ʼE Kotou Tuku Koa Ia Sehova Ke Liliu Ko Hokotou Vahe?

“Ke kotou haga kumi muʼa te puleʼaga pea mo tona faitotonu, pea ʼe toe foaki [atu] anai mo te ʼu meʼa fuli ʼaia kiā koutou.”—MAT. 6:33.

1, 2. (a) Ko ai ʼaē ʼe fakatā ki ai ia “te Iselaele ʼa te ʼAtua” ʼaē ʼe talanoa kiai iā Kalate 6:16? (b) Iā Mateo 19:28 ko ai ʼaē ʼe fakatā ki ai ia “te ʼu telepī e hogofulu-mā-lua ʼo Iselaele”?

KOTEĀ ʼaē ʼe kotou manatu kiai mokā kotou lau ia te higoa ʼo Iselaele ʼi te Tohi-Tapu? ʼE kotou manatu koa ki te foha ʼo Isaake ko Sakopo aē neʼe toe foaki ki ai ia te higoa ʼaē ko Iselaele? Peʼe kotou manatu koa ki tona hōloga, ia te puleʼaga ʼāfea ʼo Iselaele? Kae ʼe feafeaʼi lā ki te Iselaele fakalaumālie? Mokā talanoa ʼi te Tohi-Tapu ki Iselaele ʼi hona ʼaluʼaga fakatā, ʼi te agamāhani ʼe fakaʼuhiga ki “te Iselaele ʼa te ʼAtua,” ia te toko 144 000 ʼaē neʼe fakanofo ʼaki te laumālie māʼoniʼoni, ke natou liliu ko he ʼu hau pea mo he ʼu pelepitelō ʼi te lagi. (Kal. 6:16; Fakh. 7:4; 21:12) Kae tou vakaʼi age muʼa te fakaʼuhiga makehe ʼo te ʼu telepī e 12 ʼo Iselaele ʼaē ʼe tou maʼu iā Mateo 19:28.

² Neʼe ʼui fēnei e Sesu: “ ʼI te toe fakatupu, mokā heka anai te Foha ʼo te tagata ki tona hekaʼaga fakahau fakakolōlia, ko koutou ʼaē neʼe mulimuli iā te au, ʼe kotou toe heheka anai mo koutou ki ni hekaʼaga fakahau e hogofulu-mā-lua ʼo fakamāuʼi te ʼu telepī e hogofulu-mā-lua ʼo Iselaele.” ʼI te vaega ʼaenī, ko “te ʼu telepī e hogofulu-mā-lua ʼo Iselaele” ʼe ko nātou ʼaē kā fakamāuʼi anai e te ʼu tisipulo fakanofo ʼa Sesu pea ʼe natou ʼamanaki ke natou maʼu te maʼuli heʼegata ʼi te Palatiso ʼi te kele. ʼE natou maʼu anai ia te ʼu lelei fakalaumālie mai te gāue fakapelepitelō ʼa te toko 144 000.

3, 4. Koteā te faʼifaʼitaki lelei ʼaē ʼe tuku e te kau fakanofo agatonu?

³ Ohagē ko te kau pelepitelō pea mo te kau Levite ʼo te temi muʼa, ko te kau Kilisitiano fakanofo ʼo te temi nei, ʼe natou fakaʼuhiga tanatou gāue ʼe ko he pilivilēsio. (Fkau. 18:20) ʼE mole ʼamanaki ia te kau fakanofo ʼe foaki age anai kiā nātou honatou kele peʼe ko he koga meʼa ʼi te kele ko tonatou tofiʼa ʼaia. ʼE natou fakaʼamu ke natou liliu ʼo kaugā hau pea mo kaugā pelepitelō ʼi te lagi mo Sesu Kilisito. ʼE natou hoko atu anai ia tanatou tauhi ʼaē kiā Sehova ʼi tonatou tuʼulaga ʼaia, ohagē ko te manatu ʼaē ʼe tou lau iā Fakahā 4:10, 11 ʼo ʼuhiga mo te kau fakanofo ʼi tonatou tuʼulaga ʼaē ʼe ʼi selō.—Esk. 44:28.

