ʼE Lava Logo Tahi Koa Te Hahaʼi?
LOGOPE he ʼu faʼahiga meʼa ʼe koutou tui kiai, kae ʼe lagi koutou ʼio anai ki te ʼui ʼaē ʼe ʼi ai te ʼu hahaʼi ʼi te ʼu lotu fuli ʼe nātou ʼoʼofa ki te moʼoni. ʼE feala ke maʼu mai te Lotu Inituisi, mo te Lotu Katolika, mo te Lotu Faka Sutea, pea mo ʼihi atu lotu he ʼu hahaʼi ʼe nātou leleiʼia ʼaupito te moʼoni pea mo loto lelei ke nātou kumi te moʼoni. Kae ʼe hage ia ʼe fakamavetevete te hahaʼi e te lotu. Ko ʼihi ʼe nātou fakaʼaogaʼi kovi te lotu. ʼE feala koa ke logo tahi te hahaʼi fakamalotoloto ʼo te ʼu lotu kehekehe ʼaē ʼe ʼoʼofa ki te ki meʼa ʼaē ʼe lelei pea mo moʼoni? ʼE feala koa ke fakatahiʼi ia nātou ki he fakatuʼutuʼu pe e tahi?
Ko he meʼa fakaʼofaʼofa takita sio ʼe tupu tāfito te maveuveu ʼuhi ko te lotu! Koutou fakatokagaʼi age muʼa te ʼu tau ʼaenī neʼe hoko. Neʼe fetauʼaki te kau Inituisi mo te kau Putisi ʼi Sri Lanka. Neʼe lahi te ʼu tau neʼe ligi toto ai te kau Polotesita mo te kau Katolika pea mo te kau Sutea. Ko nātou ʼe nātou lau ko te kau “Kilisitiano” neʼe nātou tau mo te kau Mahometa Tchétchénie, mo Itonesia, mo Kosovo. ʼI Malesio 2000, lolotoga te ʼu ʼaho e lua ʼaē neʼe hoko ai te ʼu tau faka lotu, neʼe mamate ai te toko 300 kau Niselia. Ei, neʼe tokoni te fehiʼa faka lotu ki te aga fakalialia ʼo te ʼu tau ʼaia.
ʼI te agamāhani, ʼe lotomamahi te hahaʼi fakamalotoloto ʼi te ʼu gāue kovi ʼe fakahoko ʼaki te lotu. Ohage la, ʼe kaugamālie te hahaʼi lotu ʼe nātou punamaʼuli ki te tali leleiʼi e te ’Ēkelesia te kau takitaki lotu ʼaē neʼe nātou fakaʼalikiʼi te tamaliki. Ko ʼihi hahaʼi tui kua nātou ufiufi ʼi te ʼu maveuveu ʼaē ʼe hoko ʼi te ʼu tuʼuga magaʼi lotu, ʼaē ʼe nātou lau ko te kau Kilisitiano, ʼo ʼuhiga mo te ʼu faʼahi ohage ko te manako ʼa he tagata ki he tahi tagata peʼe ko he fafine ki he tahi fafine pea mo te fakatō fatu. ʼE tou sio lelei ai, ko te lotu ʼe mole ina faka logo tahi ia te hahaʼi. Kae ʼe tou sio ʼi te ʼu fakamatala ʼe hoa mai, ʼe ʼi ai te hahaʼi fakamalotoloto ʼe nātou ʼoʼofa ki te moʼoni, pea ʼe nātou ʼōmai mai te ʼu lotu kehekehe.
Neʼe Nātou Holi Ki Te Moʼoni
Ko Fidelia neʼe fakamalotoloto pea mo tauhi lelei ʼi te ’Ēkelesia Katolika ʼo San Francisco ʼi La Paz, ʼi Bolivie. Neʼe tulolo ʼi muʼa ʼo te paki ʼo Malia pea neʼe ina fakatuʼu ʼi muʼa ʼo te koluse te ʼu foʼi sela matalelei ʼaupito. ʼI te vāhaʼa fuli, neʼe lahi te ʼu meʼa kai neʼe ina foaki ki te patele ke ina tufa ki te kau masiva. Kae neʼe ʼi ai te ʼu tamaliki e nima ʼa Fidelia neʼe nātou mamate neʼe kei nātou meamea pea neʼe mole heʼeki nātou papitema. ʼI te ʼui age e te patele ʼe fakamamahiʼi nātou fuli ʼi te nofoʼaga fakapōʼuli ʼa te tamaliki liliki, neʼe feʼekeʼaki fēnei ia Fidelia, ‘Kapau ʼe agalelei te ʼAtua, he koʼe ʼe ina fai he faʼahi feiā?’
Ko Tara, ko he fafine tōketā, neʼe tupu ʼi Katmandou, ʼi Népal, neʼe ko te fafine Inituisi. ʼI tana mulimuli ki te agaʼi fenua ʼaē neʼe fai e tana ʼu kui talu mai ni ʼu sēkulō, neʼe tauhi ki tana ʼu ʼatua ʼi te ʼu fale lotu Inituisi pea neʼe ʼi ai mo te ʼu fakatātā ʼi tona ʼapi. Kae neʼe fai e Tara te ʼu fehuʼi ʼaenī: He koʼe koa ʼe lahi ʼaupito te mamahi? He koʼe koa ʼe mamate te hahaʼi? Neʼe mole ina leleiʼia te ʼu tali ʼaē neʼe ina maʼu mai tana lotu.
