ʼE Tokaga Ia Sehova Kia Nātou ʼe Mole Maʼuhiga

ʼE TONU koa ke tou makehe ke tokagaʼi ai tatou e te ʼAtua? ʼE ʼui ko Abraham Lincoln, te 16 pelesita ʼo Amelika, neʼe ina fai te ʼu palalau ʼaenī: “ ʼE ʼofa te ʼAliki ki te hahaʼi ʼaē ʼe mole maʼuhiga. Ko te tupuʼaga la ʼaia ʼo tana fakatupu he tokolahi feiā.” Tokolahi ʼe nātou manatu ko nātou ko he ʼu hahaʼi ʼe mole nātou maʼuhiga. Ko he tagata ʼe mole maʼuhiga, ʼe lagi faka ʼuhiga ki he tahi ʼe “masiva, ʼe veliveli.” ʼO toe feiā pe, ko te kupu “mole maʼuhiga” ʼe feala ke kita faka ʼuhiga ki “te mole maʼu ʼo he ʼu pilivilesio, peʼe ko he tuʼulaga maʼuhiga,” “ ki he tahi ʼe mālalo ifo ʼi te ʼaluʼaga māhani.” Ko ai te faʼahiga hahaʼi ʼaē ʼe koutou fia fakatahi ki ai? Te hahaʼi fiatuʼu, mo mālohi, mo fialahi? ʼE mole koutou fia fakatahi koa mo he ʼu hahaʼi aga faka kaumeʼa, mo agavaivai, mole laupisi, kae nātou tokaga moʼoni pea mo ʼofa ki te hahaʼi?

Mai tona ʼaluʼaga ʼaē ko te agamāhani ia te fakalainoaʼi pea mo te fakaufiufiʼi ʼo te hahaʼi ʼi te malamanei ia ʼaho nei, ʼe faigataʼa ki ʼihi hanatou tui ko te ʼAtua ʼe ina tokagaʼi ia nātou takitokotahi. Neʼe tohi fēnei e te tagata ʼe ina lau te nusipepa ʼaenī: “Neʼe mole lahi tamatou feʼofaʼaki ʼi toku famili. Neʼe fakalainoaʼi ʼau, mo manukiʼi ʼau, pea mo vāʼi ʼau. Koia talu taku kei veliveli ʼe hage maʼaku ʼe mole ʼau maʼuhiga. ʼE kei ʼau logoʼi te ʼu meʼa ʼaia neʼe hoko kia ʼau ʼi taku kei veliveli, pea ʼe ʼau lotovaivai ai mokā ʼau tau mo he ʼu faigataʼaʼia.” Kae ʼe ʼi ai te ʼu tupuʼaga ke tou tui ai ko te ʼAtua ʼe ina tokagaʼi te hahaʼi takitokotahi ʼaē ʼe mole maʼuhiga.

ʼE Tokaga Te ʼAtua Ki Te Hahaʼi ʼAē ʼe Mole Maʼuhiga

Neʼe tohi fēnei e te Hau ko Tavite: “ ʼE māʼoluga ia Sehova pea ʼe tāu ʼaupito ke vikiʼi ia ia, pea ko tona māʼoluga ʼe mole feala ia ke ʼiloʼi.” (Pesalemo 145:3) Logola te faʼahi ʼaia, kae ʼe tokaga Sehova kia tatou ʼaki te ʼofa pea mo te manavaʼofa. (1 Petelo 5:7) Ohage la, neʼe ʼui fēnei e te tagata fai pesalemo: “Ko Sehova ʼe ōvi kia nātou ʼaē ʼe loto lavea; pea ʼe ina hāofaki ia nātou ʼaē ʼe taʼomia tonatou laumālie.”—Pesalemo 34:18.

