“ ʼE Au Pipiki Ki Tau ʼu Fakamanatu”

“Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tatou.” ​—Loma 15:​4, MN.

1. ʼE tou maʼu feafeaʼi te ʼu fakamanatu ʼa Sehova, pea he koʼe ʼe ʼaoga kiā tatou te ʼu fakamanatu?

ʼE FOAKI e Sehova te ʼu fakamanatu ki tana hahaʼi moʼo tokoni kiā nātou ke nātou tauʼi te ʼu fihifihia ʼo te ʼu temi faigataʼa ʼaenī. ʼE tou maʼu te ʼu fakamanatu ʼaia mokā tou lau takitokotahi ia te Tohi-Tapu, pea ʼe tou logo ki te tahi ʼu fakamanatu ʼi te ʼu akonaki peʼe ʼi te ʼu tali ʼaē ʼe fai ʼi te ʼu fono. Ko te ʼu manatu ʼaē ʼe tou lau peʼe tou logo kiai ʼi te ʼu lakaga ʼaia, ʼe mole ko he ʼu manatu foʼou kiā tatou. Neʼe lagi kua tou talanoa ki te ʼu fakamanatu ʼaia ʼi muʼa atu. Kae mai tona ʼaluʼaga ʼaē ʼe tou loto galogalo, koia ʼaē ʼe ʼaoga ke fakamanatuʼi tuʼumaʼu mai kiā tatou te ʼu fakatuʼutuʼu ʼa Sehova, tana ʼu lao, pea mo tana ʼu fakatotonu. ʼE tonu ke tou loto fakafetaʼi ʼo ʼuhiga mo te ʼu fakamanatu ʼa te ʼAtua. ʼE nātou fakaloto mālohiʼi tatou ʼo tokoni mai ke tou manatuʼi tāfito te ʼu tupuʼaga ʼaē ʼe nātou uga ai tatou ke tou mulimuli ki te finegalo ʼo te ʼAtua ʼi totatou maʼuli. Koia neʼe hiva fēnei te tagata fai pesalemo kiā Sehova: “ ʼE au pipiki ki tau ʼu fakamanatu.”​—Pesalemo 119:⁠24.

2, 3. (a) He koʼe neʼe taupau e Sehova ʼo aʼu mai ki totatou temi ia te ʼu hisitolia ʼa te hahaʼi ʼi te temi ʼo te Tohi-Tapu? (b) Ko te ʼu hisitolia faka Tohi-Tapu fea ʼaē ka tou vakaʼi anai ʼi te alatike ʼaenī?

² Logola neʼe tohi te Folafola ʼa te ʼAtua kua hili kiai te ʼu lauʼi sēkulō, kae ʼe kei mālohi pe. (Hepeleo 4:12) ʼE tohi ai te ʼu hisitolia moʼoni ʼo te maʼuli ʼo te hahaʼi ʼi te temi ʼo te Tohi-Tapu. Logola kua fetogi lahi te ʼu agaʼi fenua pea mo te ʼu manatu talu mai te ʼu temi muʼa, kae ʼi te agamāhani ko te ʼu fihifihia ʼaē ʼe tou tau mo ia ʼe tatau pe mo te ʼu fihifihia ʼaē neʼe hoko kiā nātou ʼi te temi ʼaia. ʼE lahi te ʼu hisitolia neʼe taupau ʼi te Tohi-Tapu kei ʼi ai tonatou ʼaoga kiā tatou, pea ʼe ko he ʼu faʼifaʼitaki fakaloto fīmālie ʼo te hahaʼi neʼe ʼoʼofa kiā Sehova pea mo nātou tauhi agatonu kiā te ia logola te ʼu ʼaluʼaga faigataʼa. Ko te tahi ʼu fakamatala ʼe nātou fakatokagaʼi mai ʼo ʼuhiga mo he aga ʼe fehiʼa kiai te ʼAtua. Neʼe taupau e Sehova te ʼu fakamatala fuli ʼaia ʼa te hahaʼi, ʼaē neʼe agalelei pea mo agakovi, moʼo fakamanatuʼi mai he ʼu ako maʼuhiga. ʼE hage ko tona tohi fēnei e te ʼapositolo ko Paulo: “Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tatou, koteʼuhi ke tou maʼu te ʼamanaki ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu.”​—Loma 15:​4, MN.

