Tou Fakafetaʼi Ki Te ʼu Koloā Faka Teokalatike
1 ʼI tana fai te ʼu fakatuʼutuʼu ke toe gaohi te fale lotu, neʼe kole fēnei age e te Hau ko Sosiasi ki te kau gāue: “ ʼAua naʼa kole age kia nātou ʼaē ʼe ʼavage te falā ki tonatou nima, peʼe nātou fakaʼaogaʼi feafeaʼi, koteʼuhi ʼe nātou gāue agatonu.” (2 Hau 22:3-7) Neʼe ʼiloga te faka maʼuhigaʼi e te ʼu tagata ʼaia te ʼu meʼa taputapu, ʼi tanatou faʼahiga fakaʼaogaʼi ia te ʼu koloā ʼaē neʼe ʼavage kia nātou. ʼI te temi nei, ʼe tou kau ki te gāue taputapu ʼo te logo lelei ʼo te ʼAtua, koia ʼe toe maʼua ke tou agatonu ʼi te fakaʼaogaʼi ʼo te ʼu koloā ʼaē ʼe foaki mai kia tatou.
2 ʼI Te Fai Faka Mafola: ʼE tou leleiʼia ʼaupito te logo maʼuhiga ʼaē ʼe maʼu ʼi tatatou ʼu tohi, pea ʼe mahino kia tatou ʼe lahi te falā ʼaē neʼe fakaʼaogaʼi moʼo tā te ʼu tohi ʼaia. ʼAua naʼa tou hoko foaki tatatou ʼu tohi ki te hahaʼi ʼaē ʼe mole nātou leleiʼia moʼoni te logo ʼo te Tohi-Tapu. Kapau ʼe mole faʼa leleiʼia e he tahi te logo lelei, pea tou ʼavage kia ia he kiʼi pepa lotu, kae mole tou ʼavage he tohi.
3 Koutou manatuʼi te maʼuhiga ʼo tatatou ʼu tohi mokā koutou tufa. ʼAua naʼa koutou tuku he tohi ʼi te ʼu koga meʼa ʼaē ʼe feʼoloʼaki ai te hahaʼi, heʼe faigafua tona līaki e te hahaʼi. Kapau ʼe mole koutou loto ke maumau te ʼu tohi, koutou vakaʼi te ʼu tohi ʼaē ʼe koutou maʼu ʼi tokotou ʼapi ʼi muʼa ʼo hakotou kole he tahi ʼu tohi. Kapau ʼe toe lahi tuʼumaʼu takotou ʼu nusipepa, pea ʼe lagi lelei hakotou fakahifo te ʼu nusipepa ʼaē ʼe koutou fakaʼui.
4 Te ʼu Tohi ʼAē ʼe Koutou Fakaʼaogaʼi Takitokotahi: ʼE tonu ke tou fakaʼui te ʼu tohi pe ʼaē ʼe ʼaoga moʼoni kia tatou. ʼE tonu tāfito ke tou fakapotopoto mokā tou fakaʼui te ʼu Tohi-Tapu gigila, te ʼu Tohi-Tapu mo te ʼu nota, pea mo te ʼu tohi lalahi ohage ko te Concordance, te Index, te ʼu tohi Étude perspicace, pea mo te tohi Prédicateurs, ʼaē ʼe totogi kovi te ʼu meʼa gāue ʼaē ʼe fakaʼaogaʼi moʼo faʼu te ʼu tohi ʼaia.
5 ʼE koutou tohi koa tokotou higoa pea mo tokotou tuʼasila ʼi takotou ʼu tohi? Kapau ʼe koutou fai feiā, pea ʼe mole toe ʼaoga anai hakotou toʼo he tahi ʼu tohi moʼo fetogi ʼaki takotou ʼu tohi ʼaē neʼe koutou tufa hala ki he tahi. Kapau ʼe puli takotou tohi katiko, takotou Tohi-Tapu, peʼe ko he tohi ako, lagi ʼe koutou toe maʼu anai ʼi te fale fono, peʼe ʼi te ʼu fale ʼo te fakatahi.—Luka 15:8, 9.
6 Tou faigaʼi ke tou fakaʼaogaʼi fakapotopoto tatatou ʼu tohi, heʼe tou fakahā ai anai ʼe tou agatonu ʼi te fakaʼaogaʼi ʼo te ʼu koloā ʼo te Puleʼaga ʼaē neʼe foaki mai e Sehova kia tatou.—Luka 16:10.