Tou ʼAʼahi Te Hahaʼi ʼAē Neʼe Fia Logo
1 Tokolahi ia tatou neʼe tou maʼu te fua lelei ʼi tatatou tufa te ʼu nusipepa pea mo te ʼu kaupepa lalahi. ʼE maʼuhiga tatatou ʼaʼahi ia nātou ʼaia pea ke tou faigaʼi ke tuputupu tanatou fia logo. Ko te fua lelei ʼo tatatou gāue ʼe fakalogo ki tatatou teuteu ia muʼa ʼo tatatou fai te ʼaʼahi.
2 Ke ʼaua naʼa galo ia koutou e tokolahi te kau tūpulaga ʼe tatau te ʼu meʼa ʼaē ʼe nātou tuʼania mo te hahaʼi lalahi. Ko te ʼu alatike ʼo te Réveillez-vous! ʼo te māhina ko Maio ʼe talanoa ai ki te ʼu faigataʼaʼia ʼi te temi nei, ʼo fakasiosio ai te manatu ʼa te kau tūpulaga. Ko te ʼu alatike ʼaia ʼe nātou foaki mai he ʼu manatu moʼo tokoniʼi ʼo te kau tūpulaga, ʼo feiā ai foki ki tanatou ʼu mātuʼa, ke nātou mahino ki te ʼu manatu maʼuhiga ʼi tonatou maʼuli.
3 Kapau neʼe koutou tuku te “Réveillez-vous!” ʼo te ʼaho 8 ʼo Maio, ʼe feala ke koutou fakatuʼutuʼu ke koutou tuku te nusipepa ʼo te ʼaho 22 ʼo Maio. ʼE feala ke koutou ʼui age:
◼ “Ko te numelo fakamuli ʼaē neʼe ʼau tuku atu neʼe talanoa ki te ʼamanaki ʼa te ʼu fānau. Ko ʼatatou ʼu tūpulaga ʼe nātou tuputupu ʼi he mālama ʼe mole ina foaki ake he ʼamanaki ki te temi ka haʼu. Tokolahi ia nātou ʼe nātou fakahā tanatou fehiʼa ki te mālama ʼaki tanatou talagataʼa. Kae ʼe ʼi ai ʼihi ʼe nātou taupau maʼu tanatou fakapotopoto pea mo he ʼu fakatuʼutuʼu ʼe lelei. Ko te alatike ʼaenī neʼe fakahā ʼi te Réveillez-vous! ʼe ina fakamahino peʼe feafeaʼi te lagolago ʼa te Telepinale ʼo he fenua ki te tonu ʼa he tūpulaga. ʼE ʼau ʼiloʼi papau ʼe koutou leleiʼia anai te meʼa ʼaē ʼe talanoa kiai.”
4 ʼE feala ke koutou fakahā he kaupepa lahi ʼo koutou fakaʼaogaʼi te manatu ʼaenī:
◼ “Neʼe ʼau fiafia ʼi tata kiʼi fai palalau fakamuli ʼo ʼuhiga mo te meʼa ʼaē ka hoko ki te kele ʼi te temi ka haʼu. ʼE feala koa hakotou fakakaukauʼi te meʼa anai ka hoko ki te maʼuli mokā pulihi e te ʼAtua ia te agakovi pea mo te mamahi? [Koutou fakahā age te ʼu paki ʼo te ʼu pasina 26, 27 ʼo te kaupepa ʼE tokaga moʼoni koa te ʼAtua kia tatou?] Koutou fakatokagaʼi ko te ʼu vaega fuli ʼo te Tohi-Tapu ʼaē ʼe tuʼu ʼi te ʼu pasina 22 ki te 28 ʼe nātou fakahāhā mai te ʼu tapuakina ka foaki mai anai e te Puleʼaga ʼo te ʼAtua. [Koutou fili he vaega faka Tohi-Tapu, pea koutou lau age ʼi te kaupepa.] ʼE ʼau fia tuku atu te kaupepa ʼaenī ko tona totogi fakaʼofa ko te foi 50.”
5 Mokā koutou toe liliu, e lagi ʼe koutou ʼiloʼi anai ko ia ʼaē ʼe fai palalau mo koutou ʼe ʼi ai tana ʼu tohi faka lotu pea ʼe ina leleiʼia. ʼE feala ke koutou ʼui age:
◼ “Tatau aipe peʼe kehekehe tatatou ʼu lotu, ʼe tou tau fuli pe mo te ʼu tuʼania ʼaē—ko te fai fakapō, te mahaki, te ʼu meʼa ʼo te malamanei—kaeā koa la? [Koutou fakalogo ki tana tali.] ʼI takotou manatu ʼe ʼi ai koa la he puleʼaki moʼoni ʼo ʼuhiga mo te ʼu faigataʼa ʼaia? [Koutou lau ia 2 Petelo 3:13.] Ko te fakatuʼutuʼu ʼo tatatou nusipepa ʼe tuʼu ʼi te pasina 2 ʼo Te Tule Leʼo. [Koutou lau he manatu e tahi peʼe lua.] Tokolahi te hahaʼi ʼe mole ko he kau Fakamoʼoni ʼa Sehova, ʼe nātou fiafia ʼi tanatou lau tamatou ʼu tohi, ʼuhi ko te logo ʼo ʼuhiga mo te ʼamanaki ʼaē ʼe tuʼu ʼi ai, ʼaē ʼe fakatafito ki te Tohi-Tapu.” Ke ʼaua naʼa koutou lotolotolua ʼo fakahā te apone.
6 ʼE feala ke koutou fakaʼaogaʼi te manatu ʼaenī:
◼ “ ʼI taku haʼu fakamuli, neʼe tā fai palalau ʼo ʼuhiga mo te meʼa ka hoko ki te mālama ʼi te temi ka haʼu. Koteā koa la takotou manatu ʼo ʼuhiga mo te talanoa ʼaenī? [Koutou talanoa ki he ʼu logo foʼou ʼe ʼaoga kia nātou.] Ka logo te hahaʼi ki te ʼu meʼa ʼaia, ʼe nātou feʼekeʼaki pe koteā anai ka hoko ki te mālama ʼaenī, kaeā koa la? ʼE mātou tui ko te ʼu taʼi meʼa ʼaia ʼe hā ʼaki mai ai ʼe tou maʼuʼuli ʼi ‘te ʼu ʼaho fakaʼosi’ ʼaē neʼe fakakikite e te Tohi-Tapu ia 2 Timoteo 3:1-5.” ʼI te ʼosi lau ʼo te ʼu vaega, ʼe feala ke koutou fehuʼi age peʼe ʼi tana fakasiosio ʼe feiā koa la te aga ʼa te hahaʼi ʼi te temi ʼaenī. Koutou hoko atu te fai palalau ʼo koutou fakaʼaogaʼi he manatu e tahi ʼi te ʼu pasina 89 ki te 98 ʼo te tohi Comment raisonner.
7 Kapau ʼe lelei tatatou teuteu pea mo tou fakahā ʼe tou holi moʼoni ke tou tokoni ki te hahaʼi, ʼe feala ke tou ʼamanaki ʼe fakalogo anai te hahaʼi ʼaē ʼe faitotonu.—Soane 10:27, 28.