Te ʼu Fehuʼi ʼa Te Kau Lautohi
Ko temi ʼe fia neʼe mamahi ai Sopo?
ʼE manatu e ʼihi hahaʼi neʼe lagi lauʼi taʼu te ʼu ʼahiʼahi ʼo Sopo, kae ʼe mole fakahā mai e te tohi ʼo Sopo pe neʼe fualoa ʼaupito tona ʼu mamahi.
ʼE ʼiloga mai ko te ʼuluaki koga ʼo te ʼu ʼahiʼahi ʼo Sopo, te mamate ʼo tana fānau pea mo te pulinoa ʼo tona ʼu koloā, neʼe mole loaloaga ia. ʼE tou lau fēnei: “Pea koʼeni neʼe hoko mai te ʼaho neʼe lolotoga kakai pea mo ʼinu vino ai tona ʼu foha pea mo tona ʼu ʼofafine ʼi te ʼapi ʼo tonatou tēhina, te foha ʼuluaki.” Pea neʼe fakahā takitahi mai kia Sopo te tahi ʼu logo ʼo ʼuhiga mo tana ʼu meʼa ʼaē kua pulinoa—tana ʼu faga manu lalahi, tana ʼu asino, tana ʼu ōvi, tana ʼu kamelo, pea mo te ʼu tagata taupau ʼo te ʼu manu ʼaia. ʼE hā mai, ʼi te ʼosi tala age ʼo te ʼu logo ʼaia, neʼe fakahā age kua mate tona ʼu foha pea mo tona ʼu ʼofafine ʼaē “neʼe nātou lolotoga kakai pea mo ʼinu vino ʼi te ʼapi ʼo tonatou tēhina, te foha ʼuluaki.” ʼE ʼiloga ia neʼe hoko te ʼu meʼa fuli ʼaia ʼi te ʼaho pe e tahi.—Sopo 1:13-19.
Ko te lua koga ʼo te ʼu ʼahiʼahi ʼo Sopo neʼe lagi loaloaga leva ia. Neʼe ʼalu ia Satana kia Sehova, pea neʼe ina lau ko Sopo ʼe to anai mo kapau ʼe lave te ʼu mamahi kia ia totonu—ki tona sino totonu. Koia, neʼe tauteaʼi ia Sopo ʼaki “te foʼi papala kovi, mai tona ʼalofi vaʼe ʼo kaku ki te tumutumu ʼo tona ʼulu.” Neʼe lagi loaloaga te mafola ʼo te mahaki ʼaia ʼi tona sino katoa. Pea neʼe lagi hili kiai he temi loaloaga pea hoki maʼu te logo ʼo ʼuhiga mo “te ʼu malaʼia fuli ʼaia” e te ʼu tagata ʼe lau ko tana kau fakaloto fīmālie, pea neʼe nātou ʼōmai kia te ia.—Sopo 2:3-11.
Ko Elifasi neʼe ko te tagata mai Temane ʼi te fenua ʼo Etome, pea ko Sofale neʼe haʼu mai te potu noleto uesite ʼo Alapi, koia ko tonā ʼu kolo neʼe mole faʼa mamaʼo mo te kolo ʼo Sopo ʼi Usa, ʼaē neʼe lagi tuʼu ʼi te potu noleto ʼo Alapi. Kae ko Pilitate neʼe ko te tagata Suite, pea ʼe mahino ia ko te hahaʼi ʼo tona fenua neʼe nonofo ʼi te loaloaga ʼo te liuʼa ʼo Eufalate. Kapau neʼe nofo ia Pilitate ʼi te koga meʼa ʼaia, neʼe lagi lauʼi vāhaʼa peʼe lauʼi māhina kia ia hana maʼu logo ʼo ʼuhiga mo te ʼaluʼaga ʼo Sopo pea mo tana fagona ki Usa. ʼE mahino ia, neʼe lagi nonofo ia nātou toko tolu ʼaia ʼi te ʼu tafatafa ʼo te fenua ʼi te temi ʼaē neʼe kamata ai te ʼu malaʼia ʼo Sopo. Logope he faʼahiga ʼaluʼaga, kae ʼi te temi ʼaē neʼe tau mai ai te ʼu kaumeʼa e toko tolu ʼo Sopo, neʼe nātou “heheka mo ia ki te kele lolotoga ʼaho e fitu mo po e fitu” ʼo mole nātou fai palalau.—Sopo 2:12, 13.
Pea hoko mai te koga fakaʼosi ʼo te ʼu mamahi ʼo Sopo, ʼaē ʼe lahi te ʼu kapite ʼe nātou fakamatalatala te ʼu meʼa fuli ʼaē neʼe hoko. Neʼe lahi te ʼu lea neʼe fai e te ʼu tagata ʼaia neʼe lau ko he kau fakaloto fīmālie, pea neʼe tau tali age kia nātou e Sopo. ʼI te fakaʼosi ʼo te ʼu fai palalau ʼaia, neʼe fakamāuʼi nātou e te tūpulaga ko Eliu, pea neʼe fakatonutonuʼi ia Sopo e Sehova mai te lagi.—Sopo 32:1-6; 38:1; 40:1-6; 42:1.
Koia, ko te mamahi ʼo Sopo pea mo tana nofo agatonu neʼe lagi hoko lolotoga te ʼu māhina, kae neʼe lagi mole hoko ʼi he taʼu katoa. ʼE lagi koutou ʼiloʼi mai he ʼu meʼa kua hoko tonu kia koutou, ʼe hage ʼe mole he gataʼaga ʼo te ʼu ʼahiʼahi ʼaē ʼe faigataʼa. Kae ʼe mole tonu ke galo kia tatou ʼe gata anai ʼi he temi, ohage ko te ʼu ʼahiʼahi ʼaē neʼe hoko kia Sopo. Kae logope he loaloaga ʼo te ʼu ʼahiʼahi ʼe tau mo tatou, kae ke tou manatuʼi te tokoni ʼa te ʼAtua, ohage ko tona fakahā e te ʼu palalau ʼaenī mai te ʼAtua: “Logope ko te mamahi ʼe faka temi pea mo maʼamaʼa, kae ʼe ina fakatupu maʼa tatou he kolōlia ʼe fakaofoofo age tona mamafa pea ʼe heʼegata.” (2 Kolonito 4:17, MN ) Neʼe tohi fēnei e te ʼapositolo ko Petelo: “Ka ʼosi leva tokotou mamahi ʼi he kiʼi temi siʼi pe, pea ko te ʼAtua ʼo te ʼofa makehe fuli pe, ʼaē neʼe ina pāui koutou ki tona kolōlia heʼegata ʼo fakatahi mo Kilisito, ʼe ina faka katoa anai takotou ako, ʼe ina fakaloto mālohiʼi anai ia koutou, ʼe ina foaki atu anai te mālohi.”—1 Petelo 5:10, MN.