³ ʼE tou vakaʼi tāfito anai te ʼu fakamatala e tolu ʼi te Tohi-Tapu: te hisitolia ʼo te ʼu felogoi ʼa Tavite pea mo Saulo, te hisitolia ʼo ʼuhiga mo Ananiasi pea mo Safila, pea mo te aga ʼa Sosefo ki te ʼohoana ʼo Potifale. ʼE tou tāʼofi mai ai he ʼu ako maʼuhiga.

Te Agatonu Ki Te ʼu Fakatuʼutuʼu ʼa Te ʼAtua

4, 5. (a) Koteā te ʼaluʼaga neʼe hoko ʼi te Hau ko Saulo pea mo Tavite? (b) Neʼe feafeaʼi ia Tavite ʼo ʼuhiga mo te fehiʼa ʼa Saulo kiā ia?

⁴ Neʼe mole agatonu te Hau ko Saulo kiā Sehova pea neʼe mole kei tuha ke pule ki Tana hahaʼi. Koia neʼe līaki ia ia e te ʼAtua pea neʼe taki e te ʼAtua ia te polofeta ko Samuele ke ina fakanofo ia Tavite ke hau ki Iselaele. ʼI te fakahā e Tavite tona lototoʼa ʼi tona ʼuhiga tagata tau pea mo vikiʼi ia ia e te hahaʼi, neʼe liliu ai kiā Saulo ko hona fili. Neʼe faiga tuʼa lahi e Saulo ke ina matehi ia ia. Neʼe hāo tuʼumaʼu pe Tavite he neʼe nofo Sehova mo ia.​—1 Samuele 18:​6-12, 25; 19:​10, 11.

⁵ Lolotoga ni ʼu taʼu, neʼe tonu ke hola tuʼumaʼu pe ia Tavite. ʼI te ʼu temi ʼaē neʼe feala ai ke ina matehi ia Saulo, neʼe uga e te ʼu kaumeʼa ʼa Tavite ke ina matehi ia ia, ʼo nātou ʼui kua foaki e Sehova te fili ʼo Tavite ki ʼona nima. Kae neʼe fakafisi e Tavite ke ina matehi ia Saulo, he neʼe agatonu kiā Sehova pea mo fakaʼapaʼapa ki te tuʼulaga ʼo Saulo, ʼi tona ʼuhiga hau ʼaē neʼe fakanofo ki te hahaʼi ʼa te ʼAtua. Neʼe mole ko Sehova koa la ʼaē neʼe ina fakanofo Saulo ke hau ki Iselaele? ʼE toe fakahifo anai e Sehova ia ia ʼi tona temi totonu. Neʼe manatu e Tavite neʼe mole tonu ke ina fai he puleʼaki kiai. ʼI tana ʼosi fai ia meʼa fuli moʼo fakasiʼisiʼi te fehiʼa ʼa Saulo kiā ia, neʼe ʼui fēnei e Tavite: “ ʼE tāʼi totonu anai ia ia e Sehova; peʼe tonu anai ke hoko mai tona ʼaho pea ʼe tonu anai ke mate, peʼe hifo anai ki te tau pea ʼe matehi moʼoni anai. ʼE mole tau mo feʼauga ʼo ʼuhiga mo au, ʼi te manatu ʼa Sehova, ke au faoʼi toku nima moʼo fakafeagai ki te fakanofo ʼa Sehova!”​—1 Samuele 24:​3-15; 26:​7-20.

