Ko Te Kau Fai Faka Mafola ʼo Te Puleʼaga

Tou Faka Mafola Ki Te Hahaʼi ʼi Tonatou ʼu Fale Gāue

KOTEĀ ʼaē neʼe tatau ai te ʼu ʼapositolo ko Mateo, Petelo, Atelea, Sakopo pea mo Soane? Neʼe pāui fuli nātou e Sesu kae nātou lolotoga gāue. Ko Petelo, Atelea, Sakopo pea mo Soane neʼe nātou maʼumaʼua ʼi tanatou gelu ʼi te temi ʼaē neʼe fakaafe ai nātou e Sesu, ʼo ʼui maʼana: “Mulimuli mai ia te au.” Ko Mateo neʼe heka ʼi te pilō tānaki tukuhau ʼi te temi ʼaē neʼe fakaafe ai ia ia ke liliu ko he tisipulo ʼa Sesu.​—Mateo 4:​18-​21; 9:9.

Ko te faka mafola ki te hahaʼi ʼi tonatou fale gāue ʼe feala ke tou maʼu ai he ʼu fua lelei. ʼI tanatou mahino ki te faʼahi ʼaia, mole heʼeki faʼa fualoa, ko te kau Fakamoʼoni ʼa Sehova ʼi Saponia neʼe nātou faiga lahi ke nātou fakahoko te faʼahi ʼaia ʼo te minisitelio. Neʼe koteā tona ʼu fua? Lolotoga ni ʼu māhina, neʼe ko te ʼu ʼaʼahi e lauʼi afe neʼe fai, pea ko ako Tohi-Tapu e 250 tupu ʼaē neʼe kamata. Koutou tokagaʼi te ʼu meʼa ʼaenī neʼe hoko.

Ko te pionie katoa ʼi Tokio neʼe felāveʼi mo te patolo ʼo te fale kai. Ko te tagata ʼaia neʼe fai palalau mo te Fakamoʼoni ʼa Sehova kua hili kiai taʼu e 30, ʼi tana kei ako. Logola neʼe mole faʼa mahino ki te ʼu palalau ʼaē neʼe logo kiai ʼi te faleako, kae neʼe tupu ai tana fia ʼiloʼi te Tohi-Tapu. ʼI te temi leva ʼaenī, ʼi tana toe fia ʼiloʼi te Tohi-Tapu, neʼe ina tali atu aipe he ako Tohi-Tapu ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata.a Pea neʼe ina kamata lau e ia tokotahi te Tohi-Tapu ʼi te po fuli ʼi muʼa ʼo tana moe.

Ko te tuagaʼane pionie makehe neʼe ʼalu ki te pilō. Logola neʼe mole feala ke fai palalau ʼi te telefoni mo te patolo, kae neʼe fehuʼi age e te fafine ʼaē neʼe ina tali te telefoni ʼa te patolo: “ ʼE ke fia palalau mo ʼau?” Hili te fai palalau nounou ʼi te telefoni, neʼe hū te fafine ki tuʼa, pea neʼe ina ʼui age ki te pionie ʼe ina fia lau te Tohi-Tapu. Neʼe fakatuʼutuʼu e te pionie makehe ke toe liliu age mo te Tohi-Tapu pea neʼe kamata ai te ako Tohi-Tapu ʼa te fafine. Neʼe fai te ako ʼi te uhu, ʼi te ʼōloto ʼi muʼa ʼo te kamata ʼo te gāue.

ʼI te tahi pilō, neʼe sio ia te tagata ki te fafine ʼe nā kaugā gāue ʼe ina toʼo Te Tule Leʼo pea mo te Réveillez-vous ! kae neʼe ina līaki atu aipe ʼi te ʼosi ʼalu ʼa te Fakamoʼoni ʼa Sehova. ʼI te toe liliu ʼa te tagata ki tona ʼapi, neʼe ina fakamatala age ki tona ʼohoana ʼaē ko te Fakamoʼoni ʼa Sehova te meʼa ʼaē neʼe hoko. Neʼe ina ʼui age kanapaula ko ia, pea ʼe fakalogo pe anai ki te ʼu meʼa ʼaē ʼe nātou ʼui. Ko tona ʼofafine, ʼaē neʼe logo ki tana ʼu palalau, neʼe ina fakamatala age ki te tēhina Fakamoʼoni ʼe gāue ʼi te telituale ʼo te ʼu matani gāue. Neʼe foimo ʼaʼahi e te Fakamoʼoni te tagata ʼaia ʼi te pilō pea neʼe kamata tana ako Tohi-Tapu. Mole tuai, pea neʼe kamata kau tuʼumaʼu te tagata ki te ʼu fono ʼi te ʼAhotapu.

ʼE tou maʼu te tahi ʼu lelei ʼi te faka mafola ki te hahaʼi ʼi tonatou fale gāue. Tokolahi te kau fai faka mafola Saponia kua nātou liliu ʼo popoto ʼi te fai ʼo te ʼu ʼaʼahi ʼi te ʼu fale koloā, mo te ʼu matani gāue, pea mo te ʼu pilō. Tahi ʼaē meʼa, ʼaki te faʼahiga fai faka mafola ʼaia, tokolahi ʼaē neʼe mole kei fakatahi mo tatou, neʼe toe maʼu ia nātou pea mo kamata te ʼu ako mo nātou. Neʼe lahi ʼaupito te ʼu fua lelei neʼe maʼu. Mole heʼeki faʼa fualoa, ko te kokelekasio ʼi te lotomalie ʼo Tokio neʼe nātou fai tanatou ʼu ako Tohi-Tapu e 108, ʼo laka tuʼa lua age ʼi te ʼu ako ʼaē neʼe fai ʼi te taʼu ʼaē kua hili.

[Kiʼi nota]