Te ʼu Fehuʼi ʼa Te Kau Lautohi

E feafeaʼi he lava fakafuafua lelei e he fafine Kilisitiano tana agatonu ki te ʼAtua pea mo tana fakalogo ki tona ʼohoana ʼaē ʼe mole tauhi kia Sehova, tāfito la mokā ʼe kau tona ʼohoana ki he ʼu lafeti faka lotu?

Moʼo fai te faʼahi ʼaia, ʼe fakamaʼua ki ai he agapoto pea mo te fakaʼeteʼete. Kae ʼe ina fai te meʼa ʼaē ʼe tonu ke ina fai mokā ʼe ina fakafuafua lelei tona ʼu maʼua e lua. Neʼe tokoni fēnei ia Sesu ʼo ʼuhiga mo te ʼaluʼaga ʼe teitei tatau: “Koia, koutou ave ia mea a Sesale kia Sesale, pea mo mea a te Atua ki te Atua.” (Mateo 22:21) ʼE moʼoni ia neʼe palalau ki te ʼu maʼua ki te ʼu puleʼaga, ʼaē ki muli age neʼe fakahā ki te kau Kilisitiano tonatou maʼua fakalogo. (Loma 13:1) Kae ʼe feala pe ke fakapipiki mai te tokoni ʼa Sesu ki te fakafuafua lelei e te fafine ʼohoana tona ʼu maʼua ki te ʼAtua pea mo tana fakalogo ki tona ʼohoana, tatau aipe peʼe mole nā lotu tahi.

Ko ia ʼaē kua māhani mo te Tohi-Tapu ʼe ina ʼiloʼi lelei te faka maʼuhigaʼi e te Tohi-Tapu te maʼua ʼuluaki ʼa te Kilisitiano, ko tana agatonu ki te ʼAtua Māfimāfi ʼi te temi fuli pe. (Gaue 5:29) Kae ʼe lahi te ʼu ʼaluʼaga ʼe faigaʼi anai e ia ʼe atolasio ki te ʼAtua ke ina fai te ʼu meʼa ʼaē neʼe kole age e tona ʼohoana ʼaē ʼe mole lotu tahi mo ia, mo kapau ʼe mole fakafeagai te ʼu meʼa ʼaia neʼe kole age kia ia mo te ʼu lao ʼa te ʼAtua.

ʼE tou maʼu te faʼifaʼitaki lelei ʼi te kau Hepeleo e toko tolu, ʼaē ʼe talanoa ki ai ia Taniela kapite 3. Neʼe fakatuʼu te lao e te hau ʼo te puleʼaga, ia Nepukanesa, ke fakatahi ia nātou ʼaia mo ʼihi atu ki te mafa ʼo Tula. ʼI tanatou mahino ki te fakatuʼutuʼu ʼaia ʼo te lotu hala, neʼe lagi fakaʼamu e te toko tolu Hepeleo ke mole nātou ʼolo kiai. Neʼe lagi maʼu e Taniela he takuʼaki ke mole kau ai, kae neʼe mole feala ia te toko tolu ʼaia.a Koia neʼe nātou tutuʼu ai ʼi te koga meʼa ʼaia, kae neʼe mole nātou fai he meʼa ʼe fakafeagai kia Sehova.—Taniela 3:1-18.

ʼO toe feiā pe, lolotoga te ʼu ʼaho lafeti ʼe feala ke fakaʼui e te tagata ʼohoana peʼe ina fakamaʼua ki tona ʼohoana Kilisitiano ke ina fai age he meʼa ʼe lagi mole fia fai e te fafine. Koʼeni te ʼu faʼifaʼitaki: ʼE ʼui age e te tagata ke ina teuteuʼi he faʼahiga meʼa kai ʼi te ʼaho lafeti ʼaē ka ina fai anai mo ʼihi. Peʼe fakamaʼua anai e te tagata ke ʼolo tona kiʼi famili (ʼo kau ai mo tona ʼohoana) ʼo fai kakai ʼi he ʼu kāiga peʼe nātou ʼolo ʼo haʼele ki ai. Peʼe ʼi muʼa ʼo te ʼaho lafeti ʼaia, ʼe lagi ʼui anai e te tagata ki tona ʼohoana mokā ʼalu anai ʼo faifakatau, ʼe tonu ke ina toʼo he ʼu meʼa maʼa ia—ko he meʼa kai moʼo te ʼaho lafeti pe ʼaia, peʼe ko he ʼu meʼa moʼo fai ʼaki he ʼu meʼa ʼofa, peʼe ko he pepa fai meʼa ʼofa pea mo he ʼu kate moʼo tohi ai tona ʼu ʼofa.