6. He koʼe ʼe maʼuhiga ke tou vakaʼi te fakamatala ʼo Tavite pea mo Saulo?

⁶ ʼE foaki mai e te hisitolia ʼaia he ako ʼe maʼuhiga. Neʼe lagi kua koutou feʼekeʼaki pe koʼe ʼe hoko he ʼu fihifihia ʼi te kokelekasio? Neʼe lagi fai e he tahi he aga ʼe kovi. Neʼe lagi mole ko hana agahala mamafa, kae ʼe koutou hoha ai. Koteā ʼaē ʼe tonu ke koutou fai? ʼI takotou ʼofa ki te Kilisitiano ʼaia pea mo koutou fia agatonu kiā Sehova, ʼe lagi koutou ʼolo ʼo palalau mo ia, ʼaki he agalelei pea ʼaki te fakatuʼutuʼu ʼaē ke koutou fai he fakatokatoka. Kae e feafeaʼi mo kapau ʼe mole maʼu he puleʼaki? ʼI takotou ʼosi fai ia meʼa fuli ʼe koutou lava fai ʼi te ʼaluʼaga ʼaia, ʼe koutou fia tuku anai te faʼahi ʼaia kiā Sehova. Neʼe ko te faʼahi ʼaia neʼe fai e Tavite.

7. Ohage ko Tavite, ʼe tonu ke tou feafeaʼi mo kapau ʼe fai mai he aga heʼe faitotonu peʼe ko he aga ʼe kovi?

⁷ Peʼe lagi neʼe fai atu he aga heʼe faitotonu ʼi takotou gāue peʼe ʼi tokotou lotu. ʼE lagi mole ʼi ai he puleʼaki ki te faʼahi ʼaia ʼi te temi nei. ʼE lagi faigataʼa ʼaupito te kātakiʼi ʼo te ʼaluʼaga ʼaia, kae ʼe ʼi ai te ako ʼe tou lava tāʼofi mai te aga ʼaē ʼa Tavite ʼo ʼuhiga mo te heʼe faitotonu. Ko te ʼu pesalemo ʼaē neʼe tohi e te tagata fai pesalemo ko Tavite ʼe malave ki totatou loto mole ʼuhi pe he neʼe faikole fakamalotoloto ki te ʼAtua ke ʼaua naʼa matehi ia ia e Saulo, kae ʼuhi ko tana agatonu kiā Sehova pea mo tana tokaga ʼaē ke faka kolōliaʼi te huafa ʼo te ʼAtua. (Pesalemo 18:​1-6, 25-27, 30-32, 48-50; 57:​1-11) Neʼe nofo agatonu pe Tavite kiā Sehova tatau aipe pe neʼe agakovi Saulo kiā ia lolotoga ni ʼu taʼu. Mo tatou ʼe tonu ke tou nonofo agatonu kiā Sehova pea mo tana kautahi, logola te ʼu aga heʼe faitotonu pea mo te ʼu agakovi ʼaē ʼe fai mai kiā tatou. ʼE feala ke tou falala ko Sehova ʼe ina ʼiloʼi lelei te ʼaluʼaga ʼaia.​—Pesalemo 86:⁠2.

8. Neʼe koteā ʼaē neʼe fai e te kau Fakamoʼoni ʼa Sehova ʼi Mosapike ʼi te temi ʼaē neʼe ʼahiʼahiʼi ai tanatou agatonu kiā Sehova?

⁸ ʼE tuku mai e te kau Kilisitiano ʼo te fenua ʼo Mosapike he faʼifaʼitaki lelei ʼi totatou temi, ʼi tanatou taupau tanatou agatonu kiā Sehova ʼi te ʼu temi faigataʼa. ʼI te taʼu 1984, neʼe tuʼa lahi te ʼohofi ʼo tanatou kolo e te kūtuga agatuʼu ʼaki tanatou ʼu mahafu, pea neʼe nātou kaihaʼa pea mo tutu te ʼu ʼapi, pea mo nātou matehi te hahaʼi. Neʼe hage neʼe mole feala ki te kau Kilisitiano moʼoni ʼaia ke nātou fai he meʼa moʼo puipui ʼo nātou. Neʼe fakakinauʼi te hahaʼi ʼo te koga meʼa ʼaia ke nātou kau ki te kūtuga faka solia peʼe ke nātou lagolago kiai ʼi he tahi age ʼu ʼaluʼaga. Maʼa te kau Fakamoʼoni ʼa Sehova, neʼe mole ʼalutahi te faʼahi ʼaia mo tanatou fakatotonu ʼaē ke mole nātou kau ki te malamanei. Neʼe ʼiʼita ʼaupito te kau solia ʼi tanatou fakafisi ʼaia. Ko te ʼu Fakamoʼoni e toko 30 neʼe matehi ʼi te temi maveuveu ʼaia, kae neʼe nonofo agatonu pe te hahaʼi ʼa te ʼAtua tatau aipe pe neʼe tonu ke nātou mamate.a Ohage ko Tavite, neʼe nātou kātakiʼi te ʼu aga heʼe faitotonu kae neʼe nātou mālo ki muli age.

