Te Foaki ʼAē ʼe Leleiʼia e Te ʼAtua

NEʼE kakai Sesu pea mo tana kau tisipulo ʼi Petania, pea mo tona tahi ʼu kaumeʼa, ko Malia, mo Maleta, pea mo Lasalo ʼaē neʼe heʼeki faʼa fualoa tona fakatuʼuake mai te mate. ʼI te temi ʼaē neʼe liligi ai e Malia te lolo totogi kovi ki te ʼu vaʼe ʼo Sesu, neʼe ʼita ia Sutasi pea mo ina fakahā fakahagatonu age tana manatu. Neʼe fakafisi kiai, ʼo ʼui maʼana: “He koʼe neʼe mole fakatau te lolo magoni ʼaenā ki te tenalio e tolugeau [ʼe fakafuafua ko te totogi ʼo te taʼu katoa], pea foaki ki te kau māsisiva?” Mole tuai pea toe munamuna feiā mo ʼihi.​—Soane 12:​1-6, MN; Maleko 14:​3-5.

Kae neʼe tali fēnei e Sesu: “Koutou haganoa kia te ia. . . . Koteʼuhi ko te kau māsisiva ʼe maʼu tuʼumaʼu pe ia koutou, pea ka ʼe koutou loto ki ai, pea ʼe feala tuʼumaʼu pe takotou fai he meʼa ʼe lelei kia nātou, kaʼe ko ʼau, ʼe mole koutou maʼu tuʼumaʼu ʼau.” (Maleko 14:​6-9, MN ) Neʼe akonaki e te kau takitaki lotu Sutea ko te foaki ʼo te ʼu meʼa ʼofa, neʼe mole faka ʼuhiga pe ʼe ko he aga ʼe lelei, kae neʼe toe feala ai ke fakamolemole te ʼu agahala. Kae neʼe fakahā lelei e Sesu ko te foaki ʼaē ʼe leleiʼia e te ʼAtua ʼe mole gata pe ki te foaki ki te kau māsisiva.

Ka tou vakaʼi te faʼahiga foaki ʼaē neʼe fai ʼi te ʼuluaki kokelekasio faka Kilisitiano, ʼe tou ʼiloʼi ai anai te ʼu faʼahi ʼaē ʼe feala ke tou tokakaga kiai pea mo fakafiafia ai te ʼAtua ʼaki totatou ʼu meʼa ʼofa. ʼE ina toe fakahā ai foki te faʼahiga meʼa ʼofa ʼaē ʼe maʼuhiga ʼaupito.

“Foaki He ʼu Meʼa ʼOfa ʼAki He Loto Manavaʼofa”

ʼE lahi te ʼu lakaga neʼe fakaloto mālohiʼi ai e Sesu ia tana kau tisipulo ke nātou “foaki he ʼu meʼa ʼofa ʼaki he loto manavaʼofa,” peʼe ohage ko tona fakaliliu e te tahi Tohi-Tapu, ke nātou “foaki he ʼu meʼa ʼofa.” (Luka 12:33, New English Bible) Kae neʼe fakatokagaʼi mai e Sesu ke tou tokaga ki te ʼu meʼa ʼofa ʼaē ʼe fai moʼo faka kolōliaʼi pe ʼo ia ʼaē ʼe ina foaki, kae mole faka kolōliaʼi ia te ʼAtua. Neʼe ina ʼui fēnei: “Ka ke fai hou ʼu meʼa ʼofa ki te hahaʼi māsisiva, ʼaua naʼa ke pupuhi fakatagi ʼi ʼou muʼa, ohage ko tona fai e te kau malualoi ʼi te ʼu sinakoka pea mo te ʼu ala, koteʼuhi ke faka kolōliaʼi nātou e te hahaʼi.” (Mateo 6:​1-4, MN ) ʼI tanatou maʼuliʼi te tokoni ʼaia, neʼe mole fai e te kau Kilisitiano ʼo te temi muʼa he ʼu fakahāhā meʼa ʼofa ohage ko te kau takitaki lotu ʼo tonatou temi, kae neʼe nātou tokoni kia nātou ʼaē ʼe ʼaoga kiai, ʼo nātou fai he ʼu gāue peʼe nātou fai he ʼu meʼa ʼofa.

