Tou Tokagaʼi Te Lelei ʼo Te Kautahi ʼa Sehova
“ ʼE mahino papau ia ʼe mātou fiafia anai ʼi te lelei ʼo tou ʼapi.”—Pesalemo 65:4.
1, 2. (a) Koteā anai tona fua ki te hahaʼi ʼa te ʼAtua te ʼu fakatuʼutuʼu ʼaē neʼe fai ʼo ʼuhiga mo te fale lotu? (b) Neʼe tokoni feafeaʼi ia Tavite ki te laga ʼo te fale lotu?
KO TAVITE ʼe kau ʼi te hahaʼi Iselaele makehe ʼo te temi muʼa ʼaē ʼe talanoa kiai te ʼu Koga Tohi-Tapu Faka Hepeleo. Ko te tagata tauhi ōvi ʼaia, mo fai māholo, mo polofeta, pea mo hau neʼe falala kātoa kiā Sehova ʼAtua. Ko te felogoi lelei ʼaupito ʼa Tavite mo Sehova neʼe tupu ai tana fia laga he ʼapi maʼa te ʼAtua. Ko te ʼapi ʼaia, peʼe ko te fale lotu, ʼe liliu anai ko te potu tāfito ʼo te tauhi moʼoni ʼi Iselaele. Neʼe ʼiloʼi e Tavite ʼe fiafia pea mo tapuakina anai te hahaʼi ʼa te ʼAtua ʼaki te ʼu fakatuʼutuʼu ʼaē ka fai ʼo ʼuhiga mo te fale lotu. Koia neʼe hiva fēnei ia Tavite: “Fiafia ia ia ʼaē ʼe ke filifili [e koe Sehova] pea mo fakaōvi mai, ke nofo ʼi tou ʼu malaʼe. ʼE mahino papau ia ʼe mātou fiafia anai ʼi te lelei ʼo tou ʼapi, te potu taputapu ʼo te fale lotu.”—Pesalemo 65:4.
2 Neʼe mole fakagafua age kiā Tavite ke ina takitaki te laga ʼo te ʼapi ʼo Sehova. Kae neʼe foaki te pilivilesio ʼaia ki tona foha ko Salomone. Neʼe mole muhumuhu Tavite ʼi te foaki ki he tahi kehe te pilivilesio ʼaia ʼaē neʼe loto moʼoni kiai. Ko te meʼa ʼaē neʼe maʼuhiga age kiā ia neʼe ko te laga ʼo te fale lotu. Neʼe lagolago ʼaki tona loto kātoa ki te fakatuʼutuʼu ʼaia, ʼo ina foaki kiā Salomone te ʼu pāki ʼo te agaaga ʼo te fale lotu ʼaē neʼe ina maʼu mai iā Sehova. Tahi ʼaē meʼa, neʼe vaevae faka kūtuga e Tavite ia te ʼu toko lauʼi afe kau Levite, pea neʼe ina foaki te tuʼuga aulo pea mo te siliva ki te laga ʼo te fale lotu.—1 Fakamatala 17:1, 4, 11, 12; 23:3-6; 28:11, 12; 29:1-5.
3. ʼE tonu ke feafeaʼi te ʼu kaugana ʼa te ʼAtua ʼo ʼuhiga mo te ʼu fakatuʼutuʼu ki te tauhi moʼoni?
3 Ko te kau Iselaele agatonu neʼe nātou lagolago ki te ʼu fakatuʼutuʼu ʼaē neʼe fai ki te tauhi moʼoni ʼi te ʼapi ʼo te ʼAtua. ʼI totatou ʼuhiga kaugana ʼa Sehova ʼi te temi nei, ʼe tou toe lagolago feiā ki te ʼu fakatuʼutuʼu ʼaē ʼe fai ki te tauhi ʼi te loto kautahi fakakelekele ʼa Sehova. ʼE tou fakahā ai ʼe tatau tatatou manatu mo ʼaē ʼa Tavite. ʼE mole tou meo. Kae ʼe tou tokagaʼi te lelei ʼo te kautahi ʼa te ʼAtua. Kua koutou fakakaukauʼi koa ʼo ʼuhiga mo te ʼu tuʼuga lelei ʼaē ʼe feala ke tou loto fakafetaʼi kiai? Tou vakaʼi te tahi ʼu lelei ʼi te ʼu lelei ʼaia.