⁴ ʼI tanatou kei māʼuʼuli ʼi te kele, ko te kau fakanofo ʼe tonu ke natou fakahā ʼi tonatou maʼuli ko Sehova ʼe ko tonatou vahe. Pea ʼe maʼuhiga tāfito kiā nātou ia tonatou pilivilēsio aē ko te tauhi ki te ʼAtua. ʼE natou tui ki te sākilifisio faitotogi ʼa Kilisito pea ʼe natou mulimuli tuʼumaʼu iā te ia, ʼo natou ‘fakamālohi ai ia tonatou pāui ʼaē ki tonatou maʼuli ʼi selō pea mo tonatou filifili ki te maʼuli ʼaia.’ (2 Pet. 1:10) ʼE kehekehe ia tonatou ʼaluʼaga takitokotahi pea mo tonatou ʼu fealagia. Kae ʼe mole natou fakaʼaogaʼi ia tonatou ʼu tuʼakoi ʼe ko he takuʼaga ke tupu ʼaki ai hanatou mole gāue ke lahi ʼi tanatou tauhi ʼaē ki te ʼAtua. Ko te faʼahi ʼaē ʼe natou fakamuʼamuʼa tāfito, ʼe ko tanatou tauhi ʼaē ki te ʼAtua, ʼo natou fai ia meʼa fuli ʼe natou lavaʼi ʼi tanatou tauhi ʼaia. ʼE natou tuku he faʼifaʼitaki lelei kiā nātou ʼaē ʼe natou maʼu te ʼamanaki ki te maʼuli ʼi te kele.

5. ʼE lava feafeaʼi ki te kau Kilisitiano fuli ke natou tuku ia Sehova ke liliu ko honatou vahe, pea he koʼē ʼe feala ke faigataʼa?

⁵ Tatau aipē peʼe tou maʼu te ʼamanaki ki te maʼuli ʼi selō peʼe ʼi te kele, kae ʼe tonu ke tou ‘fakafisi kiā tātou totonu pea ke tou toʼo totatou pou fakamamahi pea ke tou muli tuʼumaʼu iā Kilisito.’ (Mat. 16:24) Ko te ʼu toko lauʼi miliona hahaʼi ʼaē ʼe natou fakatalitali ke natou māʼuʼuli ʼi he Palatiso ʼi te kele, ʼe natou tauhi ki te ʼAtua pea mo mulimuli kiā Kilisito. ʼE mole feala ke veliveli te ʼu gāue ʼaē ʼe natou fai ki te tauhi ʼaē kiā Sehova mo kapau ʼe natou logoʼi ʼe natou lava foaki lahi. Tokolahi neʼe natou fai te puleʼaki ke natou fakafaigafua tonatou maʼuli pea neʼe natou liliu ko he ʼu pioniē. Ko ʼihi ʼe natou fakatuʼutuʼu ke natou pioniē ʼi ni ʼu māhina ʼi te taʼu fuli. Pea ko ʼihi, logolā ʼe mole feala ke natou pioniē, kae ʼe natou faiga mālohi ʼi te fai fakamafola. ʼE natou faʼifaʼitakiʼi te faʼafai ʼo Malia ʼaē neʼe ina liligi te lolo magoni kiā Sesu. Neʼe ina ʼui fēnei: “ ʼE ko he gāue lelei ia ʼaē neʼe ina fai kiā te au. . . . Neʼe ina fai te meʼa ʼaē ʼe ina lavaʼi.” (Mko. 14:6-8) ʼE lagi faigataʼa hatatou fai ia meʼa fuli ʼaē ʼe tou lavaʼi, heʼe tou māʼuʼuli nei ʼi te mālama ʼe puleʼi e Satana. Kae ʼe tou faiga mālohi pea mo tou tuku tatatou falala kiā Sehova. ʼE tou vakaʼi anai te ʼu ʼaluʼaga e fā ʼe feala ai ke tou fai ia te faʼahi ʼaia.

