Neʼe Fakaloto Mālohiʼi Te 108 Kalasi ʼo Kalaate Ke Nātou Fai He Tauhi Taputapu

ʼI TE Tohi-Tapu, ʼe tau fakahigoaʼi te tauhi ki te ʼAtua, ko “te tauhi taputapu.” Ko te kupu ʼaia ʼe haʼu mai te kupu faka Keleka, ʼe faka ʼuhiga ki te tauhi taputapu ʼaē ʼe kita fai ki te ʼAtua. (Loma 9⁠:​4, MN) Ko te toko 5 562 hahaʼi ʼaē neʼe nātou fakalogo ki te polokalama ʼaē neʼe foaki ai te ʼu pepa ʼo te 108 kalasi ʼo te Faleako Faka Tohi-Tapu ʼo Kalaate ʼa te Sosiete Watchtower, neʼe nātou logo ki te ʼu tokoni lelei ʼaē neʼe fai e te ʼu tēhina faiakonaki, ʼaē ka ʼaoga anai ki te kau ako moʼo fai he tauhi taputapu lelei kia Sehova ʼAtua.a

Ko te Tēhina ʼaē neʼe pelesita, neʼe ko Theodore Jaracz, ʼaē ʼe kau ki te Kolesi Pule ʼa te kau Fakamoʼoni ʼa Sehova. Neʼe kamata te polokalama ʼaki te katiko 52, “Ko Te Huafa ʼo Totatou Tāmai.” ʼE ʼui fēnei ʼi te katiko ʼaia, “Tou fakavikiviki ki te ʼAtua ʼofa/ʼE fakamaʼoniʼoni tona huafa lahi.” Neʼe hā lelei ai te holi fakamalotoloto ʼa te kau ako ʼaia (ʼaē ʼe ʼōmai mai ia fenua e 10), ke nātou fakaʼaogaʼi tanatou ako ʼi te ʼu fenua e 17 ʼaē ka nātou gāue misionea ai.

ʼI te ʼu ʼuluaki palalau ʼaē neʼe fai e te Tēhina ko Jaracz, neʼe ina fakatokagaʼi age te ʼu māhina e nima ʼaē neʼe nātou ako mālohi ai te Tohi-Tapu, moʼo teuteuʼi nātou ki tanatou gāue ʼi te ʼu fenua matāpule. Ko te ako ʼaia neʼe tokoni kia nātou ke nātou ‘sivi ia meʼa fuape,’ ko tona faka ʼuhiga, ke nātou vakavakaʼi ʼaki te Folafola ʼa te ʼAtua, te ʼu meʼa ʼaē neʼe kua nātou ako, pea ke nātou “puke maʼu te meʼa ʼaē ʼe lelei.” (1 Tesalonika 5⁠:​21, MN) Neʼe ina fakaloto mālohiʼi nātou ke nātou nonofo agatonu tuʼumaʼu kia Sehova, mo tana Folafola, pea mo te ʼu gāue ʼaē neʼe akoʼi age ke nātou fai. Koteā ʼaē ka tokoni anai kia nātou ʼi tanatou ʼu gāue fuli ʼaia?

Te ʼu Tokoni Lelei Moʼo Fai He Tauhi Taputapu

Ko Lon Schilling, ʼaē ʼe kau ki te Komite ʼo te ʼu Gāue ʼo te Petele, neʼe ina fai te akonaki ko tona kupu tāfito ʼaenī “ ʼE Koutou Lava Maʼuli Fakapotopoto Anai Koa?” Neʼe talanoa tāfito ki te maʼuhiga ʼo te fakapotopoto, ʼaē ʼe hā ai te poto fakaʼatua. (Sakopo 3⁠:17) Ko te fakapotopoto ʼe faka ʼuhiga ki takita fia mālalo, te mole fakapalatahi, takita loto lolomi, takita aga fakaʼapaʼapa, pea mo takita loto faʼa kātaki. Neʼe ʼui fēnei e te Tēhina ko Schilling, “ko te hahaʼi fakapotopoto ʼe mole nātou aga fefeka ki te hahaʼi, pea ʼe mole nātou fakamaʼua age he ʼu meʼa ʼe faigataʼa fau.” Koteā ʼaē ka tokoni ki he misionea ke aga fakapotopoto? ʼE mole tonu ke fia māʼoluga, kae ʼe ina kumi anai he ʼu temi faigamālie ke fakalogo ki te hahaʼi, pea ʼe ina tali anai tanatou ʼu manatu, mo kapau ʼe ʼalutahi mo te ʼu pelesepeto fakaʼatua.​—⁠1 Kolonito 9:19-23.

