Koutou Fakafiafia Ki Te ʼAmanaki ʼo Te Puleʼaga!
NEʼE ko he lakaga fakafiafia ia te fakatahi ʼa te toko 5 784 hahaʼi ʼi te ʼaho 10 ʼo Malesio 2001, ʼi te ʼu fakatahiʼaga e tolu ʼi te kolo ʼo New York neʼe fakaʼaogaʼi e te toe famili ʼo te Petele. Neʼe ko te fakatahi ki te tufa ʼo te ʼu pepa ʼa te 110 kalasi ʼo te faleako ʼa te kau misionea ʼo Kalaate.
Ko Carey Barber, ko he tahi ʼe kau ki te Kolesi Pule ʼa te kau Fakamoʼoni ʼa Sehova, neʼe ina fai te ʼu fakamālo pea neʼe ina avahi te polokalama, ʼo ina ʼui fēnei: “Ko he meʼa fakafiafia tatatou ʼiloʼi ko kalasi e 110 ʼo te kau ako ʼo Kalaate neʼe akoako ke nātou liliu ko he kau misionea pea neʼe hinoʼi nātou ki te ʼu telituale ʼi te kele katoa.”
E Feafeaʼi Te Taupau ʼo Te Fiafia
ʼI te ʼosi avahi e te Tēhina ko Barber te fakatahi, ko Don Adams neʼe palalau kia nātou ʼo te fakatahi, ʼo kau ai te kau ako e toko 48 ʼe ʼamanaki maʼu pepa, ki te kupu tāfito ʼaenī, “Ko Te Tapuakina ʼa Sehova ʼe Ina Fakakoloaʼi Tatou.” Neʼe fakatafito tana akonaki kia Tāʼaga Lea 10:22, pea neʼe ina fakamanatuʼi ki te fakatahi, ko Sehova ʼe lagolago pea mo ina tapuakina tana kau kaugana ʼaē ʼe nātou fakamuʼamuʼa te ʼu meʼa ʼo te puleʼaga ʼi tonatou maʼuli. Neʼe ina fakaloto mālohi te kau ako ke nātou tali te ʼu telituale foʼou ka hinoʼi nātou kiai ohage pe ko tona fai e te ʼapositolo ko Paulo ʼaē neʼe ina tali te fakaafe ke “fakalaka ki Masetonia o tokoni” ai. (Gaue 16:9) Logope neʼe ʼi ai te ʼu fihifihia ke ina tauʼi, kae ʼi te lotolelei ʼo Paulo ke fai faka mafola ʼi he potu pe neʼe hinoʼi ia ia kiai, neʼe lahi te ʼu tapuakina fakafiafia neʼe ina maʼu.
Kua ʼosi te ʼu māhina e nima ʼo te ako pea mo te akoako ʼa te kalasi moʼo teuteuʼi nātou ki te gāue faka misionea. Kae, ko Daniel Sydlik, ʼe kau ki te Kolesi Pule ʼa te kau Fakamoʼoni ʼa Sehova, neʼe ina fakaloto mālohiʼi ia nātou ke nātou haga ako. ʼI tana palalau ki te kupu tāfito “Koutou Liliu Ko He Tisipulo Moʼoni,” neʼe ina fakatokagaʼi fēnei: “Ko te ʼuhiga tisipulo ke tou fakalogo tuʼumaʼu ki te ʼu folafola ʼa Sesu. ʼE fakapipiki kiai totatou lotolelei tuʼumaʼu ʼaē ke tou fagono ki ʼana ʼu folafola, ki tana logo, pea mo tana akonaki.” Neʼe ina fakatokagaʼi ko te kau tisipulo ʼa Kilisito ʼe mole nātou fai he ʼu tonu kae mole nātou fakalogo ki te leʼo ʼo te Pule; heʼe fakapipiki te poto ʼo te ʼAtua ki te maʼuli ʼa Kilisito. (Kolose 2:3) ʼE mole ʼi ai he tahi ia tatou ʼe feala ke logo tuʼa tahi ki te folafola ʼa Sesu pea ina ʼui kua ina ʼiloʼi tona ʼu agaaga fuli, koia neʼe fakaloto mālohiʼi ai e te Tēhina ko Sydlik te kau maʼu pepa ke nātou haga ako, mo maʼuliʼi pea mo akonaki te moʼoni faka Kilisitiano, ʼaē ʼe maʼu ai te ʼāteaina.—Soane 8:31, 32.