Ohage la, ia Luka 8:​1-3 (MN ), ʼe tou lau ai ko Malia Maketalena, mo Soana, mo Susana, pea mo ʼihi neʼe nātou fakaʼaogaʼi ‘tonatou ʼu koloā’ moʼo tokoni fakalogologo kia Sesu pea mo tana kau ʼapositolo. Logola neʼe mole māsisiva te ʼu tagata ʼaia, kae neʼe nātou tuku tanatou ʼu gāue ke feala hanatou tokakaga tāfito ki te minisitelio. (Mateo 4:​18-​22; Luka 5:​27, 28) ʼI tona fakahagatonu, ʼaki tanatou tokoni ʼaia moʼo fakahoko tanatou gāue ʼaē neʼe foaki age e te ʼAtua, ko te ʼu fafine ʼaia neʼe nātou faka kolōliaʼi te ʼAtua. Pea neʼe fakahā e te ʼAtua tana leleiʼia te meʼa ʼaē neʼe nātou fai, he neʼe ina taupau ʼi te Tohi-Tapu te fakamatala ʼo tanatou foaki meʼa ʼofa, ke lau e te ʼu taʼiake ka hoa mai.​—Tāʼaga Lea 19:17; Hepeleo 6:​10.

Ko Tolokasi neʼe ko te tahi fafine neʼe “lahi [tana] ʼu gāue lelei pea mo te ʼu meʼa ʼofa neʼe ina fai ʼaki he lotolelei.” Neʼe ina tui te ʼu mutuʼi meʼa maʼa te ʼu vitua fakaʼofaʼofa ʼi tona kolo ko Sope ʼaē ʼe tuʼu ʼi te matatai. ʼE mole tou ʼiloʼi pe neʼe ina totogi te ʼu meʼa fuli ʼaē neʼe ina fakaʼaogaʼi moʼo fai tana ʼu gāue, pe neʼe lagolago ʼo ina fai te ʼu gāue ʼaia. Kae ko nātou ʼaē neʼe ina fai ki ai te tokoni, neʼe nātou leleiʼia tana ʼu gāue lelei, ʼo feiā mo te ʼAtua, ʼaē neʼe ina tapuakina ia ia ʼaki he loto manavaʼofa.​—Gaue 9:​36-​41, MN.

ʼE Tonu Ke Lelei Tokita Loto ʼo ʼUhiga Mo Te ʼu Meʼa ʼAē ʼe Tou Foaki

Koteā ʼaē neʼe ina uga te ʼu hahaʼi ʼaia ke nātou foaki? Neʼe mole nātou hoko foaki feiā pe. Neʼe logoʼi e nātou takitokotahi, ʼe tonu ke nātou fai te meʼa ʼaē neʼe nātou lavaʼi moʼo tokoni kia nātou ʼe māsisiva, mo nātou neʼe tau mo he malaʼia, mo nātou neʼe mahahaki, peʼe ko ʼihi age faigataʼaʼia. (Tāʼaga Lea 3:​27, 28; Sakopo 2:​15, 16) Ko te faʼahiga foaki ʼaia ʼe leleiʼia e te ʼAtua, heʼe haʼu tāfito mai te ʼofa mamahi ki te ʼAtua pea mo he fia faʼifaʼitakiʼi ʼo tona ʼulugaaga manavaʼofa pea mo tana foaki lahi.​—⁠Mateo 5:​44, 45; Sakopo 1:​17.

Neʼe fakahā lelei e te ʼapositolo ko Soane ia te koga maʼuhiga ʼaia ʼo te foaki ʼi tana fehuʼi ʼaenī: “Ko ae e ina mau te u koloa o te malama-nei e sio ki tona tehina e aoga he tokoni pea e ina tapunu tona loto kia ia, o feafeai leva te mauli o te ofa o te Atua ia te ia?” (1 Soane 3:​17) ʼE tou ʼiloʼi lelei pe tona tali. Ko te ʼofa ʼaē ki te ʼAtua ʼe ina uga te hahaʼi ke nātou foaki he ʼu meʼa ʼofa. Ko te ʼAtua ʼe ina tokagaʼi pea mo fakapale te hahaʼi ʼaē ʼe nātou loto manavaʼofa ohage ko ia. (Tāʼaga Lea 22:9; 2 Kolonito 9:​6-​11) ʼE tou sisio koa ki te faʼahiga foaki manavaʼofa ʼaia ʼi te temi nei? Koutou tokagaʼi te meʼa ʼaē neʼe hoko mole heʼeki faʼa fualoa ʼi te kokelekasio ʼa te kau Fakamoʼoni ʼa Sehova.