Ko Samuel Herd, te tahi Tēhina ʼo te Kolesi Pule, neʼe ina fai te akonaki ʼaē neʼe fakapunamaʼuli tona kupu tāfito ʼaenī, “Koutou Manatuʼi Tuʼumaʼu ʼo Kakai!” Neʼe ina fakahā age kia nātou, ʼe maʼuhiga ke nātou kakai lelei ʼi te faʼahi fakalaumālie, ke feala hanatou mālohi moʼo fai te tauhi taputapu. Neʼe ʼui fēnei e te Tēhina ko Herd, “ ʼe tuputupu vave anai takotou gāue fakalaumālie, mo kapau ʼe koutou fai fakamalotoloto takotou gāue ʼaē ko te faka mafola pea mo te akoʼi ʼo te hahaʼi. Koia ʼe ʼaoga anai ke koutou kakai lahi ʼi te faʼahi fakalaumālie, ke feala hakotou fakafuafua lelei pea mo hikihiki tokotou mālohi.” Kapau ʼe kai tuʼumaʼu he misionea ʼi te faʼahi fakalaumālie, pea ʼe mole vaivai anai heʼe mamaʼo mai tona fenua pea ʼe mole mahaki anai ʼi te faʼahi fakalaumālie. Kapau ʼe ina fai feiā, pea ʼe fiafia anai pea mo tapiki maʼu ki tana gāue ʼi te tauhi taputapu.​—⁠Filipe 4⁠:⁠13.

Ko te Tēhina faiako ʼo Kalaate, ko Lawrence Bowen, neʼe ina fai te fakaloto mālohi ʼaenī ki te kau ako “Koutou Toe Liliu Ki Te Kamata.” Koteā tona faka ʼuhiga? Neʼe ina kole ki te hahaʼi fuli ke nātou toʼo ia Tāʼaga Lea 1⁠:7 ʼaē ʼe ʼui fēnei ai, “ko te manavasiʼi kia Sehova ʼe ko te kamataʼaga ʼo te ʼatamai mālama.” Neʼe fakamahino fēnei e te Tēhina: “Ko meʼa fuli ʼaē ʼe fakafisi ki te moʼoni maʼuhiga ʼaē ʼe ina ʼui ʼe maʼuli ia Sehova, ʼe mole feala ʼi he temi ke ʼui ʼe ko te ʼatamai mālama totonu ʼaia, pea ʼe mole iku anai ʼi he temi ki te mahino totonu.” Neʼe fakatatau e te Tēhina ko Bowen te ʼu koga kehekehe ʼo he puzzle, ki te ʼu koga kehekehe ʼo te Tohi-Tapu, te Folafola ʼa te ʼAtua. Ka fakapipiki fakatahi te ʼu koga ʼaia ʼa te puzzle, pea ʼe ina faʼu te paki. Ka kita fakapikipiki fuli te ʼu koga ʼaia, pea ʼe ʼāsili lahi te paki pea ʼe kita mahino lelei ai ki te paki ʼaia. Kapau ʼe tou fai feiā, pea ʼe feala ai kia tatou fuli ke tou fai he tauhi taputapu ki te ʼAtua.

Neʼe fai te akonaki fakaʼosi e Wallace Liverance, te sikalaipe ʼo te Faleako ʼo Kalaate. Koʼeni tona kupu tāfito, “Koutou Fai He ʼu Fakafetaʼi ʼi Takotou Sakilifisio Ki Te ʼAtua.” Neʼe talanoa ki te fakamālōlō ʼa Sesu te kau kilia e toko hogofulu. (Luka 17⁠:​11-19) Neʼe ko te tokotahi pe ʼaē neʼe toe liliu mai moʼo fakavikiviki ki te ʼAtua pea mo fakafetaʼi kia Sesu. Neʼe ʼui fēnei e te Tēhina ko Liverance, “ ʼe mahino ia neʼe fiafia te toko hiva ʼi tanatou kua maʼa. Neʼe nātou leleiʼia te faʼahi ʼaia, kae ʼe hā mai neʼe nātou fia ʼolo fuli ki te pelepitelo, ke ina tala age kua nātou maʼa.” Ko te maʼa fakalaumālie ʼaē kua hoko ʼi tatatou ako te moʼoni, ʼo fakapipiki kiai te fakafetaʼi, ʼe tonu ke ina uga tatou ke tou fakafetaʼi ki te ʼAtua ʼuhi ko tana agalelei. Neʼe fakaloto mālohiʼi te kau ako ʼo te 108 kalasi ʼo Kalaate, ke nātou metitasio ki te ʼu gāue fuli ʼa te ʼAtua pea mo tana agalelei, ke feala hanatou fakahā tanatou fakafetaʼi ki te ʼAtua, ʼi tanatou tauhi pea mo tanatou ʼu sakilifisio.​—⁠Pesalemo 50⁠:​14, 23; 116⁠:​12, 17.

Te ʼu Faʼifaʼitaki Pea Mo Te ʼu Fakamatala Ki Te Faʼahiga Fai ʼo Te Tauhi ʼAia

Neʼe hoko atu te lua koga ʼo te polokalama, e te Tēhina ko Mark Noumair, te tahi tēhina faiako ʼo Kalaate. Neʼe ina fai ʼo ʼuhiga mo te ʼu meʼa ʼaē neʼe hoko ki te kalasi ʼi te fai faka mafola, lolotoga tonatou temi ako. ʼE fakafuafua, ʼi muʼa ʼo tanatou ʼōmai ki Kalaate, ko te kau ako ʼaia kua fakalaka ia taʼu e 12 ʼi tanatou gāue temi katoa ʼi te minisitelio. Lolotoga tanatou ako, neʼe lahi te ʼu ako Tohi-Tapu ʼaē neʼe nātou kamata, mo te ʼu hahaʼi kehekehe, ʼo hā ʼaki mai neʼe ʼiloʼi e te kau ako peʼe feafeaʼi tanatou “liliu ko te mea fuli ki te tagata fuape.”​—⁠1 Kolonito 9⁠:⁠22.

