Ko Te Polokalama Foʼou ʼo Te Fakatahi Makehe ʼAho Tahi
1 Ko te tohi Le plus grand homme de tous les temps neʼe ina hikihiki tatatou leleiʼia ia Sesu Kilisito. Koia, ko te fakatahi makehe ʼaho tahi ʼaē ʼe kamata ʼi Sepetepeli ʼe talanoa anai ki te kupu tafito ʼaē “Tou muliʼi fakalelei totatou faʼifaʼitaki lahi,” ʼe tokoni anai kia tatou ke ʼāsili age tatatou mahino ki te ʼuhiga ʼaē ʼo te mulimuli ia te ia.
2 Mole toe lau te taʼu peʼe ko te ʼu taʼu ʼaē kua tou nofo ai ʼi te moʼoni, ko tatou fuli ʼaē ʼe kau ki te fakatahi ʼe fakaloto mālohiʼi anai ke ʼāsili age tatatou faiga ke tou tatau mo Kilisito. Ko te koga ʼo te polokalama ʼe fakatuʼutuʼu tāfito ki te kau tūpulaga. ʼE tokoni anai kia nātou moʼo tauʼi ʼo te ʼu faigataʼaʼia ʼi te fale ako, ʼi te ʼu fakafiafia, pea mo te ʼu koloā fakamālama. ʼE ʼi ai anai te ʼu akonaki, te ʼu fakamatala ʼo te ʼu meʼa neʼe hoko, pea mo te ʼu faʼifaʼitaki ʼe fakahāhā ai peʼe feafeaʼi tatatou lolomi te mālohi ʼaē ʼo te mālama kia tatou pea ke tou mulimuli ki te faʼifaʼitaki ʼa Kilisito. — 1 Pe. 2:21.
3 ʼE maʼu anai e te hahaʼi foʼofoʼou ʼaē neʼe nātou foaki tonatou maʼuli, ia te fealagia ʼaē ke nātou fakahā ʼi te kaugamālie ʼaki hanatou papitema ke nātou liliu ko he ʼu tisipulo ʼa Kilisito. ʼE fai anai te akonaki fakaloto mālohi ia muʼa ʼo te papitema. Ko nātou fuli ʼaē ʼe fia papitema ʼi te fakatahi makehe ʼaho tahi ʼe nātou ʼolo fakatomuʼa anai ʼo fakahā ki te tagata taupau gāue ke ina fakatuʼutuʼu mo te ʼu tagata ʼāfea ke nātou vakaʼi te ʼu fehuʼi ʼe ʼaoga ki te papitema.
4 Ko te tagata fai akonaki ʼe ina fai anai te akonaki tāfito, ko tona kupu ʼaē “Tou muliʼi totatou faʼifaʼitaki lahi — Koteā ʼapē tona ikuʼaga?” Tou tokaga ʼo fakaafe fuli mai te hahaʼi ʼaē neʼe fia logo ki te polokalama fakaloto mālohi ʼaia pea mo fakamālohiʼi ʼo tanatou tui. ʼE mole feala ke ʼi ai he tahi age meʼa lahi peʼe ko he tahi ala ʼe fua manuʼia age ʼi te muliʼi ʼaē ʼo totatou Faʼifaʼitaki Lahi, ko Sesu Kilisito. — Mat. 19:27-29.