Ko te ʼapi ʼo te tuagaʼane finematuʼa neʼe tonu ke toe gaohi. Neʼe maʼuli tokotahi pea neʼe mole ʼi ai hona famili moʼo tokoni age ki ai. Lolotoga te ʼu taʼu, neʼe ava tuʼumaʼu tona ʼapi ke fai ai he ʼu fono faka Kilisitiano, pea ko ʼaē neʼe ina tali lelei tana fakaafe neʼe kai fakatahi mo ia. (Gaue 16:14, 15, 40) ʼI te sio ʼa ʼihi ʼo te kokelekasio ki tona maʼuli fakaʼofaʼofa, neʼe nātou fakatahitahi moʼo tokoni ki ai. Ko ʼihi neʼe nātou foaki te falā, kae ko ʼihi neʼe ʼōmai ʼo fai tana ʼu gāue. Lolotoga te ʼu fakaʼosi vāhaʼa, neʼe lotolelei te ʼu tēhina pea mo te ʼu tuagaʼane ke nātou fakafoʼou tana ʼato, mo fakatuʼu te fale maʼanu foʼou, mo nātou fakamomole pea mo pena tona ʼapi, pea mo fakatuʼu he ʼu puha foʼou ʼi te fale kuka. Ko te taʼi foaki ʼaia, neʼe mole gata pe tona fua lelei ki te tuagaʼane finematuʼa ʼaē neʼe fiafia ʼaupito, kae neʼe ko he faʼahi neʼe ina faka fealagia ki te ʼu tēhina pea mo te ʼu tuagaʼane ʼo te kokelekasio ke nātou fakalahi age tanatou ʼu felogoi, pea mo sio kiai te ʼu vāhaʼa fale ohage ko he faʼifaʼitaki ʼo te foaki meʼa ʼofa ʼa te kau Kilisitiano moʼoni.

ʼE lahi te tahi ʼu faʼahiga tokoni ʼaē ʼe tou lava fai ki niʼihi. ʼE tou lava fakaʼaogaʼi koa hotatou temi moʼo tokaga ki he kiʼi tama peʼe ko he kiʼi taʼahine ʼe hala mo tāmai? ʼE tou lava fai koa he ʼu fakatau peʼe tou fai tuitui maʼa he vitua ʼe tou ʼiloʼi kua finematuʼa? ʼE tou lava fai koa he meʼa kai peʼe tou huʼi he ʼu maʼua ʼa he tahi ʼe faigataʼaʼia ʼi te faʼahi ʼo te falā? ʼE mole hoki tou koloaʼia pe pea hoki tou lava tokoni ki ʼihi. Neʼe tohi fēnei e te ʼapositolo ko Paulo: “Kapau ʼe ʼi ai tāfito te lotolelei, ʼe lelei tāfito ia, ʼo fakalogo pe ki te meʼa ʼaē ʼe maʼu e he tahi, ka mole fai ʼaki he meʼa ʼe mole maʼu e he tahi.” (2 Kolonito 8:​12, MN ) Kae ʼe ko te faʼahiga foaki pe koa ʼaia ʼe tapuakinaʼi anai e te ʼAtua? Kailoa.

E Feafeaʼi Ki Te ʼu Tokoni ʼAē ʼe Fai ʼi Hona Faʼahiga ʼAluʼaga ʼe Lahi Age?

ʼI ʼihi temi, ʼe mole feʼauga tatatou ʼu faiga takitokotahi. Ko Sesu mo tana kau ʼapositolo neʼe ʼi ai tanatou kesi falā maʼa te hahaʼi māsisiva, pea neʼe nātou tali te ʼu meʼa ʼofa mai te hahaʼi ʼaē neʼe nātou fakahoko ki ai tanatou gāue. (Soane 12:​6; 13:29) ʼO toe feiā pe, neʼe tānaki meʼa ʼofa te ʼu kokelekasio ʼo te ʼuluaki sēkulō mo kapau neʼe tonu ke nātou tokoni ʼi te faʼahi ʼaia, pea neʼe nātou fai he ʼu fakatuʼutuʼu moʼo fakahoko he tokoni ke lahi age.​—Gaue 2:​44, 45; 6:​1-3; 1 Timoteo 5:​9, 10.

