Koutou Fakaʼaogaʼi Te ʼu Nusipepa Moʼo Fakahā ʼo Te Moʼoni
1 ʼI te mālama ʼaenī ko te logo ʼaē ʼe moʼoni, mo totonu kua lahi tona meʼa noaʼi ʼuhi ko te fakahāhā fakavalevale ʼo te ʼu meʼa ʼo te mālama, te ʼu fakapapau faka politike ʼaē ʼe mole totonu, pea mo te ʼu talanoa hala ʼe fai ʼi te malamanei katoa. Ko Te Tule Leʼo pea mo te Réveillez-vous! ko te gata pe ʼaia ʼo te ʼu nusipepa ʼe nā fakahā ia te moʼoni ʼo te Puleʼaga ʼo te ʼAtua pea mo fakamahino ai te meʼa ʼe tonu ke fai moʼo maʼu ʼo te ʼu tapuakina heʼegata ʼaē ka ina foaki mai anai.
2 Ko te minisi ʼo he fenua neʼe ina leleiʼia te maʼuhiga ʼo te ʼu nusipepa ʼaia e lua, neʼe ina foaki fakalelei tana tokoni ke feala ai te fakagafua ʼo te tufa ʼo te ʼu nusipepa ʼaia. Neʼe ina ʼui: “Kia ʼau ko Te Tule Leʼo ʼe ko te nusipepa lelei ʼaupito; ʼe ʼau fiafia foki ʼi taku lagolago kiai.” Ko totatou pilivilesio ko te tokoni ki niʼihi ʼaki tatatou tufa ia te ʼu nusipepa ʼaia ʼe nātou foaki he mālama ki te hahaʼi moʼo taki ʼo nātou ki te maʼuli. (Soane 17:3) ʼE feafeaʼi anai takotou fakahā ia te ʼu nusipepa maʼuhiga ʼaia ʼi te māhina ko Maio? E lagi lelei ke koutou mulimuli ki te ʼu tokoni ʼaenī ʼe hoa mai.
3 Kapau ʼe koutou fakahā te ʼu ʼuluaki alatike ʼo “Te Tule Leʼo” ʼo te ʼaho 15 ʼo Maio, ʼe feala ke koutou ʼui age:
◼ “ ʼE mātou fai palalau mo te hahaʼi ʼo ʼuhiga mo te tohi ʼaē ʼe lahi tona tufa ʼi te mālama. ʼE koutou ʼiloʼi koa la te tohi ʼaia? [Koutou tuku ke fai mai hana tali.] ʼE mātou fia palalau ki te Tohi-Tapu. ʼE ʼi ai te ʼu tupuʼaga tāfito ʼo te maʼu e te tokolahi ia te Tohi-Tapu. Ko tona tupuʼaga ʼaē ʼe tuʼu ia 2 Timoteo 3:16.” ʼI te ʼosi lau ʼo te vaega, koutou fakahā he ʼu puani ʼaoga ʼi he alatike pea ke koutou tufa ia te nusipepa.
4 Peʼe ʼi te hili ʼo he palalau fakanounou, ʼe feala ke koutou ʼui age fēnei:
◼ “E lagi neʼe koutou fakatokagaʼi ʼi te ʼu taʼu ʼaenī kua hili neʼe lahi te ʼu faigataʼaʼia ʼe tau mo te ʼu tamaliki ʼi te mālama. Koteā te ʼu faigataʼaʼia ʼe tau mo te ʼu tamaliki ʼe koutou tuʼaniaʼi?” Koutou tuku ke fai mai hana tali. Koutou talanoa ki he ʼu faigataʼaʼia tāfito ʼe tau mo te ʼu tamaliki ʼi te mālama ohage ko te meʼa ʼaē ʼe talanoa kiai te ʼu ʼuluaki alatike ʼo te Réveillez-vous! ʼo te ʼaho 8 ʼo Maio, pea ke koutou fakatokagaʼi ia ia ki te puleʼaki ʼaē ʼe foaki mai e te Puleʼaga ʼo te ʼAtua.
5 ʼI te hahaʼi ʼaē neʼe koutou ʼaʼahi, e lagi ʼe koutou nofo mo he lisi ʼonatou ʼaē neʼe nātou fakahā tanatou fia logo ʼi te kamataʼaga, kae ʼe mole hona ikuʼaga. Kapau kua gata tanatou fia logo, ʼe feala ke koutou fakatuʼutuʼu ʼe mole ʼaoga ke koutou liliu ʼo ʼaʼahi ia nātou. Kae e lagi ʼe feala ke koutou tohi ia nātou ʼaia ʼi te lisi ʼo te hahaʼi ʼaē ʼe koutou ʼave nusipepa ki ai. Mokā ʼe koutou fakatokagaʼi he alatike ʼe koutou ʼiloʼi lelei ʼe ʼaoga tāfito ki he tahi, koutou ʼaʼahi ia ia pea koutou fakahā ki ai te nusipepa.
6 Te Fagonogono Faigamālie: Ko te faʼahi ʼaenī ʼe ko te koga lelei moʼo fakatuputupu ʼo te fia lau ʼaē ki te ʼu nusipepa. Ko te fakahāhā ʼo te ʼu takafi ʼo te ʼu nusipepa ʼe feala aipe te kamata ʼo he fai palalau. Ko he tuagaʼane neʼe ina tuku he ʼu nusipepa ʼi tona pilō ke feala he sio ki ai tona ʼu kaumeʼa; ʼo lahi ai te ʼu nusipepa neʼe ina tufa. ʼE feala ke koutou fai te faʼahi ʼaia ʼo koutou ʼave he ʼu nusipepa, pea ke koutou fakatuʼutuʼu ke koutou tufa te ʼu nusipepa ʼi te māhina ʼaenī mokā ʼe koutou ʼolo ki te ʼu koloā, ki te faleako, peʼe koutou talitali ki te kā, peʼe ko takotou felāveʼi ʼaē mo te hahaʼi ʼi te faʼahi fuli.
7 ʼAki te tokoni ʼa Te Tule Leʼo pea mo te Réveillez-vous!, ʼe tou maʼu ai he ʼu tali ki te ʼu fehuʼi maʼuhiga ʼo ʼuhiga mo Sehova pea mo tana tauhi. ʼE tou fia fakaʼaogaʼi te ʼu nusipepa ʼaia ʼi te temi fuli moʼo tokoni ki niʼihi ke nātou ʼiloʼi ia “Sehova, te ʼAtua ʼo te moʼoni.”—Pes. 31:5.