Ke Hā Lelei Takotou ʼu Faiga Ki Te Hahaʼi Fuli
1 Koutou manatuʼi te temi ʼaē neʼe koutou ʼuluaki logo ai ki te logo ʼo te Puleʼaga. Ko te ʼu ʼuluaki moʼoni neʼe nātou uga koutou ke koutou holi ki te ʼatamai mālama pea mo te mahino ʼo ʼuhiga mo te Tohi-Tapu. ʼO mole tuai pea neʼe koutou fakatokagaʼi ʼe ʼaoga ke koutou fai he ʼu fetogi ʼi tokotou maʼuli, koteʼuhi ko te ʼu ala ʼo Sehova ʼe māʼoluga age ia ʼi tokotou ʼu ala. (Is. 55:8, 9) Neʼe koutou tuputupu ʼi te ʼu faʼahi fakalaumālie, ʼo koutou foaki tokotou maʼuli ki te ʼAtua, pea mo koutou papitema.
2 Logope la kua koutou tuputupu ʼi te faʼahi fakalaumālie, ʼe kei ʼi ai te ʼu vaivaiʼaga ʼe ʼaoga ke koutou tauʼi. (Loma 12:2) E Lagi koutou manavasiʼi ki te tagata, ʼo tupu ai la takotou mole fia ʼolo ki te fai faka mafola. Peʼe lagi ʼe mole hā ia koutou te ʼu fua ʼo te laumālie ʼo te ʼAtua. Neʼe mole koutou tuʼu ʼi te ʼu manatu ʼaia, kae neʼe koutou fakatuʼutuʼu ke koutou tuputupu, ʼo koutou fai te ʼu fakatuʼutuʼu faka teokalatike.
3 Kua lagi hili nei kiai ni ʼu taʼu talu mai te taʼu ʼaē neʼe koutou foaki ai tokotou maʼuli ki te ʼAtua. ʼE koutou fakatokagaʼi koa kua koutou tuputupu ʼi te faʼahi fakalaumālie, talu mai te taʼu ʼaia? Neʼe kua koutou fakahoko koa takotou ʼu fakatuʼutuʼu? ʼE kei koutou maʼu koa te lotomālohi ʼaē neʼe koutou “maʼu ʼi te kamata”? (Hep. 3:14) Ko Timoteo neʼe ko he Kilisitiano neʼe kua māhani ʼi te faʼahi fakalaumālie, ka neʼe fakaloto mālohiʼi fēnei e Paulo: “Metitasio ki te ʼu meʼa ʼaia; nofo katoa ai, ke hā lelei tau ʼu faiga ki te hahaʼi fuli.”—1 Tim. 4:15.
4 ʼE ʼAoga Ke Tou Sivi Ia Tatou Takitokotahi: Ka tou fakakaukauʼi te ʼu meʼa ʼaē neʼe tou fai ʼi muʼa atu, ʼe tou fakatokagaʼi koa ʼe kei tou maʼu te ʼu vaivaiʼaga ʼaē neʼe tou tauʼi ʼi tatatou kamata ako te Tohi-Tapu? Neʼe ʼi ai koa he ʼu meʼa neʼe tou fakatuʼutuʼu ke tou fai, ka mole hona ikuʼaga? Kapau koia ʼaia, koteā tona tupuʼaga? Tatau aipe pe neʼe lelei ʼatatou ʼu manatu, kae lagi tou fakatuatuai te fakahoko ʼo te ʼu meʼa ʼaia. Lagi neʼe tou faka fealagia ki te ʼu tuʼania ʼo te maʼuli peʼe ko te ʼu faigataʼaʼia ʼo te tuʼu ʼaenī ke nātou fakavaivaiʼi tatou.—Luka 17:28-30.
5 ʼE mahino ia ʼe mole feala hatatou fetogi te ʼu meʼa ʼaē neʼe tou fai ʼi te ʼu temi ki muʼa atu, kae ʼe feala ke tou fai he ʼu meʼa ʼo ʼuhiga mo te ka haʼu. ʼE feala ke tou vakaʼi fakalelei totatou ʼuhiga ke tou ʼiloʼi peʼe ko te faʼahi fea ʼaē neʼe tou tōtō ai, pea ke tou faiga mālohi ke tou gāueʼi te fakahoko ʼo te faʼahi ʼaia. ʼE lagi ʼaoga anai ke lelei age tatatou fakahā te ʼu fua ʼo te laumālie ʼo te ʼAtua, ohage ko te lolomi ʼo kita, te agamālū, peʼe ko te kātaki fualoa. (Kal. 5:22, 23) Kapau ʼe tou felāveʼi mo he ʼu fihifihia mo niʼihi peʼe ʼi tatatou felogoi mo te ʼu tagata ʼāfea, ʼe maʼuhiga ke tou maʼuliʼi te agavaivai pea mo te loto fia mālalo.—Filp. 2:2, 3.
6 ʼE feala koa ke hā lelei tatatou ʼu faiga ʼaē ke tou maʼu he ʼu pilivilesio ʼi te gāue? ʼAki he ʼu faiga mālohi, ʼe feala ke maʼu e te ʼu tēhina te ʼu kalitate ʼaē ʼe ʼaoga ke nātou liliu ai ko he ʼu tagata faifekau faka minisitelio peʼe ko he ʼu tagata ʼāfea. Ko ʼihi ia tatou e lagi feala ke nātou kau ki te gāue pionie katoa. Ki te tokolahi ia tatou, ʼe feala ke tou fakatuʼutuʼu ke tou pionie vaeluaʼi temi. Ko ʼihi e lagi nātou faiga ke nātou hikihiki te faʼahiga fai ʼo tanatou ako takitokotahi, ke ʼāsili age tanatou ʼu tali ʼaē ʼe nātou fai ʼi te ʼu fono ʼo te kokelekasio, pea ke lahi age te ʼu fua ʼaē ʼe nātou maʼu ʼi te minisitelio, ʼi tonatou ʼuhiga kau fai faka mafola ʼo te kokelekasio.
7 ʼE mahino papau ia, ʼe ʼa tatou takitokotahi pe tona vakaʼi, pe ko te faʼahi fea ʼaē ʼe tonu ke tou tuputupu ai. ʼE feala ke tou tui papau ko tatatou ʼu faiga fakamalotoloto ʼaē ke tou “laka fakavilivili ki te fakapotopoto,” ʼe ina fakaʼāsili anai tatatou fiafia pea ʼe feala anai hatatou liliu ko he tahi ʼe gāue mālohi ʼi te kokelekasio.—Hep. 6:1.