Ko He Fakamanatu Moʼo Fakatokaga Mai

9, 10. (a) ʼE fua lelei feafeaʼi kiā tatou ʼihi faʼifaʼitaki ʼi te Tohi-Tapu? (b) Koteā ʼaē neʼe kovi ai te meʼa ʼaē neʼe fai e Ananiasi pea mo Safila?

⁹ Ko ʼihi hahaʼi ʼaē ʼe talanoa kiai ʼi te Tohi-Tapu ʼe nātou foaki mai he fakatokaga ʼo ʼuhiga mo he aga ʼe mole tonu ke tou fai. Koia ʼe maʼu ʼi te Tohi-Tapu he ʼu tuʼuga hisitolia ʼo te hahaʼi, māʼia ʼi te ʼu kaugana ʼa te ʼAtua, neʼe nātou fai te meʼa ʼe kovi pea mo nātou utu ai tona ʼu fua. (1 Kolonito 10:11) ʼE ʼi ai te hisitolia ʼo Ananiasi pea mo Safila, ko te taumātuʼa neʼe nā kau ki te kokelekasio ʼo te ʼuluaki sēkulō ʼi Selusalemi.

¹⁰ Hili te taʼu 33 ʼo te Penikosite ʼo totatou temi, neʼe ʼaoga ke tokoni ʼi te faʼahi fakasino ki te ʼu tēhina foʼou ʼaē neʼe nonofo ʼi Selusalemi, ke fua lelei kiā nātou tanatou fakatahi mo te kau ʼapositolo. Ko ʼihi ʼi te kokelekasio neʼe nātou fakatau tanatou kele ke feʼauga te falā moʼo tokoni ki te ʼu tēhina fuli ʼaia. (Gaue 2:​41-45) Ko Ananiasi pea mo Safila neʼe nā fakatau tana moʼi kele pea neʼe nā ʼave pe te vaelua ʼo te totogi ki te kau ʼapositolo, kae nā ʼui ko tanā meʼa ʼofa neʼe ko te totogi kātoa ʼaia ʼo te fakatau ʼo tonā kele. ʼE moʼoni, neʼe feala kiā Ananiasi pea mo Safila ke nā foaki te meʼa ʼaē neʼe nā loto kiai, peʼe lahi peʼe veliveli, kae neʼe kovi tonā loto pea neʼe nā aga fakakākā. Neʼe nā loto ke vikiʼi nāua e te kau ʼapositolo pea ke ʼasi neʼe lahi tana foaki ʼi te meʼa ʼaē neʼe nā foaki moʼoni. Ko te ʼapositolo ko Petelo, ʼaki te takitaki ʼo te laumālie maʼoniʼoni, neʼe ina fakahā tanā kākā pea mo tanā malualoi, pea neʼe matehi nāua e Sehova.​—Gaue 5:​1-10.

11, 12. (a) Koteā ʼihi faʼifaʼitaki ʼi te Tohi-Tapu ʼe fakamanatuʼi mai ai ke tou agatonu? (b) Koteā te ʼu tapuakina ʼaē ʼe tou maʼu mo kapau ʼe tou agatonu?