Tou Loto Fakafetaʼi Kiā Nātou ʼAē ʼe Takitaki
4, 5. (a) ʼE fakahoko feafeaʼi e “te tagata kaugana agatonu mo poto” te gāue neʼe tuku age? (b) Koteā ʼaē neʼe ʼui e ʼihi kau Fakamoʼoni ʼo ʼuhiga mo te meʼa kai fakalaumālie ʼaē ʼe nātou maʼu?
4 ʼE ʼi ai te ʼu tupuʼaga lelei ke tou loto fakafetaʼi ai ki “te tagata kaugana agatonu mo poto” ʼaē neʼe fakanofo e Sesu Kilisito ki tona ʼu koloā ʼi te kele. Ko te kalasi ʼa te tagata kaugana ʼaē ʼe faʼufaʼu e te kau Kilisitiano neʼe fakanofo ʼaki te laumālie, ʼe ina takitaki te faka mafola ʼo te logo lelei, mo fakatuʼutuʼu te ʼu fono ki te tauhi, pea mo tā te ʼu tohi faka Tohi-Tapu iā lea e 400 tupu. Ko te ʼu toko lauʼi miliona hahaʼi ʼi te kele kātoa ʼe nātou loto fakafetaʼi ʼi tanatou maʼu te “meʼa kai [fakalaumālie ʼaia] ʼi tona temi totonu.” (Mateo 24:45-47, MN ) ʼE mahino ia ʼe mole he tupuʼaga ke tou muhumuhu ki te faʼahi ʼaia.
5 Lolotoga ni ʼu taʼu, ko Elfi, ko te Fakamoʼoni ʼa Sehova kua finematuʼa, neʼe ina maʼu te fakaloto fīmālie pea mo te tokoni ʼi tana maʼuliʼi te ʼu tokoni faka Tohi-Tapu ʼaē ʼe ina maʼu ʼi te ʼu tohi ʼa te kalasi ʼa te tagata kaugana. ʼI tona loto fakafetaʼi lahi, neʼe tohi fēnei e Elfi: “Koteā anai te meʼa neʼe au lava fai mo kanapaula neʼe mole au kau ʼi te kautahi ʼa Sehova?” Ko Peter pea mo Irmgard kua fualoa mo nāua tanā kaugana ki te ʼAtua. ʼE fakahā e Irmgard tona loto fakafetaʼi ki te meʼa kai fuli ʼaia neʼe teuteuʼi e “te kautahi ʼofa pea mo loto tokaga ʼa Sehova.” ʼI te ʼu tohi ʼaē neʼe fai e te kautahi, ʼe kau kiai te ʼu tohi neʼe fai maʼa te hahaʼi ʼaē ʼe ʼaoga he tokaga ʼe makehe, ohage ko te hahaʼi kivi peʼe tuli.
6, 7. (a) ʼE takitaki feafeaʼi te ʼu gāue ʼa te ʼu kokelekasio ʼi te kele kātoa? (b) Koteā ʼaē neʼe ʼui e ʼihi ʼo ʼuhiga mo te kautahi fakakelekele ʼa Sehova?
6 ʼE fakafofoga te “tagata kaugana agatonu” e te Kolesi Pule ʼa te kau Fakamoʼoni ʼa Sehova, ko te kiʼi kūtuga ko he ʼu tagata neʼe fakanofo ʼaki te laumālie, ʼe nātou gāue ʼi te ʼu pilo lalahi faka malamanei ʼa te kau Fakamoʼoni ʼa Sehova ʼi Brooklyn, ʼi New York. ʼE hinoʼi e te Kolesi Pule he ʼu kaugana ʼa Sehova kua fotufotuʼa tagata, ke nātou gāue ʼi te ʼu filiale ʼaē ʼe tōkakaga ai ki te ʼu gāue ʼa te ʼu kokelekasio e 98 000 tupu ʼi te kele kātoa. Ko te ʼu tagata ʼaē ʼe nātou mulimuli ki te ʼu fakamaʼua ʼaē ʼe tuʼu ʼi te Tohi-Tapu, ʼe nātou liliu ko he ʼu tagata ʼāfea peʼe ko he ʼu tēhina faifekau faka minisitelio ʼi te ʼu kokelekasio ʼaia. (1 Timoteo 3:1-9, 12, 13) Ko te kau tagata ʼāfea ʼe nātou takitaki pea mo nātou tauhi ʼaki te ʼofa ia te faga ōvi ʼa te ʼAtua. ʼE ko he meʼa lelei hatatou kau ki te faga ōvi ʼaia pea mo tou sisio ki te ʼofa pea mo te logo tahi ʼo “te famili kātoa ʼo te ʼu tēhina!”—1 Petelo 2:17, MN; 5:2, 3.