Tou Kumi Muʼa Te Puleʼaga ʼo Te ʼAtua

6. (a) ʼI te agamāhani, ʼe fakahā feafeaʼi e te hahaʼi ko tonatou vahe ʼe ʼi te maʼuli pē ʼaenī? (b) He koʼē ʼe lelei age ia ke tou maʼu ia te manatu ʼa Tavite ki te faʼahi ʼaia?

⁶ Neʼe akoʼi e Sesu tana kau tisipulo ke natou kumi muʼa te Puleʼaga pea mo te faitotonu ʼa te ʼAtua. ʼE faiga e te hahaʼi ʼo te mālama ke natou fakamuʼamuʼa te ʼu meʼa ʼaē ʼe ʼaoga tāfito kiā nātou, ohagē ko “[he] ʼu tagata ʼo te tuʼu ʼo te ʼu faʼahiga meʼa ʼaenī, ʼaē kua maʼu tonatou vahe ʼi te maʼuli ʼaenī.” (Lau ia Pesalemo 17:1, 13-15.) Tokolahi ʼe natou faiga fakamālotoloto ke natou maʼuli fīmālie, mo natou faʼufaʼu honatou maʼuli fakafāmili pea mo tuku kiā nātou he tōfiga kae ʼe mole natou tokagaʼi tonatou Tupuʼaga. Ko tonatou vahe ʼe ʼi te maʼuli pē ʼaenī. Kae neʼe mole fēia ia Tavite. Neʼe loto ia ke ina maʼu ‘he higoa ʼe lelei’ kiā mata ʼo Sehova. Ki muli age, neʼe ʼui e tona foha ko Salomone ʼe tonu ke tou toe fai fēia mo tātou fuli. (Tnk. 7:1) Ohagē pē ko Asafe, neʼe mahino kiā Tavite neʼe lelei age tana fakakaumeʼa mo Sehova, ʼi hana fakamuʼamuʼa ia te ʼu meʼa ʼaē neʼe loto kiai ʼi tona maʼuli. Neʼe fiafia ia ʼi tana haʼele mo te ʼAtua. ʼI totatou temi, tokolahi te kau Kilisitiano ʼe natou fakamuʼamuʼa tanatou ʼu gāue fakalaumālie ʼi tanatou gāue fakamālama.

7. Koteā te tapuakina neʼe maʼu e te tehina ʼi tana fakamuʼamuʼa te Puleʼaga?

⁷ Tou vakaʼi age muʼa te faʼifaʼitaki ʼo Jean-Claude, ʼi te République Centrafricaine. Ko ia ko te tagata ʼāfea kua ʼohoana pea ko ʼana tamaliki e toko tolu. ʼI te fenua ʼaia ʼe faigataʼa te maʼu ʼo he gāue, pea tokolahi te hahaʼi ʼaē ʼe natou fai anai ia meʼa fuli moʼo taupau ia tanatou gāue. ʼI te tahi ʼaho, neʼe ʼui age e te tagata pule ʼi te gāue kiā Jean-Claude ke kamata tana gāue ʼi te hola ono vaelua afiafi, ʼi te vāhaʼa kātoa. Neʼe fakamahino e Jean-Claude ki te tagata pule ʼaia, ʼe mole gata pē ia tana tokaga ki tona fāmili ʼi te faʼahi fakasino, kae ʼe tonu foki ke toe tokaga kiā nātou ʼi te faʼahi fakalaumālie. Neʼe toe ʼui age e Jean-Claude ki ai, ʼe ʼi ai mo tona maʼua ke tokoni ki te kōkelekāsio. Neʼe koteā te tali ʼa te tagata pule? “Kapau kua ke lava maʼu hau gāue, pea ʼe tonu ke ke galoʼi te ʼu meʼa fuli aē, ʼo kau ai mo tou ʼohoana, mo tau fānau, pea mo tou ʼu fihifihia. ʼE tonu ke ke fakaʼaogaʼi kātoa tou maʼuli ki tau gāue, ʼe mole ʼi ai he tahi age meʼa ʼi tuʼa atu, gata pē ko tau gāue. Filifili lā te meʼa ʼaē ʼe ke loto kiai: peʼe ko tau lotu peʼe ko tau gāue.” Kanapau lā neʼe ko koutou, koteā ʼaē kā kotou fai anai? Neʼe mahino ia kiā Jean-Claude, kapau ʼe fakamavae ʼi tana gāue, ko te ʼAtua ʼe tokaga anai kiā ia. ʼE toe lahi pē anai tana ʼu gāue ʼaē ʼe ina fai ʼi tana tauhi ki te ʼAtua, pea ʼe tokoni anai ia Sehova ke tokaga ki tona fāmili ʼi te faʼahi fakasino. Koia, neʼe kau ia ki te fono ʼo te vāhaʼa. ʼOsi ʼaia, neʼe teuteu leva ia ke ʼalu ki tana gāue, logolā tana mole ʼiloʼi papau peʼe kei gāue. ʼI te moʼi temi pē ʼaia neʼe tagi te telefoni. Neʼe fakamavae ia te pule gāue, kae neʼe kei maʼu aipē e totatou tehina tana gāue.

