ʼE Pulihi Anai Te ʼu Tuʼutāmaki ʼAia!

KAPAU ʼe ʼui atu he tahi, “ ʼe kua vave pulihi ʼo talu ai te ʼu tuʼutāmaki fakanātulā,” koteā anai takotou manatu kiai? ʼE lagi kotou ʼui anai, “Ko tau ia moemisi, heʼe ko te ʼaluʼaga ia ʼo te maʼuli.” Peʼe ʼe kotou ʼui anai ‘ ʼe ko tana pē fakahuahua.’

Logolā te hoko tuʼumaʼu ʼo te ʼu tuʼutāmaki fakanātulā, kae ʼe ʼi ai te ʼamanaki moʼoni ʼaē ko te pulihi ʼo te ʼu tuʼutāmaki ʼaia. Pea ʼe mole pulihi anai, ʼuhi ko te ʼu faiga ʼa te tagata. Koteʼuhi ko te tagata ʼe mole feala ia hana fai he puleʼaki, heʼe mole feala ia ke mahino kātoa ki te tupuʼaga ʼo te hoko ʼo te ʼu meʼa fakanātulā ʼaia. ʼI te temi muʼa, neʼe tohi fēnei e te hau ʼo Iselaele ko Salomone, ʼaē neʼe ʼiloa ʼuhi ko tona poto pea mo tana fakasiosio poto: “E mole feala ke iloi e te tagata te u mea fuli e mau i te lalo laa; e mole fealagia e te tagata ke ina mau te u mea ae e fai i te kele, e kinakina ia i te kumi, e mole ina mau; pea kapau e loto te tagata poto ke ina iloi, e mole feala ke ina mau.”—Ekelesiasi 8:17.

Ko ai ʼapē ʼaē kā ina fai anai he puleʼaki ʼo ʼuhiga mo te ʼu tuʼutāmaki fakanātulā, mo kapau ʼe mole lavaʼi e te tagata? ʼE fakahā ʼi te Tohi-Tapu ʼe ko totatou Tupuʼaga pē ʼaē ʼe ina maʼu te fealagia ʼaia. Pea ʼe ko Ia ʼaē neʼe ina fakatuʼu te ʼulu fenua ʼo te kele ohagē lā ko te foli ʼo te vai (cycle de lʼeau). (Ekelesiasi 1:7) Pea ʼo mole tatau mo te tagata, ko te mālohi ʼa te ʼAtua ʼe mole fakatuʼakoi ia. ʼO ʼuhiga mo te faʼahi ʼaia, neʼe ʼui fēnei e Selemia: “Oi Aliki, koeni, kua ke fakatupu te atu lagi mo te kele, i tou mafimafi lahi mo tou nima mafao: E mole pe faigataa he mea kia koe.” (Selemia 32:17) Mai tona ʼaluʼaga ʼaē, ko te ʼAtua ʼaē neʼe ina fakatupu te kele, te vai, te ʼaele pea mo te afi, pea ʼe ina ʼiloʼi lelei te fakafuafua ʼo te ʼu faʼahi ʼaia ke feala ke maʼuli fīmālie mo tokalelei te tagata ʼi te kele.—Pesalemo 37:11; 115:16.

