Ko Te ʼAtua Koa ʼAē ʼe Ina Tauteaʼi Tātou?

ʼI Malesio 2011, ʼi te hili pē ʼo te hoko ʼo te mafuike mālohi ʼaupitō ʼo tupu ai te hake ʼo te foʼi peau fakamataku, neʼe tala fēnei e he takitaki politike Saponia: “ ʼE au fakalelei atu ki te hahaʼi ʼaē neʼe tuʼutāmaki, kae ʼi taku manatu, ʼe ko he tembatsu (peʼe ko he tautea fakaʼatua).”

ʼI Sānualio 2010, te temi ʼaē neʼe mamate ai te toko 220 000 ʼi te mafuike ʼaē neʼe hoko ʼi Haïti, neʼe ʼui e te tagata fai akonaki lotu ʼiloa ʼi te televisio neʼe hoko te tuʼutāmaki ʼaia he neʼe natou “fai te fuakava mo te tēvolo” pea neʼe ʼaoga ke natou toe “tafoki mai ki te ʼatua.”

ʼO ʼuhiga mo te mamate ʼo te toko 79 hahaʼi ʼi te feholaki fakavilivili ki tuʼa ʼo te hahaʼi mai te fale fai gaoʼi lahi ʼo Manille, ʼi Filipine, neʼe ʼui fēnei e te pātele Katolika: “Neʼe finegalo e te ʼAtua ke toe fakamaʼuli tamatou leʼo ʼo loto ʼaē neʼe kua mate noa.” Neʼe tala ʼi te sulunale, ko te “ ʼuafulu-mā-tahi ki te teau ʼo te hahaʼi ʼe natou manatu ʼe fakahā te ʼAtua tana hauhau ʼaki te holo ʼo te ʼu mata kele, te ʼu ʼāhiohio mo ʼihi atu tuʼutāmaki” ʼaē ʼe hoko tuʼumaʼu ʼi te fenua.

KO TE ʼui ʼaē ʼe fakaʼaogaʼi e te ʼAtua te ʼu tuʼutāmaki moʼo tauteaʼi te hahaʼi agakovi, ʼe mole ko he manatu foʼou ia. ʼI te taʼu 1755, ʼi te mamate ʼa te toko 60 000 hahaʼi ʼi te mafuike neʼe tupu ai te vela lahi mo te hake ʼo te foʼi peau fakamataku ʼi Lisbonne, ʼi Potukalia, neʼe fai e te tagata fai filosofia ʼiloa ko Voltaire te fehuʼi ʼaenī: “Ko tona fakaʼuhiga koa, neʼe lahi age te ʼu aga kovi ʼi te kolo ʼo Lisbonne ʼaē neʼe maumauʼi ʼi te kolo ʼo Palesi ʼaē ʼe lahi ai te ʼu fakafiafia heʼeʼaoga?” ʼI tona fakahagatonu, ko te toko miliona ʼe natou feʼekeʼaki peʼe tauteaʼi e te ʼAtua ia te hahaʼi ʼaki he ʼu tuʼutāmaki fakanātulā. ʼE lahi te ʼu fenua ʼe natou ʼui ai, ʼo ʼuhiga mo te ʼu tuʼutāmaki ʼaia, ʼe ko te ʼu gāue ʼa te ʼAtua.

Kapau ʼe tou fakatokagaʼi te ʼu ʼaluʼaga ʼaia, pea ʼe tou fai anai te ʼu fehuʼi ʼaenī: Neʼe fakaʼaogaʼi moʼoni koa e te ʼAtua te ʼu tuʼutāmaki fakanātulā moʼo tauteaʼi te hahaʼi? Ko te ʼu tuʼutāmaki fakanātulā ʼaē neʼe mole faʼa fualoa atu tona hoko, ʼe ko he tautea koa mai te ʼAtua?

Ko ʼihi ʼe natou tukugākoviʼi te ʼAtua ʼuhi ko te ʼu fakamatala ʼaē ʼe tuʼu ʼi te Tohi-Tapu, ʼaē ʼe talanoa ki te ʼu tautea neʼe fakahoko e te ʼAtua ʼaki te ʼu mālohi fakanātulā. (Senesi 7:17-22; 18:20; 19:24, 25; Numelo 16:31-35) Kae, kā tou vakaʼi te ʼu fakamatala Fakatohi-tapu ʼaia, ʼe tou tāʼofi puani maʼuhiga e tolu. ʼUluaki, ʼe fai tuʼumaʼu e te ʼAtua he ʼu fakatokaga ʼi muʼa ʼo tana fakahoko he tautea. Lua, ko te tautea ʼa te ʼAtua ʼe mole hagē ko te ʼu tuʼutāmaki fakanātulā ʼo te temi nei ʼaē ʼe mamate fakatahi ai te kau agalelei mo te kau agakovi. Kae ʼe ina tauteaʼi pē ia nātou ʼaē ʼe natou haga fai te ʼu aga kovi peʼe ko nātou ʼaē ʼe mole fakalogo ki te ʼu fakatokaga. Tolu, ʼe fai puleʼaki te ʼAtua ke haofaki te kau agalelei.—Senesi 7:1, 23; 19:15-17; Numelo 16:23-27.

Koia, ʼe mahino kiā tātou ko te ʼu tuʼutāmaki fakanātulā ʼaē ʼe mamate ai te toko lauʼi miliona tupu hahaʼi iā ʼaho nei, ʼe mole ko te finegalo ʼaia ʼo te ʼAtua. ʼE pulihi anai koa ʼi he temi te ʼu tuʼutāmaki fakanātulā? ʼE feafeaʼi hatatou hao mai ai? ʼE tali anai kiai te ʼu ʼalatike ʼaē kā hoa mai.