7 Ko te ʼu tēhina mo tuagaʼane ʼe mole nātou meo ʼo ʼuhiga mo te ʼu tagata ʼāfea, kae ʼe nātou tau fakahā tonatou loto fakafetaʼi ki tanatou takitaki fakalaumālie. Ohage la ko Birgit, te tuagaʼane kua ʼohoana ʼe taʼu 30 tupu. ʼI tana kei finemui, neʼe fakakaugā mo he ʼu hahaʼi kovi pea neʼe meihiʼi pe ke ina fai he agahala. Kae ko te ʼu fai tokoni faka Tohi-Tapu ʼaē neʼe foaki age e te kau tagata ʼāfea kiā ia pea mo te lagolago ʼa te ʼu tēhina mo tuagaʼane, neʼe feala ai ke hāo mai he ʼaluʼaga fakatupu mamahi. E feafeaʼi ia Birgit ʼi te temi nei? ʼE ina ʼui fēnei: “ ʼE au loto fakafetaʼi ʼaupito ʼi taku kei kau ki te kautahi fakaofoofo ʼa Sehova.” ʼE ʼui fēnei e Andreas ʼaē ʼe taʼu 17: “ ʼE ko te kautahi moʼoni ʼaenī ʼa Sehova, te kautahi ʼaē ʼe lelei tokotahi ʼi te malamanei kātoa.” ʼE mole tonu koa la ke tou loto fakafetaʼi ki te ʼu lelei ʼaē ʼe tou maʼu mai te kautahi ʼa Sehova ʼaē ʼi te kele?
Ko Nātou ʼAē ʼe Takitaki ʼe Nātou Heʼe Haohaoa
8, 9. Neʼe feafeaʼi te aga ʼa ʼihi hahaʼi ʼo te temi ʼo Tavite, pea neʼe feafeaʼi ia Tavite ʼi te taʼi aga ʼaia?
8 ʼE moʼoni, ko nātou ʼaē neʼe hinoʼi ke nātou takitaki ʼi te tauhi moʼoni ʼe nātou heʼe haohaoa. Ko nātou fuli ʼe nātou fai te ʼu lākahala, pea ko ʼihi ʼe nātou faiga mālohi ke nātou lolomi he ʼu vaivaiʼaga kei nātou maʼu. ʼE tonu koa ke tou lotovaivai ai? Kailoa ia. Māʼiape la mo te ʼu hahaʼi ʼaē neʼe tuku age kiā nātou he ʼu tuʼuga maʼua ʼi Iselaele ʼi te temi muʼa, neʼe nātou fai te ʼu hala mamafa. Ohage ko Tavite, ʼi tana kei tūpulaga, neʼe kole age ke fai māholo maʼa te Hau ko Saulo, ke fakafimālie ai tona loto. Ki muli age, neʼe faiga e Saulo ke ina matehi ia Tavite, pea neʼe tonu leva ia ke hola naʼa matehi ia ia.—1 Samuele 16:14-23; 18:10-12; 19:18; 20:32, 33; 22:1-5.
