Tou Ako Te Folafola ʼa Te ʼAtua Ki Te Hahaʼi—ʼAki Te ʼu Kaupepa Lalahi
1 Ko te ʼu kaugana katoa ʼaē kua ʼosi foaki tonatou maʼuli kia Sehova ʼe maʼua ke nātou kau ki te gāue ʼaē ko te akoʼi ʼo te Folafola ʼa te ʼAtua ki te hahaʼi. Ko te fai fakamalotoloto ʼo te maʼua ʼaia ʼe mālama anai kia tatou mokā ʼe tou mahino, ko ia ʼaē neʼe foaki ki ai te pule ʼi te lagi pea mo te kele, neʼe ina tuku mai kia tatou te maʼua ʼaē ko te “fai ni ʼu tisipulo ʼi te hahaʼi ʼo te ʼu fenua fuli pe, . . . ʼo ako ia nātou.” (Mat. 28:18-20) Koia, ko te kau ki te faka mafola ʼo te logo lelei ʼe fakamaʼuaʼi ke tou liliu ko te hahaʼi faiako!—2 Tim. 2:2.
2 ʼI te lolotoga ʼo te māhina ko ʼAukusito ʼe feala ke tou fakaʼaogaʼi tatatou faiva faiako ʼi tatatou tufa te ʼu kaupepa. ʼE feala ke tou fakaʼaogaʼi he ʼu manatu faka Tohi-Tapu ʼe ʼaoga pea ke tou teuteuʼi he ʼu puani ʼe tokoni anai kia tatou moʼo kamata ʼo tatatou fai palalau.
3 Mokā ʼe koutou fakahā te kaupepa lahi “ ʼE Tokaga Moʼoni Koa Te ʼAtua Kia Tatou?” ʼe feala hakotou ʼui fēnei:
◼ “Neʼe mātou ʼaʼahi te tokolahi ʼo tou vāhaʼa fale pea neʼe mātou tokagaʼi ʼe nātou tuʼania te mafola fakavilivili ʼo te fai fakapō, pea mo te agamālohi. ʼI tau manatu, he koʼe kua hoko te taʼi faigataʼa ʼaia? [Koutou faka fealagia ke fai atu hana tali.] ʼE ʼaoga tāfito tatatou ʼiloʼi neʼe fakakikite te faʼahi ʼaia e te Tohi-Tapu. [Koutou lau ia 2 Timoteo 3:1-3.] ʼE ke fakatokagaʼi neʼe tonu ke hoko te ʼu meʼa ʼaenī ʼi ‘te ʼu ʼaho fakamuli.’ ʼE hā mai ai ʼe ʼi ai te meʼa ka fakaʼosi. Koteā koa tau manatu?” Koutou faka fealagia ke fai atu hana tali. Koutou fuli te kaupepa lahi ki te pasina 22, ʼo koutou fakahā age te paki, pea koutou talanoa ki he vaega faka Tohi-Tapu e tahi peʼe lua ʼe tuʼu ʼi te pasina ʼaia. Koutou fai he fakatuʼutuʼu ke feala hakotou toe liliu ʼo fakamahino age ki ai pe koʼe ʼe tou faka tui kua vae hoko pe te ʼu tapuakina ʼaia.
4 E lagi ʼe koutou fia fakaʼaogaʼi te palalau ʼaenī mokā koutou tufa te kaupepa lahi “Kote puleaga ae ka ina fakatuu anai te Palatiso”:
◼ “Neʼe kua koutou fakakaukauʼi koa te maʼuli ʼo heʼegata ʼi te kele? [Faka fealagia ke fai atu hana tali]” ʼOsi ʼaia pea koutou fuli age te pasina 3 ʼo te kaupepa pea koutou lau age he koga ʼo te faikole, ʼo fakahā tāfito ʼe hoko anai te finegalo ʼo te ʼAtua ʼi te kele. Ki muli age, koutou lau te toe ʼo te palakalafe 1 ʼo fakahā ai ko te Puleʼaga ʼe ko te puleʼaki ʼaia ʼe fakaʼaogaʼi anai e te ʼAtua moʼo fakatokatoka ʼo te ʼu fihifihia ʼe fakatupu faigataʼa ai te maʼuli ia ʼaho nei. ʼI te temi ʼaia, ʼe feala ke koutou tuku age te kaupepa ki te falā 50. Koutou lagaʼi te fehuʼi ʼaenī moʼo fakatafito ʼo takotou fai palalau mokā koutou toe liliu ʼo ʼaʼahi ia ia: “Koteā anai te meʼa ka fai e te Puleʼaga ʼo te ʼAtua ke feala ai hatatou fiafia?”
5 ʼE feala ke koutou fakahā te kaupepa “Fiafia Kite Mauli Heegata Ite Kele!” ʼo koutou fakahā age te paki ʼi te takafi katoa ʼo te kaupepa pea koutou fehuʼi age:
◼ “ ʼE koutou fia maʼuli anai koa ʼi he mālama ʼe fonu ai ko te hahaʼi fiafia ohage ko te paki ʼaenī? [Koutou faka fealagia ke fai atu hana tali.] ʼE ʼui mai e te Tohi-Tapu ʼe ʼofa te ʼAtua ki te hahaʼi pea ʼe loto ia ke nātou maʼuʼuli fiafia ʼo heʼegata ʼi te kele.” Koutou fuli age te paki 49, pea koutou lau age he vaega faka Tohi-Tapu ʼe tuʼu ʼi ai. ʼOsi ʼaia, pea koutou fakahā age te paki 50, pea koutou fakamahino te meʼa ʼe tonu ke tou fai mokā ʼe tou fia maʼuʼuli ʼi te Palatiso. Koutou ʼui age ʼe koutou toe fia liliu mai ʼo palalau ki te maʼuhiga ʼo te tui kia Sesu Kilisito.
6 ʼE fiafia ia Sehova mokā tou faigaʼi ke ‘ ʼiloga ʼatatou ʼu faiga ki te hahaʼi fuli ʼaki tatatou tokaga fakalelei ki tatatou faiako.’ (1 Tim. 4:15, 16) Ko tatatou ʼu kaupepa ʼe feala ke tokoni moʼoni kia tatou ʼi tatatou ʼu faiga ʼaē ke tou tokoni kia nātou ʼaē ʼe fia logo ki te “logo lelei ʼo te ʼu meʼa ʼe lelei age.”—Is. 52:7.