E Feafeaʼi Takotou Fakatalitali?

ʼI TE temi nei, ʼe tokosiʼi te hahaʼi ʼe nātou fia fakatalitali ki he tahi peʼe ko he meʼa. ʼE mole ia nātou te faʼa kātaki. Kae ko te Tohi-Tapu ʼe ina fakaloto mālohiʼi te hahaʼi ʼa te ʼAtua ke nātou “fakatalitali.” ʼO mole hage ko te hahaʼi ʼo tona temi, neʼe ʼui fēnei e te polofeta ko Mikea: “ ʼE ʼau fia fakatalitali ki te ʼAtua ʼo toku hāofaki.”​—Mikea 7:7; Tagilāulau 3:26.

Kae koteā te faka ʼuhiga ʼo te fakatalitali kia Sehova? ʼE tonu ke feafeaʼi te fakatalitali ʼa te Kilisitiano ki te ʼAtua? ʼE ʼi ai koa he ʼu faʼahiga fakatalitali ʼe lelei pea mo ʼaoga? ʼE tou maʼu te ako lelei ki te faʼahi ʼaia ʼi te meʼa neʼe hoko ki te polofeta ko Sonasi ʼi te hiva sēkulō ʼi muʼa ʼo totatou temi.

Ko Te Fakatalitali Neʼe Mole Lelei

Neʼe fakatotonu e Sehova ʼAtua kia Sonasi ke ʼalu ʼo faka mafola ki te hahaʼi ʼo Ninive, te kolo taulaga ʼo te Puleʼaga Asilia. Ko Ninive neʼe logona ko “te kolo ligi toto” ʼuhi ko tana agamālohi pea mo tana fai fakapō, pea ko he faʼahi ʼe fakamoʼoni kiai te hahaʼi fai hisitolia pea mo fai alekeolosia. (Naume 3:1) Neʼe mole fia fakahoko e Sonasi te gāue ʼaia, kae neʼe tokaga ia Sehova ke ʼalu ia te polofeta ki Ninive.​—Sonasi 1:3-3:2.

“Neʼe foli e Sonasi te kolo ʼi te ʼaho katoa, pea neʼe ina tala fēnei: ‘ ʼE kei toe pe ʼaho e tolu, pea fakaʼauha anai ia Ninive.’ ” (Sonasi 3:4) Pea neʼe tali leleiʼi te ʼu faiga ʼa Sonasi: “Ko te hahaʼi ʼo Ninive neʼe nātou tui leva ki te ʼAtua, pea neʼe nātou fai te sesunio pea mo nātou kofuʼi te ʼu taga, ʼo kamata mai ia nātou ʼe lalahi ʼo aʼu kia nātou ʼe liliki.” (Sonasi 3:5) ʼE mahino ia, ko Sehova ʼe ko he ʼAtua “[ʼe] mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.”​—2 Petelo 3:9, MN.

Neʼe koteā te tali ʼa Sonasi? ʼE ʼui fēnei e te fakamatala: “Kae neʼe mamahi ʼaupito ai ia Sonasi pea neʼe ʼita lahi.” (Sonasi 4:1) Koteā tona tupuʼaga? Neʼe lagi ufiufi Sonasi ki tona ʼuhiga polofeta he neʼe mole hoko tana fakakikite ʼo ʼuhiga mo te fakaʼauha ʼo te kolo. Neʼe maʼuhiga age kia ia tona ʼuhigaʼi tagata ʼi tona manavaʼofa pea mo loto ʼaē ke hāofaki ia te hahaʼi.

ʼE mahino ia neʼe mole ina tuku tona ʼuhiga polofeta. Kae neʼe fakatalitali ʼo “sio pe koteā anai ka hoko ki te kolo.” Ei, neʼe mole lelei te manatu ʼa te polofeta, he neʼe tuku muʼa tana gāue kae ina sioʼi pe koteā anai ka hoko. ʼI tana sio ʼaē ʼe mole hoko tana fakatuʼutuʼu, neʼe ina faʼu tona kiʼi malumaluʼaga pea neʼe heka ʼita ai ʼo sioʼi pe koteā ʼapē ka hoko. Kae ko Sehova neʼe mole ina leleiʼia te aga ʼa Sonasi, koia ʼaki te ʼofa neʼe ina fakatonutonuʼi te manatu kovi ʼaia ʼo tana polofeta.​—Sonasi 4:​5, 9-11.

He Koʼe ʼe Faʼa Kātaki Ia Sehova?

