Koutou Fakaʼaogaʼi Fakalelei Tokotou Temi
1 ʼE tokagaʼi e Sehova te temi. ʼE ina loto ke tou toe tokagaʼi pe foki te temi. ʼAki tana kautahi ʼe tokoni ia kia tatou ke tou tokagaʼi te temi. Neʼe fakaloto mālohiʼi tuʼumaʼu tatou ke ‘lahi ʼaupito tatatou ʼu gāue ʼi te ʼAliki.’ (1 Ko. 15:58) ʼI te faʼahi ʼaia, ʼe feala ke tou faiva ʼi tatatou gāue kia Sehova.
2 ʼE tatau fuli pe te lahi ʼo totatou temi takitokotahi ʼi te vāhaʼa fuli—ko te ʼu hola e 168. E feafeaʼi tatatou fakaʼaogaʼi totatou temi? ʼE tou fakahā koa ʼe tou ʼiloʼi moʼoni peʼe feafeaʼi te ʼaluʼaga ʼo te temi ʼi te fakatuʼutuʼu ʼa Sehova? ʼE tou maʼumaʼua koa ʼi he ʼu gāue ʼe mole honatou ʼaoga?
3 ʼE maʼuhiga tatatou teuteu fakalelei. Tokolahi ʼe nātou faiga ke nātou taupau maʼu he lisi ʼo te ʼu gāue ʼaē ke nātou fakamuʼamuʼa. ʼE tohi te gāue fuli ʼo fakahoahoa pe ki tona maʼuhiga. E feafeaʼi hatatou ʼiloʼi te gāue ʼaē ke fakamuʼamuʼa? ʼE ʼui mai e te Tohi-Tapu, ʼe tonu anai ki te tagata ke ‘mamata ki te lelei ʼo tana gāue kinakina katoa.’ (Tnk. 3:13) Ko ʼihi gāue ʼe fua lelei age ia ʼi ʼihi. Tou vakaʼi te ʼu fua ʼe tou maʼu anai mai te ʼu gāue ʼaia. ʼE ʼi ai anai koa he ʼu fua lelei ʼe tou maʼu mokā ʼosi he gāue? ʼE koutou “mamata [anai koa] ki te lelei” ʼo takotou gāue kinakina? Kapau ʼe mole ʼi ai hona fua, e lagi ʼe mole ko he gāue ʼe ʼaoga ke fakamuʼamuʼa.
4 ʼI Totatou Minisitelio: ʼE tou leleiʼia mokā ʼe ʼōmai tautonu niʼihi ki te ʼu fono ʼo te gāue fai faka mafola, ke feala ai hanatou fakalogo lelei ki te ʼu fakatotonu, pea mo tou ʼolo fakavilivili ki te telituale. ʼE tou loto anai ke tou maʼumaʼua ʼi te fai faka mafola ʼi te nonofo ʼaē ʼo talitali. Neʼe mahino katoa ia Paulo ki te maʼuhiga ʼo te gāue ʼi te fakatokatoka ʼi te temi ʼaē neʼe ina tohi ai te palalau ʼaenī: “Ke fai fakapotopoto ia meʼa fuli pea ʼaki te loto fakatokatoka.”—1 Ko. 14:40.
5 Mokā tou kau ki te gāue fai faka mafola, ʼe feala ke puli totatou temi maʼuhiga mokā ʼe lahi fau tatatou mānava. Kae, kapau ʼe tuʼu kovi te ʼaho ʼaē ʼe tou fai faka mafola ai, ko he mānava ʼe ina toe fakamālohiʼi tatou pea mo tokoni kia tatou ke toe hoko atu tatatou gāue. Kae, tokolahi ʼe nātou leleiʼia tanatou maʼumaʼua ʼi te fagonogono ki te hahaʼi pea ʼe mole nātou fakaʼaogaʼi te temi ʼaē neʼe nātou fakatuʼutuʼu ki te minisitelio ke loaloaga ai tanatou mānava mo ʼihi ʼu tēhina. ʼE ʼaoga ke tou fakaʼaluʼalu lelei te faʼahi ʼaia.
6 ʼE ʼui fēnei e te Tohi-Tapu: “Tatau aipe mo te motuku . . . ʼe ina ʼiloʼi lelei tona temi tuʼakoi” ʼaē ʼe folau ai, pea ko te foʼi lō ʼe “ina teuteuʼi tana meʼa kai ʼi te temi vela” ke toka ki te temi momoko. (Sel. 8:7; Taag. 6:6-8) ʼE ko te kalavi ʼaia ʼo te fakaʼaogaʼi lelei ʼo totatou temi. ʼE tonu foki ke tou ‘fakamāmāhani mo tatatou polokalama pea ke tou ʼiloʼi totatou ʼu gataʼaga.’ ʼO mole tou aga fefeka anai, kae ʼe tonu ke tou tokagaʼi te temi. ʼE ʼaoga ke tou ʼiloʼi te meʼa ʼaē ka tou fai pea mo te temi ʼaē ʼe tonu ke tou fai ai. ʼE tonu ke tou fai he polokalama fakalelei ʼo fai fakatomuʼa ke feala ai hatatou fai he ʼu tuʼakoi fakapotopoto. Pea ʼe tonu foki ke tou lotolelei ʼo tuku he tahi ʼu gāue, moʼo fakaʼaogaʼi ʼo te temi ʼaia moʼo fai ʼo he tahi meʼa ʼe maʼuhiga age, ohage la ko te teuteuʼi ʼo tatatou ʼu fono, mo te fai faka mafola, pea mo ʼihi ʼu gāue faka teokalatike.
7 ʼE tou loto ke tou hage ko totatou Tāmai ʼaē ʼe ʼi selo, ia Sehova ʼAtua, ʼaē ʼe ina akoʼi mai kia tatou “ko meʼa fuli ʼe ʼi ai tona temi tuʼakoi.” (Tnk. 3:1) ʼAki tatatou fakaʼaogaʼi fakalelei ʼo totatou temi, ʼe feala ke tou ‘fakahoko katoa totatou minisitelio.’—2 Tim. 4:5.