Neʼe Fakaloto Mālohiʼi Te Kau Maʼu Pepa ʼo Kalaate Ke Nātou Fakahā “Te u Gaue Fakaofolele a Te Atua”
KO TE toko 6 635 hahaʼi tokalelei mai te ʼu fenua e 52, neʼe nātou kau ki te fakatahi ʼo te ʼaho 13 ʼo Sepetepeli 2003, ʼaē neʼe foaki ai te ʼu pepa ki te 115 kalasi ʼo te Faleako Faka Tohi-Tapu ʼo Kalaate ʼo te Watchtower.
Neʼe nātou logo ki te fakaloto mālohi faka Tohi-Tapu ʼaē neʼe fai ki te kau ako e toko 48 ʼo te kalasi, ke nātou fakahā “te u gaue fakaofolele a te Atua” ki te hahaʼi ʼo te ʼu fenua e 17. (Gaue 2:11) Ko te ʼu fenua ʼaia ʼaē ka ʼolo anai kiai te kau maʼu pepa ʼaia, moʼo fakahoko tanatou gāue misionea.
ʼI tana ʼu ʼuluaki palalau, ko Stephen Lett, ʼaē ʼe kau ʼi te Kolesi Pule ʼa te kau Fakamoʼoni ʼa Sehova pea neʼe pelesita ʼi te polokalama ʼaia, neʼe ina fakamanatuʼi fēnei age ki te kau ako: “Ka koutou ʼolo ki tokotou telituale, tautau aipe peʼe ko te koga meʼa fea ʼaē ka koutou ʼolo kiai peʼe ko te ʼu ʼaluʼaga ʼaē ka hoko kia koutou, kae ʼe tokolahi age ia nātou ʼaē ʼe kau mo koutou ia nātou ʼaē ʼe fakafeagai kia koutou.” ʼI tana fakaʼaogaʼi te kapite 6 ʼo Lua Hau, neʼe fakamanatuʼi age e te Tēhina ko Lett ki te kau ako, ʼe feala ʼi tanatou fakahā “te u gaue fakaofolele a te Atua,” ke nātou falala ki te tokoni ʼa Sehova ʼAtua pea mo te ʼu lauʼi miliale kau ʼaselo. (2 Hau 6:15, 16) Neʼe hoko ki te ʼu ʼuluaki Kilisitiano te fakafeagai pea mo te mole fia logo ʼa te hahaʼi ki tanatou gāue fai faka mafola pea mo faiako, pea ʼe toe hoko ia ʼaho nei te ʼu ʼaluʼaga ʼaia ki te kau misionea. Kae ʼe feala ke nātou falala ki te tokoni mai lagi pea mo te kautahi fakakelekele ʼo Sehova.—Pesalemo 34:7; Mateo 24:45.
Koutou Fakahā “Te u Gaue Fakaofolele a Te Atua”
ʼI te ʼosi ʼo te ʼu ʼuluaki palalau ʼo te pelesita, ko Harold Corkern, ʼaē ʼe kau ʼi te Komite ʼo te Filiale ʼo Amelika, neʼe talanoa ki te kupu tāfito ʼaenī: “Koutou Maʼu He ʼu ʼAmanaki Fakapotopoto, Ke Fakafiafia Pea Mo Maʼu Ai He ʼu Fua ʼo Takotou Selevisi.” Neʼe fakahā lelei e te Tēhina ko Corkern ko he ʼu ʼamanaki neʼe mole kita fakahoko ʼe fakaloto vaivai, ohage ko tona fakahā ia Tāʼaga Lea 13:12. Kae ʼe feala ke kita lotovaivai he neʼe mole fakapotopoto te ʼu ʼamanaki ʼaē neʼe mole kita fakahoko. ʼE tonu ke maʼu e te kau maʼu pepa he manatu ʼe fakapotopoto, pea mo nātou mahino lelei kia nātou totonu pea mo te hahaʼi. ʼE tonu ke mahino kia nātou ʼe nātou faihala anai, kae ʼe mole tonu ai ke nātou lotomamahi ʼaupito ʼi tanatou tokoni ki te hahaʼi ke nātou mahino ki “te u gaue fakaofolele a te Atua.” Neʼe fakaloto mālohiʼi e te Tēhina ko Corkern te kau misionea foʼou ke nātou falala kia Sehova, “e ina fakapale natou e natou kumi iaʼia.”—Hepeleo 11:6.
