Ke Fua Lelei Te ʼu ʼAʼahi ʼe Maʼua Ke Tou Faiva ʼi Te Faiako
1 Ko te ʼu ʼaʼahi ʼe ko he koga maʼuhiga pea mo fakafiafia ʼo totatou minisitelio. He koʼe koa ʼe tonu ke tou tokakaga ʼo ʼaʼahi te hahaʼi ʼaē neʼe fia logo ki te moʼoni? Ko te huafa ʼo Sehova ʼe ʼiloa pea mo faka maʼuhigaʼi ʼaki te gāue ʼaē ko te fai ʼo ni ʼu tisipulo, pea ko te hahaʼi ʼaē ʼe manavasiʼi ki te ʼAtua ʼe tokoniʼi nātou ke nātou maʼu te ala ʼo te maʼuli. (2 Ko. 2:17–3:3) ʼI tatatou mahino ʼaē ʼe fakalogo te tāpuhā ʼo te huafa ʼo Sehova pea mo te maʼuli ʼo ʼihi ki te gāue ʼaia, ʼe uga ai anai tatou ke tou teuteu fakalelei ʼi muʼa ʼo tatatou fai te ʼu ʼaʼahi.
2 Ko he tahi ʼe faiako lelei ʼe tokoni anai kia ia ʼaē ʼe ako Tohi-Tapu ke fakatafito tana mahino ki te meʼa ʼaē neʼe nā ʼuluaki talanoa kiai. Ohage pe ko he polofesea ʼe ina fakatuputupu te mālama ʼaē ʼe maʼu e te kau ako ʼi te ʼaho fuli, ʼe toe feiā aipe mo tatou ʼe tonu ke tou taupau te fia logo ʼa te hahaʼi ʼi tatatou ʼuluaki palalau ʼaki he ʼu fakamatala lahi age ʼo ʼalutahi mo te ʼuluaki felogoi. Ko te fai ʼo te faʼahi ʼaia ʼe faigafua ai te hoko atu ʼi te manatu pe ʼaia pea mo fai he palalau ʼe tuputupu māmālie.
3 Mokā ʼe koutou toe liliu ʼi te hili ʼo takotou tuku ia te kaupepa lahi “ ʼE Tokaga Moʼoni Koa Te ʼAtua Kia Tatou?” e lagi ʼe koutou leleiʼia anai te manatu ʼaenī:
◼ “ ʼI taku haʼu talu mai, neʼe tā palalau ki ‘te ʼu ʼaho fakamuli’ ʼaē ʼe tuʼu ʼi te Tohi-Tapu pea mo tona faka ʼuhiga kia tatou. E lagi ʼe koutou punamaʼuli pe feafeaʼi tamatou ʼiloʼi ʼe tou maʼuʼuli nei ʼi te ʼu ʼaho fakamuli ʼaia. (2 Tim. 3:1) Ko te ʼu tisipulo ʼa Sesu neʼe nātou lotohoha ʼi tanatou fia maʼu te tali ki te fehuʼi ʼaia. [Lau ia Mateo 24:3.] ʼI tana tali age kia nātou, neʼe fakahāhā e Sesu te ʼu ʼaluʼaga ʼaē ʼe tou sisio kiai ia ʼaho nei. ʼO kau kiai te mamahi pea mo te agamālohi ʼaē neʼe mole heʼeki hoko ʼi muʼa atu.” Tou fakahā age te agaaga ʼo te fakaʼiloga ʼaē ʼe tuʼu ʼi te ʼu palakalafe 3 pea mo te 4 ʼo te ʼu pasina 19 pea mo 20. Kapau ʼe ina tali fakalelei, tou fakahā age te tahi ʼu agaaga ʼo te fakaʼiloga ʼi te palakalafe 5 ki te 8 ʼi te pasina 20. Tou ʼui age ʼe tou toe fia liliu mai ʼo tali ki te ʼu fehuʼi ʼaē ʼe lagaʼi ʼi te kamataʼaga ʼo te kaupepa.