Logola neʼe fakahemala ia Ninive pea mo hāo mai te tautea, kae ki muli age neʼe nātou toe agahala. ʼAki te polofeta ko Naume pea mo Sofonia, neʼe fakakikite e Sehova ʼe ina fakaʼauha anai Ninive. ʼI tana ʼui ʼaē ko “te kolo ʼe ligi toto,” neʼe fakahā e Sehova ʼe ina fakaʼauha anai ia Asilia pea ʼe mole toe nofoʼi anai ia Ninive. (Naume 3:1; Sofonia 2:​13) ʼI te taʼu 632 ʼi muʼa ʼo totatou temi, neʼe fakaʼauha ai Ninive, pea neʼe mole toe fakatuʼu ake.

ʼE toe feiā mo te temi nei, ko te mālama ʼe lahi age tana ligi toto ʼi te ligi toto ʼaē neʼe fai ʼi Ninive. ʼUhi ko te faʼahi ʼaia pea mo te tahi age ʼu tupuʼaga, neʼe fakatuʼutuʼu e Sehova ko te tuʼu agakovi ʼaenī ʼe fakaʼauha anai ʼaki te toe “mamahi lahi” neʼe heʼeki hoko ki muʼa atu.​—Mateo 24:21, 22, MN.

Koia ohage pe ko te hahaʼi ʼaē neʼe fakahemala ʼi Ninive, ʼe kei tāʼofi pe e Sehova tana fakapapau ʼaē ke ina fakaʼauha te mālama ia ʼaho nei, ke feala ki te hahaʼi ke nātou fakahemala pea mo hāo mai te fakaʼauha. ʼE talanoa te ʼapositolo ko Petelo ki te faʼa kātaki ʼa te ʼAtua, ʼo ina ʼui fēnei: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi ia te tuai, kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.”​—2 Petelo 3:9, 10, 13, MN.

Tou Faʼafai ʼi Tatatou Fakatalitali

ʼE toe ʼui fēnei e Petelo: “Mai tona ʼuhiga ʼaē ʼe tonu ki te ʼu meʼa fuli ʼaia ke mavetevete, ko te ʼu faʼahiga tagata feafeaʼi anai ia koutou ʼi te aga fakamaʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua, ʼo talitali pea mo koutou taupau lelei ʼi tokotou ʼatamai te hoko mai ʼo te ʼaho ʼo Sehova!” (2 Petelo 3:​11, 12, MN ) Koutou fakatokagaʼi moʼo fakatalitali ki te ʼaho ʼo Sehova, ʼe tonu ke tou fai “te [ʼu] aga fakamaʼoniʼoni pea mo te ʼu gāue ʼaē ʼe fakaʼiloga ʼaki [tatatou] pipiki ki te ʼAtua”​—ko tona faka ʼuhiga, ʼe tonu ke tou gāue, kae mole tou fakafīfīmālie.

Ei, ʼe fakahā e te faʼahiga fakatalitali ʼaē ʼe lelei tatatou falala katoa ʼe hoko mai anai te ʼaho ʼo Sehova ʼi te temi ʼaē neʼe ina fakatuʼutuʼu kiai. Ko te taʼi tui ʼaia ʼe ina uga tatou ke tou aga fakamaʼoniʼoni pea mo fai ni ʼu gāue faka lotu, pea ko te meʼa ʼaē ʼe maʼuhiga tāfito ʼi te ʼu meʼa fuli ʼaia, ko tatatou faka mafola ia te logo lelei ʼo te Puleʼaga ʼo te ʼAtua. Neʼe tuku e Sesu te faʼifaʼitaki lelei ʼo ʼuhiga mo te fai faka mafola, pea neʼe ina fakatotonu fēnei ki tana kau tisipulo fakanofo: “Ke haʼi tokotou ʼu kogaloto pea mo fakamū tokotou ʼu mālama, pea ko koutou totonu, ke koutou tatau mo he ʼu tagata ʼe fakatalitali ki tonatou pule, mokā liliu anai mai te fai ʼohoana, ke feala te avahi age ki ai ʼi te temi pe ʼaē ʼe haʼu ai ʼo tukituki te matapā. ʼE manuʼia te ʼu tagata kaugana ʼaia ʼi te kaku mai ʼo [tonatou] pule, ʼo ina maʼu mai ia nātou ʼe nātou leʼo!”​—Luka 12:35-​37, MN.