9 Ko ʼihi kau Iselaele neʼe nātou aga kākā. Ohage la ko Soape te tagata takitaki ʼo te kautau ʼa Tavite, neʼe ina matehi ia Apinea te kāiga ʼo Saulo. Ko Apisalome neʼe fonofono mo toʼo te tuʼulaga hau ʼo tana tāmai, ia Tavite. Pea ko Ahitofele, te tagata fai tokoni ʼa Tavite ʼaē neʼe falala ki ai, neʼe ina kākāʼi ia ia. (2 Samuele 3:22-30; 15:1-17, 31; 16:15, 21) Kae neʼe mole meo Tavite ʼi te ʼu ʼaluʼaga ʼaia; pea neʼe mole ina līaki te tauhi moʼoni. Neʼe kehe ia tana aga. Ko te ʼu ʼaluʼaga fakaloto mamahi ʼaia neʼe nātou uga ia Tavite ke pipiki kiā Sehova pea mo taupau he manatu ʼe lelei ʼi tana hola mai iā Saulo. ʼI te temi ʼaia, neʼe hiva fēnei Tavite: “Fakahā mai he lotoʼofa, Ê ʼAtua, fakahā mai he lotoʼofa, heʼe au loto ke ke hāofaki toku maʼuli; pea ʼi te malumalu ʼo tou ʼu kapakau ʼe au nono ai anai ʼo aʼu ki te fakalaka ʼo te ʼu malaʼia.”—Pesalemo 57:1.
10, 11. Koteā ʼaē neʼe hoko ki te tuagaʼane ʼe higoa ko Gertrud ʼi tana kei finemui, pea koteā ʼaē neʼe ina ʼui ʼo ʼuhiga mo te ʼu hala ʼa te ʼu tēhina mo tuagaʼane?
10 Iā ʼaho nei, ʼe mole tonu ke tou meo ʼo ʼuhiga mo he aga kākā ʼe hoko ʼi te loto kautahi ʼa te ʼAtua. ʼE mole tali e Sehova, peʼe ko te ʼu ʼāselo, peʼe ko te ʼu tagata tauhi ōvi fakalaumālie he hahaʼi aga kākā mo agakovi ʼi te kokelekasio. Kae ʼe hoko kiā tatou fuli he ʼu fihifihia ʼuhi ko totatou ʼuhiga agahala—ʼo tatou pea mo te tahi ʼu kaugana ʼa te ʼAtua.
11 Ko Gertrud, te tuagaʼane kua fualoa tana tauhi kiā Sehova, ʼi tana kei finemui neʼe tukugakoviʼi hala ʼo ʼui ko ia ko te fafine kākā kae mole ko he fafine fai faka mafola ʼo te Puleʼaga temi kātoa. Neʼe koteā ʼaē neʼe fai e Gertrud ʼi te temi ʼaia? Neʼe muhumuhu koa ʼo ʼuhiga mo tona gaohi feiā? Kailoa ia. Mole fualoa ʼi muʼa ʼo tona mate ʼi te taʼu 2003 ʼi tona taʼu 91, neʼe ina toe fakamanatuʼi tona maʼuli pea neʼe ina ʼui fēnei: “Ko te ʼu meʼa ʼaē neʼe hoko kiā au ʼi toku maʼuli neʼe akoʼi mai kiā au logola te faihala ʼa te hahaʼi, kae ko Sehova ʼe ina takitaki tana gāue maʼuhiga, ʼaē ʼe ina fakaʼaogaʼi ai ia tatou, te ʼu hahaʼi agahala.” ʼI te felāveʼi ʼa Gertrud mo te ʼu fihifihia ʼuhi ko te ʼuhiga heʼe haohaoa ʼa te ʼu kaugana ʼa te ʼAtua, neʼe haga kiā Sehova ʼo faikole fakamalotoloto age ki ai.
12. (a) Koteā te faʼifaʼitaki kovi neʼe tuku e ʼihi Kilisitiano ʼo te ʼuluaki sēkulō? (b) Koteā ʼaē ʼe tonu ke tou fakakaukau kiai?
12 Mai tona ʼaluʼaga ʼaē ko te kau Kilisitiano ʼaē ʼe agatonu pea mo faʼafai ʼaupito ʼe nātou toe agahala foki mo nātou, koia ka faihala he tēhina ʼe ʼi ai hona pilivilesio ʼi te kokelekasio, tou haga fai “ia meʼa fuli ʼo mole [tou] muhumuhu.” (Filipe 2:14, MN ) ʼE fakaʼofaʼofa anai mo kapau ʼe tou mulimuli ki te faʼifaʼitaki kovi ʼa ʼihi ʼi te kokelekasio ʼo te ʼuluaki sēkulō! Ohage ko tona ʼui e te tisipulo ko Suta, ko te kau faiako hala ʼo te temi ʼaia neʼe nātou “meʼa noaʼi te pule ʼaliki pea mo laukovi ki te kau kolōlia.” Tahi ʼaē meʼa, ko te hahaʼi agakovi ʼaia neʼe nātou “muhumuhu, [neʼe] nātou meo ʼo ʼuhiga mo te ʼu meʼa ʼe hoko kiā nātou ʼi te maʼuli.” (Suta 8, 16, MN ) ʼOfa pe ke ʼaua naʼa tou hage ko te hahaʼi muhumuhu neʼe nātou meo, kae ke tou fakakaukauʼi te ʼu lelei ʼaē ʼe tou maʼu mai te “tagata kaugana agatonu.” Ke maʼuhiga kiā tatou te lelei ʼo te kautahi ʼa Sehova pea mo tou “haga fai ia meʼa fuli ʼo mole [tou] muhumuhu.”
