito la ʼi tanatou fakafisi kia Sesu te Mesia.
20. Neʼe fakaʼaogaʼi feafeaʼi e Paulo ia Hapakuke moʼo palalau ki te fakafisi kia Sesu?
20 Ohage ko te meʼa ʼaē ʼe ʼui ia Gaue 13:38-41, neʼe fakamahino e te ʼapositolo ko Paulo ki te kau Sutea ʼi Atioke pe koteā ʼaē ka hoko mo kapau ʼe nātou fakafisi kia Sesu pea mo meʼa noaʼi tana sakilifisio faitotogi. ʼI tana fakaʼaogaʼi ia te vaega ʼo Hapakuke 1:5 ʼi te Septante, neʼe fai e Paulo te fakatokaga ʼaenī: “Koutou tokaga naa kakusia koutou e te folafola e tuu i te tohi a te kau polofeta: ‘Koutou mamata mai, ia koutou fakaagaʼaga, e puna outou mauli pea koutou mamate! koteuhi e au tufugai he gaue i toutou temi mauli, ko he gaue e mole koutou tui ki ai moka fakaha atu ia e he tahi.’ ” ʼO mulimuli ki te folafola ʼaē neʼe fakaʼaogaʼi e Paulo, neʼe toe hoko te vaega ʼo Hapakuke 1:5 ʼi te fakaʼauha ʼo Selusalemi pea mo tona fale lotu e te kau Loma, ʼi te taʼu 70 ʼo totatou temi.
21. Neʼe koteā te manatu ʼa te kau Sutea ʼo te temi ʼo Hapakuke ʼo ʼuhiga mo te “gāue” ʼaē ko te fakaʼauha ʼo Selusalemi e te kau Papiloni?
21 ʼI te manatu ʼa te kau Sutea ʼo te temi ʼo Hapakuke, ko te “gāue” ʼa te ʼAtua ʼo ʼuhiga mo te fakaʼauha ʼo Selusalemi e te kau Papiloni, neʼe mole feala ke hoko koteʼuhi neʼe ko te potu tāfito ʼaia ʼo te tauhi kia Sehova pea neʼe fakanofo ai tana hau. (Pesalemo 132:11-18) Koia la ʼaē neʼe mole heʼeki maumauʼi ai ia Selusalemi. Neʼe mole heʼeki tutu tona fale lotu. Neʼe mole heʼeki maumauʼi te fale hau ʼo Tavite. Ki te kau Sutea, neʼe mole feala ke tuku e Sehova ke hoko te ʼu meʼa ʼaia. Kae ʼaki ia Hapakuke, neʼe fakahā fakatomuʼa e te ʼAtua ʼe hoko anai te ʼu meʼa ʼaia. Pea ʼe hā mai ʼi te hisitolia neʼe hoko ia meʼa fuli ohage pe ko tona fakakikite.
Ko Te Gāue “Fakaofoofo” ʼa Te ʼAtua ʼi Totatou Temi
22. Koteā te “gāue” fakaofoofo ʼaē ka fai e Sehova ʼi totatou temi?
22 ʼE fai anai koa e Sehova he “gāue” fakaofoofo ʼi totatou temi? Koutou tui papau ʼe ina fai anai, tatau aipe peʼe mata faigataʼa te faʼahi ʼaia ki te hahaʼi lotolotolua. ʼI totatou temi, ko te gāue fakaofoofo ʼaē ka fakahoko e Sehova, ʼe ko te fakaʼauha ʼo te Keletiate. Ohage ko te Suta ʼāfea, ʼe ʼui e te Keletiate ʼe tauhi ki te ʼAtua kae kua fakahehema katoa. ʼE vakaʼi anai e Sehova ke pulihi fuli te ʼu toega ʼo te fakatuʼutuʼu faka lotu ʼo te Keletiate, ohage pe ko “te Lahi ko Papilone,” te kautahi faka malamanei ʼo te lotu hala.—Apokalipesi 18:1-24.
23. Koteā te meʼa ʼaē neʼe uga e te laumālie ʼo te ʼAtua ke fai e Hapakuke ki muli age?
23 Neʼe fakatuʼutuʼu e Sehova ke fai e Hapakuke te tahi gāue, ʼi muʼa ʼo te fakaʼauha ʼo Selusalemi ʼi te taʼu 607 ʼi muʼa ʼo totatou temi. Koteā ʼaē ka toe ʼui anai e te ʼAtua ki tana polofeta? ʼE logo anai Hapakuke ki he ʼu meʼa ʼe tupu ai anai tana fia fakaʼaogaʼi tana meʼa mahōlō moʼo hiva kia Sehova he ʼu kole mamahi. Kae ʼuluaki, ko te laumālie ʼo te ʼAtua ʼe ina uga anai ia ia ke ina tala te ʼu lea faka polofeta ʼo ʼuhiga mo te ʼu malaʼia ʼaē ka hoko. ʼE mahino papau ia, ʼe tou fia mahino ki te ʼuhiga loloto ʼo te ʼu folafola faka polofeta ʼaē neʼe fai e te ʼAtua ki te temi ʼaē neʼe ina fakakatofa. Koia ke tou tokagaʼi fakalelei te lea faka polofeta ʼa Hapakuke.
Kei Koutou Manatuʼi Koa?
• Koteā te ʼu meʼa ʼaē neʼe hoko ʼi Suta ʼi te temi ʼo Hapakuke?
• Koteā te “gāue” fakaofoofo ʼaē neʼe fai e Sehova ʼi te temi ʼo Hapakuke?
• Neʼe koteā te fakatafito ʼo te ʼamanaki ʼa Hapakuke?
• Koteā te “gāue” fakaofoofo ʼaē ka fai anai e te ʼAtua ʼi totatou temi?
[Paki ʼo te pasina 9]
Neʼe fia ʼiloʼi e Hapakuke pe koʼe ʼe tuku e te ʼAtua ke mafola te agakovi. ʼE toe feiā koa mo koutou?
[Paki ʼo te pasina 10]
Neʼe fakakikite e Hapakuke ʼe fakaʼauha anai e te kau Papiloni te fenua ʼo Suta
[Paki ʼo te pasina 10]
Ko te ʼu toega ʼo Selusalemi aē neʼe fakaʼauha ʼi te taʼu 607 ʼi muʼa ʼo totatou temi