Tou Toe Liliu ʼo ʼAʼahi Ia Nātou ʼAē Neʼe Fia Logo
1 ʼI te temi ʼaē neʼe fakahā ifo ai te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, neʼe fakamahino e te tēhina faiakonaki, “ ʼi te ʼosi ako katoa ʼo te tohi ʼaia e te kau ako fakamalotoloto, ʼe feala anai hanatou foaki tonatou maʼuli kia Sehova pea mo nātou papitema.” Neʼe fakatuʼutuʼu te tohi ʼaia moʼo akoʼi vave te ʼu moʼoni ki te hahaʼi. ʼE fakahā ai te ʼu logo ʼe totonu ʼe feala ke nātou uga te kau ako ke nātou tuputupu ʼi te faʼahi fakalaumālie. ʼE ina fakahā fakalelei te moʼoni, kae mole tuʼu fualoa ʼi te ʼu akonaki hala. Ke feala hatatou fakaʼaogaʼi lelei te tohi ʼaia, ʼe tou toe liliu ʼo ʼaʼahi ia nātou ʼaē neʼe fia logo.
2 Kapau ʼe koutou liliu ke hoko atu takotou fai palalau ki te tupuʼaga ʼo te fakagafua e te ʼAtua ia te maʼuli mamahi, ʼe feala ke koutou ʼui fēnei age:
◼ “ ʼI tatā ʼuluaki fai palalau, neʼe tā talanoa ʼo ʼuhiga [toe fakamanatuʼi age te meʼa ʼaē neʼe koulua palalau kiai]. Koia ʼe feala ke tou feʼekeʼaki ai pe koʼe koa ʼe fakagafua e te ʼAtua ke maʼuli mamahi ʼaupito ia te malamanei. Koteā la tau manatu ki te faʼahi ʼaia? [Tuku ke fai mai hana tali.] ʼE ko he meʼa fakaloto mālohi hatatou ʼiloʼi ʼe mole ko te ʼAtua ʼaē ʼe tupu ai te ʼu taʼi ʼaluʼaga fakatupu mamahi ʼaia.” Koutou fuli age te tohi Te ʼAtamai Mālama ʼAē ʼe Ina Taki Ki Te Maʼuli Heʼegata ʼi te pasina 71, pea koutou palalau ki te ʼu manatu faka Tohi-Tapu ʼaē ʼe tuʼu ʼi te palakalafe 3 ki te 5. Koutou fakatuʼutuʼu ke koutou toe liliu ki ai ʼo fakamahino age, peʼe koʼe koa ʼe tou tui papau kua vave fakagata e te ʼAtua ia tana fakagafua ia te ʼu mamahi.
3 Kapau ʼe koutou toe liliu ʼo ʼaʼahi he tahi ʼe maʼu fānau pea ʼe tuʼania ʼo ʼuhiga mo te ʼu fihifihia faka famili, ʼe koutou lava ʼui fēnei:
◼ “ ʼE mahino kia ʼau ʼi tou ʼuhiga tāmai (peʼe faʼe), ʼe lagi ke loto ki te meʼa ʼaē ʼe lelei ki tau ʼu tamaliki. Mai tona ʼaluʼaga ʼaē ʼe mole feala ke ke puipui katoa ia nātou mai te ʼu meʼa ʼaē ʼe kovi, koia ʼe tonu ai ke ke akoʼi age kia nātou te ʼu meʼa ʼaē ʼe tonu ke nātou fai mokā nātou felāveʼi mo te ʼu fihifihia ʼo te maʼuli. ʼI tau manatu, e feafeaʼi hau fakahoko ia te faʼahi ʼaia? [Tuku ke fai mai hana tali.] Ko te meʼa maʼuhiga ʼaupito ʼaē ʼe lava foaki e te ʼu mātuʼa ki tanatou ʼu tamaliki ʼe ko he ako lelei.” Koutou fuli age te tohi Te ʼAtamai Mālama ʼi te pasina 145 mo te 146, pea koutou faka maʼuhigaʼi te ʼu tokoni ʼaoga ʼo te Tohi-Tapu, ʼo fakatokaga age te maʼuhiga ʼo te ʼu tokoni ʼaia pea mo te ʼu fua lelei mo kapau ʼe nātou mulimuli kiai. Koutou fai he fakatuʼutuʼu ke koutou toe liliu ki ai, ke koutou fakahā age peʼe feafeaʼi he fakaʼaogaʼi ʼo te tohi ʼaia ke feala ai hanatou maʼu he maʼuli faka famili fiafia.
4 Kapau ʼe koutou liliu ʼo ʼaʼahi he tahi neʼe koutou fagonogono fakanounou age ki ai, ʼe koutou lava ʼui fēnei:
◼ “Neʼe mole kau ki te fakatuʼutuʼu ʼa te ʼAtua ke tou matutuʼa pea ke tou mamate. Neʼe ina fakatuʼutuʼu ke tou maʼuʼuli ʼo heʼegata ʼi te palatiso ʼi te kele.” Koutou fakahā age te paki ʼi te pasina 188 mo te 189. Koutou lau age te palakalafe 11 ʼi te pasina 184. Koutou fai he fakatuʼutuʼu ke koutou toe liliu mai ʼo ʼaʼahi ia ia.
5 ʼE mahino ia ko te tohi ʼaenī ʼe ko he puleʼaki ʼa Sehova moʼo ‘fakaviliviliʼi’ te gāue ʼaē ko te fakatahiʼi ʼo te hahaʼi ʼi te ʼaho fakamuli ʼaenī. (Isa. 60:22) Kapau ʼe tou fakaʼaogaʼi fakalelei, ʼe tou lava foaki te ʼatamai mālama ʼaē ʼe ina lava faka fealagia ki he tahi ke ina maʼu te maʼuli heʼegata.