¹¹ Kapau ʼe tou fia loi ke manatu lelei ai te hahaʼi ʼo ʼuhiga mo tatou, tou manatuʼi te hisitolia fakamataku ʼo Ananiasi pea mo Safila ʼo ʼuhiga mo te aga ʼaē ʼe mole tonu ke tou fai. ʼE tou lava kākāʼi te tagata, kae ʼe mole tou lava kākāʼi ia Sehova. (Hepeleo 4:13) ʼE fakaloto mālohiʼi tuʼumaʼu tatou ʼi te Tohi-Tapu ke tou fepalalauʼaki ʼi te moʼoni, heʼe ko te kau gutuloi ʼe mole nātou māʼuʼuli anai ʼi te kele ʼaē kua puli ai te heʼe agatonu. (Tāʼaga Lea 14:2; Apokalipesi 21:8; 22:15) Ko tona tupuʼaga ʼaē heʼe ko ia ʼaē neʼe ʼuluaki loi ʼe ko Satana te Tevolo.​—Soane 8:⁠44.

¹² Kapau ʼe tou agatonu ʼi totatou maʼuli, pea ʼe lahi anai te ʼu tapuakina ka tou maʼu. ʼI te ʼu tapuakina ʼaia, ʼe tou maʼu ai he leʼo ʼo loto ʼe maʼa pea mo tou fiafia heʼe falala te hahaʼi kiā tatou. ʼUhi ko te agatonu ʼa te kau Kilisitiano, ʼe lahi te ʼu ʼaluʼaga neʼe nātou maʼu ai tanatou gāue, pe neʼe nātou taupau tanatou gāue. Kae ko te tapuakina ʼaē ʼe maʼuhiga ʼaupito, ko nātou ʼaē ʼe agatonu ʼe nātou kaumeʼa mo te ʼAtua Māfimāfi.​—Pesalemo 15:​1, 2.

Tou Nonofo Maʼa

13. Koteā ʼaē neʼe hoko kiā Sosefo, pea neʼe koteā ʼaē neʼe ina fai?

¹³ Ko Sosefo, te foha ʼo te pateliaka ko Sakopo, neʼe fakatau ohage ko he sinifu ʼi tona taʼu 17. Ki muli age neʼe gāue ʼi te ʼapi ʼo Potifale, ko te tagata Esipito tuʼulaga maʼuhiga, pea neʼe tokagaʼi ia Sosefo e te ʼohoana ʼo tona pule. Neʼe fia felāveʼi fakasino mo Sosefo, ʼaē neʼe ko he tama tūpulaga, pea ʼi te ʼaho fuli pe neʼe ina fakaneke fēnei ia ia: “Moe mo au.” Neʼe nofo mamaʼo ia Sosefo mai tona famili, pea neʼe mole ʼiloʼi ia ia e he tahi ʼi te fenua. Neʼe feala pe ke felāveʼi fakasino mo te fafine ʼaia ʼo mole ʼiloʼi e he tahi. Kae ʼi te temi ʼaē neʼe puke e te ʼohoana ʼo Potifale ia Sosefo, neʼe hola.​—Senesi 37:​2, 18-28; 39:​1-12.

14, 15. (a) He koʼe ʼe tonu ke tou tokagaʼi te hisitolia ʼo Sosefo? (b) He koʼe neʼe fakafetaʼi te tuagaʼane ʼi tana taupau te ʼu fakamanatu ʼa te ʼAtua?