Koia, ʼe fakahoko feafeaʼi anai te ʼAtua ia te fetogi ʼaia? ʼE fakahā ʼi te Tohi-Tapu, ko te lahi ʼo te ʼu meʼa fakamataku ʼaē ʼe lolotoga hoko nei ʼi te kele ʼe ko te “fakailoga” ʼaia ʼo “te faka osi o te malamanei.” Neʼe ʼui fēnei e Sesu: “Moka kotou sisio anai ki te u mea aena kua hoko mai, ke kotou iloi kua ovi mai te puleaga o te Atua.” (Mateo 24:3; Luka 21:31) Ko te Puleʼaga ʼo te ʼAtua, ʼe ko he puleʼaga neʼe fakatuʼu e te ʼAtua ʼi te lagi, ʼaē kā ina fakahoko anai te ʼu fetogi maʼuhiga ki te kele pea mo puleʼi te ʼu mālohi fakanātulā. Neʼe feala pē ke fakahoko e Sehova ʼAtua te gāue ʼaia heʼe ina maʼu te mālohi, kae neʼe ina tuku age ki tona ʼAlo. Neʼe ʼui fēnei e te polofetā ko Taniela ʼo ʼuhiga mo Sesu: “Nee foaki leva kia ia te pule, mo te kololia, mo te hau; pea nee tauhi leva kia ia te u hahai fuli.”—Taniela 7:14.

Neʼe foaki kiā Sesu Kilisito, te ʼAlo ʼo te ʼAtua, te mālohi feʼauga moʼo fakahoko te ʼu fetogi fuli ʼaē ʼe ʼaoga ke liliu te kele ko he koga meʼa taulekaleka. Iā taʼu e lua afe ki muʼa atu, ʼi te temi ʼaē neʼe maʼuli ai ʼi te kele, neʼe fakahā e Sesu ʼi he ʼaluʼaga veliveli tana lava puleʼi te ʼu mālohi fakanātulā. ʼI te tahi lakaga, neʼe nofo Sesu mo tana kau tisipulo ʼi te vaka ʼi te taʼi ʼo Kalilea, pea “nee mafuta leva he ahiohio lahi, pea nee pa te u peau ki te loto vaka, pea kua fonu foki ai ia i te vai.” Neʼe mātataku tana kau tisipulo. ʼI tanatou tuʼania ki tonatou maʼuli, neʼe natou hahaga leva kiā Sesu. Koteā ʼaē neʼe fai e Sesu? Neʼe “ina pupulai leva te matagi, pea nee lea leva ia ia ki te tai: Fakalologo! Manava osi! Pea nee mate leva te matagi, pea nee to leva he totofu lahi ki te tai.” Neʼe punamaʼuli tana kau tisipulo ʼo natou fehuʼi: “Ko ai foki ia ia aeni, ae e fakalogo foki ki ai te matagi mo te tai?”—Maleko 4:37-41.

ʼI temi nei, kua fakanofo ia Sesu ke hau ʼi te puleʼaga ʼo te ʼAtua ʼi te lagi, pea kua foaki age ki ai he mālohi mo he ʼuhiga pule ʼe lahi age. ʼI tona ʼuhiga Hau ʼo te Puleʼaga ʼo te ʼAtua, ʼe ina maʼu te poto pea mo te maʼua ʼaē ke ina takitaki te fakahoko ʼo te ʼu fetogi fuli ʼaē ʼe ʼaoga moʼo foaki ki te hahaʼi he maʼuli fīmālie mo tokalelei ʼi te kele.

Kae, ohagē ko te ʼu faʼahi ʼaē neʼe tou vakaʼi, ʼe lahi te ʼu fihifihia mo te ʼu tuʼutāmaki neʼe tupu mai te tagata, ʼuhi ko tana manatu pē kiā ia totonu pea mo tana mānumānu. Koteā ʼaē kā fai anai e te Puleʼaga ʼo ʼuhiga mo nātou ʼaē ʼe mole fia fetogi? ʼE ʼui ʼi te Tohi-Tapu ʼo ʼuhiga mo te ʼAliki ko Sesu, ʼe haʼu “mai te lagi mo te kau aselo o tona mafimafi, i lotomalie o he ulo o he afi, o tautea natou e mole natou iloi te Atua pea mo natou e mole natou fakalogo ki te Evaselio o totatou Aliki ko Sesu.” ʼEī, ʼe ina “maumaui [anai] natou ae nee natou maumaui te kele.”—2 Tesalonika 1:7, 8; Apokalipisi 11:18.