Ko te ʼu meʼa ʼaē ʼe tokagaʼi e te malamanei, ohage ko te matalelei, mo te ʼiloa, peʼe ko te maʼu koloā, ʼe mole ko he ʼu meʼa ʼe maʼuhiga ki te ʼAtua. Ko te Lao ʼa te ʼAtua ki Iselaele neʼe hā ai tana tokaga manavaʼofa ki te hahaʼi māsisiva, mo te ʼu fānau ʼaē ʼe hala mo mātuʼa, mo te ʼu vitua, pea mo te kau matāpule. Neʼe ʼui fēnei e te ʼAtua ki te kau Iselaele, ʼaē neʼe toe gaohi koviʼi mo nātou ʼi Esipito: “ ʼE mole tonu ke ke gaohi koviʼi he matāpule peʼe ke faka taʼomia ia ia . . . ʼAua naʼa ke fakamamahiʼi he fafine vitua, peʼe ko he tamasiʼi tagata ʼe hala mo tāmai. Kapau ʼe ke fakamamahiʼi ia ia ʼi he faʼahiga ʼaluʼaga pe, kapau ʼe fetapā mai kia te ʼau, pea ʼe ʼau logo moʼoni anai ki tana kalaga.” (Ekesote 22:21-24) Tahi ʼaē meʼa, neʼe fakahā e te polofeta ko Isaia tana falala ki te tokaga ʼa te ʼAtua kia ia ʼaē ʼe veliveli: “He kua ke liliu ko he tule mālohi maʼa ia ʼaē ʼe veliveli, he tule mālohi maʼa te masiva ʼi te mamahi ʼaē ʼe ina kātakiʼi, he nonoʼaga mokā ʼua mālohi, ko he malūmalū ʼi te vela, ʼi te temi ʼaē ʼe hage ai te mānava ʼo te hahaʼi aga fefeka, ʼe ko he ʼua mālohi ki he kaupā.”—Isaia 25:4.

ʼI tona minisitelio, ko Sesu Kilisito, ʼaē ko “te faʼifaʼitaki totonu” ʼo te ʼAtua, neʼe liliu ko te faʼifaʼitakiʼaga ʼo tana kau tisipulo, ʼi te fakahā ʼo te tokaga moʼoni ki te hahaʼi. (Hepeleo 1:3) ʼI tana sio ki te hahaʼi tokolahi ʼaē neʼe “fakaofaofa pea mo ogosia o hage he u ovi e mole honatou tauhiovi,” neʼe “fonu ia i te ofa kia natou.”—Mateo 9:36.

Koutou toe tokagaʼi te faʼahiga hahaʼi ʼaē neʼe fili e Sesu ke liliu ko tana kau ʼapositolo—ko he ʼu tagata neʼe ʼui ko he ʼu “hahaʼi neʼe mole ako pea ʼe mole nātou maʼuhiga.” (Gaue 4:13, MN ) ʼI te ʼosi mate ʼo Sesu, neʼe kamata fakaafe e tana kau tisipulo te ʼu hahaʼi kehekehe ke nātou fakalogo ki te Folafola ʼa te ʼAtua. Neʼe tohi e te ʼapositolo ko Paulo ko “te hahaʼi fuli pe ʼaē ʼe mole tui peʼe ko he ʼu hahaʼi ʼe mole maʼuhiga,” neʼe feala ke nātou hū ki te kokelekasio faka Kilisitiano pea mo liliu ʼo tui. (1 Kolonito 14:24, 25) Neʼe mole filifili pe e te ʼAtua ia nātou ʼaē ʼe maʼuhiga kia mata ʼo te mālama, kae neʼe ina filifili te ʼu hahaʼi tokolahi ʼe mole nātou maʼuhiga, ke nātou tauhi kia te ia. Neʼe ʼui fēnei e te ʼapositolo ko Paulo: “Heʼe koutou sisio ki tokotou pāui, ʼu tēhina: ʼe mole lahi he kau popoto ʼi te kakano neʼe pāui, peʼe ko he kau mālohi, peʼe ko he ʼu hahaʼi ʼaliki; kae ko te ʼAtua neʼe ina filifili te ʼu meʼa ʼaē ʼe vale ʼo te malamanei moʼo fakaufiufi ki te ʼu tagata popoto; pea ko te ʼAtua neʼe ina filifili te ʼu meʼa ʼaē ʼe vaivai ʼo te malamanei moʼo fakaufiufi ki te ʼu meʼa mālohi; pea ko te ʼAtua neʼe ina filifili te ʼu meʼa fakalialia ʼo te malamanei pea mo te ʼu meʼa ʼaē ʼe vaʼiganoaʼi, te ʼu meʼa noa moʼo fakalainoaʼi ʼo nātou ʼaē ʼe maʼuhiga, ke ʼaua naʼa faka kolōliaʼi e he tahi ia ia, ia muʼa ʼo te ʼAtua.”—1 Kolonito 1:26-29, MN.