Ke faigafua te gāue kinakina ʼa te ʼu kaugana ʼo te ʼuluaki sēkulō, neʼe nātou pelu tonatou ʼu tapaʼi kofu ʼo haʼi mai ki te kiliʼi pipi ʼi tonatou ʼu koga loto. Ko te Kilisitiano ʼe tonu ke mālohi, pea mo faʼafai ʼi te ʼu gāue lelei. ʼE mole tonu ke “fakatotoho” ʼi tana ʼu gāue fakalaumālie, heʼe lagi ina fakaʼaogaʼi tona mālohi ki ni ʼu fakafiafia pea mo kumi koloā. Kae ʼi tana lolotoga fakatalitali ki te ʼaho lahi pea mo fakamataku ʼo Sehova, ʼe tonu “ke lahi . . . [tana] ʼu gāue ʼi te ʼAliki.”​—Loma 12:11; 1 Kolonito 15:58, MN.

Tou Gāue Mālohi ʼi Tatatou Lolotoga Fakatalitali

ʼE lahi ʼaupito te ʼu gāue ʼa te kau Fakamoʼoni ʼa Sehova ʼi tanatou lolotoga fakatalitali ki te ʼaho ʼo Sehova. Ohage la ʼi te taʼu gāue 2003, neʼe nātou faka mafola te folafola ʼa Sehova ʼi te ʼaho fuli ia hola e 3 383 000. Koutou fakafuafua age muʼa, ko te Fakamoʼoni e tahi ʼe fai faka mafola hoholo ia taʼu e 386 moʼo fakahoko te gāue ʼaē neʼe fakahoko e te kau Fakamoʼoni ʼa Sehova ʼi te ʼaho e tahi!

Kae ʼe tonu ke tou fai kia tatou totonu te fehuʼi ʼaenī: ‘ ʼE tonu ke feafeaʼi taku fakatalitali?’ Neʼe fai e Sesu te lea fakatātā moʼo fakahā te maʼuhiga ʼo te gāue ʼaē neʼe fakamaʼua ki te kau Kilisitiano agatonu fakanofo. Neʼe talanoa ʼo ʼuhiga mo te ʼu kaugana e toko tolu: “Ki te tahi neʼe . . . tuku [e te pule] ki ai ia taleta e nima, pea lua ki te tahi, pea tahi pe ki te tahi ake, ʼo mulimuli pe ki te meʼa ʼaē ʼe lavaʼi e te tagata takitokotahi, pea ʼalu ai leva ia ki te tahi fenua. Pea ko ia ʼaē neʼe tuku ki ai te ʼu taleta e nima, neʼe foimo ʼalu atu aipe ʼo fai ʼaki te ʼu meʼa, pea ina maʼu ai te tahi ʼu taleta e nima. Pea toe feiā pe mo ia ʼaē neʼe tuku ki ai te ʼu taleta e lua, neʼe ina maʼu te tahi ʼu taleta kehe e lua. Kaʼe ko ia ʼaē neʼe tuku ki ai te taleta e tahi, neʼe ʼalu ia ʼo keli te kele pea ina fufū ai te paʼaga ʼo tona pule. Pea ʼi te ʼosi ʼo te temi loaloaga, ko te pule ʼo te ʼu tagata kaugana ʼaia neʼe toe liliu mai pea neʼe ina vakaʼi tana ʼu paʼaga mo nātou.”​—Mateo 25:15-​19, MN.

Ko te ʼu kaugana ʼaia e toko tolu neʼe nātou fakatalitali ki te toe liliu mai ʼo tonatou pule. ʼI te tau mai ʼo te pule, neʼe ina ʼui fēnei age ki te toko lua ʼaē neʼe maʼumaʼua ʼi tanā fakatalitali ia ia: “ ʼE lelei, tagata kaugana agalelei pea mo agatonu!” Kae neʼe kehe te meʼa ʼaē neʼe ina ʼui age ki ʼaē neʼe fakatalitali fakafīfīmālie. Neʼe ʼui fēnei age e te pule: “Koutou lī te tagata kaugana ʼaē ʼe mole lelei ʼi he meʼa ki te fakapōʼuli ʼo tuʼa.”​—Mateo 25:20-30, MN.

