Ko Sesu Neʼe Ko He ʼAtua Koa Peʼe Neʼe Ko He Tagata?

“E KO au te malama o te malama-nei; Ko ae e mulimuli mai ia te au, e mole haele anai ia i te fakapouli, kae e ina maù anai te malama o te mauli.” (Soane 8:12) Neʼe ko Sesu Kilisito ʼaē neʼe ina fai ia te ʼu palalau ʼaia. Ko te tagata poto ʼi te ʼuluaki sēkulō, neʼe ina ʼui fēnei ʼo ʼuhiga mo ia: “ ʼE fufū lelei ia te ia te ʼu koloā fuli ʼo te poto pea mo te ʼatamai mālama.” (Kolose 2:​3, MN ) Tahi ʼaē meʼa, ʼe ʼui fēnei ʼi te Tohi-Tapu: “Ko te faka ʼuhiga ʼaenī ʼo te maʼuli heʼegata, ke nātou ako ke nātou [maʼu ia te ʼatamai mālama ʼo ʼuhiga mo] koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:​3, MN ) ʼE maʼuhiga ke tou maʼu ia te ʼatamai mālama totonu ʼo ʼuhiga mo Sesu ke feala hatatou maʼu te fīmālie ʼi te faʼahi fakalaumālie.

Kua tokolahi ia te hahaʼi ʼaē kua nātou logo ki te ʼu talanoa ʼo ʼuhiga mo Sesu Kilisito. ʼE mole ʼi ai he tahi age tagata neʼe ina fakatupu he ʼu fetogi ʼi te hisitolia ʼo te malamanei. Ohage la ko te kaletalio ʼaē ʼe fakaʼaogaʼi e te tokolahi ʼi te malamanei, ʼe fakatafito ki te taʼu ʼaē ʼe ʼui neʼe tupu ai ia Sesu. ʼE ʼui fēnei ʼi te The World Book Encyclopedia: “Tokolahi te hahaʼi ka nātou talanoa ki te ʼu taʼu ʼi muʼa ʼo te taʼu aia, ʼe nātou ʼui ko te ʼu taʼu ʼi muʼa ʼo Kilisito. Pea kapau ko he ʼu taʼu ki muli age, pea ʼe nātou ʼui ko te ʼu taʼu ki muli mai ʼo Kilisito.”

Kae ʼe lahi te ʼu manatu kehekehe ʼo ʼuhiga mo Sesu. Maʼa ʼihi, neʼe ko he tagata maʼuhiga pe ia neʼe ina fai tana ʼu gāue fakatalakitupua ʼi tona temi maʼuli ʼi te kele. Kae ko ʼihi ʼe nātou tauhi kiā ia ohage ko te ʼAtua Māfimāfi. Ko ʼihi kau Inituisi neʼe nātou fakatatau ia Sesu Kilisito ki te ʼatua Inituisi ko Krishna, ʼaē ʼe ʼui e te tokolahi neʼe ko he ʼatua neʼe tupu tagata. Neʼe ko he tagata pe koa ia Sesu ohage ko te tagata fuli, peʼe neʼe ko he tahi koa neʼe tonu ke atolasioʼi? Neʼe ko ai moʼoni koa ia Sesu? Neʼe haʼu maifea? Neʼe feafeaʼi tona ʼulugaaga? Pea kua maʼuli nei ʼifea? ʼE tou vakaʼi anai te faʼahi ʼaia ʼi te alatike ka hoa mai, ʼe tou maʼu anai te ʼu tali ki te ʼu fehuʼi ʼaia ʼi te tohi ʼaē ʼe lahi tana talanoa ʼo ʼuhiga mo Sesu.