Ke Tou Kalagaʼi Te ʼUluaki Fakatupu ʼa Sehova!
1 ʼI te ʼAhotapu, ʼaho 9 ʼo Nisani ʼo te taʼu 33 ʼo totatou temi, ko he hahaʼi tokolahi neʼe ʼi ai tonatou ʼu palema ʼi ʼonatou ʼu nima neʼe nātou kalagaʼi te ʼAlo ʼo Sehova ko Sesu Kilisito, ʼaē neʼe ina ʼuluaki fakatupu, “ia Ia ʼaē ʼe haʼu, te Hau, ʼi te huafa ʼo Sehova!” (Luka 19:38; Hep. 1:6) ʼI te Mōnite ʼaho 10 pea mo te Feliatolu ʼaho 11 ʼo Nisani neʼe maʼumaʼua ʼaupito ia Sesu ʼi tona minisitelio, ʼo ina fai te ʼu meʼa ʼaia ʼi te ʼu ʼaho fakaʼosi ʼo tona maʼuli ʼi te kele.
2 Ia ʼaho nei, ʼe ʼi ai te toe hahaʼi tokolahi age ʼe ʼi ai te ʼu palema ʼi ʼonatou ʼu nima ʼo nātou kalaga leʼolahi: “Ko te fakamaʼuli, ʼe tou maʼu mai totatou ʼAtua, ʼaē ʼe ʼafio ʼi te hekaʼaga hau, pea mo te Akeno.” (Fkhā. 7:9, 10) ʼI te ʼaho 26 ʼo Malesio, ʼe tou fakatahitahi anai ʼo fakamanatu te mate ʼo Kilisito. ʼI te fakaōvi mai ʼo te ʼaho ʼaia, ʼe feala koa hatatou faiga mālohi ʼi te minisitelio ke feala ai hatatou kalaga fakavikiviki ʼi te kele katoa?
3 Ke Tuputupu Tatatou Gāue Faka Mafola: Tokolahi te kau faka mafola kua nātou tohi ke nātou pionie vaeluaʼi temi ʼi Malesio. ʼE koutou fia kau koa kia nātou ʼaia? Kapau ko ia ʼaia, ke koutou foaki fakatomuʼa takotou pepa neʼe koutou tohi ki te gāue ʼaia. ʼE fiafia anai he tahi ʼi te ʼu tagata ʼāfea ʼo tali ki te ʼu fehuʼi ʼe koutou fai ʼo ʼuhiga mo te gāue.
4 Tatau aipe peʼe feala ke koutou pionie vaeluaʼi temi peʼe kailoa, ʼe koutou loto anai ke lahi takotou kau ki te minisitelio ʼi Malesio. ʼE feala ke fakatuʼutuʼu e te kokelekasio he ʼu fono fai faka mafola ʼi te ʼaho fuli lolotoga te māhina ʼaia. ʼE tonu anai ke feʼauga te telituale ki te faʼahi ʼaia.
5 Ko te ʼu kokelekasio fuli ʼe tonu ke nātou fai he fakatuʼutuʼu ʼo ʼuhiga mo he fono makehe ki te gāue faka mafola ʼi te Moeaki ʼaho 26 ʼo Malesio. Logope la te lahi ʼo te ʼu faʼahi ke teuteuʼi ki te Memoliale, ʼe kole kia nātou ʼaē ʼe faigamālie ke nātou kau ki te minisitelio ʼi te Moeaki uhu. ʼO mole gata pe ʼi te fai faka mafola ʼi te ʼu ʼapi, ʼe tonu ke koutou tokakaga kia nātou ʼaē neʼe koutou fakaafe ki te Memoliale ke maʼu hanatou motokā ke nātou ʼōmai ai pea ke mahino lelei kia nātou te hola pea mo te faʼahi ʼaē ʼe fai ai te fono.
6 Tou Fakaafe Pea Mo Tou Fakaloto Mālohiʼi Niʼihi: Neʼe fakatotonu e Sesu ki tana kau tisipulo: “Koutou haga fai te meʼa ʼaenī moʼo fakamanatu kia te ʼau.” (1 Ko. 11:24) Ohage ko te kau tisipulo fakanofo ʼa Sesu neʼe nātou mulimuli kia te ia ʼo nātou fakalogo ki te fakatotonu ʼaia, ʼe fakaafe te ʼu kaugana fuli ʼa Sehova ke nātou kau ki te fono pea mo te toʼotoʼoga ʼo te Memoliale. Koia, ʼe tonu ke koutou fakaafe ia nātou ʼaē ʼe ako Tohi-Tapu mo koutou, tokotou famili, mo nātou fuli ʼaē neʼe palalau mo koutou ki te Tohi-Tapu, te hahaʼi ʼohoana ʼaē ʼe mole ko he ʼu kau Fakamoʼoni ʼa Sehova, pea mo tokotou ʼu kāuga gāue. Koutou fai he lisi ke ʼaua naʼa galo he tahi.
7 ʼE lahi anai te ʼu faigamālie moʼo fakaloto mālohiʼi ʼo nātou ʼaē neʼe ʼōmai ki te Memoliale. Ke koutou ʼōmai fakatomuʼa ke feala ai hakotou fakamālo kia nātou ʼaē neʼe hoki ʼōmai ki te fono. Kapau ʼe lahi te hahaʼi ʼe ako Tohi-Tapu mo koutou ʼe ʼōmai ki te fono, ʼe feala ke heheka ni hahaʼi fai faka mafola mo niʼihi ia nātou lolotoga te fono. Koutou fakaafe ia nātou ʼaē neʼe hoki ʼōmai ke nātou ʼōmai tuʼumaʼu ki te Fono ki te Hahaʼi fuli. Ko te tagata ʼāfea ʼaē ʼe ina fai te akonaki ki te hahaʼi fuli ʼe teuteu fakalelei anai ke ina fai te akonaki fakaloto mālohi.
8 ʼI te fakaʼosi ʼo te Memoliale, ʼe tou fakatahiʼi ʼotatou ʼu leʼo ʼo tou hiva te katiko 105, “Ke tou kalagaʼi te ʼuluaki fakatupu ʼa te ʼAtua!”, ʼofa pe ke tou fiafia ʼi te māhina neʼe lahi ai tatatou gāue ʼi te gāue faka teokalatike moʼo fakavikiviki ʼo Sehova!