ʼI te ʼu lakaga ʼaenī, ʼe lagi loto e te fafine Kilisitiano ke ʼaua naʼa kau ki te ʼu meʼa ʼo te lotu hala, kae e feafeaʼi ki te ʼu taʼi kole ʼaenī? Ko te tagata ʼe ko te pule ʼo te famili, pea ʼe ʼui fēnei e te Folafola ʼa te ʼAtua: “ ʼU fafine ʼohoana, koutou fakalogo ki ʼokoutou ʼohoana, ko te meʼa ʼaia ʼe lelei ʼi te ʼAliki.” (Kolose 3:18, MN ) ʼI te ʼu ʼaluʼaga ʼaenī, ʼe feala koa hana fakahoko tona maʼua fakalogo pea mo nofo agatonu aipe ki te ʼAtua? ʼE tonu ke ina fai he tonu ʼo ʼuhiga mo te fakafuafua lelei ʼo tana fakalogo ki tona ʼohoana pea mo tana fakalogo ʼuluaki kia Sehova.

ʼI ʼihi lakaga, ʼe lagi kole anai e tona ʼohoana ke teuteuʼi age he faʼahiga meʼa kai, ʼuhi ko te faʼahiga meʼa kai ʼaia ʼe ina leleiʼia peʼe māhani ʼi te kai ʼo te faʼahiga meʼa kai ʼaia ʼi he faʼahiga ʼaho. ʼE ina fia fakahā anai tona ʼofa ki ai pea mo fakamoʼoni ki tona ʼuhiga pule. ʼE feala koa ke ina fakahoko te potu ʼaia mo kapau la ʼe to tonu te meʼa ʼaē ʼe ina kole age mo he ʼaho lafeti? ʼE fakahoko gafua anai e ʼihi fafine Kilisitiano te potu ʼaia ʼo mole hoha tonatou leʼo ʼo loto, koteʼuhi maʼa nātou ʼe ʼalutahi pe mo tanatou fai kuka māhani. ʼE mahino ia, ʼe mole he fafine agatonu ʼe ina fakapipiki anai te meʼa ʼaē ʼe ina fai mo he ʼaho lafeti, tatau aipe pe ko tona ʼohoana ʼaē ʼe ina maʼu te taʼi manatu ʼaia. ʼO toe feiā pe, ʼe lagi kole age e te tagata ke nā ʼolo ʼo ʼaʼahi he ʼu kāiga ʼi he faʼahiga ʼaho. ʼE ʼalu anai koa mo ia tatau aipe peʼe to tonu te ʼaho ʼaia mo he ʼaho lafeti? Peʼe lotolelei anai koa ʼo fai he fakatau ʼuhi heʼe neʼe kole age e tona ʼohoana, ʼo mole ina fakakaukau ia peʼe koteā te meʼa ʼaē ka fai anai e tona ʼohoana ʼaki te ʼu meʼa ʼaia neʼe toʼo?

ʼE moʼoni, ʼe tonu ke manatuʼi e te fafine Kilisitiano peʼe koteā anai te manatu ʼa ʼihi ʼo ʼuhiga mo te faʼahi ʼaia. (Filipe 2:4) ʼE lagi mole ina loto anai ke manatu ʼihi neʼe kau ki he faʼahiga ʼaho lafeti, ohage pe la ko te toko toku Hepeleo ʼaē neʼe lagi nātou loto ke ʼaua naʼa sisio age niʼihi ki tanatou ʼolo ki te mafa ʼo Tula. Koia ʼe feala ke fai palalau mo tona ʼohoana peʼe feala la, mo kapau ʼe tokaga age ki tona loto, ke fai e ia totonu ia te ʼu meʼa ʼaē ʼe ʼalutahi mo he faʼahiga ʼaho lafeti, moʼo fakafimālieʼi tona ʼohoana ʼaē ʼe ʼofa pea mo fakaʼapaʼapa kia ia. ʼE lagi sio anai te tagata ʼe ko he aga fakapotopoto ke mole ina fai he meʼa ʼe fakaufiufi anai kia nāua, mo kapau ʼe mole fia kau te fafine ki he ʼu meʼa faka lotu. Koia, ko he felogoi ʼe fai fakatokatoka pea mo fakatomuʼa ʼe feala ke iku ai ki he puleʼaki ʼi te tokalelei.—Tāʼaga Lea 22:3.

ʼAki leva te ʼu meʼa fuli ʼaia, ʼe tonu ki te Kilisitiano ke fakasiosio lelei ki te ʼu ʼaluʼaga pea ke ina fai he tonu ʼo ʼuhiga mo te ʼu meʼa ʼaē ʼe tonu ke ina fai. ʼE tonu ke ʼuluaki fakalogo ki te ʼAtua, ohage ko tona fai e te toko tolu Hepeleo. (1 Kolonito 10:31) Kae ʼaki te puani ʼaia, ʼe tonu ke filifili e te Kilisitiano te ʼu meʼa ʼaē ʼe feala ke ina fai, ʼo ʼuhiga la mo he ʼu meʼa neʼe kole age ki ai e he tahi ʼe pule ʼi te famili peʼe ʼi te kolo.

[Kiʼi nota]