E Feafeaʼi He Fakamālohiʼi ʼo Tokotou ʼOhoana

KOUTOU fakakaukauʼi age muʼa he ʼapi ʼe ʼamanaki maumau. Kua tō te pena, kua maumau mo te ʼato, ʼo feiā pe mo te malaʼe kua vaoa. ʼE mahino ia, neʼe tau te ʼapi ʼaia mo te ʼu matagi lalahi lolotoga ni ʼu taʼu, pea neʼe mole gaohi tona ʼu meʼa ʼaē neʼe maumau. ʼE tonu koa ke holoʼi te ʼapi ʼaia? Kailoa. Kapau ʼe mālohi tona tafitoʼaga pea mo lelei tona faʼu, ʼe lagi feala pe ke toe fakafoʼou.

ʼE hage koa tokotou nofo ʼohoana ko te ʼapi ʼaia? Lolotoga ni ʼu taʼu, ʼe lagi koutou tau mo ni ʼu fihifihia ʼi takotou ʼu felogoi faka taumatuʼa. ʼE lagi neʼe tupu tokolua ʼu fihifihia ʼuhi ko he tahi ia koulua, peʼe ko koulua toko lua pe. ʼE feala ke koutou hage ko Sandy. Hili taʼu e 15 ki tona ʼohoana, neʼe ina ʼui fēnei: “ ʼE mole ma felogoi pe la, kae ʼe ma maʼuʼuli fakatahi pe. Kae ʼe mole feʼauga te faʼahi ʼaia.”

Tatau aipe mo kapau kua feiā tokotou ʼohoana, kae ʼaua naʼa koutou lotovaivai ʼo ʼui ʼe mole kei ʼi ai he puleʼaki kiai. ʼE lagi kei feala pe ke hāofaki tokotou ʼohoana. ʼE koutou loto moʼoni koa ke fakatokatoka pea mo hāofaki tokotou ʼohoana. ʼI te ʼu temi fihifihia, ʼe feala ke tokoni te fakapapau ki te haʼele lelei ʼo te maʼuli faka taumatuʼa. Kae koteā te fakapapau? Pea ʼe lava tokoni feafeaʼi atu te Tohi-Tapu ke mālohi takotou fakapapau ʼaia?

Ko Te Fakapapau ʼe Ko Te Fakamaʼua

ʼI te tikisionalio, ʼe ʼui ai ko te fakapapau ʼe ko “te meʼa ʼe fakamaʼua ki he tahi peʼe ko he meʼa ʼe fakamaʼua kiai te loto ʼo he tahi.” ʼI ʼihi temi, ʼe faka ʼuhiga te kupu ʼaia ki he gāue neʼe talaga ke fai. Ko he tahi ʼe laga fale ʼe lagi mulimuli anai ki te ʼu fakatotonu ʼo te pepa ʼaē neʼe ina sinie moʼo faʼu ia he fale. ʼE lagi mole ina ʼiloʼi te tagata ʼaē neʼe ina fakatotonu age te gāue. Kae ʼe ina ʼiloʼi ʼe tonu ke ina fakahoko te meʼa ʼaē kua ʼio kiai.

Kae ko te ʼohoana ʼe mole ko he matani gāue, ko te fakapapau ʼe pipiki kiai he fakamaʼua. ʼE lagi ko koutou mo tokotou ʼohoana neʼe kua koutou fakapapau ʼi muʼa ʼo te ʼAtua pea mo te tagata ʼe koutou maʼuʼuli fakatahi anai, logola te ʼu meʼa ʼaē ʼe feala ke hoko. Neʼe ʼui fēnei e Sesu: “Nee gaohi naua e te Tupuaga, tagata mo fafine? Pea nee ui maʼana: ‘Uhi ko te mea aia, e mavae anai te tagata mai tana tamai mo tana fae, e pipiki anai ki tona ohoana.’ ” Pea toe ʼui maʼa Sesu: “Ko te mea ae kua haʼi e te Atua, ke aua naa veteki e te tagata.” (Mateo 19⁠:​4-6) Pea ka hoko ni ʼu fihifihia, ko koulua taumatuʼa, ʼe tonu ke koulua faigaʼi ke koulua fakaʼapaʼapa ki takolua fakapapau.a ʼE ʼui fēnei e te fafine: “Neʼe hoki feala hamā felogoi lelei ʼi tamā mole kei fakaʼaogaʼi te manatu ʼaē ke ma mavete mokā hoko he fihifihia.”

Ko te fakapapau ʼe pipiki ki te maʼua. Koteā te tahi age meʼa ʼe pipiki kiai?