Ia ʼaho nei, ʼe toe tokaga feiā te ʼAtua kia tatou. Ko te finegalo ʼo te ʼAtua ke “fakamauli te tagata fuape, pea ke natou kaku ki te iloi o te mooni.” (1 Timoteo 2:4) Kapau neʼe ʼofa lahi te ʼAtua ki te malamanei ʼo ina fekauʼi ifo tona ʼAlo ki te kele ke mate maʼa tatou, pea ʼe mole tonu ke tou manatu ʼe mole ʼofainaʼi tatou peʼe mole tou maʼuhiga. (Soane 3:16) Neʼe fakahā e Sesu Kilisito ki tana kau tisipulo te maʼuhiga ʼaē ke tatau tanatou aga kia ia ʼaē ʼe veliveli ʼaupito ʼi tona ʼu tēhina fakalaumālie, ohage neʼe ko hanatou ʼofa kia Sesu totonu. Neʼe ina ʼui fēnei: “Ko meafuape nee koutou fai ki he tahi o oku kiʼi tehina aeni, nee koutou fai ia kia te au.” (Mateo 25:40) Tatau aipe peʼe faka ʼuhiga feafeaʼi tatou e te malamanei, kae kapau ʼe tou ʼofa ki te moʼoni, pea ʼe tou maʼuhiga ʼaupito kia mata ʼo te ʼAtua.

Ko Francisco,a ko te tama ʼi Pelesile ʼe hala mo tāmai, neʼe ina logoʼi te faʼahi ʼaia ʼi tana kua felogoi lelei mo te ʼAtua. ʼE ina fakamahino fēnei: “Ko te ʼiloʼi ʼaē ʼo Sehova pea mo tana kautahi neʼe tokoni mai kia ʼau ke ʼau tauʼi taku nofo tuʼania pea mo taku ufiufi. Neʼe ʼau ako ko Sehova ʼe ina tokagaʼi ia tatou takitokotahi.” Neʼe liliu ia Sehova ko he tāmai moʼoni maʼa Francisco.

ʼE Ina Tokagaʼi Te Kau Tūpulaga

ʼE tokaga lahi ia Sehova ki te kau tūpulaga fuli pea mo nātou takitokotahi. ʼE mahino ia, peʼe tou tūpulaga peʼe tou matutuʼa, kae ʼe mole tou fia māʼoluga fau. Kae ʼe lagi ʼi ai he faʼahi ʼe tou faiva ai, peʼe ko hotatou ʼu kalitate ʼe feala ke fakaʼaogaʼi e te ʼAtua ʼi te ka haʼu. ʼE ʼiloʼi e Sehova te ʼu faʼahi ʼaē ʼe tonu ke tou hikihiki, pea mo te ako ʼaē ʼe tonu ke tou fai ke tou fakaʼaogaʼi katoa ai totatou poto peʼe ko totatou ʼu kalitate. Ohage la, koutou tokagaʼi te fakamatala ia 1 Samuele kapite 16. Mai tona ʼaluʼaga ʼaē neʼe manatu e te polofeta ko Samuele, ʼe ʼi ai te tahi kau tama neʼe lelei age ke nātou hau ki Iselaele, neʼe fakamahino ai e Sehova pe koʼe neʼe ina fili ia Tavite, te foha muli ʼo Sese ke hau ki Iselaele: “ ʼAua naʼa ke sio ki te meʼa ʼaē ʼe hā ki tuʼa pea mo tona lahi, he neʼe ʼau fakafisi kia ia [te taʼokete ʼo Tavite]. Ko te sio ʼa te ʼAtua ʼe mole hage ko te sio ʼa te tagata, heʼe sio te tagata ki te meʼa ʼaē ʼe hā ki te ʼu mata; kae ko Sehova, ʼe sio ki te ʼuhiga ʼo te loto.”—1 Samuele 16:7.