Neʼe hoa leva kiai ia Daniel Sydlik, ʼe kau ʼi te Kolesi Pule, pea neʼe talanoa ki te kupu tāfito “Koteā Te ʼAmanaki Faka Kilisitiano?” Neʼe ina ʼui fēnei: “Ko te ʼamanaki ʼe ko he kalitate lelei ʼo he Kilisitiano. ʼE ko he fakatuʼutuʼu totonu ke mulimuli kiai he tahi, pea ʼe liliu ai ʼo felogoi lelei mo te ʼAtua. ʼE mole feala ki he tahi ʼi te mālama ke ina maʼu te ʼamanaki ohage ko tatou.” Neʼe hoko atu e te Tēhina ko Sydlik ʼo ina fakamatala te ʼu agaaga kehekehe ʼo te ʼamanaki faka Kilisitiano, ʼaē ʼe tokoni ki he tahi ke fiafia logola te ʼu faigataʼaʼia ʼo te maʼuli. “ ʼAki te ʼamanaki ʼe feala ke tou kātakiʼi te ʼaho fuli ʼaki he mālohi ʼe fakafoʼou pea mo he manatu lototoʼa.” Ko te ʼamanaki ʼaē ʼe maʼu e he Kilisitiano ʼe tokoni kia ia ke ina faka ʼuhiga ia Sehova, ko he ʼAtua ʼe ʼi ai tona fakatuʼutuʼu pea mo fiafia ʼi tana tauhi kia te ia.—Loma 12:12.
Ko Wallace Liverance, te sikalaipe ʼo te Faleako ʼo Kalaate, neʼe ina fakaloto mālohiʼi te kau ako ke nātou “Haga Haʼele ʼAki Te Laumālie.” (Kalate 5:16) Neʼe talanoa ʼo ʼuhiga mo Paluke, te sikalaipe ʼo Selemia, ʼaē neʼe meihiʼi pe ke mole kei haʼele ʼaki te laumālie. ʼI te tahi lakaga, neʼe fakahaʼuhaʼu te gaʼegaʼe ʼo Paluke pea neʼe ina kamata kumi te ʼu meʼa lalahi maʼana. (Selemia 45:3, 5) Neʼe fakahā lelei leva e te Tēhina ko Liverance, ko ʼihi neʼe mole kei nātou mulimuli ia Sesu pea mo nātou līaki te moʼoni fakalaumālie, ʼaē ʼe ʼaoga ki te hāofaki. Neʼe tupu ko tanatou mole mahino ki te meʼa ʼaē neʼe akoʼi e Sesu, pea mo lotomamahi ʼuhi ko te mole fakafimālieʼi ʼi te temi pe ʼaia tanatou ʼu holi fakatagata. (Soane 6:26, 27, 51, 66) Koteā ʼaē ʼe feala ke ako e te kau misionea mai te ʼu fakamatala ʼaia, ʼaē ko tanatou gāue ko te tokoni ki te hahaʼi ke nātou ʼiloʼi te Tupuʼaga pea mo tona fakatuʼutuʼu? Neʼe fakaloto mālohiʼi te kau ako ke ʼaua naʼa nātou kumi tuʼulaga, ke vikiʼi nātou e te tagata, peʼe nātou fakaʼaogaʼi he gāue faka teokalatike moʼo maʼu ai ni ʼu lelei.