Ko Te Felagolagoʼaki ʼe Ina Fakamālohiʼi Te Fakapapau ʼo Te ʼOhoana

ʼE mole faka ʼuhiga leva ʼe mole toe hoko anai ni ʼu fihifihia ʼuhi ko te fakapapau ʼaia. Kae ka hoko he fihifihia, ʼe tonu ki te taumatuʼa ke nā holi mālohi ke fakatokatoka tonā fihifihia, ʼo mole nā fai pe ohage ko honā maʼua, kae ʼe nā fai ʼaki tonā loto katoa. ʼO ʼuhiga mo te tagata pea mo te fafine, neʼe ʼui fēnei e Sesu: “E mole foki kei na tokolua, kae ko te kakano e tahi.”

Koteā te faka ʼuhiga ʼo te ʼui ʼaē kua koutou “kakano e tahi” mo tokotou hoa? Neʼe tohi e te ʼapositolo ko Paulo ko “te u tagata ohoana e maua ke oʼofa . . . ki onatou ohoana o hage ko onatou sino totonu.” (Efeso 5⁠:​28, 29) Pea tahi ko te faka ʼuhiga ʼo te “kakano e tahi” ke koutou tokaga ki te fīmālie ʼo tokotou hoa ohage pe ko takotou tokaga kia koutou totonu. ʼE tonu ki te taumatuʼa ke nā manatuʼi ʼe mole kei nā maʼuʼuli takitokotahi, kae kua nā toko lua. Neʼe tohi fēnei e te fafine fai tokoni: “Ko te taumatuʼa ʼe tonu ʼi tonā ʼu loto ke nā mahino kua nā ʼohoana.”

ʼI tokotou “loto” pea mo ʼaē ʼo tokotou hoa, kua koutou ʼohoana koa? ʼE feala pe ke koutou nonofo fakatahi lolotoga ni ʼu taʼu kae ʼe mole heʼeki koutou liliu ko he “kakano e tahi.” Ei ko te meʼa ʼaia ʼe feala ke hoko, kae ʼe ʼui fēnei e te tohi Giving Time a Chance: “Ko te ʼohoana ko tona faka ʼuhiga ko te maʼuli fakatahi mo he tahi, pea ka lahi tanā fetokagaʼaki, pea ʼe toe tuputupu ai anai mo tanā feʼofaniʼaki.”

Ko ʼihi taumatuʼa ʼe mole maʼuli fiafia kae ʼe nātou nonofo fakatahi ʼuhi pe ke maʼuli fīmālie te fānau ʼi te faʼahi faka paʼaga. Ko ʼihi taumatuʼa ʼe haga nonofo fakatahi koteʼuhi ʼe mahino kia nātou ko te mavete ʼe mole ko he aga ʼe tau mo feʼauga, peʼe nātou tuʼania te meʼa ʼaē ka ʼui anai e te hahaʼi mo kapau ʼe nātou mavete. Logola te lelei ʼo te ʼu taʼi manatu ʼaia moʼo fakatologa he ʼohoana, kae koutou manatuʼi ʼe tonu ke koutou maʼu he felogoi ʼofa.

ʼE Tuputupu Te Fakapapau ʼo Te ʼOhoana Mokā ʼe Fakatafito ʼAki Ni ʼu Gāue ʼOfa

Neʼe fakakikite e te Tohi-Tapu ʼi “te ʼu ʼaho fakamuli” ko te hahaʼi ʼe nātou “kaumeʼa pe anai mo nātou totonu.” (2 Timoteo 3⁠:​1, 2, MN ) ʼE moʼoni te fakakikite ʼaia, koteʼuhi ia ʼaho nei ko te hahaʼi kua nātou tokakaga pe kia nātou totonu. ʼE lahi te ʼu nofo ʼohoana, ʼe nātou manatu ʼe ko he vaivaiʼaga mokā foaki he meʼa kae mole liufaki. Kae ʼe mālohi he ʼohoana, mokā ko te taumatuʼa ʼe nā fefakahāʼaki he ʼu aga faka sakilifisio. ʼE koutou lava fakahoko feafeaʼi ia te faʼahi ʼaia?

ʼAua naʼa koutou fai te fehuʼi ʼaenī, ‘E feafeaʼi haku fakagata toku maʼuli ʼaenī?’ kae koutou lagaʼi te fehuʼi ʼaē, ‘Koteā ʼaē ʼe ʼau fai moʼo fakamālohiʼi toku ʼohoana?’ ʼE ʼui e te Tohi-Tapu ko te kau Kilisitiano ʼe tonu anai “ke mole [nātou] tokakaga pe ki te ʼu meʼa ʼa [nātou] totonu, kae ke [nātou] toe tokakaga pe foki ki te ʼu meʼa ʼa ʼihi.” (Filipe 2⁠:​4, MN ) ʼI takotou lolotoga fakakaukauʼi te pelesepeto faka Tohi-Tapu ʼaia, koutou vakavakaʼi takotou ʼu gāue ʼo te vāhaʼa kua hili. Neʼe tuʼa fia takotou fai te ʼu agalelei maʼa tokotou hoa? Ka palalau atu tokotou hoa, ʼe koutou fakalogo koa ki ai​—logola ʼe mole koutou manatu tahi mo ia? Ko te ʼu gāue e fia neʼe koutou fai ke fiafia ai tokotou hoa?

