Tou ʼAʼahi Ia Nātou ʼAē Neʼe Nātou Tali Te Nusipepa Pea Mo Te Kaupepa Lahi
1 Neʼe fakaloto mālohiʼi e Sesu tana kau tisipulo ke nātou gāue ʼo fai he ʼu tisipulo. (Mat. 28:19) Ko tona faka ʼuhiga ʼe mole gata ʼaki pe te tufa ʼo te tohi; ʼe tou fia tokoni ki te hahaʼi ke nātou tuputupu ʼi te faʼahi fakalaumālie. Moʼo fai ʼo te faʼahi ʼaia ʼe tonu ke tou toe liliu ʼo foaki he tokoni lahi kia nātou fuli ʼaē neʼe fia logo ki te moʼoni.
2 Kapau neʼe tou fakahā age he alatike ʼi tatatou ʼu nusipepa ʼi tatatou ʼuluaki felogoi, ʼe lelei ke tou fai palalau ki te manatu pe ʼaia mokā tou toe liliu:
◼ “ ʼI taku haʼu talu mai, neʼe ʼau fakatokagaʼi koe ki he alatike ʼo Te Tule Leʼo (peʼe ko te Réveillez-vous!) ko te faʼahi ʼaia neʼe tokoni kia tatou ke tou ʼiloʼi ʼe ʼaoga ke tou fakasiosio ia te Tohi-Tapu. Ko te fakatuʼutuʼu ʼa te ʼAtua ʼo ʼuhiga mo he ʼapogipogi fakatalakitupua maʼa te hahaʼi ʼe ko te fakatuʼutuʼu tāfito ʼo tona Puleʼaga. Ia Mikea 4:3, 4 ʼe fakahā ai tana fakapapau ʼaē ko tona Puleʼaga ʼe ina fakagata anai te ʼu tau fuli.” ʼI te ʼosi lau ʼo te vaega, koutou fakahā age te kaupepa lahi “Voici!,” pea ke koutou fakahā age te paki ʼo te ʼuluaki pasina. Koutou vakaʼi te ʼuluaki palakalafe pea mo te ʼu vaega ʼe tuʼu ʼi ai, ʼo koutou fakatokagaʼi age ia Mikea 4:3, 4 ʼe ko he vaega ʼe kau ki te ʼu vaega ʼaia. Koutou fakatuʼutuʼu he ʼaʼahi moʼo hoko atu ʼo te fai palalau ʼaki te palakalafe 2.
3 Kapau ʼe mole maʼu hona temi ke fai palalau ai mo koutou, e lagi tonu pe ke koutou tohi tona higoa ʼi te lisi ʼo nātou ʼaē ʼe koutou ʼave kiai te ʼu nusipepa:
◼ “ ʼI taku sio ʼaē ki tau fia lau te ʼu nusipepa neʼe ʼau tuku atu ʼi taku haʼu talu mai ai, ʼi taku manatu ʼe ke fiafia anai ʼi te lau ʼo te ʼu alatike fakamuli. ʼE mahino kia ʼau ʼe ke leleiʼia anai te alatike ʼaenī.” Koutou fakahā age he alatike ʼe koutou fakasiosio ʼe ina leleiʼia anai. Koutou ʼui age ki ai ʼe koutou toe ʼōmai mo te ʼu nusipepa fakamuli.
4 Koutou fakahā he apone:
◼ “Koteʼuhi ʼe ʼau fakatokagaʼi ʼe ke leleiʼia Te Tule Leʼo, ʼe ʼau fiafia ʼi te tuku atu ʼo te ʼu nusipepa fakamuli ʼi te temi pe ʼaē ʼe ʼau maʼu ai. Kapau ʼe ke loto kiai, ʼe feala ke ʼau faigaʼi ke fakamomoli tuʼumaʼu atu ʼi te meli ke ke maʼu te ʼu nusipepa fuli. Ko te apone ʼe foi afe ki te ʼu numelo e 24 pea ʼe feala ʼi te temi nei ke ʼau tohi tou higoa pea mo tou tuʼasila ke feala ai ke ke maʼu vave te ʼu nusipepa fakamuli.”
5 Kapau neʼe koutou tuku he kaupepa lahi kae neʼe mole maʼu hokotou faigamālie ke koutou fakahā age ki ai he ako, koutou fai hakotou fakatuʼutuʼu ʼo ʼuhiga mo te faʼahi ʼaia mokā koutou toe liliu.
Ohage la, kapau neʼe koutou tuku te kaupepa lahi “Puleʼaga,” koutou ʼui age ki ai ke ina toʼo tana kaupepa pea koutou ʼui age:
◼ “Koutou fakatokagaʼi te meʼa ʼe tuʼu ʼi henī ʼi te pasina 3 te meʼa ʼaē ʼe fakahā mai ʼo ʼuhiga mo te kupu tāfito ʼo te logo neʼe faka mafola e Sesu ʼi te temi ʼaē neʼe nofo ai ʼi te kele.” ʼOsi ʼaia pea koutou palalau fakanounou ki te talanoa ʼo te pasina 3. Koutou fehuʼi age ki ai pe koteā tana manatu ʼo ʼuhiga mo te meʼa ʼe ʼaoga ke fai ke lahi ai tana mahino. ʼOsi ʼaia pea koutou ʼui age: “ ʼE maʼuhiga tatatou ʼiloʼi pe koʼe ʼe ʼaoga ʼaupito kia tatou te Puleʼaga ʼo te ʼAtua. ʼE ʼau toe fia liliu mai ke ta fai palalau pe koʼe ʼe tonu ke tou haga ki te Puleʼaga ʼo te ʼAtua ʼaē ko totatou hāofakiʼaga pe ʼaia e tahi.”
6 ʼE tou maʼu te ʼu kaupepa lalahi kehekehe. Koutou tokagaʼi te ʼu puani ʼaoga ʼi he kaupepa lahi neʼe koutou fakatuʼutuʼu ke koutou fakaʼaogaʼi. Ko te faʼahi ʼaia ʼe tokoni anai kia koutou ke koutou fakaloto mālohiʼi te hahaʼi fakamalotoloto ke lahi tanatou ako ʼo ʼuhiga mo te ʼu meʼa neʼe fakatotonuʼi e Sesu.—Mat. 28:20.