Ko Te Kau Fai Faka Mafola ʼo Te Puleʼaga
Ko Te Fakavai ʼo Te ʼu Pulapula ʼo Te Moʼoni ʼi Chili
ʼI TE toafa, ʼi te potu tokelau ʼo Chili, ʼe feala ke fakalaka he ʼu taʼu kae mole tō ai he ʼua. Kae ka ʼua, pea ʼe liliu ai te kele magemage pea mo makaʼia ko he kele ʼe matala ai te ʼu fisiʼi teu ʼe lanu kehekehe. Ko te faʼahi makehe ʼaia ʼe ina uga ai te hahaʼi ʼo te fenua katoa ke nātou ʼōmai ʼo mamata kiai.
Kae ko te tahi faʼahi ʼe maʼuhiga age ʼe lolotoga hoko nei ʼi te hahaʼi ʼo Chili. ʼE lolotoga tafe nei te ʼu vai ʼo te ʼu moʼoni faka Tohi-Tapu ʼi te ʼu potu fuli ʼo te fenua, pea ʼe tokolahi te ʼu hahaʼi fakamalotoloto ʼe nātou “mātala” ʼo liliu ko te ʼu tisipulo ʼa Sesu Kilisito. ʼE kau te telefoni ki te ʼu puleʼaki ʼaē ʼe fakaʼaogaʼi moʼo faka mafola te ʼu vai ʼaia ʼo te moʼoni. Ko te ʼu faʼifaʼitaki ʼaenī ʼe nātou fakahā mai te ʼu fua lelei ʼo te fakaʼaogaʼi ʼo te puleʼaki ʼaia ki te fai faka mafola.
• Neʼe kole age ki te pionie ko Karina ke ina fai he faʼifaʼitaki ʼi te fakatahi faka silikosikilipisio ki te fai faka mafola ʼaki te telefoni. Kae neʼe mole heʼeki fai e Karina te koga ʼaia ʼo te fai faka mafola. Moʼo fakaloto mālohiʼi ia ia ke kau ki te polokalama ʼo te fakatahi, ko te tagata ʼāfea pea mo tona ʼohoana neʼe nā toe vakaʼi mo Karina he ʼu puani ʼo ʼuhiga mo te fai faka mafola ʼaki te telefoni. Neʼe nā toe fakaloto mālohiʼi ia ia ke faikole ke takitaki ia ia e Sehova ʼo ʼuhiga mo te faʼahi ʼaia. Pea neʼe ina fai te faʼahi ʼaia pea neʼe ina fakatotonu ai ke ina ʼahiʼahi te fai telefoni.
Neʼe fili e Karina te numelo telefoni ʼo te kolo ʼe ōvi mai pea telefoni kiai. Pea neʼe tali mai e te fafine, pea neʼe fakamahino age e Karina te tupuʼaga ʼo tana fai telefoni. Neʼe tali leleiʼi e te fafine, pea neʼe fai ai te ʼu fakatuʼutuʼu ke hoki nā toe fai palalau hili kiai ʼaho e tolu. Ko te ʼaʼahi ʼaia ʼaki te fai telefoni, neʼe iku ki te ako Tohi-Tapu neʼe fai ʼaki te kaupepa Koteā ʼAē ʼe Fakamaʼua Mai e Te ʼAtua Kia Tatou? Pea talu mai ai mo te hoko atu ʼo te ʼu ako ʼe mahōlō lelei, pea neʼe momoli e Karina te ʼu tohi moʼo tali ki te ʼu fehuʼi ʼa te fafine.
• Neʼe fakatotonu e Bernarda ke faka mafola ki te tagata neʼe faihala ʼi te numelo telefoni ʼaē neʼe ina lomi. Neʼe mole koviʼia e Bernarda te faʼahi ʼaia, kae neʼe ina fakahāhā age ko ia ko te Fakamoʼoni ʼa Sehova pea neʼe fia tokoni age ki ai. Neʼe hoko ai te fai palalau, pea neʼe fakalogo e te tagata te fakamahino age e Bernarda te kua vave molehi e te Puleʼaga ʼo te ʼAtua te heʼe faitotonu. Neʼe tuku age e te tagata tona numelo telefoni kia Bernarda, pea neʼe ina fai ai te ʼu ʼaʼahi ʼaki te telefoni. Lolotoga tanā fai palalau, neʼe ina lau age ki ai he koga ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe kole age e te tagata peʼe feala la hana maʼu hana tohi feiā, pea neʼe momoli age e Bernarda tana tohi pea mo te Tohi-Tapu. Neʼe fai ai te ʼu fakatuʼutuʼu ke ʼaʼahi ia ia e he tēhina ʼo te koga meʼa ʼaē ʼe nofo ai te tagata, pea ʼi te temi nei, ʼe ina hoko atu te “fakavai” ʼo te “ ʼakau” maʼuli ʼaia.
ʼE moʼoni, ʼi te kele magemage fakalaumālie ʼo te mālama ʼaenī, ʼe ʼi ai te ʼu pulapula ʼe ū, ʼe fakatalitali ke homo ake mokā kaku age te ʼu vai ʼo te moʼoni ʼaē ʼe nātou foaki te maʼuli. Ko te ʼu lauʼi afe hahaʼi ʼe fia ʼiʼinu, ʼe hoko atu pe tanatou “homo ake” pea mo tanatou “mātala” ʼo nātou liliu ko he kau kaugana agatonu ʼa Sehova ʼAtua.—Isaia 44:3, 4.