Te ʼu Fehuʼi ʼa Te Kau Lautohi

He koʼe neʼe ʼui e Te Tule Leʼo ʼo te ʼaho 1 ʼo ʼApelili 2002, ʼi te pasina 11, ʼi te palakalafe 7, ko te papitema ʼo te kau Sutea ʼaē neʼe foʼofoʼou tui ʼi te Penikosite ʼo te taʼu 33 ʼo totatou temi, neʼe ko he fakahā ʼaia ʼo tanatou “foaki tonatou maʼuli ki te ʼAtua ʼaki ia Kilisito,” kae neʼe ʼui ʼi muʼa atu ko te papitema ʼa te kau Sutea mai te taʼu 33 ʼo totatou temi ʼo aʼu ki te taʼu 36 ʼo totatou temi neʼe mole fakamaʼua ke nātou tahi foaki ia nātou totonu?

ʼI te taʼu 1513 ʼi muʼa ʼo totatou temi, neʼe foaki e Sehova ʼAtua ki te kau Iselaele ia te faigamālie ke nātou liliu ko he puleʼaga taputapu maʼa ia, mo kapau ʼe nātou ‘fakalogo lelei ki tona leʼo pea mo taupau tana fuakava.’ Neʼe nātou tali fēnei: “Ko meʼa fuli ʼaē kua folafola kiai ia Sehova, ʼe mātou fia fakahoko.”​—Ekesote 19:​3-8; 24:​1-8.

ʼI tanatou tali ke nātou fakahoko te fuakava ʼo te Lao ʼa Moisese, ko te kau Iselaele neʼe nātou foaki ia nātou totonu ki te ʼAtua. Koia ʼaē ko te ʼu taʼiake ʼo te kau Sutea ʼaē neʼe tutupu ake ki muli age neʼe nātou tutupu ake ʼi te puleʼaga ʼaia kua ʼosi foaki ki te ʼAtua. Kae ko te papitema ʼo te kau Sutea ʼaē neʼe liliu ko he kau tisipulo ʼa Sesu Kilisito ʼo kamata ʼi te taʼu 33 ʼo totatou temi, neʼe mole faka ʼuhiga pe ʼe nātou foaki ia nātou totonu ki te ʼAtua heʼe nātou kau ki he puleʼaga kua foaki ki te ʼAtua. Kae neʼe ina fakatā tonatou foaki ia nātou kia Sehova ʼAtua ʼi he ʼu felogoi foʼou mo ia ʼaki ia Sesu Kilisito. ʼO feafeaʼi?

ʼI te ʼosi tuku ifo ʼo te laumālie maʼoniʼoni ki te toko 120 tisipulo ʼaē neʼe fakatahitahi ʼi te kogafale fata ʼi Selusalemi ʼi te Penikosite ʼo te taʼu 33 ʼo totatou temi, neʼe tuʼu ake te ʼapositolo ko Petelo ʼo kamata fai faka mafola ki te kau Sutea pea mo te kau poloselite kaugamālie neʼe ʼōmai ʼo sisio ki te meʼa ʼaē neʼe hoko. ʼI tana ʼosi fakahoko ʼo he fagonogono katoa, neʼe ina ʼui ki te kau Sutea ʼaē neʼe kua nātou logoʼi te ufiufi ʼi tonatou loto: “Koutou fakahemala, pea ke koutou tahi papitema ʼi te huafa ʼo Sesu Kilisito moʼo fakamolemole ʼakotou agahala.” ʼI tanatou muliʼi te fakaloto mālohi ʼa Petelo, “ko nātou ʼaē neʼe nātou tali ʼaki tonatou loto katoa tana folafola neʼe papitemaʼi pea, ʼi te ʼaho ʼaia, ko te teitei toko tolu afe nefesi neʼe hilifaki.”​—Gaue 2:​1-​41, MN.

ʼO ʼuhiga mo te kau Sutea ʼaia neʼe papitema ʼi tanatou muliʼi te fakaloto mālohi ʼa Petelo, neʼe mole heʼeki koa la nātou kau ki he hahaʼi kua foaki ki te ʼAtua? Neʼe mole heʼeki koa la nātou maʼu he ʼu felogoi mo te ʼAtua? Kailoa ia. Neʼe tohi fēnei e te ʼapositolo ko Paulo ‘ko te ʼAtua neʼe ina toʼo te Lao ʼi te ala ʼo ina tutuki ki te pou fakamamahi.’ (Kolose 2:​14) ʼAki te mate ʼa Kilisito ʼi te taʼu 33 ʼo totatou temi, neʼe molehi e Sehova ʼAtua te fuakava ʼo te Lao​—te fakatafito ʼaia ʼo te felogoi ʼa te kau Iselaele mo te ʼAtua ʼi tonatou ʼuhiga hahaʼi kua foaki kia te Ia. Ko te hahaʼi ʼaē neʼe nātou līaki te ʼAlo ʼo te ʼAtua kua līaki leva nātou e te ʼAtua totonu. Neʼe mole kei feala ki ‘te Iselaele ʼi te kakano’ ke ina lau ko ia ko he puleʼaga kua foaki ki te ʼAtua.​—1 Kolonito 10:18; Mateo 21:43.