Ke tou taupau te fiafia ʼi te gāue ʼa te ʼAtua, ʼe tonu ke tou lotolelei ʼo tali ke akonakiʼi pea mo fakatonutonuʼi tatou. Koʼeni te fehuʼi neʼe lagaʼi e Lawrence Bowen, ko he tagata faiako ʼi Kalaate “ ʼE Fakatonutonuʼi Anai Koa Koutou e ʼOkotou ʼu Ifiifi?” Neʼe ina fakahā ʼi te Tohi-Tapu, neʼe faka ʼalutahi te ʼu ifiifi fakatātā mo te ʼu manatu pea mo te ʼu meʼa loloto ʼaē ʼe tou logoʼi. ʼE nātou ʼaoga moʼo fakatonutonuʼi ʼo tatou mokā malave te Folafola ʼa te ʼAtua ki te ʼu koga loloto ʼo totatou ʼuhigaʼi tagata. (Pesalemo 16:7; Selemia 17:10) ʼE feala pe ke malave ʼaupito kia Sehova tatatou nofo agatonu. ʼI tana ʼosi lau ʼo Tāʼaga Lea 23:15, 16, neʼe fehuʼi fēnei e te tagata fai akonaki: “ ʼE fakatonutonuʼi anai koutou e ʼokotou ʼu ifiifi?” Neʼe ina toe ʼui fēnei: “ ʼE mātou faikole ke hoko ʼo feiā, pea ʼe mahino ia ʼe koutou fakafiafia lahi anai ia Sehova. ʼE koutou fakaʼala anai te ʼu meʼa loloto ʼaē ʼi tona loto. ʼE koutou fakafiafia anai te ʼu ifiifi ʼo te ʼAtua ʼi takotou pipiki agatonu ki te telituale ʼaē ka hinoʼi koutou kiai.”
Ko te akonaki fakaʼosi ʼo te koga ʼaia ʼo te polokalama neʼe fakahoko e Mark Noumair, neʼe misionea ʼi Kenia ʼi muʼa ʼo tana liliu ko he tagata faiako ʼi Kalaate. Ko tana akonaki, “ ʼE Lelei Age Te Sio ʼAki Te ʼu Mata,” neʼe fakahāhā lelei ai te maʼuhiga ʼo te maʼuli fakafeauga. ʼO mulimuli kia Tagata Tānaki 6:9, neʼe tokoniʼi fēnei e te Tēhina ko Noumair: “Koutou tali te ʼaluʼaga ʼo te maʼuli. Ko te faka ʼuhiga ʼaia ʼo te ‘sio ʼaki te ʼu mata.’ ʼAua takotou moemisi ki he meʼa ʼe koutou fia fai kae mole koutou lolotoga fai, kae koutou tokakaga fakalelei ki te ʼu ʼaluʼaga ʼe tau mo koutou. Ko te moemisi, ko te fakaʼamu ki he ʼu meʼa kae ʼe mole fakapotopoto, peʼe ko te tokagaʼi pe ʼo te ʼu faʼahi kovi ʼo te telituale ʼaē neʼe hinoʼi koutou kiai, ʼe mole koutou fīmālie ai anai pea ʼe mole koutou fiafia anai.” Ei, logope he faʼahi peʼe ko he ʼaluʼaga ʼe tau mo tatou, kapau ʼe fakatafito te maʼuli fakafeauga ki ʼatatou ʼu felogoi mo te ʼAtua pea ʼe tou fiafia anai ʼi te tauhi ki totatou Tupuʼaga Lahi.