Logola te kehekehe ʼo tatatou ʼu ʼamanaki heʼe faka ʼuhiga tāfito te lea fakatātā ʼaia ki te kau Kilisitiano fakanofo, kae ʼe ʼi ai te ako kia tatou fuli. Ko te Pule ko Sesu Kilisito, ʼe ina fakamaʼua kia tatou fuli ke tou gāue mālohi ʼi tatatou lolotoga fakatalitali te ʼaho lahi ʼo Sehova. ʼE ina leleiʼia te gāue ʼa te ʼu kaugana fuli “ ʼo mulimuli pe ki te meʼa ʼe [nātou] lavaʼi” pea mo te ʼu ʼaluʼaga ʼo te tagata takitokotahi. ʼE ko he meʼa fakafiafia ʼo he logo ki te Pule ʼe ina ʼui ʼi tana tau mai: ʼe “lelei”!

ʼE Tou Maʼu Te Maʼuli ʼi Te Faʼa Kātaki ʼo Totatou ʼAliki

Pea kapau la ia neʼe loaloaga age te tuʼu ʼaenī ʼi takotou ia manatu pea mo takotou ia fakaʼamu? Neʼe tuʼu fualoa he neʼe ʼi ai tona tupuʼaga tāfito. Neʼe tohi fēnei e te ʼapositolo ko Petelo: “Koutou faka ʼuhiga te kātaki fualoa ʼa totatou ʼAliki ko he fakamaʼuli ʼo tatou.” (2 Petelo 3:15, MN ) Ko tatatou mahino lelei ki te ʼu fakatuʼutuʼu ʼa te ʼAtua pea mo takita ʼiloʼi lelei totatou ʼuhiga noa, ʼe feala ai leva ke tou fakatalitali ʼo mulimuli pe ki te temi ʼaē kei fakagafua ai e Sehova ke tuʼu te mālama ʼāfea ʼaenī.

Neʼe fai e Sakopo te lea fakatātā ʼi te Tohi-Tapu moʼo fakaloto mālohiʼi te kau Kilisitiano ke nātou faʼa kātaki. Neʼe ina tohi fēnei: “Koutou mamata ki te tagata gaue kele, e nofo amanaki ki te fua mauhiga o te kele, e kataki o tatali ki ai, o kaku ki tana tali te uluaki ua mo te ua fakaosi. Pea mo koutou, koutou kataki, koteuhi kua ovi mai te haele mai a te Aliki.”​—Sakopo 5:​7, 8.

Ko Sehova ʼe mole ina loto ʼi tatatou lolotoga fakatalitali ke tou pipiko peʼe ke tou tuku tatatou gāue. Neʼe ina foaki mai te gāue kia tatou, pea ʼe fiafia anai mo kapau ʼe tou fakaʼaogaʼi te temi moʼo gāue mālohi. ʼE ina loto ke tou kau ia nātou ʼaē neʼe ʼui e te ʼapositolo ko Paulo ʼi tana tohi ki te kau Hepeleo: “ ʼE mātou loto ke koutou tahi fakahā he loto faʼafai feiā, ke feala hakotou tui papau ki te ʼamanaki ʼo aʼu ki te fakaʼosi. Ke ʼaua naʼa koutou pipiko, kae ke koutou liliu ko he faʼifaʼitaki ʼo nātou ʼaē, ʼaki te tui pea mo te faʼa kātaki, ʼe nātou tofiʼa ki te ʼu fakapapau.”​—Hepeleo 6:​11, 12, MN.

ʼAua naʼa tou fakaʼauʼauganoa ki te fai ʼo te gāue. Kae ʼofa pe ke tou maʼu he mālohi ʼi totatou maʼuli, ʼaki tatatou ʼu felogoi lelei mo Sehova ʼAtua, mo tatatou tui ki te sakilifisio faitotogi ʼo Sesu, pea mo tatatou ʼamanaki fiafia ki te tuʼu foʼou ka haʼu. Ohage pe ko te lea fakatātā ʼa Sesu ʼo ʼuhiga mo te ʼu tagata kaugana “lelei mo agatonu,” ʼofa pe ke tāu mo tatou te gāue ʼaē neʼe foaki mai pea mo te fakapale ʼi tatatou maʼumaʼua ʼo fakavikiviki totatou ʼAtua, ohage ko tona ʼui e te tagata fai pesalemo: “Kia ʼau, ʼe ʼau talitali tuʼumaʼu anai, pea ʼe ʼau hilifaki anai kia meʼa fuli te fakavikiviki ʼo koe.”​—Pesalemo 71:⁠14.

[Paki ʼo te pasina 21]

Neʼe ʼita ia Sonasi ʼi tana fakatalitali ʼo sio ki te meʼa ʼaē ka hoko ki Ninive

[Paki ʼo te pasina 22]

Tou fakahā he aga faka lotu ʼi tatatou lolotoga fakatalitali ki te ʼaho ʼo Sehova