Tou Vaevae Mo Te Hahaʼi ʼo Mulimuli Ki Te ʼu Meʼa ʼe ʼAoga Kia Nātou

¹ Neʼe fai e Sehova he ʼu fakatuʼutuʼu ke tou maʼu te ʼu meʼa ʼaē ʼe ʼaoga kia tatou ʼi te faʼahi fakalaumālie, ʼaki te “kaugana” agatonu. (Mat. 24:​45-​47) ʼE tou maʼu te ʼu meʼa ʼaia ʼi te ʼu tohi, mo te ʼu Tohi-Tapu, mo te ʼu foʼi tohi ʼaē ʼe tānaki ai te ʼu Tule Leʼo pea mo te ʼu Réveillez-vous !, mo te ʼu fime viteo, mo te ʼu foʼi kaseti, pea mo te pa olotinatea ke fai he ʼu kumi faka Tohi-Tapu. Ko te ʼu meʼa ʼaē ʼe foaki mai e Sehova ʼe feʼauga tuʼumaʼu pe pea ʼe mole maumau. ʼE ina fakaʼamu ke tou fevaevaeʼaki, ke ʼaoga tatau kia tatou fuli.

² ʼE lahi te paʼaga ʼe fakaʼaogaʼi moʼo fai te ʼu meʼa fuli ʼaia. ʼE feala ke maʼu te paʼaga ʼaia ʼaki te tokoni ʼo te famili fakatautehina ʼi te malamanei katoa. ʼE moʼoni tāfito te faʼahi ʼaia talu mai te fai e te Sosiete te fakatuʼutuʼu ʼaē ke tufa noa te ʼu tohi, ʼo fakalogo katoa ki te ʼu meʼa ʼofa ʼaē ʼe foaki moʼo totogi te ʼu tohi ʼaia. Tahi ʼaē meʼa, ʼe lahi te ʼu filiale ʼe nātou maʼu te ʼu meʼa ʼaia mai te Sosiete pea ʼe mole totogi kovi, ke feala ki te ʼu tēhina ke nātou maʼu te ʼu meʼa ʼe ʼaoga kia nātou ki te ʼu fono pea mo te gāue faka mafola, tatau aipe peʼe mole lahi tanatou falā.

³ Te Tokoni ʼe Feala Ke Tou Fai: ʼE feala ke tou tali ki te tokoni ʼa Paulo ke tou vaevae mo te hahaʼi “ ʼo mulimuli ki te ʼu meʼa ʼaē ʼe ʼaoga kia nātou.” (Loma 12:13, MN ) Ka tou foaki hatatou meʼa ʼofa maʼa te gāue ʼi te malamanei, pea ʼe tou vaevae ai te meʼa ʼaē ʼe tou maʼu mo totatou ʼu tēhina ʼi te malamanei katoa. ʼAki te manatu ʼaia, neʼe fakatotonu e ʼihi ke nātou tuku kehe ʼi te māhina fuli he falā moʼo lagolago ki te gāue ʼi te malamanei katoa, ohage pe ko hanatou fai ki te ʼu meʼa ʼaē ʼe totogi e te Fale ʼo Te Puleʼaga. ʼE nātou ʼiloʼi ʼe mole fakaʼaogaʼi pe te falā ʼaia moʼo tā te ʼu tohi, kae ʼe toe ʼaoga foki ki te ʼu faʼahi fuli pe ʼo te gāue. Koutou fakakaukauʼi age muʼa te toe tapuakina lahi ʼaē ka maʼu anai e totatou ʼu tēhina ʼi te malamanei, mo kapau ʼe toe kaugamālie age niʼihi ʼe nātou lagolago tuʼumaʼu ki te faʼahi ʼaia.

⁴ Tahi ʼaē meʼa, ʼe feala ke tou vaevae mo nātou mo kapau ʼe tou fakapotopoto ʼi tatatou fakaʼui he ʼu tohi ʼe tou lava maʼu ʼi he temi pe. Kapau ʼe tou fakaʼui pe te ʼu tohi ʼaē ʼe ʼaoga moʼoni kia tatou, pea ʼe feala anai ke maʼu e totatou ʼu tēhina ʼi te ʼu potu kehekehe te ʼu meʼa gāue fakalaumālie ʼaē ʼe ʼaoga kia nātou, ke nātou mālolohi pea mo fakahaʼele ki muʼa te faka mafola ʼo te logo lelei ʼi te ʼu potu ʼaē ʼe nātou nonofo ai.​—Hep. 13:16.

