Tou Tokoni Kia Nātou ʼAē Kua Lotovaivai Ke Nātou Toe Kau Ki Te Gāue
1 ʼI tana mahino ki te tuʼutāmaki fakalaumālie ʼaē neʼe feala ke hoko ki tona ʼu kau fagona Kilisitiano, neʼe tohi fēnei e te ʼapositolo ko Paulo: “Kua hoko te hola ʼaē ʼe tonu ai ke koutou ʼaʼala ake ai mai te moe, heʼe kua ōvi ʼosi mai tokotou hāofaki talu mai te temi ʼaē neʼe tou liliu ai ko he ʼu hahaʼi tui.” (Loma 13:11) Neʼe tuʼania ia Paulo ʼo ʼuhiga mo tona ʼu tēhina ʼaē neʼe kua māʼumoea ʼi te faʼahi fakalaumālie; neʼe nofo tuʼania, he neʼe loto ia ke ina toe fakaloto mālohiʼi nātou ke toe hoko atu tanatou gāue.
2 ʼE feala ke tou ʼui moʼoni kua vave hili te pōʼuli ʼo te mālama ʼaenī, pea kua vave te mafoa ʼo te ʼaho ʼo te mālama foʼou. (Loma 13:12) ʼE lelei ke tou tuʼania ʼo ʼuhiga mo totatou ʼu tēhina ʼaē ʼe mole kei kau ki te fai faka mafola ʼo te logo lelei. ʼI te taʼu gāue kua hili, ʼi Niu-Kaletonia, ko te ʼu kaugā fai faka mafola e toko 25 neʼe toe kau ki te gāue fai faka mafola. ʼE lava feafeaʼi hatatou tokoni kia nātou ʼaē ʼe mole kei fai faka mafola ke nātou toe tauhi kia Sehova?
3 Te ʼu Meʼa ʼAē ʼe Lava Fai e Te ʼu Tagata ʼĀfea: Ko te tokolahi ʼo nātou ʼaē ʼe mole kei fai faka mafola, ʼe mole heʼeki nātou līaki te moʼoni, neʼe nātou tuku tanatou fai faka mafola he neʼe lagi nātou lotovaivai, neʼe nātou tau mo te ʼu fihifihia, neʼe lahi fau tanatou tokaga ki te koloā, pea mo te tahi ʼu tuʼania ʼo te maʼuli. (Luka 21:34-36) Kapau ʼe feala, pea ʼe lelei anai tatatou tokoni kia nātou ʼi muʼa ʼo hanatou liliu ko he ʼu hahaʼi ʼe mole kei fai faka mafola. Ko te sikalaipe ʼo te kokelekasio ʼe tonu ke ina fakatokagaʼi ki te tagata ʼaē ʼe ina takitaki te Ako Tohi mokā liliu he kaugā fai faka mafola ʼo mole kei ina fai tana kiʼi pepa tānaki gāue. ʼE feala ke fai he ʼu fakatuʼutuʼu e te kau tagata ʼāfea ke nātou ʼaʼahi ia ia. ʼE tonu ke nātou faigaʼi ke nātou ʼiloʼi pe koteā te fihifihia ʼaē ʼe tau mo ia pea mo vakaʼi pe koteā te tokoni ʼaē ʼe feala ke foaki kia ia.—Vakaʼi Te Tule Leʼo fakafalani ʼo te ʼaho 15 ʼo Sepetepeli 1993, ʼi te pasina 20 ki te 23.
4 ʼE Lava Feafeaʼi He Tokoni ʼa ʼIhi: Tokolahi ia tatou ʼe tou ʼiloʼi mokā tahitahiga te fai faka mafola ʼa he tahi. ʼE lagi ko he tahi neʼe kita faifaitahi lelei mo ia. Koteā koa te meʼa ʼaē ʼe feala ke tou fai moʼo tokoni kia ia? He koʼe koa ʼe mole tou ʼolo ʼo ʼaʼahi ia ia. Tou ʼui age ki ai ʼe tou loto ke toe fakatahitahi mo tatou. Tou fakahā ʼe tou fiafia pea mo tou fai he ʼu palalau fakaloto mālohi. Koutou fakahā age takotou tuʼania ʼo ʼuhiga mo ia, kae mole koutou ʼui age kua mahaki ia ʼi te faʼahi fakalaumālie. Koutou fakamatala age kia ia he ʼu meʼa ʼe fakatupu lotomālohi, peʼe ko he tahi age ʼu meʼa lelei neʼe fai e te kokelekasio. Koutou fakahā fakafiafia age ki ai te Fakatahi Faka Tisitilike ʼaē ko tona kupu tāfito ko “Te Kau ʼAve Logo ʼo Te Tokalelei Fakaʼatua,” pea mo koutou fakaloto mālohiʼi ia ia ke haʼu kiai. Ko te tokoni ʼaē ʼe lelei age kia ia, ʼe ko hana toe fakatahi mo te kokelekasio. Koutou fakatahi mo ia ʼi te ʼu fono. Koutou fakahā ki te kau tagata ʼāfea pe neʼe feafeaʼi te ʼaʼahi ʼaē neʼe koutou fai kia ia.
5 Ka toe liliu mai he tahi neʼe mole kei fai faka mafola ʼo kau ki te ʼu fono, ʼe lagi ufiufi anai mokā toe felāveʼi mo niʼihi neʼe ina ʼiloʼi lelei ʼi te temi muʼa. ʼAua naʼa koutou fehuʼi age, “Neʼe ke ʼifea koa?” Kae, koutou faigaʼi ke ina logoʼi ʼe koutou tali lelei ia ia. Koutou faka kau ia ia ki takotou ʼu fai palalau. Koutou faka felāveʼi mo nātou ʼaē ʼe mole ina ʼiloʼi. Koutou heheka mo ia lolotoga te fono, ʼo koutou vakaʼi peʼe ʼi ai hana katiko pea mo te ʼu tohi ʼaē ka vakaʼi ʼi te fono. Koutou fakaloto mālohiʼi ia ia ke toe liliu mai ki te ʼu fono, pea mo koutou fakahā age kia ia, kapau ʼe loto ki he meʼa, pea ʼe koutou tokoni anai kia ia ʼo ʼuhiga mo te faʼahi ʼaia.
6 ʼE ʼofa ia Sehova pea mo Sesu kia nātou ʼaē kua lotovaivai, koia ʼe nā fiafia ai mokā nātou toe lotomālohi ʼi te faʼahi fakalaumālie. (Mal. 3:7; Mat. 18:12-14) ʼE feala ke tou maʼu te taʼi fiafia ʼaia mo kapau ʼe lava lelei tatatou tokoni kia nātou ʼaē kua lotovaivai, ke nātou toe kau ki te tauhi ʼaē kia Sehova.