Tou Tokoni Ki Niʼihi Ke Nātou ʼIloʼi Te Moʼoni
1 Neʼe haʼu ia Sesu ki te kele moʼo fakamoʼoni ʼo ʼuhiga mo te moʼoni. Neʼe ina fai he ako ki tana ʼu tisipulo ke feala ai tanatou faka mafola te moʼoni ki niʼihi. Neʼe ina ʼiloʼi papau ʼe nātou fai fakalelei anai tanatou gāue koia ʼaē neʼe ina higoaʼi ia nātou ko te ʼu ‘tagata fai akonaki.’ (Mat. 13:52) Neʼe ina fakatatau ia nātou takitokotahi ki he tagata poto ʼe ʼi ai hana aulo maʼuhiga ʼe feala hana fakaʼaogaʼi. Ia ʼaho nei, ʼe fakaʼaogaʼi e te ʼu tisipulo ʼa Sesu te kaupepa moʼo fakatuputupu ʼo te fai faka mafola ʼo te Puleʼaga. ʼE lahi te ʼu kokelekasio ʼe nātou maʼu te ʼu kaupepa lalahi kehekehe moʼo tokoni ki niʼihi ke nātou mulimuli kia Sesu. E feafeaʼi koa te fakaʼaogaʼi ʼo te ʼu meʼa gāue lelei ʼaia?
2 Moʼo kamata ʼo he fai palalau ʼe faka fealagia ai te fakahā ʼo te kaupepa lahi ʼaē “Kote puleaga ae ka ina fakatuu anai te Palatiso,” ʼe feala anai hatatou fai te fehuʼi ʼaenī:
◼ “Neʼe kua koutou fehuʼi koa pe koʼe ʼe tokolahi te hahaʼi ʼe nātou lau te kole ʼaē ‘Te Tāmai ʼe ʼi selo?’ [Tou tuku ke fai atu hana tali.] Tokosiʼi ʼe mahino ki te ʼuhiga ʼo te kole ʼaia. Kae ʼe foaki mai e te Tohi-Tapu te ʼu tali ʼe ʼaoga.” Lau ia Mateo 6:9, 10. ʼO mulimuli ki te tali ʼaē ka ina fai mai, ʼe feala hatatou talanoa ki he ʼu manatu ʼaoga ʼo te kaupepa, peʼe ke tou fai he ʼu fakatuʼutuʼu moʼo palalau ki te faʼahi ʼaia ʼi he ʼaʼahi ki ʼamuli.
3 Koʼeni te faʼahiga fakaʼaogaʼi ʼo te kaupepa lahi ʼaē “ ʼE tokaga moʼoni koa te ʼAtua kia tatou? ”:
◼ “Tokolahi ʼe nātou fai te fehuʼi ʼaē ʼe tuʼu ʼi lalo ʼo te kupu tāfito ʼo te kaupepa lahi ʼaenī. [Lau te ʼu fehuʼi ʼaē ʼe tuʼu ʼi lalo ʼo te pasina ʼo te kaupepa, pea koutou tuku he kiʼi temi ke ina fai atu hana tali.] Ko he ʼAtua ʼofa ʼe mole feala ia ke haʼu mai ai te meʼa ʼaē ʼe lelei pea mo te meʼa ʼaē ʼe kovi, koteā koa takotou manatu ʼo ʼuhiga mo tana fakapapau ʼaē ʼe tuʼu ia Isaia 65:21-24?” ʼE tou talanoa anai ki te ʼu manatu ʼo te fahaʼi 10 moʼo fakamahino ʼo te meʼa ka fakahoko anai e te Puleʼaga ʼo te ʼAtua.
4 Kapau ʼe tou fakahā te kaupepa lahi ʼaenī “Te ʼu laumālie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE nātou maʼuʼuli moʼoni koa?,” ʼe tou ʼui age anai:
◼ “ ʼI te manatu ʼa te tokolahi ko te kau mate ʼe nātou ʼolo ki te mālama ʼo te kau laumālie. ʼI takotou manatu, ʼe moʼoni koa la? ʼE maʼuʼuli moʼoni koa te kau mate? [Tou faka fealagia ke ina fakahā mai tana manatu.] ʼE fakahā mai e te Tohi-Tapu te tali ki te ʼu fehuʼi ʼaia. Koutou fakatokagaʼi mai muʼa te manatu ʼe tuʼu ia Senesi 3:19.” ʼOsi ʼaia pea tou fakamahinohino age he ʼu faʼahiga manatu ʼo te ʼu pasina 4 pea mo te 5 ʼo te kaupepa.
5 Ko he kau faka mafola kei tūpulaga ʼe ina fehuʼi age anai, ʼaki tana fakahā ia te kaupepa lahi ʼaē “Fiafia kite mauli heegata ite kele! ”:
◼ “ ʼE koutou fakaʼamu koa ke koutou maʼuli ʼi he kele faka palatiso ohage ko tona tuʼu ʼi te paki ʼaenī? [ʼOsi ʼaia pea koutou fakahā age te takafi ʼo te kaupepa pea mo te pasina 32, pea koutou tuku he kiʼi temi ke fai mai hana tali.] Ko toku famili ʼo feiā pe mo ʼau, ʼe mātou fakaʼamu ke mātou ʼiloʼi te ʼu ʼaluʼaga ʼaia, ʼuhi ko te meʼa ʼaē ʼe ʼui e te Tohi-Tapu ia Soane 17:3.” ʼE feala pe, ʼi te ʼosi lau ʼo te vaega, ke tou fakatuʼutuʼu ke tou tuku age te kaupepa ke ina lau.
6 Kapau ʼe tou fakaʼaogaʼi niʼihi ʼu kaupepa lalahi ʼi te minisitelio ʼi te māhina ʼaenī, ʼe feala ke tou faʼufaʼu ʼatatou ʼu ʼuluaki palalau pea mo te fakahā ʼo ʼatatou ʼu kaupepa ki te ʼu tokoni ʼaenī neʼe hoki tou vakaʼi. Tou manatuʼi ʼo fai fakanounou ʼatatou ʼu palalau pea ke tou fakahā he ʼu manatu ʼe ʼaoga pea mo lelei, ke feala ai hatatou uga te fia logo ʼa ia ʼaē ʼe fai palalau mo tatou.
7 Neʼe fakahā mai e Sehova kia tatou ia te moʼoni. ʼE tonu anai ke tou fakaʼaogaʼi te ʼu faigamālie fuli moʼo fakahā ʼo te moʼoni ʼaki te ʼu kaupepa lalahi pea mo tou fai palalau mo te hahaʼi ʼaē ʼe felāveʼi anai mo tatou. ʼAki te taʼi fai ʼaia, ʼe tou fakahā anai ko tatou ko te ʼu hahaʼi fai akonaki ke feala ai he maʼu e te hahaʼi he fua lelei heʼegata.—Mat. 28:19, 20.