¹⁴ Neʼe lahilahi ake Sosefo ʼi he famili ʼe manavasiʼi ki te ʼAtua, pea neʼe mahino kiā ia ʼe kovi te fai felāveʼi fakasino ʼa he toko lua ʼe mole heʼeki nā ʼohoana. Neʼe ina fehuʼi fēnei: “ ʼE lava feafeaʼi anai haku fai te toe meʼa kovi ʼaia pea mo au agahala ki te ʼAtua?” ʼE hā mai ʼi henī neʼe ina fai tana tonu ʼaia he neʼe mālama ki te lēkula ʼaē neʼe foaki e te ʼAtua ki te tagata, ke ʼohoana mo he fafine e tahi, ohage ko tona hā ʼi Eteni. (Senesi 2:24) ʼE feala ke fua lelei ki te hahaʼi iā ʼaho nei mokā nātou fakakaukauʼi te aga ʼa Sosefo ʼi te ʼaluʼaga ʼaia. ʼI ʼihi fenua, kua lahi te tali ʼo te ʼu felāveʼi fakasino, pea ko te kau tūpulaga ʼaē ʼe nātou fakafisi ke nātou fai he aga heʼeʼaoga, ʼe vāʼi nātou e tonatou ʼu kaumeʼa. Ko te ʼu felāveʼi fakasino mo he tahi ʼe mole ko tokita ʼohoana ʼe kua fai māhani e te hahaʼi lalahi. Koia ko te hisitolia ʼo Sosefo ʼe ina fakamanatuʼi mai he faʼahi maʼuhiga ʼi totatou temi. Kiā mata ʼo te ʼAtua, ko te folonikasio pea mo te tono ʼe ko he ʼu agahala. (Hepeleo 13:4) Tokolahi iā nātou ʼaē neʼe tō ki te fakaneke ʼaē ke nātou fai he ʼu felāveʼi fakasino, ʼe nātou fakamoʼoni ʼe ʼi ai he ʼu tupuʼaga moʼoni ke ʼaua naʼa tou fai te faʼahi ʼaia. ʼI te ʼu fua kovi ʼo te aga ʼaia ʼe ʼi ai te ufiufi, te hoha ʼo te leʼo loto, te ʼu maheka, te faitama, pea mo te pikisia ʼi he mahaki ʼuhi ko te ʼu felāveʼi fakasino. Ohage pe ko tona fakamanatuʼi mai ʼi te Tohi-Tapu, ko ia ʼaē ʼe fai folonikasio “ ʼe agahala ia ki tona sino totonu.”​—1 Kolonito 5:​9-12; 6:18; Tāʼaga Lea 6:​23-29, 32.

¹⁵ Ko Jenny,b ko he Fakamoʼoni ʼa Sehova mole heʼeki ʼohoana, ʼe fakafetaʼi ʼaupito ʼo ʼuhiga mo te ʼu fakamanatu ʼaē ʼe haʼu mai te ʼAtua. ʼI tona fale gāue, ko te tagata ʼe nā gāue tahi neʼe manako ia ia. ʼI te mole manako ʼa Jenny kiā ia, neʼe toe ʼāsili age te faiga ʼa te tagata ke ina maʼu ia ia. ʼE ʼui fakalelei fēnei e Jenny: “Neʼe au faiga fakamalotoloto ke au nofo maʼa, koteʼuhi ʼe kita fiameʼameʼa mokā tokagaʼi kita e he tagata.” Kae neʼe ʼiloʼi e Jenny neʼe faiga pe te tagata ʼaia ke kau ia Jenny ʼi te ʼu tuʼuga fafine ʼaē kua felāveʼi fakasino mo ia. ʼI te temi ʼaē neʼe logo vaivai ai ʼi tana tauʼi, neʼe ina kole fakamalotoloto kiā Sehova ke tokoni kiā ia ke nofo agatonu kiā te Ia. Kiā Jenny, ko te ʼu manatu ʼaē neʼe ina ako ʼi tana fai te ʼu kumi ʼi te Tohi-Tapu pea mo te ʼu tohi faka Kilisitiano neʼe hage ko he ʼu fakamanatu neʼe uga ia ia ke nofo tokaga. ʼI te ʼu fakamanatu ʼaia neʼe ʼi ai te hisitolia ʼo Sosefo pea mo te ʼohoana ʼo Potifale. ʼE ina ʼui fēnei: “Neʼe ko taku manatuʼi tuʼumaʼu toku ʼofa kiā Sehova ʼaē neʼe feala ai ke mole au tuʼania, naʼa au fai anai te toe meʼa kovi ʼaia pea mo au agahala kiā te ia.”

Tou Taupau Te ʼu Fakamanatu ʼa Te ʼAtua!

16. Koteā te ʼu fua lelei ʼe tou maʼu mokā tou toe vakaʼi pea mo metitāsioʼi te maʼuli ʼo te hahaʼi ʼaē ʼe talanoa kiai ʼi te Tohi-Tapu?