ʼE feala koa ke falala te kau tūpulaga ia ʼaho nei ʼe tokaga lahi ia Sehova kia nātou? Tou vakaʼi te faʼifaʼitaki ʼa Ana, ko te taʼahine ʼi Pelesile. Ohage ko te tokolahi ʼo te kau tūpulaga, neʼe tuʼania ʼo ʼuhiga mo te agakovi pea mo te heʼe faitotonu. Pea neʼe ʼave leva ia ia mo tona ʼu tokolua e tanatou tāmai ki te ʼu fono faka Kilisitiano. ʼAki te temi, neʼe ina kamata leleiʼia te ʼu meʼa ʼaē neʼe logo kiai ʼo ʼuhiga mo te Folafola ʼa te ʼAtua. Neʼe kamata lau e Ana te Tohi-Tapu pea mo te ʼu tohi, pea mo faikole kia Sehova ʼAtua. Māmālie pe, neʼe kamata felogoi lelei mo te ʼAtua. ʼE ina fakamahino fēnei: “Neʼe ʼau leleiʼia taku ʼalu ʼi taku lelue ki te kiʼi moʼuga ʼe ōvi ki tomatou ʼapi pea neʼe ʼau mamata ai ki te hopo ake ʼo te laʼā. Neʼe ʼau faikole kia Sehova pea mo fakamālo kia te ia ʼo ʼuhiga mo tona manavaʼofa pea mo tana loto fia foaki, ʼo ʼau faiga ke ʼau fakahā toku ʼofa kia te ia. Ko te ʼiloʼi lelei ʼo Sehova ʼAtua pea mo tana ʼu fakatuʼutuʼu, neʼe ʼau maʼu ai te tokalelei pea mo te fīmālie.” ʼE koutou faiga koa ke koutou maʼu he temi ke koutou fakakaukauʼi ai te tokaga ʼofa ʼa Sehova?

ʼE moʼoni, ʼuhi ko te ʼu ʼaluʼaga ʼaē neʼe tou lahilahi ake ai, ʼe lagi feala ke faigataʼa hatatou felogoi lelei mo Sehova. Ohage la ko Lidia. ʼI tana fakahā ʼaē ki tana tāmai te faʼahi neʼe tuʼania lahi kiai, neʼe tali fēnei age e tana tāmai: “Tuku koe tau tuʼania!” Logola tana mahino ʼaē neʼe loto e tana tāmai ke ina galoʼi te fihifihia ʼaia, kae ʼe ʼui fēnei e Lidia: “ ʼI taku ako te Tohi-Tapu neʼe ʼau maʼu fuli ai te meʼa ʼaē neʼe ʼau loto kiai pea mo te tahi ʼu meʼa. ʼI taku leleiʼia te ʼulugaaga matalelei ʼo Sehova neʼe liliu ai ko toku kaumeʼa lelei. ʼI te temi nei, kua ʼau maʼu taku Tāmai ʼe ʼofa pea mo mahino kia ʼau, ʼe feala ke ʼau avahi age toku loto pea mo fakahā age te ʼu meʼa ʼaē ʼe ʼau tuʼania kiai. ʼE feala ke ʼau fai palalau ʼi ni ʼu tuʼuga hola mo Ia ʼaē ʼe maʼuhiga tokotahi ʼi te ʼatulaulau, pea ʼe ʼau ʼiloʼi papau ʼe fakalogo mai.” Ko te ʼu vaega Tohi-Tapu ohage ko Filipe 4:6, 7 neʼe tokoni kia ia ke ina logoʼi te tokaga ʼofa ʼa Sehova. ʼE ʼui fēnei ʼi te vaega ʼaia: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.”