8, 9. ʼE feafeaʼi hatatou lava faʼifaʼitakiʼi ia te kau pelepitelō pea mo te kau Levite ʼi tanatou tuku ʼaē ia Sehova ke liliu ko honatou vahe?

⁸ Ko ʼihi iā koutou neʼe kua lagi felāveʼi mo he ʼaluʼaga fēia. Neʼe lagi kotou tuʼania peʼe feafeaʼi hakotou tōkakaga ki te maʼuli ʼo tokotou fāmili mo kapau neʼe fakamavae koutou. (1 Tim. 5:8) Peʼe kotou felāveʼi mo he ʼaluʼaga fēia peʼe kailoa, ʼaki te ʼu meʼa ʼaē neʼe hoko kiā koutou ʼe lagi kotou ʼiloʼi papau ʼe mole kotou mamahi anai mo kapau ko te ʼAtua ʼe ko tokotou vahe, pea ʼe lahi takotou fakamaʼuhigaʼi ia te pilivilēsio ʼaē ko te tauhi age kiā te ia. ʼI te ʼui ʼaē e Sesu ki tana ʼu tisipulo ke natou haga kumi muʼa te Puleʼaga, neʼe ina fakapapauʼi age kiā nātou: “[Ko] te ʼu meʼa fuli ʼaia”—ohagē ko te meʼa kai, mo te meʼa ʼinu pea mo te ʼu mutuʼi meʼa—“ ʼe toe foaki atu anai . . . kiā koutou.”—Mat. 6:33.

⁹ Kotou fakakaukauʼi age muʼa ia te kau Levite, ʼaē neʼe mole natou maʼu he kele ko honatou tofiʼa. Mai tona ʼaluʼaga ʼaē neʼe natou fakamuʼamuʼa te tauhi maʼa, koia ʼaē ʼo ʼuhiga mo tonatou maʼuli fakasino, neʼe tonu ke natou falala kiā Sehova, ʼaē neʼe ina ʼui fēnei age kiā nātou: “Ko au ko [tokotou] vahe.” (Fkau. 18:20) Logolā ʼe mole tou gāue ʼi he fale lotu ohagē ko te kau pelepitelō pea mo te kau Levite, kae ʼe feala ke tou faʼifaʼitakiʼi ia nātou, ʼo tou falala ʼe tokaga anai ia Sehova kiā tātou. ʼI te kua ovi mai ʼo te ʼaho fakaʼosi, ʼe tou ʼiloʼi kā ʼāsili kovi age anai te maʼuli kiā tātou ʼaē ʼe tou fakafisi ki “te fakaʼiloga” ʼo te manu fekai. Koia ʼaē ʼe maʼuhiga ʼaupitō anai ke tou falala ʼe tokaga te ʼAtua kiā tātou.—Fakh. 13:17.

Tou Kumi Muʼa Ia Te Faitotonu ʼa Te ʼAtua

10, 11. Neʼe fakahā feafeaʼi e ʼihi tanatou falala kiā Sehova ʼo ʼuhiga mo te gāue? Kotou tuku mai he faʼifaʼitaki.