¹⁶ ʼE tou lava fakatuputupu fuli tatatou fakafetaʼi ki te ʼu lēkula ʼa Sehova, ʼo tou faiga ke tou mahino pe koʼe neʼe ina taupau maʼa tatou ʼihi hisitolia ʼi te Tohi-Tapu. Koteā ʼaē ʼe nātou akoʼi mai? Koteā ʼihi kalitātē ʼo te hahaʼi ʼi te temi ʼo te Tohi-Tapu, ʼe tonu ke tou faʼifaʼitakiʼi peʼe ko honatou vaivaiʼaga ʼe tonu ke tou tekeʼi? Ko te ʼu hisitolia ʼa te toko teau hahaʼi ʼe tuʼu ʼi te Folafola ʼa te ʼAtua. Ko nātou fuli ʼaē ʼe nātou ʼoʼofa ki te akonaki ʼa te ʼAtua, ʼe tonu ke nātou holi ke nātou maʼu te poto ʼaē ʼe ina foaki te maʼuli, ʼaē ʼe kau kiai te ʼu ako ʼaē ʼe tou tāʼofi mai te ʼu faʼifaʼitaki ʼaē neʼe taupau fakalelei e Sehova. ʼE tau hā ʼi te nusipepa ʼaenī he ʼu alatike ʼo ʼuhiga mo te ʼu hisitolia ʼo te hahaʼi, ʼe tou tāʼofi ai he ako maʼa tatou. ʼE lelei ke tou toʼo hotatou temi ke tou toe lau te ʼu hisitolia ʼaia.

17. Koteā takotou manatu ʼo ʼuhiga mo te ʼu fakamanatu ʼa Sehova, pea he koʼe ʼe koutou manatu feiā?

¹⁷ ʼE tou loto fakafetaʼi lahi ki te tokaga ʼofa ʼa Sehova kiā nātou ʼaē ʼe nātou faiga ke nātou fai tona finegalo! ʼE mahino ia ʼe mole tou haohaoa, ohage pe ko te hahaʼi tagata pea mo fafine ʼaē ʼe talanoa kiai ʼi te Tohi-Tapu. Kae ko te fakamatala ʼo tanatou ʼu gāue ʼe ʼaoga ʼaupito kiā tatou. Kapau ʼe tou taupau te ʼu fakamanatu ʼa Sehova, ʼe mole tou fai anai he ʼu agahala mamafa, pea ʼe feala ke tou faʼifaʼitakiʼi nātou ʼaē neʼe haʼele ʼi te ala ʼo te faitotonu. Kapau ʼe tou fai feiā, ʼe feala anai hatatou hiva ohage ko te tagata fai pesalemo, ʼaē neʼe hiva fēnei: “Manuʼia ia nātou ʼaē ʼe nātou mulimuli ki [te] ʼu fakamanatu [ʼa Sehova]; ʼi tonatou loto kātoa ʼe nātou haga kumi ia ia. Neʼe taupau e toku nefesi tau fakamanatu, pea neʼe au manako lahi kiai.”​—Pesalemo 119:​2, 167.

[Kiʼi nota]

ʼE Koutou Tali Feafeaʼi Anai?

• Koteā ʼaē ʼe tou ako mai te aga ʼa Tavite kiā Saulo?

• Koteā ʼaē ʼe tou ako ʼi te hisitolia ʼo Ananiasi pea mo Safila?

• He koʼe ʼe tonu ke tou tokagaʼi iā ʼaho nei ia te hisitolia ʼo Sosefo?

[Paki ʼo te pasina 16]

He koʼe neʼe fakafisi e Tavite ke ina matehi ia Saulo?

[Paki ʼo te pasina 17]

Koteā ʼaē ʼe tou ako mai te hisitolia ʼo Ananiasi pea mo Safila?

[Paki ʼo te pasina 18]

He koʼe neʼe fakafisi ia Sosefo ki te ʼu fakaneke ʼaē ke ina fai he aga heʼeʼaoga?