Ko Te Kau Fai Faka Mafola ʼo Te Puleʼaga

ʼE Nātou “Logo” Ki Te Logo ʼo Te Puleʼaga ʼi Pelesile

MOʼO kalagaʼi te logo lelei ʼo te Puleʼaga ki te hahaʼi tuli, tokolahi te kau Fakamoʼoni ʼa Sehova ʼi Pelesile neʼe nātou tali lelei ke nātou fai te gāue faigataʼa, ʼaē ko te ako ʼo te lea faka Pelesile ʼaki te ʼu nima. Neʼe fua lelei tanatou ʼu faiga, pea ʼe ʼiloga ʼi te ʼu fakamatala ʼaenī.

Ko Eva,a ko te fafine tuli ʼe nofo ʼi te kolo ko São Paulo, pea neʼe ina kamata ako te lea ʼaki te ʼu nima ʼi tana ʼosi mavae mo tana ʼu tamaliki e toko tolu ʼo nonofo tahi mo te tagata tuli. ʼI te foʼi fale koloā lahi, ko Eva pea mo te tagata ʼaē ʼe nā nonofo, neʼe nā felāveʼi mo te kau Fakamoʼoni ʼe nātou tuli, pea neʼe nātou fakaafe ia nāua ki he fono ʼi te Fale ʼo Te Puleʼaga. Neʼe nā tali te fakaafe, ʼi tanā manatu ʼaē ʼe ko he fakafiafia.

ʼUhi ko tana mole faʼa ʼiloʼi lelei te lea ʼaki te ʼu nima, neʼe mahino veliveli pe ia Eva ki te meʼa ʼaē neʼe lau ʼi te fono. Hili pe ʼaia, pea neʼe fakaafe ia ia e te taumatuʼa Fakamoʼoni ke ʼalu age ke nātou kakai fakatahi ʼi tonā ʼapi. ʼI tanā fakaʼaogaʼi te ʼu paki ʼo te kaupepa Fiafia Kite Mauli Heegata Ite Kele!, neʼe nā fakamahino age te palatiso ʼi te kele ʼaē neʼe fakapapauʼi e te ʼAtua ki te temi ka haʼu. Neʼe leleiʼia e Eva ia te meʼa ʼaē neʼe ina ako pea neʼe kamata tatuʼu ki te ʼu fono.

Mole tuai, pea neʼe mavete ia Eva mo te tagata ʼaē neʼe nā nonofo, ke feala hana faka ʼalutahi tona maʼuli pea mo te ʼu pelesepeto faka Tohi-Tapu. Logope te fakafeagai mālohi ʼo tona famili, kae neʼe haga tuputupu aipe ʼi te faʼahi fakalaumālie pea neʼe papitema ʼi te taʼu 1995. Hili kiai te ʼu māhina e ono, pea neʼe kamata gāue pionie ia Eva. Talu mai ai, kua tokoni ki te ʼu hahaʼi tuli e toko fā, ke nātou foaki tonatou maʼuli ki te ʼAtua pea mo nātou papitema.

Ko Carlos neʼe tupu ake kua tuli. Talu mai tana kei veliveli mo tana toloke, mo fai te ʼu aga heʼeʼaoga, pea mo kaihaʼa. ʼI tana tuʼania ki te kūtuga ʼe fakafeagai mai kiai, neʼe hola ki São Paulo ʼo nofo lolotoga he kiʼi temi mo te tagata ko João. Ohage pe ko Carlos, neʼe toe tuli mo João pea neʼe maʼuli faʼifaʼitaliha pea mo fai te ʼu aga heʼeʼaoga.

Hili kiai te ʼu taʼu, neʼe ako e Carlos ia te logo ʼo ʼuhiga mo te Puleʼaga, pea neʼe ina fetogi tona maʼuli ke ʼalutahi mo te ʼu pelesepeto faka Tohi-Tapu, pea neʼe ʼohoana. ʼI te kua ʼalutahi ʼo tona maʼuli mo te ʼu fakamaʼua faka Tohi-Tapu, neʼe papitema ia Carlos, moʼo fakahā kua foaki tona maʼuli kia Sehova. Kae lolotoga te temi ʼaia, neʼe mole ʼiloʼi e Carlos, neʼe toe ako mo João ia te logo lelei pea mo ia foki neʼe ina fetogi katoa tona maʼuli. ʼI tana mālama ʼaē ʼe mole tali e Sehova ia te fakaʼaogaʼi ʼo te ʼu paki ki te tauhi, neʼe ina līaki fuli te ʼu paki ʼo “te kau sagato.” ʼI tana ʼosi lītuʼa katoa ki tona maʼuli ʼāfea, neʼe toe papitema ai mo ia.

Neʼe fiafia ʼaupito ia Carlos pea mo João ʼi tanā felāveʼi ʼi te Fale ʼo Te Puleʼaga pea mo tanā sio ki te ʼu fetogi ʼaē neʼe nā fai! ʼI te temi nei ko nāua toko lua kua nā maʼu tamaliki, pea ko te ʼu tagata fai faka mafola faʼafai ʼo te Puleʼaga.

ʼI Pelesile, kua maʼu ʼi te temi nei te ʼu kokelekasio e 30 ki te lea ʼaki te ʼu nima pea mo te ʼu kūtuga e 154, mo te kau fai faka mafola e toko 2 500 tupu, ʼe kau ai te kau tuli e toko 1 500. ʼI te ʼu Fakatahi Faka Tisitilike “Te Kau Faiako ʼo Te Folafola ʼa Te ʼAtua” ʼaē neʼe fai ʼi te taʼu 2001 ʼi Pelesile maʼa te kau tuli, ko te toko 3 000 tupu neʼe kau ai, pea neʼe papitema ai te toko 36. ʼAki te tapuakina ʼa Sehova, ʼe fakaʼamu ke toe tokolahi ake te kau tuli ʼaē ka nātou tali anai te logo ʼo te Puleʼaga.

[Kiʼi nota]