Te ʼu Tali Ki Te ʼu Fehuʼi Fakatohi-tapu
ʼE fakatuʼuake anai koa te kau mate?
ʼE feala ki te tupuʼaga ke ina toe foaki te maʼuli
Ko Sehova ʼAtua ʼe ko te Matapuna ʼo te maʼuli. (Pesalemo 36:10) ʼE kotou manatu koa ʼe mole feala ki te ʼAtua ke ina fakatuʼuake te kau mate? ʼE fakapapauʼi mai ʼi te Tohi-Tapu ʼe ko te faʼahi ʼaia ka ina fakahoko anai ʼi te ka haʼu. (Lau ia Gaue 24:15) Kaʼe, he koʼe ʼe ina fakahoko te fakatuʼuake?
ʼI te kamata, neʼe fakatuʼutuʼu e totatou Tupuʼaga ke maʼuli ʼo heʼe gata te tagata ʼi te kele. (Senesi 1:31; 2:15-17) Pea ko te faʼahi ʼaia ʼe kei ina loto ke maʼu e te tagata. ʼE lotomamahi ia Sehova ʼi tana sio ki te ʼu aluʼaga ʼae ʼe tou felaveʼi mo ia ʼi totatou maʼuli ia ʼaho nei. Ohage la, ko te lahi ʼo te ʼu faigataʼaia pea mo te nounou ʼo totatou maʼuli.—Lau ia Sopo 14:1, 14, 15.
ʼE maʼuʼuli anai ʼifea ia natou ʼae ka fakatuʼuake?
Neʼe fakatupu koa e te ʼAtua ia te tagata ke maʼuli ʼi te lagi? Kailoa. Neʼe fakatupu e te ʼAtua ia te kau ʼaselo ke maʼuʼuli ʼi te lagi. Kaʼe, neʼe ina fakatupu te tagata ke maʼuli ʼi te kele. (Senesi 1:28; Sopo 38:4, 7) Tou vakaʼi age muʼa te ʼu fakatuʼuake neʼe fakahoko e Sesu. Neʼe ina fakatuʼuake te hahaʼi ʼi te kele. ʼO toe feia pe, ko natou ʼae ka fakatuʼuake ʼi te ka haʼu ʼe fakatuʼuake anai ʼi te kele.—Lau ia Soane 5:28, 29; 11:44.
Kaʼe, neʼe filifili e te ʼAtua ia he tokosiʼi ke natou olo ʼo maʼuʼuli ʼi te lagi. ʼE natou kofuʼi anai he ʼu sino fakalaumalie. (Luka 12:32; 1 Kolinito 15:49, 50) Ko natou ʼaia, ʼe natou kauga hau fakatahi anai mo Kilisito moʼo puleʼi te kele.—Lau ia Apokalipisi 5:9, 10.