Ko He ʼu Fakamatala Fakafiafia
ʼI te ʼosi maʼu ʼo te ʼu tokoni ʼaoga mai te ʼu akonaki ʼaia, neʼe fai e te kau ako te ʼu fakamatala ʼo ʼuhiga mo tanatou fai faka mafola lolotoga te ʼu māhina ʼaia e nima. ʼAki te fakaʼaluʼalu e Wallace Liverance, te sikalaipe ʼo te Faleako ʼo Kalaate, neʼe fakamatala e te kau maʼu pepa pe neʼe feafeaʼi tanatou fakamoʼoni ko nātou ko te kau minisi ʼa te ʼAtua. (2 Kolonito 4:2) Neʼe nātou lava fakaʼala te leʼo ʼo loto ʼo ʼihi hahaʼi. Neʼe fakahā e te kau ako pe neʼe feafeaʼi tanatou kamata he ʼu ako Tohi-Tapu ʼaki te ʼu hahaʼi fakamalotoloto neʼe felāveʼi mo nātou ʼi te ala, ʼi te ʼu ʼapi, pea mo te tahi ʼu ʼaluʼaga. ʼI te ʼu ʼaluʼaga kehekehe, neʼe ʼui e te hahaʼi ʼaē neʼe nātou fia logo, neʼe nātou maʼu te moʼoni ʼi te tohi ʼa te kautahi ʼa Sehova. Neʼe ʼi ai te fafine neʼe ina tali lelei ke ina sioʼi te vaega faka Tohi-Tapu. ʼI te temi nei ʼe ina ako te Tohi-Tapu mo te kau Fakamoʼoni ʼa Sehova.
ʼOsi ʼaia, pea neʼe fakafehuʼi e Joel Adams te kau maʼu pepa ʼo Kalaate ʼo te ʼu ʼuluaki kalasi. Ko te kupu tāfito ʼo tana akonaki, “Ke ʼAua Naʼa Koutou Tuku ʼi He Temi Takotou Ako, Ke ʼAua Naʼa Koutou Tuku ʼi He Temi Takotou Tauhi Kia Sehova.” Ko nātou ʼaia ʼaē neʼe fakafehuʼi neʼe nātou fai te ʼu tokoni ʼaoga ki te kau misionea foʼou. ʼI tana fakamanatu te temi ʼaē neʼe kau ai ki te 26 kalasi ʼo Kalaate, neʼe ʼui fēnei e Harry Johnson: “Neʼe akoʼi mai kia mātou ko Sehova neʼe ina takitaki tuʼumaʼu tana hahaʼi pea ʼe ina takitaki anai tana hahaʼi. Ko te falala ʼaia neʼe ko he fakaloto mālohi lolotoga te ʼu taʼu kua hili.” Ko William Nonkes, ʼaē neʼe kau ki te 53 kalasi ʼo Kalaate, neʼe ina tokoniʼi fēnei te kau maʼu pepa: “Ko te faʼahi ʼe tonu ke koutou tāʼofi tuʼumaʼu, ke koutou manatuʼi te ʼu pelesepeto faka Tohi-Tapu, pea mo koutou fakaʼaogaʼi ki te ʼu tonu fuli ʼaē ʼe koutou fai ʼi tokotou maʼuli ʼi te temi nei pea mo he temi ʼo heʼegata. Ko te meʼa ʼaē ka hoko ai anai, ʼe koutou lava nofo anai ʼi tokotou telituale, pea ʼe tapuakina lahi anai koutou e Sehova.”
Ki te koga ʼo te polokalama neʼe tuku age kiai, neʼe filifili e Richard Rian te kupu tāfito ʼaenī “Neʼe Fakamālohiʼi Moʼo Fakahoko Te Finegalo ʼo Sehova.” Ia nātou ʼaē neʼe fakafehuʼi neʼe kau ai ia John Kurtz, neʼe kau ʼi te kau maʼu pepa ʼo te 30 kalasi, pea neʼe gāue misionea ʼi Sepania ʼo laka ʼi te ʼu taʼu e 41 tupu. ʼI te fehuʼi age ʼo ʼuhiga mo te polokalama ʼi Kalaate, neʼe tala fēnei e te Tēhina ko Kurtz: “Ko te tohi tāfito ʼe ko te Tohi-Tapu. Pea ʼe ʼi ai te ʼu tohi ako moʼo tokoni ki te mahino ʼo te Tohi-Tapu. Ko te ʼu tohi ʼaia ʼe feala ke maʼu e te hahaʼi fuli. ʼE mole ʼi ai he ʼu logo fakafūfū ʼi Kalaate. ʼE ʼau faka maʼuhigaʼi tuʼumaʼu te potu ʼaia koteʼuhi ʼe feala pe ki te hahaʼi fuli ke nātou ʼiloʼi te ʼu meʼa ʼaē ʼe fakahā ʼi Kalaate.”