“Ko Te Taʼi Lea ʼAenī ʼe Matamatakovi ʼAupito”
13. Koteā ʼaē neʼe fai e ʼihi ʼi tanatou logo ki te tahi akonaki ʼa Sesu Kilisito?
13 Ko ʼihi ʼi te ʼuluaki sēkulō neʼe nātou muhumuhu ʼo ʼuhiga mo te ʼu kaugana ʼaē neʼe hinoʼi, pea ko ʼihi neʼe nātou muhumuhu ʼo ʼuhiga mo te ʼu akonaki ʼa Sesu. Ohage ko tona fakamatala iā Soane 6:48-69 (MN ), neʼe ʼui fēnei e Sesu: “Ko ia ʼaē ʼe kai ki toku kakano pea mo ʼinu ki toku toto, ʼe ina maʼu te maʼuli heʼegata.” ʼI tanatou logo ki te ʼu palalau ʼaia, “tokolahi ʼo tana kau tisipulo . . . neʼe ʼui maʼa nātou: ‘Ko te taʼi lea ʼaenī ʼe matamatakovi ʼaupito; ko ai koa ʼaē ʼe faʼa fia logo kiai?’ ” Neʼe ʼiloʼi e Sesu ko “[tana] kau tisipulo neʼe nātou muhumuhu ʼo ʼuhiga mo te faʼahi ʼaia.” Tahi ʼaē meʼa, “ ʼi te meʼa ʼaia, ko te tokolahi ʼo [nātou] neʼe nātou toe liliu ki te ʼu meʼa ʼaē ʼi muli, pea neʼe mole kei nātou haʼele mo ia.” Kae neʼe mole muhumuhu te ʼu tisipulo fuli. Koutou tokagaʼi pe koteā ʼaē neʼe hoko ʼi te fehuʼi fēnei age e Sesu ki te toko 12 kau ʼapositolo: “ ʼE mole koa la toe fia ʼolo ai mo koutou?” Neʼe tali fēnei e te ʼapositolo ko Petelo: “ ʼAliki, ke mātou ʼolo la kiā ai? ʼE ke maʼu koe te ʼu folafola ʼo te maʼuli heʼegata; koia neʼe mātou tui ai, pea neʼe mātou ʼiloʼi ai ko koe ko te Maʼoniʼoni ʼa te ʼAtua.”
14, 15. (a) He koʼe ko ʼihi neʼe mole manatu tahi mo ʼihi ʼu akonaki faka Kilisitiano? (b) Koteā ʼaē ʼe feala ke tou ako mai te faʼahi neʼe hoko kiā Emanuel?
14 ʼI totatou temi, neʼe ko te kiʼi kūtuga tokosiʼi ʼi te hahaʼi ʼa te ʼAtua neʼe mole nātou manatu tahi mo ʼihi akonaki faka Kilisitiano pea neʼe nātou muhumuhu ʼo ʼuhiga mo te kautahi fakakelekele ʼa Sehova. He koʼe ʼe hoko te faʼahi ʼaia? Ko te ʼu muhumuhu ʼaia ʼe tau hoko ʼuhi ko te mole mahino ʼa ʼihi ki te faʼahiga fakahoko e te ʼAtua tana ʼu gāue. ʼE fakahā māmālie e te Tupuʼaga te moʼoni ki tana hahaʼi. Koia ko tatatou mahino ki te Tohi-Tapu ʼe tonu ke fetogi ʼi ʼihi temi. Ko te tokolahi ʼo te hahaʼi ʼa Sehova ʼe nātou fiafia ʼo ʼuhiga mo te ʼu fetogi ʼaia. Kae ko te kiʼi tokosiʼi iā nātou ʼe nātou fia “agatonu fau” pea ʼe mole nātou leleiʼia te ʼu fetogi. (Tagata Tānaki 7:16) ʼE lagi nātou fialahi pea ko ʼihi ʼe nātou tō ki te hele ʼo te fia mulimuli pe ki tanatou ia ʼu manatu. Tatau aipe pe koteā tona tupuʼaga, kae ko te ʼu muhumuhu ʼaia ʼe fakatupu tuʼutāmaki, heʼe feala ai ke tou toe liliu ki te malamanei pea mo tana faʼahiga maʼuli.
