Te Kele—ʼE ʼAhiʼahiʼi Ai Koa Tatou?

ʼI MEʼA fakaloto fīmālie! Neʼe iku lelei te meʼa ʼaē neʼe faiga kiai. Neʼe fai e te taʼahine ako te ʼu sivi faigataʼa lolotoga vāhaʼa e lua, pea neʼe fua lelei tana ʼu faiga. Kua ina lava fai ʼi te temi nei te gāue ʼaē kua fualoa tana loto kiai.

Tokolahi te hahaʼi ʼe nātou faka ʼuhigaʼi feiā te maʼuli. ʼI tanatou manatu, ko te maʼuli ʼe ko he ʼuluaki ʼahiʼahi ʼe tonu ke hoko ki te hahaʼi fuli. Ko te hahaʼi ʼaē “neʼe nātou fakahoko lelei te sivi,” ʼe nātou maʼu he meʼa lelei ʼi he tahi age maʼuli mokā nātou mamate. ʼIo ʼe ko he meʼa fakaʼofaʼofa mo kapau ko te maʼuli ʼaenī, ʼaē ki te tokolahi ʼe nounou, neʼe ko te faʼahiga maʼuli lelei ʼaia pe e tahi ʼe feala ke maʼu e te hahaʼi. Logola te maʼuli haohaoa ʼo Sopo pea mo tana maʼu koloā, neʼe ʼui fēnei e te Tohi-Tapu ʼo ʼuhiga mo ia: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha.”​—⁠Sopo 14⁠:⁠1.

ʼO mulimuli ki te manatu ʼa te tokolahi, ʼe ʼui fēnei e te tohi New Catholic Encyclopedia: “Ko te ʼAtua ʼe ina fakatuʼutuʼu ke maʼu e te tagata te kolōlia ʼaē ʼi selo. . . . Ko te maʼuli fiafia ʼa he tagata, ʼe hoki feala ke ina maʼu ʼi te fīmālie taulekaleka ʼaē ʼi selo.” ʼI te ʼu sivi ʼaē neʼe fai ʼi Amelika ki te lotu ʼe higoa ko te ’Ēkelesia ʼo Kilisito, ʼe ʼui e te ʼēkelesia ʼaia ko te toko 80 ki te teau ia nātou, ʼe nātou faka tui ʼe lagi nātou ʼolo anai ki selo mokā nātou mamate.

ʼE tokolahi te hahaʼi ʼaē ʼe mole ko he kau Kilisitiano, ʼe nātou fakaʼamu mokā nātou mamate, ke nātou ʼolo ki he tahi koga meʼa ʼe lelei age. Ohage la ko te kau Mahometa, ʼe nātou fakaʼamu ke nātou ʼolo ki he palatiso ʼe tuʼu ʼi selo. Ko te hahaʼi ʼaē ʼe nātou lagolago ki te ʼu magaʼi lotu ʼo te Tauhi kia Puta ʼo te Kele Maʼa ʼi Siaina pea mo Saponia, ʼe nātou faka tui mokā ʼe nātou puʼaki liuliuga te kupu “Amitabha,” ʼaē ko te higoa ʼo Puta ʼo te Mālama Heʼegata, pea ʼe nātou toe tutupu anai ʼi te Kele Maʼa, peʼe ko te Palatiso ʼaē ʼe tuʼu ʼi te Potu Uesite, pea ʼe nātou maʼuʼuli ai anai ʼi he manuʼia taulekaleka.

ʼE lelei ke tou fakatokagaʼi, ko te Tohi-Tapu ʼaē kua lahi ʼaupito tona fakaliliu pea mo tona tufa ʼi te malamanei, ʼe mole ina ʼui ʼe tonu ke tou hola mai te kele, ohage ko he koga meʼa ʼe tonu ke tou nonofo faka temi ai. Ohage la, ʼe ina ʼui fēnei: “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.” (Pesalemo 37⁠:29) ʼE tou maʼu ʼi te Tohi-Tapu te palalau maʼuhiga ʼa Sesu, ʼe ina ʼui fēnei: “Manuʼia ia nātou ʼaē ʼe agavaivai: heʼe nātou maʼu anai te kele.”​—⁠Mateo 5⁠:​5, King James Version.

Ko te manatu ʼaē ʼe tou tautau logo kiai, ʼaē ʼe ina ʼui ʼe faka temi totatou nofoʼaga fakakelekele, ko tona faka ʼuhiga ko te mate ʼe ko he matapā ia ki he maʼuli taulekaleka. Kapau ʼe koutou ʼio kiai, pea ko tona faka ʼuhiga ko te mate ʼe ko he tapuakina. Kae ʼi te agamāhani ʼe manatu feiā koa te hahaʼi ʼo ʼuhiga mo te mate, peʼe nātou faiga koa nātou ke nātou fakatologa tonatou maʼuli? ʼI te agamāhani ʼe mole fia mamate te hahaʼi, tāfito la mokā ʼe mole nātou mahahaki pea mokā nātou logo fīmālie.

Kae ʼi te fonu ʼo te agakovi pea mo te mamahi ʼaē ʼi te kele, maʼa te tokolahi ko selo ʼe ko te nofoʼaga pe ʼaia e tahi ʼe tou maʼu ai te tokalelei moʼoni pea mo te fiafia. Ko te lagi ʼe ko he nofoʼaga koa ʼe maʼu ai te tokalelei fakatalakitupua, ʼe mole kei maʼu ai te agakovi pea mo te fihifihia? Pea ko te potu ʼaē ka tou ʼolo kiai ʼi te ʼosi mate, ʼe tonu koa ke tuʼu ʼi he potu ʼo te lagi? ʼE koutou punamaʼuli anai ʼi te ʼu tali ʼaē ʼe tou maʼu ʼi te Tohi-Tapu. ʼE mātou fakaafe atu koutou ke koutou lau tona ʼu tali.