ʼE Nātou Logo Feafeaʼi Anai Kiai, Mo Kapau ʼe Mole Tou ʼOlo ʼo ʼAʼahi Ia Nātou?
1 “ ʼE nātou logo feafeaʼi anai ki ai, mo kapau ʼe mole he tagata fai akonaki?” (Loma 10:14) ʼIo, ʼe feafeaʼi anai tanatou ʼiloʼi te moʼoni mo kapau ʼe mole tou fai he ʼu ʼaʼahi fakapotopoto? Ko te hahaʼi fuli ʼaē neʼe tou palalau ki ai ʼo ʼuhiga mo te Puleʼaga ʼe tāu mo nātou ke tou toe liliu ʼo ʼaʼahi ia nātou. ʼI te māhina ʼaenī, e lagi ʼe feala anai ke toe hoko atu tatatou fai palalau talu mai ai, ʼo fakaʼaogaʼi he ʼu manatu faka Tohi-Tapu ʼe tuʼu ʼi te kaupepa ʼaē neʼe tou tuku ki ai; ko te faʼahi ʼaia ʼe faka fealagia anai he kamata ʼo he ako faka Tohi-Tapu.
2 Kapau neʼe tou tuku te kaupepa lahi ʼaenī “Kote puleaga ae ka ina fakatuu anai te Palatiso,” ʼe lagi lelei anai ke kamata he fai palalau ʼe faka fealagia ai he kamata ʼo he ako faka Tohi-Tapu. ʼE feala anai ke tou fehuʼi age, ʼaki tatatou fakahā age te paki ʼo te pasina 31:
◼ “ ʼE koutou fia maʼuʼuli koa ʼi he mālama ʼe koutou maʼu ai mo tokotou famili he ʼapogipogi tokalelei? [Tou tuku he kiʼi temi ke fai mai ai hana tali, ʼosi ʼaia pea tou talanoa ki te ʼu manatu ʼo te ʼu pasina 29 pea mo te 30.] ʼE ia tatou fuli te fakaʼamu ʼaia, logope la ia te lotolotolua ʼa te tokolahi ki te faʼahi ʼaia. Ki te ʼAtua, ʼaē neʼe ina fakapapau ʼe ina fakahoko moʼoni anai te ʼamanaki ʼaia, ʼe mole faigataʼa ia ki ai.” [Lau ia Mateo 6:9, 10.] Tou fakamahino age ko te Puleʼaga ʼaē ka fakagata ʼaki anai e te ʼAtua te ʼu tau, te pakupaku, te mahaki, te fakapō, kae ʼe ina ʼaumai anai te faifaitahi pea mo te tokalelei. Tou fai palalau ki he ʼu manatu faka Tohi-Tapu ʼaē ʼe tuʼu ʼi te pasina 3 ʼo te kaupepa, ʼosi ʼaia pea tou fakahā age ki ai, ko te ako ʼo te kaupepa ʼe feala ke tokoni ki ai ke ina maʼu he mālama lahi ʼaupito. Tou fai he ʼu fakatuʼutuʼu ke feala ai hatatou toe liliu fakavilivili ʼo hoko atu te fai palalau.
3 Mokā tou toe felāveʼi mo ia ʼaē neʼe tou tuku ki ai te kaupepa lahi ʼaenī “ ʼE tokaga moʼoni koa te ʼAtua kia tatou?,” ʼe lagi ʼaoga anai ke tou ʼui age:
◼ “ ʼI taku ʼaʼahi talu mai, neʼe tā lagaʼi ia te fehuʼi ʼaenī: ʼE ʼi ai koa he ʼAtua ʼe tokaga kia tatou? ʼI takotou manatu ʼe tokaga lelei koa te ʼAtua kia tatou ʼo feala ai hana fakagata ia te mamahi pea mo te agamālohi? [Tou tuku he kiʼi temi ke fai mai hana tali, ʼosi ʼaia pea tou fakamahinohino age te faʼahi 6 ʼo te kaupepa.] Neʼe fakapapau e te ʼAtua ʼe ina fetogi ia te mālama agakovi ʼaenī ʼaki he mālama foʼou ʼe maʼuʼuli ai anai te ʼu tagata agalelei ʼi te tokalelei. [Tou lau ia Pesalemo 37:11.] ʼE feala anai foki hatatou ʼiloʼi te mālama foʼou ʼaia mo kapau ʼe tou tui ki te Tohi-Tapu pea mo tou maʼuliʼi tana ʼu tokoni.” Tou fakamahino age te ʼu fakatuʼutuʼu neʼe fai e te kau Fakamoʼoni moʼo tokoni ki te hahaʼi ke nātou ako ia te Tohi-Tapu.
4 Mokā tou ʼaʼahi he tahi neʼe ina toʼo te kaupepa lahi ʼaē “Te ʼu laumālie ʼo te kau mate,” ʼe feala anai ke tou fakahā age ia te paki ʼaē ʼi te pasina 30:
◼ “E feafeaʼi koa takotou fakakaukauʼi te maʼuli ʼi he mālama haohaoa? [Tou tuku he kiʼi temi ke ina fai mai hana tali.] Ko te meʼa ʼaē ʼe koutou sio ki ai ʼi te paki ʼaenī ʼe mole ko he faʼahi pe ia neʼe fakakaukauʼi; ko te paki ʼaia ʼe fakatafito ki he ʼu fakapapau moʼoni ʼe tuʼu ʼi te Tohi-Tapu. [Tou lau ia Fakahā 21:4.] ʼE ʼau fia fakamahino atu peʼe feafeaʼi anai takotou maʼu pea mo tokotou famili te ʼu tapuakina ʼaia.” Tou hoko atu te fai palalau pea tou ʼui age ki ai ʼe feala he fai ʼo hana ako faka Tohi-Tapu.
5 Mokā tou felāveʼi mo ni hahaʼi fakamalotoloto ʼe nātou kumi ia te moʼoni, ʼe tou fakahā anai he ʼofa moʼoni ʼaki tatatou liliu ʼo tokoni kia nātou ke nātou maʼuliʼi te meʼa ʼaē neʼe nātou logo kiai. ʼE tou fakaʼaogaʼi anai te ʼu moʼoni taputapu ʼaē neʼe foaki mai kia tatou ke fua lelei kia tatou ʼo heʼegata pea ʼo feiā aipe mo nātou ʼaē ʼe fagono mai kia tatou.—1 Tim. 4:16.