15 Ohage la ko Emanuel, neʼe ko he Fakamoʼoni neʼe ina valokiʼi te ʼu manatu neʼe ina lau ʼi te ʼu tohi ʼa “te tagata kaugana agatonu mo poto.” (Mateo 24:45, MN ) Neʼe mole kei ina lau te ʼu tohi faka Kilisitiano pea neʼe ina ʼui ki muli age ki te kau tagata ʼāfea ʼo tona kokelekasio ʼe fia mavae ʼi te kau Fakamoʼoni ʼa Sehova. Kae hili te kiʼi temi nounou kiai, neʼe mahino kiā Emanuel neʼe moʼoni ia te ʼu akonaki ʼa te kautahi ʼa Sehova. Neʼe toe felogoi mo te kau Fakamoʼoni, ʼo ina fakahā neʼe faihala, pea neʼe toe kau ʼi te ʼu Fakamoʼoni ʼa Sehova. Koia neʼe toe fiafia ai.
16. Koteā ʼaē ʼe lava tokoni mai ke puli totatou ʼu lotolotolua ʼo ʼuhiga mo ʼihi akonaki faka Kilisitiano?
16 Koteā ʼaē ʼe tonu ke tou fai mo kapau ʼe tou fia muhumuhu heʼe tou lotolotolua ʼo ʼuhiga mo he ʼu akonaki ʼa te hahaʼi ʼa Sehova? Tou faʼa kātaki ʼo fakatalitali. ʼE lagi fakahā anai e te “tagata kaugana agatonu” he alatike ka tali ki tatatou ʼu fehuʼi pea mo puli ai totatou lotolotolua. ʼE ko he aga poto te kumi tokoni ki te kau tagata ʼāfea. (Suta 22, 23) Ko te faikole, mo te ako takitokotahi, pea mo te fakatahi mo te ʼu tēhina mo tuagaʼane ʼe manatu fakalaumālie, ʼe feala ke toe tokoni mai ke puli totatou ʼu lotolotolua pea feala ke fakaloloto totatou loto fakafetaʼi ki te ʼu moʼoni faka Tohi-Tapu ʼaē ʼe ina fakaloto mālohiʼi te tui, pea ko te ʼu akonaki ʼaia neʼe tou ako ʼi te kautahi ʼaē ʼe fakaʼaogaʼi e Sehova.
Tou Taupau He Manatu ʼe Lelei
17, 18. ʼE mole tonu ke tou muhumuhu, kae ko te faʼahiga aga fea ʼaē ʼe tonu ke tou maʼu, pea koteā tona tupuʼaga?
17 ʼE moʼoni, ʼe maʼu e te hahaʼi agahala te holi ʼaē ki te agahala, pea ko ʼihi ʼe lagi nātou fia fakahā leʼo lahi tanatou meo. (Senesi 8:21; Loma 5:12) Kae kapau kua tou māhani ʼi te muhumuhu, pea ʼe fua kovi anai ki tatatou felogoi mo Sehova ʼAtua. Koia ʼe ʼaoga ai ke tou tāʼofi tatatou fia muhumuhu.