Ka koutou fai te ʼu taʼi fehuʼi ʼaia, ʼe mole tonu ke koutou tuʼaniaʼi peʼe tokagaʼi peʼe fua anai takotou ʼu gāue lelei ʼaia. ʼE ʼui fēnei e te tohi: “ ʼE teitei pe ke fua lelei te ʼu felogoi ʼaē ʼe fai ʼaki he agalelei, koia ka koutou fakaloto mālohiʼi tokotou hoa ʼaki tokotou aga, pea ʼe mahino ia ʼe ina toe liufaki atu pe anai takotou agalelei.” ʼE fakaloto mālohiʼi tokotou ʼohoana ʼaki te ʼu gāue faka sakilifisio koteʼuhi ʼe hā ai te maʼuhiga ʼo tokotou maʼuli faka taumatuʼa kia koutou pea mo takotou fia puipui tokotou ʼohoana.

ʼE Maʼuhiga He Sio Mamaʼo

ʼE leleiʼia e Sehova ʼAtua te agatonu. ʼIo, ʼe ʼui fēnei e te Tohi-Tapu: “ ʼAki ia ia ʼaē ʼe agatonu ʼe ke [Sehova] agatonu anai kia ia.” (2 Samuele 22⁠:26) Ko te nofo agatonu ki te ʼAtua ʼe fakamaʼua kiai te nofo agatonu ki te ʼohoana ʼaē neʼe ina fakatuʼutuʼu.​—Senesi 2⁠:⁠24.

Kapau ʼe koulua feʼagatonuʼaki, ʼe tologa anai tokolua maʼuli faka taumatuʼa. Ka koulua fakakaukauʼi te ʼu māhina, mo te ʼu taʼu, pea mo te ʼu taʼu e hogofulu ka haʼu, ʼe tonu ke koulua sio ʼe kei koulua maʼuʼuli fakatahi. ʼE mole hake ia koulua te manatu ʼaē ke koulua mavete ʼi he temi, pea ko te taʼi manatu ʼaia ʼe lelei heʼe ina puipui ai anai takolua felogoi lelei. ʼE ʼui fēnei e te fafine: “Logola te ʼu temi ʼaē ʼe ʼau ʼita lahi ai ki [toku ʼohoana] pea mo ʼau lotomamahi ki te meʼa ʼaē ʼe hoko kia māua, kae ʼe mole ʼau tuʼania peʼe ma mavete anai. Ko te meʼa ʼaē ʼe ʼau tuʼania, peʼe feafeaʼi anai hamā fakatokatoka tomā fihifihia. ʼE ʼau ʼiloʼi papau ʼe ma fakatokatoka anai, kae ʼi te temi fihifihia ʼe mole ʼau faʼa ʼiloʼi lelei te meʼa ʼaē ʼe tonu ke ʼau fai.”

Ko te sio mamaʼo ʼe ko he koga maʼuhiga ʼo te fakapapau ʼaē ʼe kita fai ki tokita hoa, kae tokolahi te ʼu ʼohoana kua puli te taʼi faʼahiga manatu ʼaia. ʼI te ʼu temi kē, ʼe feala ki he tahi ʼi te taumatuʼa ke ina ʼui fēnei, “ ʼE ʼau mavete mo koe!” peʼe “ ʼE ʼau ʼalu ʼo kumi he tahi ʼe ʼofa moʼoni kia ʼau!” Kae ʼi te agamāhani, ʼe ko he ʼu palalau neʼe mole koutou fakakaukauʼi. Koia, ko te Tohi-Tapu ʼe ina ʼui ko te ʼalelo ʼe feala ke “fonu ia ko te kafo kona ʼe feala ke ina matehi he tahi.” (Sakopo 3⁠:​8, MN ) Ko te ʼu palalau kona pea mo te ʼu palalau faka mataku ʼe feala ke faka ʼuhiga fēnei: ‘ ʼE hage kia ʼau ko tatā nofo ʼohoana ʼe mole fualoa anai. ʼE feala pe ʼi he temi ke tā mavete ai.’ ʼE feala ki te ʼu taʼi palalau feiā ke maumau ai he nofo ʼohoana.

