Te Polokalama Foʼou ʼo Te Fakatahi Makehe ʼAē ʼe ʼAho Tahi
1 He koʼe ʼe tonu ke tou tala fakamālohi te logo lelei? Koteā te ʼu meʼa ʼe tonu ke tou fai ke tou liliu ai ko he tagata fai faka mafola ʼo te logo lelei? ʼE lava feafeaʼi ki te hahaʼi umiuminoa peʼe kia nātou ʼaē ʼe matataku hanatou fai he fakatuʼutuʼu ke nātou kau ki te fakahā ʼo te logo lelei ki niʼihi? Ko te ʼu fehuʼi ʼaia pea mo ʼihi age fehuʼi ʼe fakatupu fakakaukau ʼe tou maʼu anai tona ʼu tali ʼi te polokalama ʼo te fakatahi ʼaē ʼe ʼaho tahi ʼe kamata anai ʼi Sepetepeli, ko tona kupu tāfito “Tou Faʼafai ʼi Totatou ʼUhiga Minisi ʼo Te Logo Lelei.”—Vakaʼi ia 2 Kolonito 3:5.
2 Mai tona ʼaluʼaga ʼaē ko tatou ko te hahaʼi ʼa Sehova, ʼe tonu ke tou tokakaga ki tatatou aga. ʼE fai anai he ʼu fakamatala fakaloto fiafia e he ʼu tūpulaga, ʼo nātou fakahā ai pe neʼe feafeaʼi tanatou tekeʼi te fakahala ʼo tonatou ʼu kaugā ako. ʼE foaki anai ki te ʼu mātuʼa te tokoni fakaloto mālohi fonu ʼi te ʼofa ke feala ai hanatou akoʼi tanatou fānau ke nātou liliu ko he ʼu minisi ʼa te ʼAtua. ʼE tou maʼu fuli anai he ʼu tokoni ke tou mahino ai ki te maʼuhiga ʼo te fai faka mafola pea mo te ʼu tapuakina ʼe tou maʼu anai ʼo feiā aipe kia nātou ʼaē ʼe fagono mai.—1 Tim. 4:16.
3 ʼE mahino ia ko te papitema ʼe ko te meʼa maʼuhiga ʼo te ʼaho ʼaia. Ia muʼa ʼo te fai ʼo te papitema, ʼe fai anai he akonaki faka Tohi-Tapu, tāfito kia nātou ʼaē ka nātou foaki anai tonatou maʼuli ki te ʼAtua. ʼE mahino ia, ko nātou fuli ʼaē ʼi te fakatahi ʼe nātou tokakaga fakalelei anai ki te akonaki ʼaia ʼaē ʼe fakamatalatala ai te ʼuhiga ʼo te papitema. Ko ʼaē ʼe fia papitema ʼi te fakatahi makehe ʼaē e ʼaho tahi ʼe tonu anai ke ʼalu ʼo faka felogoi fakatomuʼa mo te tagata taupau pelesita ke feala ai hana fai he ʼu fakatuʼutuʼu ke ʼolo he ʼu tagata ʼāfea ʼo vakaʼi te ʼu fehuʼi mo ia ʼaē ʼe fia papitema.
4 Ko te tahi meʼa ʼe fakaʼiloga ʼaki ai te ʼaho ʼaia ko te akonaki tāfito ʼaē ka fai anai e te tagata ʼāfea ʼaē ʼe ina ʼaʼahi te fakatahi. Ko tona kupu tāfito “Tou Faʼafai Pea Ke Tou Maʼu Te ʼu Meʼa Fuli ʼe ʼAoga ʼi Totatou ʼUhiga Minisi ʼa Te ʼAtua.” Ko te ʼu fakatuʼutuʼu e fā ʼe fakahā anai moʼo tokoni kia tatou ke tou faiva ʼi totatou ʼuhiga minisi, pea ʼe fai anai ʼi te akonaki ʼaia te ʼu fakamatala ʼe ʼaoga.
5 Tou fakatuʼutuʼu ʼi te temi nei ke feala hatatou kau ki te polokalama katoa. Tou tokakaga ʼo fakaafe mai te hahaʼi ʼaē neʼe fia logo ki te moʼoni pea mo nātou ʼaē ʼe ako Tohi-Tapu, ke feala ai foki hanatou maʼu he fua lelei ʼi te ako faka teokalatike ʼo te ʼaho ʼaia. ʼI te faʼahi ʼaia ʼe feala ai hatatou ʼiloʼi papau ʼe tou “faʼafai fakalelei” ʼi totatou ʼuhiga ʼaē ko te kau minisi ʼo te logo lelei.