Ko te Tēhina faiako ʼo Kalaate ko Mark Noumair neʼe ina lagaʼi te fehuʼi ʼaenī: “ ʼE Koutou Foaki Anai Koa Peʼe Koutou Tali Anai?” Neʼe ina fakatafito tana ʼu palalau kia Fakamāu 5:2, ʼaē neʼe foaki ai e te kau Iselaele ia nātou takitokotahi ke nātou kau ʼi te kautau ʼo Palake. Neʼe fakamālo ki te kau ako ʼo Kalaate ki tanatou tali lelei ki te pāui ʼo te Palake Lahi, ia Sesu Kilisito, ke lahi age tanatou kau ki te tau fakalaumālie. ʼE tonu ke tokaga te kau solia ʼa Kilisito ke nātou maʼu te ʼofa ʼo ia ʼaē neʼe ina pāui nātou. Neʼe fakamanatuʼi fēnei e te Tēhina ko Noumair ki te kau ako: “Ka tou kamata tokaga pe tatou ki te ʼu meʼa ʼaē ʼe tou leleiʼia, ʼe mole kei tou tauʼi te fili. . . . ʼE mole koutou misionea maʼa koutou. ʼE koutou misionea maʼa Sehova, mo tona tuʼi faʼifaʼitaliha, pea mo fakahoko tona finegalo. ʼE mole tou misionea heʼe tou loto ke fakafiafia tatou e Sehova, kae ʼe tou tauhi kia te ia heʼe tou ʼofa kia te ia.”—2 Timoteo 2:4.
Ki muli age ko Lawrence Bowen, ʼaē ʼe faiako ʼi Kalaate, neʼe ko te pelesita ʼo te akonaki ʼaē ko tona kupu tāfito “Fakamaʼoniʼoni Nātou ʼAki Te Moʼoni.” (Soane 17:17) Neʼe ina ʼui ko te kau ako ʼo te 115 kalasi, neʼe kua fakamaʼoniʼoni nātou ʼi tonatou ʼuhiga minisi ʼa te ʼAtua. ʼI temi ʼaē neʼe nātou kau ai ki te ako, neʼe nātou toe kau ki te fai faka mafola, ʼo nātou kumi te hahaʼi ʼaē ʼe ʼoʼofa moʼoni ki te moʼoni. Ohage ko Sesu pea mo tana ʼu ʼuluaki tisipulo, ʼe mole palalau te kau ako ʼi tonatou ‘loto totonu.’ (Soane 12:49, 50) ʼAki he faʼafai neʼe nātou fakahā te folafola ʼo te moʼoni ʼaē ʼe haʼu mai te ʼAtua pea mo ina foaki te maʼuli. Ko te ʼu faʼifaʼitaki pea mo te ʼu fakamatala ʼa te kau ako, neʼe fakahā ai te malave mālohi ʼa te Tohi-Tapu ki te hahaʼi ʼaē neʼe nātou palalau kiai.
Ko Te ʼu Tokoni Pea Mo Te ʼu Fakamatala ʼe Fakaloto Mālohi
Ko Anthony Pérez pea mo Anthony Griffin, ʼaē ʼe nā kau ki te Selevisi Gāue ʼo te filiale ʼo Amelika, neʼe nā fakafehuʼi te ʼu tēhina ʼo te ʼu Komite ʼo te ʼu Filiale mai te malamanei katoa. Neʼe palalau te ʼu tagata ʼaia ʼo ʼuhiga mo te ʼu faigataʼaʼia ʼaē ka felāveʼi mo te kau misionea foʼou pea neʼe nātou fai age te ʼu tokoni ʼaoga. ʼE kau ʼi te ʼu faigataʼaʼia ʼaia te kehekehe ʼo te ʼu agaʼi fenua, te vevela lolotoga te taʼu katoa, peʼe ko he ʼaluʼaga faka lotu peʼe faka politike ʼe kehekehe mo te maʼuli ʼaē neʼe māhani kiai te kau ako. Koteā ʼaē ʼe feala ke tokoni ki te kau misionea foʼou ʼi tonatou maʼuli foʼou? Ke nātou ʼoʼofa kia Sehova, mo ʼoʼofa ki te hahaʼi, ke ʼaua naʼa nātou fakahemala, peʼe aga fefeka. Neʼe ʼui fēnei e te tēhina ʼe kau ki te filiale: “Ko te hahaʼi ʼo te fenua ʼaē ʼe koutou ʼolo kiai ʼe kua lauʼi sēkulō tanatou maʼuʼuli ʼi ai, ʼi muʼa atu ia koutou. ʼE mahino ia ʼe feala ke tou maʼuʼuli ai pea mo faka ʼalutahi totatou maʼuli mo te fenua. ʼI te temi fuli pe ʼaē neʼe hoko ai he ʼu fihifihia, neʼe mātou manatu ko te hahaʼi ʼe nātou tokoni mai ke fetogi tomatou agaaga. Koutou faikole pea mo falala ki te laumālie ʼo Sehova, pea ʼe koutou sio anai ki te moʼoni ʼo te ʼu palalau ʼaenī ʼa Sesu: ‘ ʼE ʼau nofo mo koutou.’ ”—Mateo 28:20, MN.