¹⁰ Neʼe toe uga e Sesu ia tana kau tisipulo ke ‘natou haga kumi muʼa te faitotonu ʼa te ʼAtua.’ (Mat. 6:33) Ko tona fakaʼuhiga ke tou fakamuʼamuʼa ia te ʼu lēkula ʼa Sehova ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi, kae mole tou mulimuli ʼi te ʼu lēkula ʼa te tagata. (Lau ia Isaia 55:8, 9.) Ko ʼihi hahaʼi ʼi muʼa ʼo tanatou ako te moʼoni, neʼe natou tō pata peʼe natou fakatau te ʼu faʼahiga meʼa fuli pē ʼe faʼu ʼaki te pata, pe neʼe natou akoako ʼihi ki te tau pe neʼe natou faʼu pea mo fakatau mahafu tau. Kae ʼi tanatou kua ʼiloʼi te moʼoni, tokolahi neʼe natou fetogi gāue pea mo natou papitema.—Isa. 2:4; 2 Ko. 7:1; Kal. 5:14.

¹¹ ʼE tuku mai e Andrew te faʼifaʼitaki lelei. ʼI te temi ʼaē neʼe ina ako ai pea mo tona ʼohoana ʼo ʼuhiga mo Sehova, neʼe nā fakatotonu ke nā tauhi kiā te ia. Neʼe leleiʼia ʼaupitō e Andrew tana gāue kae neʼe mavae ai. Koteā tona tupuʼaga? Neʼe gāue ʼi te sōsiete ʼe kau ki te tau pea neʼe ina fakatotonu ke ina fakamuʼamuʼa te faitotonu ʼa te ʼAtua. ʼI te temi ʼaē neʼe mole kei ʼi ai hana gāue, neʼe ko ʼana tamaliki e toko lua, neʼe mole hona lī totogi pea neʼe feʼauga pē tana falā moʼo taupau tona fāmili ʼi ni ʼu māhina. Ohagē ko te kau Levite, neʼe hagē ia neʼe mole ʼi ai hona tofiʼa. Neʼe falala ia ki te ʼAtua pea neʼe kumi gāue. ʼI te temi nei, mokā ina manatuʼi te ʼu taʼu ʼaē kua hili, ʼe feala ke fakamoʼoni e ia pea mo tona fāmili, ko te nima ʼo Sehova neʼe mole nounou fau. (Isa. 59:1) ʼAki tanā fakafaigafua tonā maʼuli, neʼe toe maʼu foki e Andrew pea mo tona ʼohoana te pilivilēsio ʼaē ke nā pioniē kātoa. ʼE ina ʼui fēnei: “ ʼI ʼihi temi ko te falā, mo te nofoʼaga, mo te mahaki pea mo tamā kua mātutuʼa, neʼe fakatupu lotohoha kiā māua, kae ko Sehova neʼe nofo ovi tuʼumaʼu pē ʼi ʼomā tafa. . . . ʼE feala ke mā ʼui ʼaki he tui papau, ko te tauhi ʼaē kiā Sehova, ʼe lelei age pea mo fakafiafia age ia ʼi he gāue ʼa he tagata.”a—Tnk. 12:13.

12. Koteā te kalitātē ʼe ʼaoga ke tou fakamuʼamuʼa ia te ʼu lēkula ʼa te ʼAtua? Kotou tuku mai he ʼu faʼifaʼitaki neʼe hoko iō tātou.

