ʼE Lahi Fau Koa Takotou Maʼumaʼua?

¹ Neʼe fakaloto mālohiʼi tatou e Paulo ke ‘lahi ʼaupito tatatou ʼu gāue ʼi te ʼAliki.’ (1 Ko. 15:58) ʼE uga tatou ke tou fai tuʼumaʼu hatatou ako takitokotahi ʼi te ʼaho fuli, ke tou kau tuʼumaʼu ki te minisitelio, ke tou kau tuʼumaʼu ki te ʼu fono, pea ke tou tokakaga fakalelei ki te ʼu gāue ʼo te kokelekasio. ʼO hilifaki ki te faʼahi ʼaia, ʼe tonu ke tou tokoni ki te hahaʼi ʼaē ʼe ʼaoga ki ai tatatou tokoni. ʼI te lahi ʼo tatatou ʼu gāue, ʼi ʼihi temi ʼe feala ke tou logoʼi kua tou lotovaivai, ʼo tou manatu ai ʼe tonu ke tou kumi he ʼu meʼa moʼo fakamaʼamaʼa ʼo tatatou ʼāmoga.

² ʼE ʼi ai te ʼu ʼaluʼaga ʼe lagi ko he aga fakapotopoto anai tatatou fakamaʼamaʼa te ʼu gāue ʼaē ʼe tou fai. Ko ʼihi ʼe nātou ʼui ʼe tonu ke nātou fakahoko te ʼu meʼa fuli ʼaē ʼe fakamaʼua age e te hahaʼi kia nātou. Kapau ʼe mole tou fakafuafua lelei te faʼahi ʼaia, pea ʼe feala ke tupu ai he ʼu fihifihia pea mo he tuʼania, ʼo fakatupu kovi ai kia tatou.

³ Tou Fakafuafua Lelei Te ʼu Meʼa ʼAē ʼe Tou Fai: Ko te meʼa ʼaē ʼe ʼaoga tāfito ke tou maʼu ai te fakafuafua lelei ʼe ko te maʼuliʼi ʼo te tokoni ʼaenī ʼa Paulo “ke [tou] ʼiloʼi papau te ʼu meʼa ʼaē ʼe maʼuhiga tāfito.” (Filp. 1:​10) Ko tona faka ʼuhiga ke tou tokakaga tāfito ki te ʼu meʼa ʼaē ʼe ʼaoga pea, kapau ʼe faka fealagia e te temi pea mo te ʼu ʼaluʼaga, ʼe feala hatatou tokakaga ki te ʼu meʼa ʼaē ʼe mole faʼa maʼuhiga. ʼE mahino papau ia ko te ʼu maʼua faka famili ʼe kau ki te ʼu meʼa ʼaē ʼe maʼuhiga tāfito. Ko ʼihi maʼua fakamālama ʼe maʼua ke fai. Kae, neʼe akoʼi mai e Sesu ko te ʼu meʼa ʼaē ʼe tou fakamuʼamuʼa ʼe fakatafito ki te fakatuʼutuʼu ʼaē ko te ʼuluaki kumi ʼo te Puleʼaga. ʼE tonu ke tou ʼuluaki fai te ʼu meʼa ʼaē ʼe nātou faka fealagia ai kia tatou ke tou fakahoko tatatou fakapapau kia Sehova.​—Mat. 5:3; 6:⁠33.

⁴ Kapau ʼe tou manatuʼi te faʼahi ʼaia, ʼe tou faigaʼi anai ke tou ʼiloʼi papau ʼe tonu ke tou molehi ʼi tatatou polokalama te ʼu meʼa ʼaē ʼe mole ʼaoga, te ʼu fakafiafia fakavale, pea mo te lahi fau ʼo tatatou ʼu fakatahi mo ʼihi. Moʼo fakatuʼutuʼu ʼo tatatou gāue ʼi te vāhaʼa fuli, ʼe tou toʼo anai he temi moʼo fai ʼo tatatou ako takitokotahi, ke tou fakapotopoto ʼo kau ʼi te gāue fai faka mafola, ke tou kau ki te ʼu fono, pea mo ʼihi ʼu gāue lelei ʼe ʼalutahi mo tatatou tauhi. Ko te toe ʼo totatou temi ʼe feala ke vaevae ʼi ʼihi ʼu meʼa, ʼo vakaʼi peʼe kau ki te ʼu meʼa ʼaia te fakahoko ʼo tatatou ʼuluaki fakatuʼutuʼu ʼaē ke tou liliu ko he Kilisitiano ʼe ina fakafuafua lelei tona temi, pea mo tou kumi muʼa te Puleʼaga.

⁵ Logope la te meʼa ʼaē neʼe kua tou palalau kiai, ʼe lagi kei tou toe logoʼi ko tatatou ʼāmoga ʼe fakatupu mamahi. Kapau koia ʼaia, ʼe tonu ke tou tali te fakaafe ʼaenī ʼa Sesu: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou.” (Mat. 11:28) Tahi ʼaē meʼa, tou falala foki kia Sehova, “ ʼaē ʼe ina ʼamo te kavega maʼa tatou ʼi te ʼaho fuli” pea ʼe ina foaki te mālohi ki ʼaē ʼe vaivai. ʼE ina fakapapau mai ʼe mole ina fakagafua anai ke higa te faitotonu. (Pes. 55:22; 68:19; Is. 40:29) ʼE feala ke tou falala ʼe tali anai ʼatatou ʼu faikole, ʼo faka fealagia ai ke tou haga fai mālohi tatatou ʼu gāue faka teokalatike.

⁶ ʼE tou ʼiloʼi papau ʼe tou maʼumaʼua anai ʼi te kumi ʼo te ʼu meʼa ʼo te Puleʼaga, koia ʼe feala ke tou fakafiafia ʼi tatatou ʼiloʼi ʼaē ko tatatou gāue ʼe mole vaʼiganoa ʼo ʼuhiga mo te ʼAliki.​—1 Ko. 15:⁠58.