Neʼe fakaʼosi te polokalama fakalaumālie ʼaia ʼaki te akonaki ʼa te Tēhina ko Gerrit Lösch, ʼe kau ʼi te Kolesi Pule ʼa te kau Fakamoʼoni ʼa Sehova, neʼe ko tona kupu tāfito “ ʼI Te ʼu Kapakau ʼa Sehova Pea ʼi Tona ʼu Lalo Kapakau.” Neʼe ina fakamahino peʼe feafeaʼi te fakatātā ʼi te Tohi-Tapu ki te ʼu kapakau ʼa te akuila ia te puipui pea mo te lagolago ʼa te ʼAtua ki tana kau kaugana agatonu. (Teutalonome 32:11, 12; Pesalemo 91:4) ʼE tautau folahi e te matuaʼi akuila tana ʼu kapakau lolotoga ni ʼu hola moʼo puipui tana ʼu kiʼi ʼuhi. ʼI ʼihi temi, ʼe ina ʼaofi tana ʼu kiʼi ʼuhi ʼaki ʼona ʼu kapakau moʼo nātou puipui mai te ʼu matagi ʼaē ʼe momoko. ʼE feala pe ke fai feiā mo Sehova ʼo mulimuli ki ʼana ʼu fakatuʼutuʼu, ʼe lava tokoni ki tana kau kaugana agatonu, tāfito la ʼi tanatou ʼu ʼahiʼahi fakalaumālie. ʼE mole tali e Sehova ke fakahalaʼi tana ʼu kaugana ʼo fakalaka ʼi te meʼa ʼe nātou lavaʼi kae ʼe ina fai te puleʼaki ke nātou lava kātakiʼi. (1 Kolonito 10:13) Neʼe fakaʼosi fēnei e te Tēhina ko Lösch: “Ke puipui tuʼumaʼu tatou ʼi te faʼahi fakalaumālie, ʼe tonu ke tou nonofo ʼi te ʼu lalo kapakau ʼo Sehova. Ko tona faka ʼuhiga ʼe mole tonu ke tou fia loto faʼifaʼitaliha. ʼOfa pe ke tou ōvi tuʼumaʼu kia Sehova mo tona kautahi ʼaē ʼe fakatatau ki he faʼe, ke ʼaua naʼa tou mavae mai tana takitaki pea mo tana tokoni ʼofa.”
Neʼe lau e te pelesita te ʼu tohi pea mo te ʼu fakaʼalofa mai te malamanei katoa. Pea neʼe hoko ai mo te tufa ʼo te ʼu pepa fakamoʼoni. ʼI te temi ʼaē neʼe fakatuʼu ai te Faleako ʼo Kalaate, neʼe fakatuʼutuʼu pe ke faka tuʼakoi te ʼu kalasi lolotoga taʼu e nima. Kae talu mai te ʼu taʼu e 58 neʼe tuku e Sehova ʼAtua ke hoko atu te gāue ʼa te faleako. Ohage ko tona fakatokagaʼi e te Tēhina ko Barber ʼi tana ʼu palalau moʼo avahi te polokalama: “Ko he fakamatala fakaofoofo neʼe fai e te kau maʼu pepa ʼo Kalaate talu mai te 1943 ʼaē neʼe avahi ai ia Kalaate! ʼAki te ʼu faiga fakatahi ʼaia, neʼe hilifaki te ʼu lauʼi teau afe hahaʼi agamālū ki te kautahi faka kolōlia ʼa Sehova.” Neʼe tokoni moʼoni te faleako ʼaia ʼa te kau misionea ke fakafiafia te lauʼi miliona hahaʼi ki te ʼamanaki ʼo te Puleʼaga.
[Talanoa ʼo te pasina 24]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 8
ʼE nātou ʼolo ki te ʼu fenua e: 18
Ko te kau ako e: 48
Te fakafuafua ʼo tonatou ʼu taʼu: 34
Te fakafuafua ʼo tonatou ʼu taʼu ʼi te moʼoni: 18
Te fakafuafua ʼo tonatou ʼu taʼu ʼi te gāue temi katoa: 13
[Paki ʼo te pasina 25]
Ko Te 110 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.