¹² Neʼe ʼui fēnei e Sesu ki tana kau tisipulo: “Kapau ʼe kotou maʼu he tui ʼe fualahi ohagē he tegaʼi sinapi, pea ʼe kotou ʼui age anai ki te moʼuga ʼaenī: ‘Hiki ia koe ʼi henī ki he atu,’ pea ʼe hiki anai ia, pea ʼe mole toe faigataʼa anai he meʼa kiā koutou.” (Mat. 17:20) ʼE kotou haga fakamuʼamuʼa anai koa ia te ʼu lēkula ʼa te ʼAtua mo kapau, ʼi takotou fai ʼaia, ʼe kotou tau ai mo he ʼu fihifihia? Kapau ʼe kotou lotolotolua ʼo ʼuhiga mo te fai ʼo te faʼahi ʼaia, kotou palalau mo ʼihi ʼi te kōkelekāsio. Ko tanatou fakamatala te ʼu ʼaluʼaga ʼaē neʼe hoko kiā nātou pea mo te tokoni age ʼa Sehova kiā nātou, ʼe mahino papau ia ʼe mālohi ai anai takotou tui.

Tou Fakafetaʼi Ki Te ʼu Fakatuʼutuʼu Fakalaumālie ʼa Sehova

13. Koteā ʼaē ʼe tou falala kiai, mokā ʼe tou fakamālotoloto ʼi tatatou tauhi ʼaē kiā Sehova?

¹³ Mokā ʼe kotou fakamaʼuhigaʼi tokotou pilivilēsio ʼaē ko te tauhi kiā Sehova, pea ʼe feala ke kotou tui papau ʼe ina tokaga anai ʼo foaki atu te ʼu meʼa ʼaē ʼe ʼaoga kiā koutou, ʼi te faʼahi fakasino pea mo te faʼahi fakalaumālie, ohagē pē ko tana tokaga ʼaē ki te kau Levite. Kotou fakakaukauʼi age muʼa ia te faʼifaʼitaki ʼa Tavite. Logolā tana nofo ʼaē ʼi te ʼana, kae neʼe falala ia ʼe tokaga age te ʼAtua kiā ia. ʼE feala pē foki ke tou falala kiā Sehova tatau aipē peʼe hagē mai ʼe mole ʼe ʼi ai he tahi ʼe tokoni mai kiā tātou. Tou manatuʼi ʼi te temi ʼaē neʼe hū ai ia Asafe “ki te sagatualio māʼoluga ʼo te ʼAtua,” neʼe feala ke mahino ki te faʼahi ʼaē neʼe lotomamahi ai. (Pes. 73:17) ʼE toe fēia pē mo tātou, ʼe tonu ke tou falala kiā Sehova ʼe ina foaki mai tatatou meʼa kai fakalaumālie. Koia, tou loto fakafetaʼi ki te pilivilēsio ʼaē ke tou tauhi ki te ʼAtua ʼo mole lauʼia te ʼu ʼaluʼaga ʼe tau mo tātou. ʼE tou fakahā ai ʼe tou tuku ia Sehova ke liliu ko totatou vahe.

14, 15. Koteā ʼaē ʼe tonu ke tou fai mokā ʼe ʼi ai he fetogi ʼo ʼuhiga mo tatatou faʼahiga mālama ki he ʼu vaega Tohi-Tapu, pea koteā tona tupuʼaga?

¹⁴ ʼE kotou falala koa kiā Sehova mokā tokoni mai kiā tātou ke tou mahino ki “te ʼu meʼa loloto ʼa te ʼAtua” ʼaē ʼe tou maʼu ʼi te Tohi-Tapu? (1 Ko. 2:10-13) ʼE tou maʼu te faʼifaʼitaki lelei mai te ʼu palalau ʼaē neʼe fai e te ʼapositolo ko Petelo, ʼi te temi ʼaē neʼe ʼui fēnei ai e Sesu ki te hahaʼi ʼaē neʼe natou fakalogo kiā te ia: “Kapau ʼe mole kotou kai ki te kakano ʼo te Foha ʼo te tagata, pea mo ʼinu ki tona taʼataʼa, pea ʼe mole iā koutou te maʼuli.” Tokolahi neʼe natou manatu neʼe palalau ia Sesu ki he kakano moʼoni pea mo he toto moʼoni, pea koia ʼaē neʼe natou ʼui fēnei ai: “Ko te taʼi lea ʼaenī ʼe matamatakovi ʼaupitō; ko ai koa ʼaē ʼe faʼa fia logo kiai?” Neʼe “natou toe liliu ai ki te ʼu meʼa ʼaē ʼi muli.” Kae neʼe ʼui fēnei e Petelo: “ ʼAliki, ke matou ʼolo lā kiā ai? ʼE ke maʼu koe te ʼu folafola ʼo te maʼuli heʼegata.”—Soa. 6:53, 60, 66, 68.