Neʼe hoko te ʼaluʼaga feiā ʼi te taʼu 55 ʼo totatou temi. Neʼe liliu te ʼu kokelekasio ʼo Sutea ʼo māsisiva ʼuhi ko te hoge neʼe hoko ʼi te fenua. (Gaue 11:27-​30) Ko te ʼapositolo ko Paulo, ʼi tana tuʼania tuʼumaʼu ʼo ʼuhiga mo te kau masiva, neʼe kole tokoni ki te ʼu kokelekasio mai mamaʼo, ohage ko Masetonia. Neʼe ina fakatuʼutuʼu he tānaki meʼa ʼofa pea neʼe ina fakaʼaogaʼi te ʼu tagata fakapotopoto ke nātou tufa te ʼu meʼa ʼofa. (1 Kolonito 16:​1-4; Kalate 2:​10) Neʼe mole ʼi ai he tahi peʼe ko niʼihi neʼe nātou fakamaʼua ke totogi tanatou gāue.​—2 Kolonito 8:​20, 21.

ʼI te temi nei, ko te kau Fakamoʼoni ʼa Sehova ʼe nātou toe foimo tokoni mokā hoko he tuʼutāmaki. Ohage la, ʼi te fasiga taʼu māfana 2001, neʼe hoko te ʼu lōfia lahi ʼi Houston ʼi Texas ʼi Amelika ʼuhi ko te ʼu ʼua lalahi. Pea ko fale e 723 ʼa te kau Fakamoʼoni neʼe maumau, pea ko ʼihi fale neʼe maumau kovi ʼosi. Ko te komite tokoni neʼe faʼufaʼu e te ʼu tagata ʼāfea faiva, neʼe nātou vakaʼi te ʼu meʼa ʼaē neʼe maumau ʼa te ʼu tēhina takitokotahi, pea neʼe nātou vaevae te ʼu meʼa ʼofa ʼaē neʼe ʼaoga moʼo tokoni ki te kau Fakamoʼoni ʼo te kolo, ke nātou fakatokatoka tonatou ʼu fihifihia pea mo toe gaohi tonatou ʼu fale. Ko ʼihi tēhina ʼo te ʼu kokelekasio ʼo tonatou ʼu tafaʼaki neʼe nātou fai fuli te gāue. ʼI te loto fakafetaʼi ʼaupito ʼa te Fakamoʼoni ki te tokoni ʼaē neʼe fai age kia ia, ʼi te temi ʼaē neʼe ina maʼu ai te falā ʼo tana assurance moʼo totogi te ʼu meʼa ʼaē ʼe ʼaoga moʼo faʼu ʼo tona fale, neʼe ina foaki atu aipe te falā ʼaia moʼo lagolago ki te ʼu meʼa ʼaē ʼe fai moʼo tokoni ki te hahaʼi ʼaē ʼe faigataʼaʼia.

Kae ʼo ʼuhiga mo te ʼu fakatuʼutuʼu meʼa ʼofa, ʼe tonu ke tou tokakaga ki te ʼu kole tokoni ʼaē ʼe fai mai. Ko ʼihi kūtuga fakatuʼutuʼu meʼa ʼofa ʼe lahi tanatou puli ki te ʼu fai pepa, ʼo veliveli ai te falā ʼaē ʼe toe mai kia nātou, ʼaē ka nātou fakaʼaogaʼi ki te faʼahi ʼaē neʼe fakatuʼutuʼu tāfito kiai. ʼE ʼui fēnei e te Tāʼaga Lea 14:15: “Ko ia ʼaē ʼe mole heʼeki fakapotopoto ʼe tui ki te ʼu palalau fuli, kae ko ia ʼaē ʼe fakasiosio tonu ʼe tokaga ki tana haʼele.” Koia ʼe ko he aga fakapotopoto ia te sivisivi fakalelei ʼo te ʼu kole tokoni.