Kapau ʼe koutou sio mamaʼo, pea ʼe koutou ʼamanaki ʼe koutou nonofo fakatahi anai mo tokotou ʼohoana ʼi te ʼu temi fihifihia pea mo te ʼu temi maui mālie. ʼE ko he tahi ʼaia meʼa lelei. ʼE faigafua ai anai kia koutou pea mo tokotou hoa ke mole koutou tokagaʼi tokotou ʼu vaivaiʼaga mo takotou ʼu hala, pea ke koutou fekātakiʼaki pea mo fefakamolemoleʼaki ʼaki he lotolelei. (Kolose 3⁠:13) ʼE ʼui fēnei e te tohi: “ ʼI he ʼohoana ʼe lelei, ʼe feala pe ke hoko ni ʼu hala ia koulua, kae logola te faʼahi ʼaia ʼe feala pe ki te ʼohoana ke mālohi.”

ʼI tokolua ʼaho ʼohoana, neʼe koulua fai te fakapapau, pea neʼe mole koulua fai te faʼahi ʼaia ki he fakatuʼutuʼu ʼohoana, kae neʼe koulua fefakapapauʼaki kia koulua pe. Koia ʼi tokotou ʼuhiga hahaʼi ʼohoana, ʼe tokoni anai te faʼahi ʼaia ki takotou fakakaukau pea mo takotou aga ʼi te temi nei. ʼE moʼoni ʼe tonu ke koutou maʼuʼuli mo tokotou hoa ʼuhi ko takotou tui mālohi ki te taputapu ʼo te ʼohoana, kae ʼe koutou fai koa ia te faʼahi ʼaia heʼe koutou ʼofa ki tokotou hoa?

[Kiʼi nota]

[Talanoa ʼo te pasina 5]

Koteā ʼAē ʼe Koutou Lava Fai ʼi Te Temi Nei

Koteā takotou manatu ʼo ʼuhiga mo te fakapapau? ʼE lagi koutou fakatokagaʼi ʼe feala ke koutou hikihiki tokotou maʼuli. Koutou fakatokagaʼi age te ʼu tokoni ʼaē ʼe tuʼu ʼi lalo moʼo fakaloto mālohiʼi tokotou ʼohoana:

● Koutou sivi ia koutou totonu. Koutou fai te fehuʼi ʼaenī: ‘ ʼI toku loto ʼe ʼau fakamoʼoni koa kua ʼau ʼohoana, peʼe kei ʼau manatu pe koa pea mo fai he ʼu aga ʼe hage ai ʼe mole heʼeki ʼau ʼohoana?’ Koutou fakalavelave ki tokotou hoa pe koteā tana manatu ʼo ʼuhiga mo koutou.

● Koutou lau te alatike ʼaenī mo tokotou hoa. Pea koutou felogoi ʼi te tokalelei, peʼe feafeaʼi hakotou fakamālohiʼi takotou fakapapau ʼohoana.

● ʼAki tokotou ʼohoana, koutou kaugā gāue fakatahi heʼe ko he faʼahi ʼe ina fakamālohiʼi ai takotou fakapapau. Ohage la: Koutou sioʼi fakatahi te ʼu paki ʼo tokotou ʼaho ʼohoana, ʼo feiā pe mo he tahi age ʼu suvenia lelei. ʼE kei koutou fai koa te ʼu meʼa ʼaē neʼe koutou fai ʼi tokotou temi fakatahi pe ʼi takotou foʼofoʼou ʼohoana? Koutou ako fakatahi te ʼu alatike faka Tohi-Tapu ʼo Te Tule Leʼo pea mo te Réveillez-vous ! ʼaē ʼe talanoa ki te ʼohoana.

[Talanoa ʼo te pasina 6]

ʼE Tonu Ke Koutou Tokakaga ʼo Puipui Tokotou ʼOhoana

● Te Maʼua “Ko te fakapapau ʼaē ʼe ke fai, ke ke fakahoko. ʼE lelei age kia koe hau mole fai hau fakapapau, ʼi hau fai he fakapapau kae mole ke fakahoko.”​—Tagata Tānaki 5⁠:​4, 5.

● Koulua Kaugā Gāue Fakatahi “ ʼE lelei age he toko lua ʼi he tokotahi. . . . Heʼe kapau ʼe tō he tahi ia nāua, ʼe feala ki ʼaē ke ina faka tuʼuake tona hoa.”​—Tagata Tānaki 4⁠:​9, 10.

● Koulua Maʼuli Faka Sakilifisio “E leleiʼage takita foaki i takita tali.”​—Gaue 20⁠:⁠35.

● He Sio Mamaʼo “Ko te ʼofa . . . ʼe ina kātakiʼi ia meʼa fuli.”​—1 Kolonito 13⁠:​4, 7, MN.

[Paki ʼo te pasina 7]

Ka palalau atu tokotou ʼohoana, ʼe koutou fakalogo koa ki ai?