4 Moʼo taupau te fia logo ʼa he tahi neʼe ina toʼo te kaupepa lahi “Kote puleaga ae ka ina fakatuu anai te Palatiso” ʼe feala ke koutou ʼui age:
◼ “Neʼe ʼau fakaʼamu ke toe hoko atu tatā fai palalau ʼo ʼuhiga mo te Puleʼaga ʼo te ʼAtua ʼaē ka ina fetogi anai te ʼu ʼaluʼaga ʼo te maʼuli ʼi te kele. ʼE ʼau mahalo ʼe tā manatu tahi, ko te fakatuʼutuʼu ʼa te ʼAtua ke tou maʼuʼuli ʼi te kele ʼaenī ʼi he ʼaluʼaga fiafia pea mo tokalelei, ka mole ko te ʼu ʼaluʼaga maveuveu ʼaē ʼe hoko ʼi te temi ʼaenī. ʼI tau manatu ʼe ina fakahoko katoa anai koa tana fakapapau?” Koutou faka fealagia ke fai atu hana tali. Koutou lau ia Isaia 55:11, ʼosi ʼaia pea koutou talanoa ki te ʼu manatu ʼi te ʼu pasina 28 pea mo te 29 ʼo te kaupepa. Koutou fakahā age ko te ako faka Tohi-Tapu ʼe ko he puleʼaki lelei ʼaia ke tou maʼu ai he ʼuhiga moʼoni ʼo totatou maʼuli.
5 Moʼo taupau ʼo te fia logo ʼa he tahi ʼi te tufa ʼo te kaupepa “Fiafia Kite Mauli Heegata Ite Kele!” ʼe feala ke koutou toe fakahā age te kaupepa ʼaia pea ke koutou ʼui age fēnei:
◼ “Neʼe tā palalau ki te mālama matalelei ʼaē ʼe tuʼu ʼi te takafi ʼo te kaupepa ʼaenī. ʼE ʼau haʼu ʼo fakahā atu pe koʼe ʼe maʼuhiga ʼaupito ki te hahaʼi ʼaē ʼe fia maʼuʼuli ʼi te koga meʼa ʼaia ke nātou tui kia Sesu Kilisito.” Koutou fakahā age te paki 41, pea koutou lau ia Isaia 9:6. Koutou talanoa ki te paki 62, pea koutou lau ia Soane 3:16, ʼaē ʼe ina fakahā te maʼuhiga ʼo te talagafua. Koutou fakamahino age ko te kau Fakamoʼoni ʼa Sehova ʼe nātou tokoni ki te hahaʼi ʼo nātou ako kia nātou peʼe feafeaʼi te tui ʼaki te ako ʼo te Tohi-Tapu pea mo nātou faiga ke nātou maʼuliʼi te ʼu tokoni.
6 ʼI te hili ʼo te ʼu ʼaʼahi fuli, koutou fakakaukauʼi te ʼu ʼaʼahi ke feala hakotou fakatuʼutuʼu ke fakatuputupu takotou faiva. Koutou tahi fai te ʼu fehuʼi ʼaenī: ʼE ʼau manatuʼi koa he meʼa ke ʼau talanoa kiai? Neʼe ʼau fakatokagaʼi koa ia ia ki te Tohi-Tapu? Neʼe ʼau mulimuli koa ki te palalau ʼi tamā ʼuluaki felogoi? Neʼe ʼau fakatuʼutuʼu koa ke kamata he ako faka Tohi-Tapu? Ko takotou ʼio ki te ʼu fehuʼi ʼaia ʼe ko he fakamoʼoni ʼaia ʼe koutou fai ia meʼa fuli ke koutou liliu ko ni hahaʼi faiako lelei ʼo te Folafola ʼa te ʼAtua.