ʼE Tokoni Atu Moʼo Tali Ki Te ʼu Meʼa ʼe ʼAoga Kia Koe

ʼE fakahā e Sehova tana tokaga ki tana ʼu kaugana takitokotahi pea mo tona kokelekasio katoa. ʼE feala ke tou fakahā totatou ʼofa ki tatatou Tāmai ʼaē ʼi selo, ʼo tou toʼo hotatou temi ke tou palalau kia te ia. ʼE mole tonu ʼi he temi ke tou meʼa noaʼi tatatou ʼu felogoi mo ia. Neʼe tokaga tuʼumaʼu ia Tavite ki tana ʼu felogoi mo Sehova. Neʼe ina ʼui fēnei: “Fakahā mai kia te ʼau tou ʼu ala, Ê Sehova! Akoʼi mai kia te ʼau tou ʼu haʼeleʼaga. Fakahaʼele ʼau ʼi tau moʼoni pea mo ke akoʼi ʼau, he ko koe ko toku ʼAtua ʼo te hāofaki. Pea neʼe ʼau falala aipe kia te koe ʼi te ʼaho katoa.”—Pesalemo 25:4, 5.

ʼE lagi ko he manatu foʼou kia koutou ke koutou felogoi lelei mo te ʼAtua. Tatau aipe te ʼu fihifihia ʼaē ʼe feala ke hoko kia koutou, ʼe koutou lava falala tuʼumaʼu ko te Māʼoluga ʼe feala anai ke tokoni atu, ʼo mulimuli ki tona finegalo. (1 Soane 5:14, 15) Koia koutou ako ke koutou fakahā lelei ʼi takotou ʼu faikole, te ʼu meʼa ʼaē ʼe koutou loto kiai ʼo koutou vakaʼi tokotou ʼaluʼaga pea mo te ʼu meʼa ʼaē ʼe ʼaoga kia koutou.

Ko te maʼuhiga ʼaē ke tou ʼiloʼi te ʼu meʼa ʼaē ʼe ʼaoga kia kita ʼe fakahā lelei ʼi te faikole ʼaē neʼe fai e te Hau ko Salomone ʼi te avahi ʼo te fale lotu. Neʼe ina ʼui fēnei: “Kapau ʼe hoko he hoge ʼi te fenua, kapau ʼe hoko he mahaki, kapau ʼe magemage te fulumeto pea mo ukaukamea, he ʼu heʼe pea mo te ʼu ʼelelū, kapau ʼe ʼohofi nātou e tonatou ʼu fili ʼi te fenua ʼo tonatou ʼu matapā—he faʼahiga malaʼia pe peʼe ko he faʼahiga mahaki pe—tatau aipe pe koteā te kole, pe ko te fakakolekole ki te ʼofa ʼo he tagata pe, peʼe ko tau hahaʼi ʼo Iselaele, heʼe nātou tahi ʼiloʼi anai tona malaʼia pea mo tona mamahi . . . Ke ke fakalogo mai lagi, . . . pea ʼe tonu anai ke ke fakamolemole mai pea mo foaki kia mātou takitokotahi ʼo mulimuli ki tonatou ʼu ala.” (2 Fakamatala 6:28-30) ʼI tona fakahagatonu, ko koutou totonu pe ʼaē ʼe koutou ‘ ʼiloʼi tokotou malaʼia pea mo tokotou mamahi.’ Koia ʼe maʼuhiga ʼaupito ke koutou mālama ki te ʼu meʼa ʼaē ʼe ʼaoga moʼoni kia koutou pea mo te ʼu meʼa ʼaē ʼe koutou holi kiai. Kapau ʼe koutou fai te faʼahi ʼaia, pea ʼe “fakahoko anai [e Sehova] te ʼu meʼa ʼaē ʼe kole e tokotou loto.”—Pesalemo 37:4.

