Te Aga ʼAē ʼe Lelei Pea Mo Te Aga ʼAē ʼe Kovi
ʼI TE malamanei, ʼe hage ʼe tokosiʼi ia te hahaʼi ʼaē ʼe nātou fia tokoni ki niʼihi. Kae ko ʼihi ʼe mole nātou fia mulimuli ki te taʼi aga ʼaia—kae ʼe nātou fia tokoni ki te hahaʼi ʼi he ʼu faʼahiga ʼaluʼaga pe. ʼI te taʼu fuli, tokolahi te hahaʼi ʼe nātou foaki te ʼu lauʼi miliale falā ki te ʼu kautahi, ʼi tanatou manatu ʼaē ʼe ko he ʼu kautahi lelei moʼo tokoni ki te hahaʼi. Ohage la ʼi Pilitania ʼi te taʼu 2002, ko te falā neʼe foaki ki te ʼu kautahi ʼaē ʼe tokoni ki te hahaʼi faigataʼaʼia, neʼe ko te tahi afe miliale tupu. Talu mai te taʼu 1999, ko te ʼu hahaʼi e toko hogofulu, neʼe nātou foaki tanatou falā moʼo tokoni peʼe nātou fakapapau ke nātou foaki te falā e tolu afe miliale tupu moʼo tokoni ki te hahaʼi ʼaē ʼe faigataʼaʼia.
ʼI te ʼu gāue lelei ʼaē neʼe fai e nātou ʼaē ʼe gāue ʼi te ʼu faʼahiga kautahi ʼaia, ʼe kau ai te totogi ʼo te tōketā maʼa te ʼu famili ʼaē ʼe māsisiva, mo te tokaga ki te ʼu fānau ʼaē ʼe taupau tokotahi e tanatou tāmai peʼe ko tanatou faʼē, mo te tokoni ki te fai ʼo te ʼu foʼi huki moʼo puipui ia te hahaʼi mai te ʼu mahaki ʼi te ʼu fenua māsisiva, mo te foaki ki te ʼu tamaliki tanatou ʼuluaki tohi ako, mo te foaki ʼo he ʼu manu ki te hahaʼi ʼaē ʼe taupau manu ʼi te ʼu fenua māsisiva, pea mo te tokoni ki te hahaʼi ʼaē neʼe hoko kiā nātou te ʼu tuʼutāmaki fakafokifā ʼo te kele.
Ko te faʼahi ʼaia ʼe ina fakahā mai ko te hahaʼi ʼe feala ke nātou agalelei. Kae meʼa fakaʼofaʼofa, heʼe toe ʼi ai foki mo te ʼu hahaʼi ʼe nātou agakovi ʼaupito.
ʼE Tuputupu Te Agakovi
Talu mai te fakaʼosi ʼo te Lua Tau Faka Malamanei, neʼe fai te ʼu ʼata e teitei 50, ko te ʼu meʼa neʼe hoko moʼoni, ʼe fakahāhā ai te tāmateʼi ʼa te hahaʼi ʼuhi ko tanatou lanu pea mo te matehi ʼa te hahaʼi tokolahi ʼuhi ko te ʼu faʼahi faka politike. ʼE ʼui fēnei ʼi te sulunale American Political Science Review: “ ʼI te ʼu ʼaluʼaga ʼaia neʼe mamate ai te teitei toko 12 miliona kau solia pea mo te toko 22 miliona hahaʼi sivile, ʼo laka age ʼi te hahaʼi fuli ʼaē neʼe mamate ʼi te ʼu tau ʼaē neʼe hoko ʼi te ʼu loto fenua pea mo te fetauʼaki ʼa te ʼu fenua talu mai te taʼu 1945.”
ʼI te fakaʼosi ʼo te 20 sēkulō, ko te toko 2,2 miliona hahaʼi neʼe matehi ʼi Kamopotia ʼuhi ko te politike. Ko te fehiʼa ki te ʼu lanu ʼi Rwanda neʼe hoko ai te mamate ʼa te toko 800 000 tupu tagata, mo fafine, pea mo fānau. Ko te hahaʼi fai fakapō ʼi Bosnie ʼaē neʼe uga e te lotu pea mo te politike, neʼe nātou matehi te hahaʼi e toko 200 000 tupu.
ʼI te taʼu 2004, ʼi tana talanoa ʼo ʼuhiga mo te ʼu aga kovi ʼaē neʼe hoki hoko age pe, neʼe ʼui fēnei e te sikalaipe lahi ʼo te ʼu Puleʼaga Fakatahi: “ ʼI Ilakia, neʼe hoko ai te tāmateʼi fakamataku ʼa te hahaʼi sivile, pea ko te hahaʼi gāue agatonu, mo te hahaʼi ʼaē ʼe gāue ʼi te ʼu tala logo, pea mo nātou ʼaē neʼe mole kau ʼi te tau, neʼe pilisoniʼi nātou pea mo matehi nātou ʼi hona ʼaluʼaga fakalialia. ʼI te temi pe ʼaia, neʼe tou sio ki te gaohi koviʼi ʼaupito ʼo te hahaʼi pilisoni Ilakia. ʼI Darfur, neʼe feholaki te hahaʼi fuli ʼo te fenua mai tonatou ʼu ʼapi, neʼe maumauʼi tonatou ʼu ʼapi, pea neʼe fakaʼalikiʼi ai te hahaʼi. ʼI te potu noleto ʼo Ouganda, neʼe mātou sisio ki te ʼu fānau māʼimoa pea neʼe fakakinauʼi nātou ke nātou fai he ʼu aga fakalialia ʼaupito. ʼI Beslan, neʼe fakahā mai te pilisoniʼi ʼo te fānau pea mo tonatou tāmateʼi.”
Māʼia mo te ʼu fenua ʼaē ʼe ʼui ʼe kua haʼele ki muʼa, ʼe ʼāsili tuputupu te ʼu fai fakapō. Ohage la, ʼi te 2004 ʼi te sulunale Independent News, neʼe tala ai ʼi Pilitania “ ʼi te ʼu taʼu e hogofulu ʼaenī kua hili, neʼe tuʼa hogofulu-ma-tahi te tuputupu ʼo te hahaʼi ʼaē neʼe tā peʼe gaohi koviʼi ʼuhi ko tanatou lanu.”
He koʼe koa ko te hahaʼi ʼaē ʼe feala ke nātou agalelei, ʼe nātou fai he ʼu aga ʼe kovi feiā? ʼE pulihi anai koa ʼi he temi te agakovi? Ohage ko tona fakahā ʼi te alatike ʼaē ha koa mai, ʼe tou maʼu ʼi te Tohi-Tapu te ʼu tali lelei ki te ʼu fehuʼi faigataʼa ʼaia.