Tou Tokoni Ki Niʼihi Ke Nātou Leleiʼia Te Maʼuhiga ʼo Te Tohi-Tapu
1 Neʼe foaki age e Sesu te meʼa ʼaē ʼe ʼaoga ki tana ʼu tisipulo. ʼE fakahā fēnei ia Luka 24:45: “Neʼe ina avahi katoa ai tonatou ʼatamai ke nātou mahino ki te ʼu Tohi.” Neʼe ina ʼiloʼi kapau ʼe nātou fia maʼu te ʼofa ʼo tana Tāmai, neʼe tonu ke nātou ako pea ke nātou mahino ki te Folafola ʼa te ʼAtua, te Tohi-Tapu. (Pes. 1:1, 2) ʼE toe feiā mo te fakatuʼutuʼu ʼo tatatou gāue fai faka mafola. ʼE tou fakatuʼutuʼu ke tou kamata he ʼu ako faka Tohi-Tapu, ke feala ai hatatou ‘ako te hahaʼi ke nātou mulimuli ki te ʼu meʼa ʼaē neʼe fakatotonu mai e Sesu.’ (Mat. 28:20) ʼAki te ʼu manatu ʼaia, ʼe koutou mulimuli anai ki te ʼu tokoni ʼaē ʼe hoa mai mokā ʼe koutou fai te ʼu ʼaʼahi.
2 Kapau neʼe koutou ʼuluaki palalau ki te Akonaki ʼaē ʼi te Moʼuga, ʼe feala ke hoko atu takotou palalau ʼo fēnei:
◼ “ ʼE ʼau fia fakahā atu te meʼa ʼaē ʼe hā ai te maʼuhiga ʼo te ʼu tokoni ʼo te Tohi-Tapu. Tokolahi te hahaʼi ʼe nātou tokagaʼi ʼe faigataʼa te felogoi lelei mo niʼihi. Koteā te meʼa ʼaē ʼe feala ke tou fai ke tuputupu ai he ʼu felogoi ʼe lelei age mo nātou ʼaē ʼi ʼotatou tafaʼaki? [ʼI te ʼosi ʼo tana tali mai, tou fuli age te pasina 8 ʼo te kapite 35 pea tou lau te palakalafe 2 pea mo te pasina 9 ʼi te palakalafe 1 ʼaē ʼe tuʼu ai ia Mat. 5:38-39, 43-45.] Ko te manatu ʼaenī ʼe ko he tahi faʼifaʼitaki ʼo te agapoto ʼaē ʼe tou maʼu ʼi te ʼu tokoni ʼo te Tohi-Tapu. ʼI taku toe liliu mai, ʼe ʼau fia fakahā atu anai te tokoni ʼe foaki mai e te Tohi-Tapu ʼo ʼuhiga mo te faikole.” Tou fai he ʼu fakatuʼutuʼu ke tou toe liliu ʼo fai palalau ki te pasina 10 ʼo te kapite 35.
3 Kapau neʼe koutou palalau mo he tahi neʼe ina fakahā tana fia logo ki te Tohi-Tapu, e lagi feala ke koutou fakaʼaogaʼi te manatu ʼaenī moʼo kamata ʼo he ako Tohi-Tapu:
◼ “Ko nātou fuli ʼaē ʼe palalau mo koutou ʼe nātou ʼui atu anai ʼe nātou fia maʼuʼuli ʼi te tokalelei pea mo te fīmālie. Kapau ko te loto ʼaia ʼo te hahaʼi fuli, he koʼe koa ʼe tou maʼuʼuli ʼi te mālama ʼe fonu ai te maveuveu pea mo te agamālohi? [Koutou tuku ke ina fai atu hana tali.] Ko te Tohi-Tapu ʼe ina tuku mai te tali ki te fehuʼi ʼaia.” Koutou lau ia 2 Kolonito 4:4. Koutou fakamahino age peʼe feafeaʼi anai te fakaʼauha e te ʼAtua ia te Tevolo pea mo ina fakatuʼu anai he mālama ʼe ʼi ai te tokalelei pea mo te fiafia heʼegata. Koutou lau ia Fakahā 21:3, 4. ʼE feala ke koutou ʼui age: “ ʼI taku toe liliu mai, ʼe ʼau fia fakahā atu anai he ʼu vaega faka Tohi-Tapu ʼe fakamahino ai pe koʼe ʼe feala ke koutou ʼamanaki ki he mālama ʼe pulihi ai anai te mamahi.”
4 Kapau neʼe koutou tuku te kiʼi pepa lotu ʼaē “Ko Te Malamanei ʼo Te Temi ʼAenī ʼe Hāo Anai Koa?” ʼe feala ke tou ʼui age te manatu ʼaenī:
◼ “ ʼI tatā ʼuluaki fai palalau, neʼe tā lagaʼi te fehuʼi ʼaenī: Ko ʼafea koa ʼaē ka tokalelei ai ia meʼa fuli ʼi te kele? ʼI tau manatu ʼe feala koa ke tou ʼamanaki ki he ʼu temi ʼe lelei age ʼi te temi ka haʼu? [Koutou tuku ke ina fai atu hana tali pea koutou fakahā age te kiʼi pepa lotu.] Koutou fakatokagaʼi te meʼa ʼaē ʼe tuʼu ʼi te pasina 3 ʼaenī. Ko te meʼa ʼaenī ʼo ʼuhiga mo te ʼu lea faka polofeta ʼaē neʼe talanoa kiai ia Sesu ʼaē ka nātou fakaʼiloga anai te ʼu ʼaho fakamuli. [Koutou vakaʼi he ʼu lea faka polofeta e lua peʼe tolu mo ia ʼaē ʼe palalau mo koutou.] ʼE feala ke koutou ʼui age, ʼe mole koutou fakamoʼoni koa la kua hoko te ʼu lea faka polofeta ʼaia ʼi totatou temi?” Koutou fuli age te kapite 111 ʼi te tohi Te Tagata ʼaē ʼe lahi tokotahi pea tou fakahā age he ʼu manatu ʼo ʼuhiga mo te fakaʼiloga ʼaē neʼe fakahā e Sesu.
5 Kapau ʼe feala hakotou tokoni ki te hahaʼi fakamalotoloto ke nātou leleiʼia te maʼuhiga ʼaupito ʼo te Folafola ʼa te ʼAtua, ʼe koutou tokoni anai kia nātou ke nātou fai te meʼa ʼaē ʼe lelei tāfito. ʼE feala ke nātou ʼiloʼi te agapoto ʼaki tanatou ako te ʼu pasina ʼo te tohi ʼaia, ʼo nātou liliu ai ko “he fuʼu ʼakau ʼo te maʼuli,” pea ʼe ina foaki anai kia nātou te fiafia lahi ʼaupito.—Taag. 3:18.