Koutou Fakamālohiʼi Takotou Felogoi Mo Sehova

ʼE fiafia ia Sehova mokā ʼe felogoi mo ia te hahaʼi ʼaē ʼe mole maʼuhiga. ʼE tou maʼu te fakaloto fīmālie ʼaenī ʼi Tana Folafola: “ ‘ ʼE ʼau liliu anai ko hakotou tāmai, pea ʼe koutou liliu anai ko hoku ʼu foha pea mo ʼofafine,’ ko te ʼui ʼaia ʼa Sehova te Māfimāfi.” (2 Kolonito 6:18, MN ) ʼE moʼoni, ʼe loto ia Sehova pea mo Sesu ke tou mālo pea mo tou maʼu te maʼuli heʼegata. ʼI meʼa fakaloto mālohi te ʼiloʼi ʼaē ko Sehova ʼe tokoni mai ke tou fakahoko totatou ʼu maʼua ʼi te famili, ʼi te gāue, pea mo te kokelekasio faka Kilisitiano.

Kae ʼe tou tau fuli mo te ʼu temi faigataʼa. Ko te mahamahaki, te ʼu fihifihia ʼo te famili, te mole feʼauga ʼo te lī totogi, peʼe ko he tahi atu ʼu meʼa ʼe feala ke tou mamahi ai. ʼE lagi mole tou ʼiloʼi peʼe feafeaʼi te fakatokatoka ʼo he ʼahiʼahi. ʼE tuputupu te ʼaluʼaga faigataʼaʼia ʼuhi ko ia ʼaē ʼe ina tukugakoviʼi hala ia tatou, ia Satana te Tevolo, ʼaē ʼe ina fai he tau fakalaumālie ki te hahaʼi ʼa te ʼAtua. Kae ʼe ʼi ai te tahi ʼe mahino kia tatou, pea mo tokoni mai ke tou taupau he ʼu felogoi lelei mo Sehova. ʼE ko Sesu Kilisito ʼi tona tuʼulaga māʼoluga ʼi selo. ʼE tou lau fēnei: “ ʼE ʼi ai totatou pelepitelo lahi, ʼe mole ko he tahi ia ʼe hala mo manavaʼofa ki ʼotatou ʼu vaivaiʼaga, kae ʼe ko he tahi ia neʼe ʼahiʼahiʼi ʼi te faʼahi fuli pe ohage pe ko tatou, kae mole hana agahala. Tou fakaōvi ʼaki te fakahagatonu ki te ʼafioʼaga ʼo te ʼofa makehe, ke tou maʼu ai te manavaʼofa ke tokoni mai kia tatou ʼi tona temi totonu.”—Hepeleo 4:15, 16, MN.

ʼE fakaloto fīmālie te ʼiloʼi ʼaē ʼe mole ʼaoga ke tou ʼiloa peʼe maʼu koloā ke ʼofainaʼi tatou e te ʼAtua! Ka hoko mai he ʼaluʼaga faigataʼa ʼaupito, pea ʼe tonu ke tou hage ko te tagata fai pesalemo ʼaē neʼe faikole fēnei. “ ʼE ʼau mamahi pea mo masiva. Ko Sehova totonu ʼe tokaga kia ʼau. Ko koe toku tokoni pea mo Ia ʼaē ʼe ina fakahāo ʼau.” (Pesalemo 31:9-14; 40:17) Koutou ʼiloʼi papau ʼe ʼofa ia Sehova ki te hahaʼi agavaivai, pea mo ʼaē ʼe mole maʼuhiga. ʼE moʼoni, ‘ ʼe feala hatatou tuku age kia te ia tatatou ʼu tuʼania heʼe tokaga ia kia tatou.’—1 Petelo 5:7.

[Kiʼi nota]

[Paki ʼo te pasina 29]

Tokolahi te ʼu tisipulo ʼa Sesu neʼe mole popoto ʼi te lautohi pea neʼe ko te ʼu hahaʼi neʼe mole maʼuhiga

[Paki ʼo te pasina 30]

ʼE faiga e te kau Kilisitiano ke mālohi tanatou tui

[Paki ʼo te pasina 31]

ʼE mole ʼaoga ke tou maʼu he tuʼulaga maʼuhiga ke ʼofainaʼi tatou e Sehova