Te Foaki ʼAē ʼe Fua Lelei Age

ʼE ʼi ai te faʼahiga foaki ʼe maʼuhiga age ʼi te ʼu meʼa ʼofa. ʼI te felogoi ʼa Sesu mo te pule tūpulaga maʼu koloā, neʼe palalau ki te meʼa ʼaē neʼe tonu ke ina fai ke ina maʼu ai te maʼuli heʼegata. Neʼe ʼui fēnei age e Sesu: “ ʼAlu ʼo fakatau te ʼu meʼa ʼaē ʼe ke maʼu, pea ke ke foaki ki te kau māsisiva, pea ʼe ke maʼu anai hou koloā ʼi te lagi; pea ke haʼu ʼo muli mai ia te ʼau.” (Mateo 19:16-​22, MN ) Koutou tokagaʼi neʼe mole ʼui pe e Sesu, ‘Foaki ki te kau māsisiva, pea ʼe ke maʼu anai te maʼuli.’ Kae neʼe ina toe ʼui, “Haʼu ʼo muli mai ia te ʼau.” ʼI tona tahi fakaliliu, logope ʼe lelei ʼaupito pea mo ʼaoga ia te ʼu taʼi foaki ʼaia, kae ʼe mole gata pe ʼi te faʼahi ʼaia ia te fai ʼo ni ʼu tisipulo.

Ko te faʼahi tāfito ʼaē neʼe tokaga kiai ia Sesu ʼe ko te tokoni ki ʼihi ʼi te faʼahi fakalaumālie. ʼI te kiʼi temi siʼi ʼi muʼa ʼo tona mate, neʼe ina ʼui fēnei kia Pilato: “Neʼe ʼau tupu ʼuhi ko te potu ʼaenī, pea neʼe ʼau haʼu ki te malamanei ʼuhi ko te potu ʼaenī: ko te fakamoʼoni ki te moʼoni.” (Soane 18:37, MN ) Logope neʼe ko ia ʼaē neʼe ʼuluaki tokoni ki te kau masiva, mo te hahaʼi mahahaki, pea mo fafaga ia nātou ʼaē neʼe pakupaku, kae neʼe akoʼi tāfito e Sesu ia tana kau tisipulo ki te fai faka mafola. (Mateo 10:​7, 8) Ohage la, ʼi tana ʼu fakatotonu fakamuli ʼaē neʼe ina fai age kia nātou, neʼe ina fakatotonu age fēnei: “Koutou olo o fakahoko he u tisipulo i te atu puleaga.”​—Mateo 28:19, 20.

ʼE mahino ia ko te fai faka mafola ʼe mole ina fakatokatoka te ʼu fihifihia fuli ʼo te malamanei. Kae ko te fakahā ʼo te logo lelei ʼo ʼuhiga mo te Puleʼaga ʼo te ʼAtua ki te hahaʼi kehekehe, ʼe ina faka kolōliaʼi te ʼAtua, koteʼuhi ko te fai faka mafola ʼe ina fakahoko te finegalo ʼo te ʼAtua, pea mo faka fealagia ai kia nātou ʼaē ʼe nātou tali te logo ʼa te ʼAtua ke nātou maʼu te ʼu lelei heʼegata. (Soane 17:3; 1 Timoteo 2:​3, 4) He koʼe koa ʼe mole koutou fakatuʼutuʼu ke koutou fakalogo ki te ʼu meʼa ʼaē ʼe ʼui atu e te kau Fakamoʼoni ʼa Sehova mokā nātou ʼolo atu ki tokotou ʼapi? ʼE nātou ʼolo atu mo te meʼa ʼofa fakalaumālie. Pea ʼe nātou ʼiloʼi ʼe ko te faʼahiga foaki ʼaia ʼe lelei ʼaupito ke nātou fai atu kia koutou.

[Paki ʼo te pasina 6]

ʼE lahi te ʼu puleʼaki ke tou fakahā ai ʼe tou ʼofa ki te hahaʼi

[Paki ʼo te pasina 7]

ʼE leleiʼia e te ʼAtua tatatou faka mafola te logo lelei ki te hahaʼi, pea ʼe ina faka fealagia ai ke nātou maʼu he ʼu lelei heʼegata