Neʼe molehi te fuakava ʼo te Lao ʼi te taʼu 33 ʼo totatou temi, kae ko te temi ʼo te ʼofa pea mo te tokaga makehe ʼa te ʼAtua ki te kau Sutea neʼe mole gata ia ʼi te temi ʼaia.a Neʼe kei hoko atu te temi ʼo te tokaga makehe ʼaia ʼo aʼu ki te taʼu 36 ʼo totatou temi, ʼi te temi ʼaē neʼe fai faka mafola ai ia Petelo ki te tagata Italia aga faka lotu ko Kolonelio mo tona famili pea mo te tahi kau Senitile. (Gaue 10:1-​48) Neʼe koteā te fakatafito ʼo te fakahoko atu ʼo te ʼofa ʼaia?

ʼE ʼui ia Taniela 9:​27, “ ʼe tonu anai [ki te Mesia] ke ina taupau te fuakava ki te kaugamālie lolotoga te vāhaʼa katoa.” Ko te fuakava ʼaē neʼe tonu ke taupau lolotoga te ʼu ʼaho e fitu, peʼe ko “te vāhaʼa katoa,” mai te papitema ʼo Sesu pea mo te kamata ʼo te minisitelio ʼa te Mesia ki te hahaʼi ʼi te taʼu 29 ʼo totatou temi, neʼe ko te fuakava mo Apalahamo. Ke kau he tahi ki te fuakava ʼaia, neʼe tonu pe ke hifo mai te hākoga Hepeleo ʼo Apalahamo. ʼI te fuakava ʼaia, neʼe mole maʼu e he tahi he felogoi mo Sehova. Koia ko te kau Sutea ʼaē neʼe tui pea mo nātou papitema ʼi tanatou ʼosi logo ki te akonaki ʼa Petelo ʼi te Penikosite ʼo te taʼu 33 ʼo totatou temi, logope ko nātou ʼe nātou maʼu he tokaga makehe ʼi tonatou ʼuhiga kau Sutea ʼi te kakano, kae neʼe mole feala ia ke nātou lau ʼe kei ʼi ai hanatou ʼu felogoi mo te ʼAtua, ʼi te hili ʼo te kua molehi ʼo te fuakava ʼo te Lao. Neʼe tonu kia nātou takitokotahi ke nātou foaki ia nātou totonu ki te ʼAtua.

Neʼe ʼi ai te tahi tupuʼaga ʼo te maʼuhiga ʼaē ki te kau Sutea mo te kau poloselite ke nātou foaki ia nātou totonu ki te papitema ʼi te ʼaho ʼo te Penikosite ʼo te taʼu 33 ʼo totatou temi. Neʼe fakaloto mālohiʼi e te ʼapositolo ko Petelo ia te hahaʼi ʼaē neʼe fagono ke nātou fakahemala pea ke nātou papitema ʼi te huafa ʼo Sesu. ʼI tanatou fai ia te koga ʼaia neʼe fakamaʼua ai kia nātou ke nātou līaki te ala ʼo te mālama pea mo fakamoʼoni ko Sesu ʼe ko te ʼAliki pea mo te Mesia, ko te Pelepitelo Lahi, pea ko ia ʼaē ʼe heka ʼi te toʼomataʼu ʼo te ʼAtua ʼi te lagi. Neʼe tonu ke nātou fetapā ki te huafa ʼo Sehova ʼAtua ke hāofaki ia nātou ʼaki ia Kilisito Sesu, ko tona faka ʼuhiga ʼe tonu ke nātou tui kia Kilisito pea mo fakamoʼoni ko ia ko tonatou Pule. Ko te fakatafito katoa ki he ʼu felogoi mo te ʼAtua pea mo maʼu te fakamolemole ki te ʼu agahala kua fetogi leva. Neʼe tonu ki te kau Sutea takitokotahi ke nātou tali te fakatuʼutuʼu foʼou ʼaia. ʼO feafeaʼi? ʼAki tanatou foaki ia nātou totonu ki te ʼAtua pea mo haga fakahā ʼi muʼa ʼo te kaugamālie tanatou fakahoko ia te faʼahi ʼaia ʼaki tanatou uku ʼi te huafa ʼo Sesu Kilisito. Ko te papitema neʼe ko he fakahā ʼaia ʼo tanatou kua foaki ia nātou ki te ʼAtua, ʼo fakatupu ai ia nātou he ʼu felogoi foʼou mo ia ʼaki ia Sesu Kilisito.​—Gaue 2:​21, 33-​36; 3:​19-​23.

[Kiʼi nota]