Ki te faʼahi ʼo Panya, neʼe ko te Putisi neʼe lahilahi ake ʼi te vaʼe vaitafe ʼi Bangkok, ʼi Thaïlande. Neʼe akoʼi age ko te ʼu mamahi ʼe tupu mai te ʼu gāue neʼe fai ʼi te ʼu maʼuli ʼi muʼa atu, pea moʼo faka ʼāteaina mai kita mai te ʼu mamahi fuli ʼaia ʼe tonu ke kita pulihi te ʼu holi fuli. Ohage ko te kau Putisi fuli, neʼe akoʼi age kia nātou ke fakaʼapaʼapa lahi ki te kau monike ʼaē ʼe kofu loloa legalega, ʼaē ʼe ʼōmai ʼi te ʼu ʼapi ʼi te māfoatā fuli ʼo tae falā. Neʼe fai metitasio pea mo tānaki te ʼu paki ʼo Puta ʼi tana manatu ʼaē ʼe ina maʼu ai he puipui. ʼI te fakaʼī neʼe palalisia ai tona ʼu vae, pea neʼe ʼaʼahi e Panya te ʼu monasetelio Putisi, ʼi tana fakaʼamu ʼaē ke ina maʼu ai he fakamālōlō faka milakulo. Neʼe mole ina maʼu ai he faitoʼo peʼe ko he fakamālama fakalaumālie. Kae neʼe fakahā age ki ai te gaohi meʼa fakalauʼakau pea ina kamata fai te faʼahi ʼaia.
Neʼe tupu ake ia Virgil ʼi Amelika pea ʼi te faleako neʼe kau ki te kau Mahometa ʼUli (te kau Black Muslims). Neʼe lahi tanatou ʼu tohi neʼe ina tufa, pea ko te ʼu tohi ʼaia ʼe nātou ʼui ko te Tevolo ʼe ko te papālagi. Neʼe nātou manatu ko te tupuʼaga ʼaia ʼo te fai e te kau papālagi te ʼu aga fakalialia ki te kau ʼuli. Logope neʼe tui fakamalotoloto ia Virgil, kae neʼe hoha ki te ʼu fehuʼi ʼaenī: E feafeaʼi he ʼui ʼe agakovi fuli te kau papālagi? Pea he koʼe koa neʼe lahi te pikipikiga ʼa te paʼaga pea mo te fai faka mafola?
Logope neʼe tupu ia Charo ʼi Amelika ʼo te Potu Saute ʼaē ʼe lahi ai te lotu Katolika, kae neʼe ko te fafine neʼe tauhi lelei ki te Lotu Faka Polotesita. Neʼe ina leleiʼia tana mole kau ki te tauhi tamapua ʼaē neʼe fai e te tahi ʼu lotu. Neʼe leleiʼia e Charo tana ʼalu ki te ʼēkelesia ʼi te ʼAhotapu fuli, pea ʼi te ʼu failaulau ʼaia ʼe logo sino, neʼe kalaga ai: “Aleluia!” pea mo kau ki te ʼu hiva pea mo te ʼu meʼe faka lotu ʼaē neʼe hoko ai. Neʼe tui fakamalotoloto ia Charo neʼe kua hāofaki ia ia pea neʼe kua toe tupu ake. Neʼe ina foaki te vaega e hogofulu ʼo tona totogi ki te ʼēkelesia, pea ka kole falā te tagata fai faka mafola ʼi te televisio, ʼaē neʼe ina leleiʼia, pea neʼe ina momoli ki ai he falā maʼa te tamaliki ʼi Afelika. Kae ʼi tana fehuʼi age ki te pasitea te tupuʼaga ʼo te fakamamahiʼi e te ʼAtua ʼofa te ʼu nefesi ʼi te ʼifeli, neʼe mole ina maʼu hana tali. Neʼe hoki ina ʼiloʼi age ki muli mai, neʼe mole fakaʼaogaʼi tana ʼu meʼa ʼofa moʼo tokoni ki te tamaliki ʼi Afelika.
Logope tanatou ʼu haʼuʼaga kehekehe, kae neʼe maʼu tatau fuli e te toko nima ʼaia te faʼahi e tahi. Neʼe nātou ʼoʼofa ki te moʼoni pea neʼe nātou kumi fakamalotoloto he ʼu tali feʼauga ki tanatou ʼu fehuʼi. Kae ʼe lava feafeaʼi hanatou logo tahi moʼoni ʼi te tauhi moʼoni? ʼE tali anai te alatike ka hoa mai ki te fehuʼi ʼaia.
[Paki ʼo te pasina 4]
ʼE feala moʼoni koa ke logo tahi he ʼu hahaʼi ʼe nātou ʼōmai mai te ʼu potu kehekehe?
[Haʼuʼaga ʼo te paki pasina 3]
G.P.O., Jerusalem