⁵ ʼE tonu ke tou manatuʼi tāfito te faʼahi ʼaia mokā tou fakaʼui he ʼu meʼa ʼe totogi kovi tona faʼu e te Sosiete. Ohage la ko te ʼu foʼi fime viteo, te ʼu CD-ROM, te ʼu foʼi tohi lalahi ʼaki te ʼu kumiʼaga, te ʼu foʼi tohi ʼaē ʼe tānaki ai te ʼu Tule Leʼo pea mo te ʼu Réveillez-vous !, pea mo te apone ki te ʼu kaseti. ʼE feala ke fakaʼui he tohi e tahi maʼa te famili, kae mole faiga ke maʼu ʼe nātou takitahi ʼo te famili hana tohi peʼe ko he tahi age meʼa. Kapau ʼe tou fakasiʼisiʼi te ʼu meʼa ʼaē ʼe tou fakaʼui maʼa tatou, pea ʼe feala ai anai ki ʼihi ke nātou maʼu te ʼu meʼa lelei ʼaē ʼe tou maʼu.​—Filp. 2:4.

⁶ Ko te falā moʼo totogi ʼaki te ʼu tohi ʼaē ʼe tou tufa ʼi te fai faka mafola, ʼe lava maʼu ʼi te ʼu meʼa ʼofa ki te gāue faka malamanei ʼo te Sosiete ʼaē ʼe tou foaki ʼi te Fale ʼo Te Puleʼaga, pea mai te hahaʼi ʼaē ʼe nātou toʼo te ʼu tohi heʼe nātou fia lau. Kae ʼo ʼuhiga mo te ʼu tohi ʼaē ʼe tou fakaʼui maʼa tatou, ohage ko te ʼu katiko, te ʼu Annuaires, te ʼu Tohi-Tapu matalelei, pea mo te tahi atu ʼu tohi, ʼe mole feala ke tou manatu ʼe ko te hahaʼi ʼo tuʼa ʼaē ka nātou totogi te ʼu meʼa ʼe ʼaoga kia tatou. ʼE ko te ʼu kaugana ʼa Sehova ʼaē kua papitema ʼaē ʼe nātou foaki tāfito te falā ʼaia moʼo lagolago kiai. ʼI tanatou manatuʼi te faʼahi ʼaia, tokolahi te kau fai faka mafola ʼe nātou lagolago kiai heʼe nātou manatu neʼe feala pe ke totogi te ʼu meʼa ʼaia mo kanapaula neʼe tā e te sosiete ʼo te mālama. Ohage la, ko te Tohi-Tapu ʼaē ʼe fakamatalelei te ʼu pasina mo te aulo ʼe feala pe ke teitei 2 500 tupu tona fakatau, ko he foʼi tohi lahi ʼaki te ʼu kumiʼaga ʼe teitei 5 000 tupu, ko he kaletalio mo te ʼu lanu ʼe feala ke 600 tupu, ko he CD-ROM ʼe feala ke 6 000 peʼe 12 000 peʼe laka atu, ko te ʼu pa fakatagi ʼe teitei ke 2 500 tupu, pea ko ʼihi ʼu foʼi fime viteo ʼe feala ke totogi kovi. Kapau ʼe mole feʼauga te lagolago kiai, pea ʼaki te temi ʼe faka tuʼakoi anai te gāue ʼaē ʼe feala ke fai e te kautahi moʼo fakahaʼele ki muʼa te gāue ʼi te malamanei.

⁷ Neʼe tala e Sesu ʼe ʼiloʼi lelei anai tana ʼu tisipulo moʼoni ʼi tonatou feʼofaniʼaki. (Soa. 13:​34, 35) Ko tatatou loto fia foaki pea mo fia vaevae ʼi te faʼahi fakasino, ʼe ko te ʼu ʼaluʼaga lelei ʼaia moʼo fakahā ko tatou ko te ʼu Kilisitiano moʼoni.