Tou Fakahā Tatatou Tokaga Ki Te Hahaʼi ʼAki Tatatou Fai Te ʼu ʼAʼahi
1 Ko te kumi ʼo te hahaʼi ʼaē ʼe fia logo ʼaki te fai faka mafola ʼi te ʼu ʼapi, ʼe hā ʼaki ai ʼe tou loto ke ʼiloʼi e ʼihi te logo ʼo te Puleʼaga. Tou tokakaga ʼo toe liliu ʼo ʼaʼahi te hahaʼi ʼaē neʼe tou tuku kia nātou te ʼu tohi ʼi Sanualio, heʼe ko te faʼahi lelei ʼaia ʼe tou fakahā ʼaki ai ʼe tou tokakaga ki te hahaʼi.
2 E feala hakotou fakanounou takotou fai palalau ʼo fēnei:
◼ “ ʼI tatā felogoi talu mai, neʼe tā palalau ʼo ʼuhiga mo te Puleʼaga ʼo te ʼAtua pea mo te meʼa ka ina fai anai maʼa tatou. Kua vave pe te fakaliliu e te Puleʼaga ʼaia te kele ko he palatiso. Mai tona ʼaluʼaga ʼaē neʼe mole heʼeki tou sisio ki he palatiso, e lagi ʼe mata faigataʼa tatatou fakakaukauʼi te faʼahi ʼaia. Koʼeni te fakatatau ʼo te palatiso. [Koutou fakaʼaogaʼi te paki ʼi te pasina 12 pea mo te 13 ʼo te tohi Mauli O Heegata.] Ko te palatiso la ʼaenī neʼe fakapapau mai e te Tohi-Tapu.” Tou lau ia Pesalemo 72:7. Kapau ʼe fia logo ia ia ʼaē ʼe palalau mo tatou, tou fakahā age te pasina 127, ʼi te ʼu palakalafe 1 pea mo te 2, pea ke tou fakahā age te meʼa ʼe tonu ke tou fai mokā ʼe tou fia maʼuli ʼi te Palatiso ʼaē ka haʼu.
3 Koʼeni te tahi manatu moʼo hoko atu ʼo te fai ʼo te ʼu ʼaʼahi kia nātou ʼaē neʼe tou tuku kiai te tohi:
◼ “Ko tatou fuli ʼe tou fia maʼuli fiafia. ʼI te manatu ʼa te tokolahi ko te fiafia moʼoni ʼe faigataʼa tona maʼu ʼi te mālama ʼaenī. Koteā takotou manatu ʼo ʼuhiga mo te faʼahi ʼaia? [Koutou faka fealagia ke fai atu hana tali.] Neʼe ʼui fēnei ko te fiafia ʼe ʼi tatatou fakakaukau. Kapau ko tatatou fakakaukau ʼe fonu ai te ʼofa ki niʼihi, mo te fakaʼapaʼapa ki te ʼAtua, pea mo te ʼamanaki moʼoni ki te temi ka haʼu, ʼe feala ke tou ʼiloʼi te fiafia moʼoni māʼiape la ʼotatou ʼu faigataʼaʼia.” Tou lau ia Pesalemo 119:1, 2. Tou fakamahino age ko te ako ʼo te Tohi-Tapu ʼe ina akoʼi mai kia tatou te ʼofa ki niʼihi, ke tou fakahā tatatou fakaʼapaʼapa ki te ʼAtua, pea ke tou maʼu he ʼamanaki fakafimālie ki te temi ka haʼu.
4 ʼE feala ke hoko takotou fai palalau ki te tokalelei ʼaki te faʼahiga palalau fakanounou ʼaenī:
◼ “Ko te ʼu takitaki ʼo te mālama ʼaenī ʼe mole feala hanatou fakatuʼu ia te tokalelei pea mo te fīmālie. Ko Sehova ʼAtua tokotahi pe ʼaē ʼe lava ke ina fai te faʼahi ʼaia. ʼE fakahā mai e te Tohi-Tapu neʼe ina fili ia Sesu Kilisito ke ina fakahoko te faʼahi ʼaia. [Koutou palalau ki te ʼu puani ʼo te ʼu palakalafe 3 pea mo te 4 ʼi te pasina 112, pea mo lau ia Isaia 9:6, 7.] ʼE ʼau fia fakahā atu peʼe feafeaʼi te tokoni ʼa te tohi ʼaenī kia koutou.”
5 ʼE feala hakotou ʼaʼahi he tahi neʼe koutou tuku kiai te kaupepa “ ʼE Tokaga Moʼoni Koa Te ʼAtua Kia Tatou?” ʼo koutou fakaʼaogaʼi te manatu ʼaenī:
◼ “ ʼI taku haʼu talu mai, neʼe ʼau tuku atu te kaupepa ohage ko te kaupepa ʼaenī, ʼaē ʼe lagaʼi ai te fehuʼi maʼuhiga: ‘ ʼE tokaga moʼoni koa te ʼAtua kia tatou?’ ʼI te ʼosi ʼo takotou vakaʼi te kaupepa ʼaenī, koteā takotou manatu? [Faka fealagia ke fai atu hana tali.] E lagi neʼe fakaloto mālohiʼi koutou ʼi takotou lau te ʼu vaega faka Tohi-Tapu ʼaē neʼe fakahā mai ai te fakapapau ʼo ʼuhiga mo he mālama foʼou ʼi te palatiso, ʼaē ʼe feala ke tou maʼuʼuli ai ʼi te tokalelei. [Fakahā age te ʼu paki ʼi te ʼu pasina 2 pea mo te 3, pea ke tou talanoa ki te ʼu agaaga matalelei ʼo ʼuhiga mo te mālama foʼou.] ʼE ʼau ʼiloʼi papau ʼe koutou fia maʼuli anai ʼi te mālama ʼaenī ʼo feiā aipe kia nātou ʼaē ʼe koutou ʼofa mamahi ai. Koutou fakatokagaʼi te palakalafe 16 ʼi te pasina 31 ʼaē ʼe ina fakahā mai te faʼahi ʼaenī.” Tou lau te palakalafe, pea ke tou fakahā age ko te kumi ʼo Sehova ko tona faka ʼuhiga, ke lahi age tatatou ako ʼo ʼuhiga mo ia mo tana ʼu fakatuʼutuʼu, ʼaki te ako ʼo tana Folafola, ia te Tohi-Tapu.
6 Neʼe tuku mai e Sehova he faʼifaʼitaki haohaoa ʼi tona ʼuhiga Tagata tauhi ōvi ʼofa ʼaē ʼe tokaga ki tana ʼu ōvi. (Esk. 34:11-14) Ko tatatou faiga fakamalotoloto ke tou muliʼi tana tokaga ʼofa ʼe fiafia anai ia, pea ʼe fakahā ai totatou ʼofa, pea ʼe feala ke maʼu ai e niʼihi he ʼu tapuakina.