ʼI te ʼosi ʼo te ʼu fakamatala ʼaia ʼo te kau ako, neʼe fakafehuʼi e Charles Molohan pea mo William Samuelson ʼihi ʼo te Petele pea mo te ʼu tagata taupau feʼoloʼaki neʼe nātou kau ki te Faleako ʼo Kalaate. Ko te tahi neʼe fakafehuʼi, ko Robert Pevy, neʼe gāue ʼi Philippines ʼi tana ʼosi maʼu tana pepa ʼi te 51 kalasi ʼo Kalaate. Neʼe ina fakamatala fēnei ki te kalasi: “ ʼI te ʼu temi fuli ʼaē ʼe koutou tau ai mo he fihifihia, ko te hahaʼi ʼe nātou fai fuli atu anai he ʼu tokoni moʼo fakatokatoka takotou fihifihia. ʼE ʼi ai tuʼumaʼu pe he tahi ʼe mahino vave age ia koutou, pe ko he tahi ʼe ina fakahā atu he manatu ʼe lelei age. Kae kapau ʼe koutou vakaʼi te Tohi-Tapu pea mo koutou faiga ke koutou ʼiloʼi te manatu ʼa te ʼAtua, pea ʼe lelei age ia. ʼE lelei tuʼumaʼu anai te tali ʼaē ka ina fai atu.”

Moʼo fakakatoa te polokalama fakalaumālie lelei ʼaia, neʼe talanoa te Tēhina ʼo te Kolesi Pule ko John Barr ki te kupu tāfito ʼaenī, “Koutou Fai He Tauhi Taputapu Lelei Kia Sehova.” Neʼe ina fakahā ai ʼe feala ki te tauhi taputapu ke tokoni ki te hahaʼi fakamalotoloto ʼi te minisitelio, ke nātou fai te tauhi ʼaē ʼe leleiʼia e te ʼAtua. ʼI tana ʼosi lau te ʼu palalau ʼa Sesu ia Mateo 4⁠:​10, neʼe ʼui fēnei e te Tēhina ko Barr, “kapau ʼe tonu ke tou tauhi kia Sehova tokotahi pe, pea ʼe tonu ke tou līaki te ʼu faʼahiga tauhi tamapua kehekehe, ohage ko te mānumānu, te fia maʼu koloā, pea mo te laupisiʼi ʼo kita. ʼE ko he meʼa fakafiafia kia tatou, hatatou manatuʼi ko tatatou kau misionea, lolotoga ni ʼu taʼu talu mai te kamata ʼo te ʼu taʼu 1940, neʼe nātou tuku he faʼifaʼitaki lelei ʼi te faʼahi ʼaia. Pea ʼe mātou tui papau, ko koutou kau ako ʼo te 108 kalasi, ʼe koutou mulimuli anai ki te faʼifaʼitaki lelei ʼo nātou ʼaia. ʼE koutou fai anai he tauhi taputapu kia Sehova, ia ia ʼaē ʼe tau mo feʼauga ke fai ki ai te tauhi ʼaia.”

Neʼe ko he fakaʼosi lelei ʼaia ʼo he polokalama neʼe fakaloto mālohi. Neʼe tala mo te ʼu ʼofa mai te ʼu tēhina mo tuagaʼane ʼo te malamanei katoa, mo tufa te ʼu pepa ʼa te kau ako, pea neʼe lau e te kalasi tanatou tohi, ʼe nātou fakamālo ai ki te ako ʼaē neʼe fai age kia nātou. Neʼe fakaloto mālohiʼi te kalasi ʼaia ke nātou tapiki maʼu ki tanatou ʼu gāue pea mo tanatou tauhi kia Sehova. Ko te hahaʼi fuli ʼaē neʼe ʼōmai ki te fakatahi ʼaia, ʼo kau kiai mo te kau fakaafe ʼaē neʼe ʼōmai mai te ʼu fenua e 25, neʼe nātou kau fakatahi ki te fakaʼosi ʼo te polokalama, ʼaki te katiko pea mo te faikole.

[Kiʼi nota]

[Talanoa ʼo te pasina 23]

KO TE ʼU AGAAGA ʼO TE KALASI

ʼE nātou ʼōmai mai te ʼu fenua e: 10

ʼE nātou ʼolo ki te ʼu fenua e: 17

Ko te kau ako e: 46

Te fakafuafua ʼo tonatou ʼu taʼu: 34

Te fakafuafua ʼo tonatou ʼu taʼu ʼi te moʼoni: 16

Te fakafuafua ʼo tonatou ʼu taʼu ʼi te gāue temi katoa: 12

[Paki ʼo te pasina 24]

Ko Te 108 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.