Koteā Te Kalavi Ki He Ikuʼaga Lelei?

NEʼE teuteuʼi fakalelei e te ʼu tagata poto e lua te masini faikehe moʼo fai te ʼahiʼahi maʼuhiga. Fokifā pe, neʼe havili te tuʼani matagi ʼo ina ʼave te masini ʼaia, ʼo takaminomino ʼi te ʼaele pea ina peʼehi ki lalo ʼi he logoaʼa lahi. Neʼe tutuʼu fakalogologo te ʼu tagata ʼaia e lua, he neʼe nā lotomamahi ʼi te meʼa ʼaia neʼe hoko. Neʼe laliki katoa te masini ʼaē neʼe nā gāue kinakina kiai pea mo fakaʼeteʼete kiai.

Neʼe mole ko te hoki hoko ʼaia ʼo he meʼa feiā kia Orville pea mo Wilbur Wright ʼi te ʼaho ʼaia ʼo ʼOketopeli 1900, ʼi tanā faiga ʼaē ke nā faʼu he vakalele, he masini ʼe mamafa age ʼi te ʼaele. Ki muʼa atu, neʼe kua lahi te temi pea mo te paʼaga ʼaē neʼe nā fakaʼaogaʼi ki te faʼahi ʼaia.

Kae ki muli age leva, neʼe fua tanā faʼa kātaki ʼaia. ʼI te ʼaho 17 ʼo Tesepeli 1903, ʼi te kolo ʼo Kitty Hawk, ʼi Caroline Noleto, ʼi Amelika, ko te tautēhina Wright neʼe nā ʼahiʼahi te vakalele pea neʼe lele ia sekonita e 12​—logola ʼe mole loaloaga mokā fakatatau ki te ʼu folau vakalele ia ʼaho nei, kae neʼe ko he fetogi lahi ʼaia ʼi te malamanei ʼo aʼu mai ki te temi ʼaenī.

ʼE fakalogo tāfito te hoko ʼo tatatou ʼu gāue ki tatatou faʼa kātaki. Peʼe tou lolotoga ako he lea, pe ko he gāue, pe ko hatatou fakakaumeʼa mo he tahi, ʼe tou lavaʼi anai ni ʼu meʼa maʼuhiga mo kapau ʼe tou faiga tuʼumaʼu. ʼE ʼui fēnei e te tagata faitohi ko Charles Templeton: “ ʼE tuʼa hiva ʼi te hogofulu te iku ʼo hakita gāue mokā kita gāue kinakina.” ʼE tohi fēnei e te tagata tohi sulunale ko Leonard Pitts Jr.: “ ʼE tou ʼui ʼe ko te poto, pe neʼe hoko feiā pe, kae ʼe tautau galo kia tatou te ʼu meʼa maʼuhiga. Te gāue kinakina pea mo te ʼu lakaga ʼaē neʼe mole iku lelei ai te ʼu gāue. Te ʼōmai fakatomuʼa ki te gāue pea mo te ʼolo tauhala.”

ʼE fakamoʼoni e te ʼu palalau ʼaia ki te meʼa ʼaē kua fualoa te talanoa kiai ʼa te Tohi-Tapu: “Ko te nima ʼo ia ʼaē ʼe faʼa gāue ʼe ko ia ʼaē ka pule anai.” (Tāʼaga Lea 12⁠:24) Ko te faʼa gāue ko tona faka ʼuhiga ʼe tou kātaki ʼi tatatou ʼu faiga. ʼE maʼuhiga te faʼahi ʼaia mo kapau ʼe tou fia fakahoko te gāue ʼaē neʼe tou fakatuʼutuʼu ke tou fai. Koteā te faʼa kātaki? ʼE tou lava faʼa kātaki feafeaʼi moʼo fakahoko tatatou ʼu fakatuʼutuʼu, pea koteā te ʼu fakatuʼutuʼu ʼaia? ʼE tali anai te alatike ʼaē ka hoa mai ki te ʼu fehuʼi ʼaia.

[Haʼuʼaga ʼo te paki pasina 3]

U.S. National Archives photo