Te ʼu Fehuʼi ʼa Te Kau Lautohi

ʼE lelei koa ki he Kilisitiano moʼoni hana kau ki he ʼavaifo peʼe ko he ʼohoana ʼe fai ʼi te ʼēkelesia?

ʼE mole leleiʼia e Sehova hatatou kau ki he koga ʼo te lotu hala, pea ʼe tonu ke tou tekeʼi. (2 Kolonito 6:14-17; Apokalipesi 18:4) Ko te ʼavaifo ʼi te ʼēkelesia ʼe ko he toʼotoʼoga faka lotu, pea ko te akonaki ʼaē ʼe fai ai ʼe talanoa ki he ʼu manatu ʼe mole tuʼu ʼi te Tohi-Tapu, ohage ko te nefesi tuputupua pea mo te fakapale ʼi selo maʼa te hahaʼi agalelei fuli. ʼE lagi toe fai ai mo te pule pea mo faikole fakatahi te hahaʼi mo te patele. Ko te ʼohoana ʼaē ʼe fai ʼi te ʼēkelesia peʼe ʼi te tahi age koga meʼa, ʼe lagi toe fai anai te ʼu faikole pea mo te tahi ʼu toʼotoʼoga faka lotu ʼe fakafeagai ki te akonaki faka Tohi-Tapu. ʼE lagi feala ke faigataʼa ki he Kilisitiano hana fakafisi kiai, mo kapau ʼe nofo ʼi te lotolotoiga ʼo te hahaʼi ʼaē ʼe nātou fai fuli te ʼu toʼotoʼoga ʼaia ʼo te lotu hala. ʼE ko te fakahā koa ʼaia ʼo he aga fakapotopoto?

E feafeaʼi mo kapau ʼe manatu e he Kilisitiano ʼe tonu ke ʼalu ki he ʼavaifo peʼe ko he ʼohoana ʼe fai ʼi te ʼēkelesia? Ohage la, ko he tagata ʼe mole ʼi te moʼoni, ʼe feala ke ina fakamālohiʼi tona ʼohoana Kilisitiano ke nā kaugā ʼolo kiai. ʼE feala koa ke ʼalu kiai kae mole kau anai ki te ʼu meʼa ʼaē ka fai ai? ʼUhi heʼe ko te meʼa ʼaia ʼe loto kiai tona ʼohoana, ʼe lagi ʼalu anai te fafine ʼohoana mo ia, ʼaki tana fakatotonu ʼaē ke mole kau ki te ʼu toʼotoʼoga faka lotu. ʼI te tahi faʼahi, ʼe lagi mole ʼalu anai, ʼi tana manatu ʼaē ʼe lahi anai tona fakaneke ʼi te ʼaluʼaga ʼaia, ʼo lagi feala ai ke ina maumauʼi he ʼu pelesepeto ʼa te ʼAtua. ʼE ko ia pe ʼaē ʼe feala ke ina fai he tonu ki te faʼahi ʼaia. ʼE mahino ia ʼe ina fakatotonu mālohi anai ʼi tona loto, ke ina taupau he leʼo ʼo loto ʼe maʼa.—1 Timoteo 1:19.

Kae ʼe lelei anai kia ia ke ina fakamahino ki tona ʼohoana, ʼe mole fakagafua e tona leʼo ʼo loto, ke kau ki te ʼu toʼotoʼoga faka lotu peʼe hiva peʼe punou tona ʼulu ʼi te faikole. ʼAki tana fakamahino ʼaia, ʼe mahino anai ki te tagata, ʼe ko he fihifihia kia ia hana ʼaumai tona ʼohoana ki te toʼotoʼoga ʼaia. ʼE lagi fakatotonu anai e te tagata ke ʼalu tokotahi, ʼi tana ʼofa ki tona ʼohoana, mo fakaʼapaʼapa ki tana tui, peʼe ʼi tana mole loto ʼaē ke hoko he meʼa fakaufiufi. Kae kapau ʼe loto e te tagata ke nā kaugā ʼolo, pea ʼe feala ke ʼalu kae ke mole kau ki te ʼu meʼa ʼaia.

ʼE tonu ke tou toe tokakaga peʼe malave feafeaʼi anai ki totatou ʼu tēhina mo tuagaʼane, tatatou kau ki he toʼotoʼoga faka lotu. ʼE feala koa ke fakatupu kovi ki te leʼo ʼo loto ʼo he tahi? ʼE feala koa ke vaivai ai tanatou fakatotonu ʼaē ke mole nātou kau ki te tauhi tamapua? ʼE tokoni fēnei te ʼapositolo ko Paulo: “Ke koutou ʼiloʼi papau te ʼu meʼa ʼaē ʼe maʼuhiga tāfito, ke koutou maʼa pea ke ʼaua naʼa koutou faka tūkia he tahi ʼo kaku ki te ʼaho ʼo Kilisito.” ’—Filipe 1:10, MN.

Kapau ʼe ko he meʼa ʼe fai maʼa he tahi ʼo te famili totonu, pea ʼe feala ke lahi te fakaneke ʼa te famili. Tatau aipe peʼe faka ʼuhiga kiteā, kae ʼe tonu ke fakakaukauʼi lelei e he Kilisitiano te ʼu faʼahi fuli ʼaē ʼe feala ke hoko. ʼI ʼihi ʼaluʼaga, ʼe feala ke ina manatu ʼe mole hoko he ʼu fihifihia mo kapau ʼe ʼalu ki he fai ʼavaifo peʼe ko he ʼohoana ʼi te ʼēkelesia, kae mole kau ki te ʼu toʼotoʼoga faka lotu. Kae ʼuhi ko te ʼu meʼa ʼaē ʼe feala ke hoko ʼi tatatou ʼolo kiai, ʼe feala ke lahi age tona fua kovi ki he leʼo ʼo loto ʼo he tahi peʼe ki ʼihi, ʼi te ʼu lelei ʼaē ʼe lagi kita maʼu ʼi tatatou ʼolo kiai. Tatau aipe peʼe koteā te ʼaluʼaga, kae ʼe tonu ke mahino ki te Kilisitiano ke mole ina fai he tonu ʼe fua kovi anai ki tana taupau he leʼo ʼo loto ʼe maʼa ia muʼa ʼo te ʼAtua pea mo te tagata.