Ko Samuel Herd, ʼe kau ʼi te Kolesi Pule, neʼe ina fakaʼosi te polokalama ʼaki tana akonaki: “Koutou Haga Fakahā Te ʼu Gāue Fakaofolele ʼa Te ʼAtua.” Ko te tufa ʼo te laumālie maʼoniʼoni ʼi te ʼaho 33 ʼo te Penikosite ʼo totatou temi, neʼe ina fakafonu ai te ʼu tisipulo ʼa Sesu ʼi te mālohi, pea neʼe nātou faka mafola “te u gaue fakaofolele a te Atua.” Koteā ʼaē ʼe feala ke tokoni ki te kau misionea foʼou ia ʼaho nei ke nātou faka mafola te Puleʼaga ʼa te ʼAtua ʼaki he faʼafai ʼe tatau? Ko te laumālie maʼoniʼoni. Neʼe fakaloto mālohiʼi e te Tēhina ko Herd te kau ako ʼaē neʼe maʼu pepa, ke nātou “vela ʼi te laumālie,” ke nātou fiafia ʼaupito ʼi tanatou gāue, pea ke mole galo kia nātou te ako ʼaē neʼe fai kia nātou. (Loma 12:11, MN ) Neʼe ʼui e te Tēhina ko Herd “ko te Tohi-Tapu ʼe ko he meʼa gāue taulekaleka ʼa te ʼAtua. ʼAua naʼa koutou meʼa noaʼi tona maʼuhiga. Ko te logo ʼaē ʼe tohi ai, ʼe ko he logo ʼe maʼuli. ʼE talanoa fakahagatonu ki te ʼu faʼahi ʼaē ʼe moʼoni. Koutou fakaʼaogaʼi te Tohi-Tapu moʼo fakatokatoka te ʼu meʼa ʼo tokotou maʼuli. Koutou tuku ke ina fetogi takotou faʼahiga fakakaukau. Koutou taupau takotou fealagia fakakaukau, ʼo koutou ako, mo lau pea mo metitasioʼi te Tohi-Tapu . . . Koutou fakatuʼutuʼu pea mo loto moʼoni ke koutou fakaʼaogaʼi takotou ako ʼi Kalaate moʼo palalau ki ‘te u gaue fakaofolele a te Atua.’ ”
ʼI te ʼosi lau ʼo te ʼu ʼofa mai te malamanei katoa pea mo foaki te ʼu pepa ki te kau ako, neʼe lau e te tēhina te tohi ʼo te kalasi, neʼe fakahā ai tanatou loto fakafetaʼi ki te ako ʼaē neʼe foaki kia nātou. Pea ko te Tēhina ko Lett neʼe ina fakaʼosi te lakaga fakafiafia ʼaia, ʼo talanoa kia 2 Fakamatala 32:7 pea mo Teutalonome 20:1, 4. Neʼe ina fakapipiki tana ʼu palalau fakaʼosi ki tana ʼu ʼuluaki palalau, ʼo ina ʼui fēnei: “Koutou ʼaē kua maʼu pepa, ka koutou hū ki tuʼa, pea ka koutou kau ki te tau fakalaumālie ʼi te fenua foʼou ʼaē ʼe fekauʼi koutou kiai, koutou manatuʼi ʼe haʼele anai Sehova mo koutou. ʼAua naʼa galo kia koutou ʼe tokolahi age ia nātou ʼaē ʼe kau mo koutou ia nātou ʼaē ʼe fakafeagai kia koutou.”
[Paki ʼo te pasina 25]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 7
ʼE nātou ʼolo ki te ʼu fenua e: 17
Ko te kau ako e: 48
Te fakafuafua ʼo tonatou ʼu taʼu: 33,7
Te fakafuafua ʼo tanatou ʼu taʼu ʼi te moʼoni: 17,8
Te fakafuafua ʼo tonatou ʼu taʼu ʼi te gāue temi katoa: 13,5
[Paki ʼo te pasina 26]
Ko te 115 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.