¹⁵ Neʼe mole mahino kātoa ia Petelo ki te meʼa ʼaē neʼe ʼui e Sesu ʼo ʼuhiga mo te kai ki Tona kakano pea mo te ʼinu ki Tona taʼataʼa. Kae neʼe falala ia ko Sehova neʼe ina fakaʼaogaʼi ia Sesu moʼo tokoni ki te hahaʼi ke natou mahino ki te moʼoni. Iā ʼaho nei, kā fai he fetogi ʼo ʼuhiga mo tatatou faʼahiga mālama ki he moʼoni Fakatohi-tapu, ʼe kotou faiga koa ke kotou mahino ki te ʼu tupuʼaga Fakatohi-tapu ʼo te fetogi ʼaia? (Taag. 4:18) ʼI te ʼuluaki sēkulō ko te kau Pelea “neʼe natou fia ʼiloʼi ʼaupitō te folafola, ʼo natou vakavakaʼi lelei te ʼu Tohi ʼi te ʼaho fuli pē.” (Gāue 17:11) ʼI takotou mulimuli ki tanatou faʼifaʼitaki, ʼe tuputupu anai tokotou loto fakafetaʼi ki te pilivilēsio ʼaē ke kotou tauhi kiā Sehova, ʼaē ʼe ko tokotou vahe.

Kotou ʼOhoana Pē ʼi Te ʼAliki

16. ʼE lava liliu feafeaʼi ia te ʼAtua ko hotatou vahe ʼo ʼuhiga mo te fakatotonu ʼaē ʼe tou maʼu iā 1 Kolonito 7:39?

¹⁶ Ko te tahi faʼahi ʼaē ʼe ʼaoga ai ki te kau Kilisitiano ke natou manatuʼi te ʼu fakatuʼutuʼu ʼa te ʼAtua, ʼe ko tanatou fakalogo ʼaē ki te fakatotonu Fakatohi-tapu, ʼaē ko te ʼohoana “ ʼi te ʼAliki pē.” (1 Ko. 7:39) Tokolahi ʼe natou filifili ke natou nonofo selipatea heʼe mole natou fia talagataʼa ki te fakatotonu ʼaia. Pea ʼe tokaga lelei ia te ʼAtua kiā nātou ʼaia. Koteā ʼaē neʼe fai e Tavite ʼi te temi ʼaē neʼe ina logoʼi ai ʼe nofo tokotahi pea mo hagē ai neʼe mole ʼi ai hona tokoni? Neʼe ina ʼui fēnei: “[Iā] muʼa [ʼo te ʼAtua] neʼe au haga fakahā toku tuʼania; neʼe au haga fakahāhā toku mamahi ʼi ʼona muʼa, ʼi te temi ʼaē neʼe vaivai ai toku ʼatamai.” (Pes. 142:1-3) Neʼe lagi maʼu te ʼu manatu ʼaia e te polofetā ko Selemia, ʼaē neʼe tauhi agatonu ki te ʼAtua lolotoga ni ʼu taʼu ʼi tana kei ʼeva. ʼE lagi kotou fia ako ia tana faʼifaʼitaki ʼaki takotou vakaʼi ia te kāpite 8 ʼo te tohi Dieu nous parle par Jérémie.

