Kua Feafeaʼi Te Foaki Meʼa ʼOfa?
NEʼE fakaofoofo te tokoni ʼaē neʼe fai e te hahaʼi ʼi te ʼosi ʼo te tuʼutāmaki ʼaē neʼe hoko ʼi New York pea mo Washington ʼi te ʼaho 11 ʼo Sepetepeli 2001. Neʼe lahi ʼaupito te ʼu meʼa ʼofa ʼaē neʼe foaki ki te ʼu kautahi ʼaē ʼe gāue moʼo tokoni ki te ʼu famili ʼaē neʼe hoko ki ai te tuʼutāmaki. ʼI tanatou fakaʼofaʼofa ki te tuʼutāmaki ʼaia neʼe hoko, ko te hahaʼi ʼi te ʼu potu fuli neʼe nātou fia tokoni.
Kae neʼe ʼiʼita te hahaʼi ʼi tanatou logo ʼaē ko te ʼu kautahi ʼiloa neʼe nātou fakaʼaogaʼi kovi te ʼu meʼa ʼofa ʼaia. Neʼe lahi te ʼu aga fakakākā neʼe hoko, ohage la ko te kautahi lahi neʼe ina fakatuʼutuʼu ke ina toʼo te vaelua ʼo te teitei 62 miliale falā, ʼo ina fakaʼaogaʼi ki te tahi ʼu gāue. Logola ki muli age neʼe mole ina fakaʼaogaʼi te falā ʼaia moʼo fakahoko tana fakatuʼutuʼu ʼaia, pea mo faifakalelei, kae neʼe ʼui fēnei e te fafine fai sulunale: “Ko te hahaʼi ʼaē neʼe nātou ʼiloʼi te meʼa ʼaia neʼe hoko, neʼe kua faigataʼa hanatou toe falala ki te kautahi ʼaia.” Kaeā koutou? Kua puli koa takotou falala ki te ʼu taʼi kautahi ʼaia?
ʼE ʼAoga Koa Peʼe Ko He Maumau Falā?
ʼI te agamāhani ʼe vikiʼi kita mokā kita lagolago ki ni ʼu kautahi ʼe gāue moʼo tokoni ki te hahaʼi faigataʼaʼia. Kae ʼe mole ko te manatu ʼaia ʼa te hahaʼi fuli. Kua hili kiai taʼu e 200 tupu, ko te tagata faitohi Pilitania ko Samuel Johnson, neʼe ina ʼui fēnei: “ ʼE koutou ʼiloʼi papau ʼe koutou fai he meʼa lelei mokā ʼe koutou foaki he falā kia nātou ʼaē ʼe gāue, moʼo totogi ʼaki tanatou gāue kinakina, kae ʼe mole tatau mokā ʼe koutou foaki he falā ki he kautahi, ohage ko hokotou meʼa ʼofa.” Ko ʼihi ia ʼaho nei ʼe tatau tanatou manatu mo te tagata Pilitania ʼaia, pea ko te ʼu logo ʼo ʼuhiga mo te ʼu kautahi ʼaē ʼe nātou fakaʼaogaʼi kovi te ʼu meʼa ʼofa, ʼe nātou pulihi ai te loto falala ʼa te hahaʼi ki te ʼu taʼi kautahi ʼaia. Tou vakaʼi age te ʼu faʼifaʼitaki ʼaenī e lua.
ʼI San Francisco, neʼe kapu te pule ʼo te kautahi faka lotu ʼe foaki meʼa ʼofa, koteʼuhi ia taʼu e lua neʼe ina fakaʼui ki tana kautahi ʼaia ke ina totogi te ʼu tafa ʼaē neʼe fai moʼo fakafoʼou tona kili, pea mo huʼi tona ʼu maʼua ki tana fale kai, ʼaē ko tona tau neʼe ko te falā ʼe teitei 57 280 ʼi te vāhaʼa. ʼI Pilitania, neʼe ufiufi ia te hahaʼi fakatuʼutuʼu ʼo te kautahi lahi foaki meʼa ʼofa ʼi te televisio, ʼi te temi ʼaē neʼe maʼu ai neʼe ko te falā ʼe teitei 145 500 000 ʼaē neʼe tonu ke foaki ki Lumania moʼo tokoni ki te faʼu ʼo te ʼu fale posio foʼou, neʼe ko fale pe e 12 neʼe laga pea neʼe mole lelei tona faʼu, kae puli te ʼu lauʼi teau afe tola. Ko te ʼu taʼi logo kovi ʼaia, neʼe tupu ai te tokaga fakalelei ʼa ʼihi hahaʼi foaki meʼa ʼofa, ki te lahi ʼo te ʼu meʼa ʼaē ʼe nātou foaki, pea ko ai ʼaē ʼe nātou foaki ki ai.
ʼE Tonu Ke Foaki Peʼe Kailoa
Kae ʼe mole tonu anai ke tou tuku ni ʼu gāue kovi ʼa he tokosiʼi peʼe ko ni ʼu kautahi ke nātou pulihi tatatou tokaga moʼoni pea mo tatatou manavaʼofa ki te hahaʼi. ʼE ʼui fēnei e te Tohi-Tapu: “Ko te tauhi ʼaē ʼe maʼa pea mo heʼe mele ia muʼa ʼo totatou ʼAtua pea mo Tāmai, ʼe ko ia ʼaenī: ko te taupau ʼo te ʼu fānau ʼaē ʼe hala mo tāmai pea mo faʼe, pea mo te ʼu fafine vitua ʼi tonatou ʼu mamahi.” (Sakopo 1:27, MN ) Ei, ʼe ko he koga maʼuhiga ʼo te maʼuli faka Kilisitiano ia te fai ʼo he ʼu gāue maʼa te hahaʼi faigataʼaʼia.
Kae ʼe lagi koutou fai anai te fehuʼi ʼaenī: ‘ ʼE tonu koa ke ʼau haga foaki he ʼu meʼa ʼofa ki te ʼu kautahi foaki meʼa ʼofa, peʼe tonu pe koa ke ʼau foaki haku ʼu meʼa ʼofa ki te hahaʼi?’ Koteā te faʼahiga foaki ʼaē ʼe leleiʼia e te ʼAtua? ʼE tou vakaʼi anai te ʼu fehuʼi ʼaia ʼi te alatike ka hoko mai.