Ki muli age ko te “Hau o te atu hau” ʼaia ko Sesu Kilisito ʼe ina puleʼi anai te ʼu mālohi fakanātulā fuli ʼo te kele. (Apokalipisi 19:16) ʼE tokaga lelei anai ke mole toe mamahi te hahaʼi ʼo te Puleʼaga ʼuhi ko he tuʼutāmaki fakanātulā. ʼE ina toe fakaʼaogaʼi anai tona mālohi ki te fakaʼaluʼalu lelei ʼo te faʼahiga tuʼu ʼo te ʼaele pea mo te ʼu fasigā taʼu, ke fua lelei ki te tagata. Pea ʼe iku anai leva ki te fakahoko ʼo te fakapapau ʼaenī neʼe fai e Sehova ʼAtua ki tana hahaʼi: “E au fekaui mai anai kia koutou ni ua i onatou temi, pea e foaki anai e te kele ona magisi, pea e foaki anai e te ulu akau fua o te u gaueaga onatou fua.” (Levitiko 26:4) Ko te hahaʼi ʼe mole natou laga anai honatou ʼu fale ʼaki te tuʼania ʼaē naʼa maumauʼi e he tuʼutāmaki fakanātulā: “E natou fakatuu anai ni fale, pea e natou nonofo anai i ai; E natou to anai ni gaueaga vite, pea e natou kai anai onatou fua.”—Esaia 65:21.

Koteā ʼAē ʼe Tonu Ke Kotou Fai?

ʼE mahino papau ia, ohagē pē ko te tokolahi ia tātou, ʼe tou fakaʼamu ki he mālama ʼe mole toe maʼu ai he tuʼutāmaki fakanātulā. Kae koteā ʼaē ʼe tonu ke kotou fai ke kotou māʼuʼuli ʼi te mālama ʼaia? Mai tona ʼaluʼaga ʼaē ʼe mole māʼuʼuli anai ʼi te mālama foʼou, ʼaē ʼe mole maʼu anai he tuʼutāmaki fakanātulā, ia nātou ʼaē “e mole natou iloi te Atua” mo nātou ʼaē “e mole natou fakalogo ki te Evaselio,” ʼe mahino ia ʼe tonu nei ke tou ako ke tou ʼiloʼi ia te ʼAtua pea mo lagolago ki tana fakatuʼutuʼu ʼaē ke ina takitaki te kele. E fakamaʼua mai e te ʼAtua ke tou ʼiloʼi ia ia pea mo fakalogo ki te logo lelei ʼo te Puleʼaga ʼaē neʼe ina fakatuʼu mo tona ʼAlo.

Ko te puleʼaki lelei ke tou ako te fakahoko ʼo te ʼu faʼahi ʼaia ʼe ko te ako fakalelei ʼo te Tohi-Tapu. ʼE maʼu ai te ʼu fakamaʼua tāfito ʼaē ʼe ina fakafealagia anai ke kotou māʼuʼuli fīmālie ʼi te kele lolotoga te takitaki ʼo te Puleʼaga. He koʼē ʼe mole kotou fakaʼui ki he Fakamoʼoni ʼa Sehova ke tokoni atu ke kotou mahino ki te ʼu meʼa ʼaē ʼe akoʼi mai ʼi te Tohi-Tapu? ʼE natou fiafia anai ʼi te tokoni atu kiā koutou. Ko te meʼa ʼaenī ʼe moʼoni: Kapau ʼe kotou faiga ke kotou ʼiloʼi te ʼAtua pea mo talagafua ki te logo lelei ʼo te Puleʼaga, pea ʼe hoko moʼoni anai kiā koutou ia te ʼu palalau ʼaenī ʼe tuʼu iā Taaga Lea 1:33: “Kae ko ae e fakalogo kia au e malolo anai i te tokalelei, e mauli anai ia i te fimalie pea e mole ina toe tuania anai he mea kovi.”