18 ʼE mole tonu ke tou muhumuhu ʼo ʼuhiga mo ni ʼu meʼa ʼi te kokelekasio, kae ʼe lelei age ke tou taupau he manatu ʼe lelei pea mo tou mulimuli ki tatatou ʼu gāue ʼaē ʼe tou fai māhani, ʼaē ʼe tou maʼumaʼua ai, mo fiafia, mo aga fakaʼapaʼapa, mo fakafuafua lelei pea mo mālohi ai tatatou tui. (1 Kolonito 15:58; Tito 2:1-5) Ko Sehova ʼe ina fakaʼaluʼalu ia meʼa fuli pe ʼi tana kautahi, pea ko Sesu ʼe ina ʼiloʼi te meʼa ʼaē ʼe hoko ʼi te ʼu kokelekasio takitahi, ohage pe ko tana fai ʼi te ʼuluaki sēkulō. (Apokalipesi 1:10, 11) Tou faʼa kātaki ʼo fakatalitali ki te ʼAtua pea mo Kilisito, te Pule ʼo te kokelekasio. ʼE lagi fakaʼaogaʼi he ʼu tagata tauhi ōvi faʼafai moʼo fakatonutonuʼi he ʼu faʼahi ʼe tonu ke hoko ai he ʼu fetogi.—Pesalemo 43:5; Kolose 1:18; Tito 1:5.
19. ʼO aʼu ki te temi ʼaē ka puleʼi ai e te Puleʼaga ia te malamanei, koteā ʼaē ʼe tonu ke tou tokagaʼi tāfito?
19 Kua vave pe anai te pulihi ʼo te tuʼu ʼo te ʼu faʼahiga meʼa agakovi ʼaenī, pea ʼe puleʼi kātoa anai te Puleʼaga Faka Mesianike ia te malamanei. ʼO aʼu ki te temi ʼaia, ʼe maʼuhiga ʼaupito ke tou tahi taupau he manatu ʼe lelei! ʼE tokoni mai anai ke tou ʼiloʼi te ʼu kalitātē ʼo totatou ʼu tēhina, kae mole tou tokagaʼi tanatou ʼu hala. ʼE tou fiafia anai mo kapau ʼe tou tokagaʼi ia te ʼu faʼahi ʼaē ʼe lelei ʼo tonatou ʼulugaaga. ʼE fakaloto mālohi ai anai tatou pea mo tou mālohi ʼi te faʼahi fakalaumālie, kae mole tou lotovaivai anai ʼuhi ko te ʼu muhumuhu.
20. Kapau ʼe tou manatu lelei, koteā anai te ʼu tapuakina ka tou maʼu?
20 Kapau ʼe tou maʼu he ʼu manatu lelei, pea ʼe toe feala anai ke tou manatuʼi tatatou ʼu tapuakina ʼi tatatou kau ki te kautahi fakakelekele ʼa Sehova. ʼE ko te kautahi pe ʼaia e tahi ʼi te malamanei ʼaē ʼe agatonu ki te Tuʼi ʼAliki ʼo te ʼatulaulau. ʼE malave feafeaʼi kiā koutou te faʼahi ʼaia pea mo te pilivilesio ʼaē ke koutou kau ki te kautahi ʼa te ʼAtua moʼoni pe e tahi ko Sehova? Ke koutou hage ko Tavite, ʼaē neʼe hiva fēnei: “Ia koe ʼaē ʼe fagono ki te faikole, ʼe ʼolo atu anai kiā te koe te hahaʼi fuli pe. Fiafia ia ia ʼaē ʼe ke filifili pea mo fakaōvi mai, ke nofo ʼi tou ʼu malaʼe. ʼE mahino papau ia ʼe mātou fiafia anai ʼi te lelei ʼo tou ʼapi, te potu taputapu ʼo te fale lotu.”—Pesalemo 65:2, 4.
ʼE Kei Koutou Manatuʼi Koa?
• He koʼe ʼe tonu ke tou loto fakafetaʼi kiā nātou ʼaē ʼe nātou takitaki ʼi te kokelekasio?
• ʼE tonu ke malave feafeaʼi kiā tatou mokā fai he lākahala e te ʼu tēhina ʼaē ʼe takitaki?
• Ko te manatu fea ʼaē ʼe tonu ke tou maʼu mokā hoko he ʼu fetogi ʼo ʼuhiga mo te mahino ki te Tohi-Tapu?
• Koteā ʼaē ʼe feala ke tokoni ki he Kilisitiano ke puli tona ʼu lotolotolua?
[Paki ʼo te pasina 9]
ʼE fiafia te kau tagata ʼāfea ʼi te foaki ʼo he tokoni fakalaumālie