17. Neʼe tekeʼi feafeaʼi e te tuagaʼane ʼe kei ʼeva ia tana logoʼi ʼaē ʼe nofo tokotahi ʼi ʼihi temi?

¹⁷ ʼE ʼui fēnei e te tuagaʼane ʼe nofo ʼi Amelika: “Neʼe heʼeki au fakatotonu ʼi he ʼaho ke au nofo selipatea ai. ʼE au tali ke au ʼohoana mokā hoki au felāveʼi mo ia ʼaē ʼe tonu ke au ʼohoanaʼi. Ko taku faʼē ʼaē ʼe mole ko he Fakamoʼoni, neʼe ina faigaʼi ke ina fakalotoʼi au ke au ʼohoanaʼi he tahi pē ʼe fakatahi mo au. Neʼe au fehuʼi age ki ai peʼe ina loto ke tukugākoviʼi ia ia mokā ʼe mole au fiafia ʼi toku maʼuli fakataumātuʼa. ʼAki te temi, neʼe sio ia neʼe ʼi ai taku gāue lelei, mo au tokaga lelei kiā au, pea neʼe au maʼuli fiafia. Pea neʼe ina tuku ai leva tana fakakinauʼi au.” ʼI ʼihi temi ko te tuagaʼane ʼaia ʼe ina logoʼi tana nofo tokotahi. Kae ʼe ina ʼui fēnei: “ ʼE au faiga ke liliu ia Sehova ko toku falalaʼaga. ʼE mole he temi neʼe kua ina liʼaki au.” Koteā ʼaē neʼe tokoni ki ai ke falala kiā Sehova? “ ʼE tokoni mai te faikole ke au logoʼi ko te ʼAtua ʼe maʼuli moʼoni pea ke au logoʼi ʼe mole au nofo tokotahi ʼi he temi. Ko te Māʼoluga ʼAupitō ʼo te ʼatulaulau ʼe fagono mai, koia ʼe feafeaʼi haku mole lava logoʼi ʼe au maʼuhiga pea mo au fiafia?” ʼI tana falala ʼaē “ ʼe lahi age te fiafia ʼi takita foaki, ʼi takita tali,” ʼe ina ʼui fēnei: “ ʼE au faiga mālohi ke au tokoni ki ʼihi, kae ʼe mole au fakatalitali ke liufaki mai he meʼa. Mokā ʼe au fakakaukau peʼe koteā ʼaē ʼe feala ke au fai moʼo tokoni ki he tahi, ʼe au maʼu ai he loto fiafia lahi.” (Gāue 20:35) ʼEī, ko Sehova ʼe ko tona vahe, pea ʼe fiafia ki tona pilivilēsio ʼaē ko tana tauhi kiā te ia.

18. ʼE kotou lava liliu feafeaʼi ko he vahe ʼo Sehova?

¹⁸ Tatau aipē peʼe koteā te ʼaluʼaga ʼe feala ke hoko kiā koutou, ʼe kotou lava tuku ia te ʼAtua ke liliu ko hokotou vahe. ʼI takotou fai fēia, ʼe kotou kau anai ʼi tana hahaʼi fiafia. (2 Ko. 6:16, 17) ʼE feala ke kotou liliu ko he vahe ʼo Sehova, ohagē ko ʼihi ʼi te temi muʼa. (Lau ia Teutalonome 32:9, 10.) Ohagē pē ko te liliu ʼaē ʼa Iselaele ko he vahe ʼo te ʼAtua ʼi te lotolotoiga ʼo te ʼu puleʼaga, ʼe feala ke ina filifili ke kotou liliu ko hona vahe pea mo tokaga kiā koutou ʼaki te ʼofa.—Pes. 17:8.

[Nota]

ʼE Kotou Tali Feafeaʼi Anai?

ʼE feafeaʼi hakotou lava tuku ia Sehova ke liliu ko hokotou vahe

• ʼaki te fakamuʼamuʼa ʼo te Puleʼaga ʼo te ʼAtua mo tana faitotonu?

• ʼaki te fakahā ʼo te loto fakafetaʼi ki te meʼa kai fakalaumālie?

• ʼaki te mulimuli ki te fakatotonu ʼa te ʼAtua ʼaē ke ʼohoana pē ʼi te ʼAliki?

[Fakamatala ʼo te pāsina 16]

ʼE liliu ia Sehova ko hotatou vahe mokā tou fakamuʼamuʼa tatatou tauhi ʼaē kiā te ia

[Paki ʼo te pāsina 18]

ʼE fakalotomālohi kiā tātou ia te faʼifaʼitaki ʼa Selemia